ဒူအီ နပ် ဒီ ကာဒွါ့ ကာဖာ ခဲင် နဝ်း အန်။ ပီ ဒီ ဝျီ့ ပီ ဒီ ကာလာင် အန် ဒီ အီ၊ န့ ယီ မုး ဇဝ်ဖြာ အီ ဒွါ။

2 ဒူအီ ထာင် ပဲ့ ဟဲ့ ဘူင် အန် ဟဲ့ မုး ဟဲ့ မှာန်။ မာလဲ၊ ဇဝ်ဖြာ ဒီ ယွတ် ပီ ပါယ် နဝ်း အန်။

3 ဂါန် ပီ ဘူင် မဲ ဒွန် မျုဝ်၊ တဲး မဲ တဲး ဇဝ်ဖြာ အိုပ်။ ဆေ မဲ ဘူင် ပါယ် တီ၊ ပီ ခြာမ် မဲ ဒီ ဘူင်၊ န့ ဒီ အွင်။

4 ခဲ့ ပီ ဘူင် ဇဝ်ဖြာ ဒွန် မျုဝ်၊ န့ ဟဲ့ မိုဝ်း ဒီခုဝ်။ အန် ယီ ဘူင် တဲး ဂေ ဒူအီ ဟာယ် စှိုမ်။

5 ဇဝ်ဖြာ ဇွင့် ဂေ အီ ပီခိုက် ဒွန် အီ။ ဘေ မိူဝ် လုဝ် နပ် ဆီချာ၊ အန် တူ တဲး ဂေ လွတ် ဒေါ ဒမ် အန် မှာပ် ဒီ ဂေ။

6 နဝ်း ရွက့် နဝ်း မှာန် တဲး ဇဝ်ဖြာ ဂဝ်း ဝဲန် မှာပ်။ ဆေ ဒူအီ ရုဝ်ဆေ ဇဝ်ဖြာ၊ အာဖေ အီ တူ မွှိုမ် မိူဝ် တူ ဇမ် ဒီ အန်။

7 ဆေ ပီ ဘူင် မဲ လဝ့် နဝ်း ဇဝ်ဖြာ၊ အန် ဇဝ် ဒီ ဘူင် တဲး ရန်ဆူ မဲ ဝီ ဘဲန် ဂိုက် မဲ။

8 ဆေ မဲ ဘူင် နာ ဆိူဝ် နာ မှာန်၊ ယီ ပွိုန် ကြုဝ်ကြာမ် အီ စဲက်၊ န့ မွှိုမ် လွှိုမ် ဂေ အီ ဟဲ့ ပွိုန် ကြုဝ်ကြာမ် ကိူန်၊ ကူပ် ဘူင် ဂေ နာ တူ မွှိုမ်။

9 ဒူအီ ဘော ပွိုန် ခြာမ် ပီ ဆီ ဘူင် အန်။ မာလဲ၊ န့ မုး ဇဝ်ဖြာ အီ ဒီ တဲး အန် နပ် ပီ ဒီ ပါယ် ဒီ ဘူင်။

10 ဂြုဝ်း ပီ ဆုင်ဖျာတ် ဇဝ်ဖြာ၊ န့ ဘော လေး ခဲင် မူတ့် ခုန်ဒီခမ်။ ဆေ ခုန်ဒီခမ် ဆုင်ဖျာတ် ဒါရာ၊ အန် တူ နပ် ဒီ ကာလိုပ်။

11 ဇဝ်ဖြာ ဆီ တဲး ဒူအီ တာ ညွယ် ဂေ ဘ့လေ ဆ အီ မှာန်။ အီ ဘော ဆ မာဆေ၊ ဇဝ်ဖြာ ဟဲ့ တဲး န့ ကာဇီ၊ တဲး န့ မှာန်။

12 ခုန်ဒီခမ် ဘော ကာအိး ဘော ဇွင့် အီ တူ မွှိုမ်။ ခုဝ်၊ အန် နပ် ဆေ ဟီ ဆုင်ဖျာတ် ဒူပ် ဒါရာ၊ န့ ဒီ တဲး အန် အိုပ် ဆီချာ၊ အိုပ် လှေန့်။

13 ခုန်ဒီခမ် ဘော ဆီ ထူမ် ဂြုဝ်း အီ မုး အီ မှာန်။ ဂေ အီ ကာလာင် ဂြုဝ်း ဇိုဝ် တီ၊ န့ ဘော လဝ့် နဝ်း အန်။

14 ဆေ ခုန်ဒီခမ် မိုဝ်း နဝ်း ရူ၊ န့ ဘော ပီ ဒါလာမ် အန် ဒီ တး တဝ်း ဒီ ငဝ်း အီ။ ဆေ န့ ယီ မိုဝ်း ဒူအီ အီ မိုဝ်း အာငျာန်၊ အန် ဘော နပ် ဒီ ဝီ လှဝ် နဝ်း ခုန်ဒီခမ်။

15 ဆေ နာ ခုန်ဒီခမ် ဟီ ဒါခိုယ်၊ န့ ဒီ ဘဲန် ဂျာမ်ဆာ ဒီ အီ။ ဂေဇူ အန် ဘော ပီ န့အု အီ တဲး ဂ့လာယ် စုဝ်း ဒေါ အာခြာဝ် ဒီယာင်။

16 ဆေ အေ မိုဝ်း အာငျာန်၊ န့ မွှိုမ် လွှိုမ် မိုဝ်း အေ ခြိဝ်။ ဆေ အေ နပ် ပီ ပါယ် ဘဲန် မျုဝ် ဘဲန် မျုဝ်၊ န့ မွှိုမ် လွှိုမ် မိုဝ်း အေ ရွိုန်။

17 ဂေ အီ ဘွတ် အီ မွှိုမ်၊ ဂေ ဟဲ့ ဝး န့တေန့် အီ တူ မွှိုမ်။ ဆေ ဂေ ဆာဒိက် န့တေန့် ပီ ဝဝ့် ဂေ၊ န့ ဒီ ချွတ် အာဆာက် ဂေ။

18 နဝ်း ပီခိုက် န့ ဒီ ယဲတ့် တဲး အီ စှိုမ်။ နဝ်း ပီစာ ဒုဝ် ဘြိမ်၊ န့ ဒီ ဘူင် တဲး အီ ဝီ စုဝ်း တျီမ်။

19 ဆေ မဲ မိုဝ်း နဝ်း တျီမ် ဘော ကွယ် ရိုမ် ဒူပ် ဒူအီ ဂိန်၊ န့ မွှိုမ် လွှိုမ် ကွယ် မဲ ဒူပ် ဒူအီ အီ ပီခိုက်၊ အီ ကာဆာင် ကြုဝ် ပီ ဖာတ် ဒိုဝ်း ဂေ ဒီ အီ ဟဝ်။

20 ဆေ မဲ ဆာဒိက် ဒူပ် ပဲ့ ဟဲ့ ဟေန် မဲ၊ မဲ ဒီ အွင်။ ဆေ မဲ ညှိုမ် ဘိုင် ဇဝ်ဖြာ၊ မဲ ဒီ ဘျုဝ် ဒါခိုယ်။

21 ဆေ ဒူအီ မိုဝ်း အာငျာန်၊ အီ ဟဝ် ဒီ ဘော တဝ်း၊ အန် နပ် ဘဲန် မျုဝ် ဘဲန် မျုဝ်။ ဆေ အန် ကာလာင် ဂြုဝ်း ဒါခိုယ် ဂြုဝ်း ငါမ်၊ န့ ဒီ တဲး အန် ဝဲ နပ် ဒီ မာနုဝ် အီ။

22 အာငျာန် ဘော ပီ အိုမ် အီ ဒွါ အာဆာက် ဒီ ဂေ အီ မိုဝ်း အာငျာန်။ ဒူအီ ရိုဝ်၊ ယီ လုဝ် ခမ် အာဂျိုဝ် ရိုဝ် အန်။

23 ဒူအီ အီ မိုဝ်း အာငျာန်၊ အန် ဘော နပ် ခဲင် နဝ်း အန် ခဲ့ ပီ လုဝ် ကာလာင် အန်။ ပါယ် တီ အန် ဘော ဝဲ နပ် ဒီ မာနုဝ် အီ။

24 ဂြုဝ်း အီ ဒါခိုယ်၊ န့ ပီ ငါမ် မာဖျီန်။ န့ ဘော ဒါခိုယ် ဒီ နဝ်း ဒီ ဖွိုမ်။ န့ ဘော ဘဲန် ပ့လူမ် ဘဲန် ဟဲန့် ဒီ ဒုဝ် ဘူင့် အီ။

25 ဆေ မဲ ဒူပ် န့တေန့် ပီ ထာင် မဲ ဟဲ့ မှာန်၊ န့ ဒီ တဲး မဲ ယမ်။

26 ပီ ဒီ လုဝ် ဒူအီ၊ န့ တဲး အန် ဘူင် ဂါန်။ ပီ ကာပြာန့် အန် ဘော တဲး အန် ဝဲ အွန် ဒီ ဘူင်။

27 ဒူအီ ဟာယ်၊ အန် ဘော ခြာမ် ဒီ ဘူင် မီ နာ စီစိဝ် ဒီ အီ။ ဂြုဝ်း ပီ ကာလာင် အန် ဘော ပီ ငဝ် အီ ကာဆိုမ်။

28 ဂေ ဒူအီ နဝ်း ဂုဝ့် ဂဲ့၊ ဂေ နပ် ဒီ ကာယွင့် အီ ဟဝ်။ ဂေ အီ ကာလာင် ဂြုဝ်း ဖူဖာပ်၊ ဂေ နပ် ဒီ ဘူင် တဲး အူ ဂိုက် လာယ် ကာယဝ်း။

29 ဒူအီ မိူက်၊ အန် နပ် ဒီ ကဝ် ဂိုက် အန်။ ဟဲ့ ဟွတ့်၊ အန် ဘော ယဲတ့် ဂိုက် အန် ဟာဝ် ဘူင် နာ တူ မွှိုမ်။

30 ဒူအီ အီ နပ် ဒီ ကာယပ် ငါယ် ဒီ မဲ၊ အန် ခြာမ် ဒီ ဘူင် နာ တူ မွှိုမ်။ ဆေ ဒူအီ ဒီမမ် ဒီ မဲ၊ အန် ဆီ ဘူင် နာ စီစိဝ်။

31 ဆေ ဟိုက် ဂိန့် ဒူအီ ဟဲ့ လုယ်၊ အန် ဘော မိုဝ်း ဆာရေ။ န့ ပီ အန် စှိုပ် မင်ဂိုမ်။ န့ ဘော လိုဝ်း ပီ ဘူင် အန် ဟဲ့ ဆိူဝ် ဟဲ့ မှာန် ဆေဆေ။

32 ဆေ ဒူအီ ခမ် ဒီ ယိူန်၊ န့ ဘော မွှိုမ် လွှိုမ် ဒူအီ အီ မိုဝ်း ပ့လူမ် တာင်။ ဆေ အန် ပဲ ဒီ အူတ် နဝ်း၊ န့ ဘော မွှိုမ် လွှိုမ် ဒူအီ အီ အိုပ် မိူင် ဘော မိူင်။

33 ဒူအီ ဘော နပ် ဒီ ကာတာမ်၊ တဲး ဂေ နပ် ပီ လုဝ် ဇဝ်ဖြာ။ မာလဲ၊ ဇဝ်ဖြာ အီ ဆုင်ဖျာတ် တူတ့် ဒွန် မျုဝ်။