ဂြုဝ်း န့စု န့စမ် ဘော ဂြုဝ်း ငါမ် နပ် ဒီ ဂဝ်း ဝဲန် နဝ်း ရူ။ ဂြုဝ်း ကာအန့် ယီ တဲး အီ ထူမ် ဘဲန် ဒေါဆ။

2 ဂြုဝ်း ပီ ကာလာင် ဒူအီ အီ မိုဝ်း အာငျာန်၊ န့ တဲး ဒူအီ နပ် ပီ ပါယ် ဘဲန် မျုဝ် ဘဲန် မျုဝ်။ အီ မုး ဂြုဝ်း ဒူအီ တူ လွှက့်၊ န့ တဲး အီ နပ် ခဲ့ ရိုဝ် အန်။

3 ဇဝ်ဖြာ အီ ယိုဝ် ဒွန် နာ ဒွန် ပ့လုဝ့်။ အန် ဘော ယွတ် ခဲ့ ပီ ဘူင် ဂေ အီ မွှိုမ် ဘော အီ တူ မွှိုမ်။

4 ဂြုဝ်း အီ လှဝ် နဝ်း၊ န့ ပီ ဟေ အီ တဲး အာဆာက် ဒီ အီ။ ဂြုဝ်း အီ ဆီမာ ကာလုဝ်၊ န့ ဒီ ပျာတ့် နဝ်း ဖွိုမ် အီ။

5 ဆေ မဲ ဝး ပီ မာနုဝ် ဂုန့် မဲ၊ မဲ ဟဲ့ ရိုဝ်။ ဆေ မဲ ယီ ထူမ် ပီ မာနုဝ် အန်၊ မဲ ဒီ မိုဝ်း အာငျာန်။

6 ဂေ အီ မိုဝ်း နဝ်း ဆိူဝ် နဝ်း မှာန်၊ ဂေ နပ် ဒီ ကာဇု အုန် ကိူန် ကြုဝ်ကြာမ် ခဲင် ကာင် ဂေ။ ပီ ပွိုန် ဂေ ဒူအီ ဟာယ်၊ ယီ ဘဲန် ဒုက် ဒီ ဂေ။

7 ဒူအီ ဟာယ် တူ မာနုဝ် တဲး အေ နပ် ပီ ပါယ် ဘဲန် မျုဝ် ဘဲန် မျုဝ်။ န့ မုး ပီ ဒွါ ဒူအီ အီ မိုဝ်း အာငျာန်။

8 ဒေါ ဆာခိုဝ် ဒူအီ ဘွတ် ဒူအီ မွှိုမ်၊ န့ ဘော လဝ့် နဝ်း ဇဝ်ဖြာ။ အန် ယီ ဇွင့် ပီ လှူ ဂေ ဒူအီ ဟာယ် ဒူအီ မိူက် ဒီ အန်။

9 ဇဝ်ဖြာ ဘော ဇွင့် ပီ ဘူင် ဂေ ဒူအီ ဟာယ်။ အန် ယီ ရွက့် ဂေ အီ ဘူင် နာ ဆိူဝ် နာ မှာန်။

10 ဆေ မဲ ဘူင် ကာလိုပ်၊ ဘူင် ဘ့လိူင်၊ မဲ ဒီ လုဝ် ခမ် မှာပ် ကိူန်။ ဆေ မဲ တူ ဆီ ထူမ် ပီ မာနုဝ် အီ ဟဝ်၊ မဲ ဒီ ယမ်။

11 မိူင် မာရာန အီ မုး မိူင် ဒူင် လိုဝ် ဒူင် စှိုမ် တွိုန်၊ န့ ဘော လိုဝ်း ဆီချာ ဒီ ဇဝ်ဖြာ။ နဝ်း ဖွိုမ် ဒူအီ၊ န့ ဘော ဝဲ လိုဝ်း ဆီချာ ဒီ အန် လွှိုမ် တီ။

12 ဒူအီ ပီခိုက် တူ ဆီ ထူမ် ပီ မာနုဝ် အီ ဟဝ်။ အန် မိူဝ် တူ ဒွိုမ် ဒီမွှတ် အာကျာမ် အာငျာန် ဒီ ဒူအီ အီ မိုဝ်း အာငျာန်။

13 ဒေါ မိုဝ်း ဒူအီ နဝ်း ခူယ်၊ ဂေ ဘော အေဝ်။ ဒေါ ခမ် ဂေ ဒုက်၊ ဂေ ယီ က့လိုဝ် ဘော ငှဝ်။

14 ဒူအီ အီ မိုဝ်း အာငျာန် မွှိုမ်၊ အန် ဘော ဆီ ဟေန် တဲး အန် နပ် ဘဲန် မျုဝ် ဘဲန် မျုဝ်။ အီ မုး ဒူအီ ရိုဝ်၊ အန် ဘော ကွယ် ပီယေန့် ကူပ် တူ နပ် အန် မာဆေ။

15 ဒူအီ ဂိန်၊ ဒူအီ အေတ့်၊ န့ ဘော ညှာပ် ကာဆဝ် ဒီ နဝ်း ဂေ ဒွန် ဆီငဲ။ ဒူအီ အီ မိုဝ်း နဝ်း ဒါခိုယ်၊ ဂေ ပီ ဒူအီ အီ လိုပ် ဘ့လွယ် ဆေဆေ။

16 ဆေ ဒူအီ ဂိန် ရုဝ်ဆေ ဇဝ်ဖြာ၊ န့ မွှိုမ် လွှိုမ် ဒူအီ ခြမ်၊ ယီ မိုဝ်း ဒုက် ခဲင် နဝ်း။

17 ဟာပ် ဒဝ် ငျီန် ဒူပ် ဒူအီ အီ လာယ် ရွက့်၊ န့ ဘော မွှိုမ် လွှိုမ် ဟာပ် ယင် ဒူပ် ဒူအီ အီ လာယ် ဇွင့်။

18 ဒူအီ ကာဟဝ်း အီ ငှိုယ် ရူ၊ အန် ဘော ဘူင် တဲး အီ ကာအေး ကာထဲန့်။ ဒူအီ နဝ်း ယေန် နဝ်း နှိမ်၊ အန် ယီ ဘူင် တဲး ဒူအီ အီ လာယ် ရူ လာယ် စာဝ် ဝီ ယေန် ဒါခိုယ်။

19 ဆေ မဲ ကြာန်၊ မဲ ဒီ ကာဒုး ဒုက် ညှာပ် ဒွန် နာ ဒွန် ပ့လုဝ့်။ ဆေ မဲ မိုဝ်း နဝ်း ဆိူဝ် နဝ်း မှာန်၊ မဲ ဒီ လွတ် အာဖေ အာရေ။

20 ဂွန် အီမာယ် အီ မိုဝ်း အာငျာန်၊ အန် တဲး နဝ်း ဂုန့် အန် ဒါခိုယ်။ ဂွန် အီမာယ် အီ ရိုဝ်၊ အန် ဘော လုက်တာယ် မာ အန်။

21 ဒူအီ ရိုဝ်၊ အန် ဘော ဘျုဝ် ဒီ ဒူပ် အီ တူ မွှိုမ်။ ဒူအီ အီ မိုဝ်း အာငျာန် မွှိုမ်၊ အန် ဘော ဘူင် နာ မုး နာ မှာန်။

22 ဆေ အာဝ် မိုဝ်း အီ ဒွါ အာကျာမ် အာငျာန်၊ ပီ ခြာမ် အီ ဒီ ဘူင်၊ န့ ဒီ လိုဝ် စှိုမ်။ ဆေ န့ ယီ မိုဝ်း ဒူအီ ကိူန်၊ အီ တဲး အာကျာမ် အာငျာန်၊ န့ ဒီ ဘော အွင် ဘော ပွိုန်။

23 ဆေ ဒူအီ ဟဲ့ နပ် ဒီ ဝျီ့ ဆီချာ ဂြုဝ်း အီ ဟဝ်၊ န့ တဲး အန် ဒါခိုယ်။ ပါယ် တီ၊ န့ ဘော မွှိုမ် ကာဆဝ် ဆေ ဒူအီ နပ် ဒီ ကာလာင် ဂြုဝ်း အီ ကာအာပ် ကာလာင် ဘော ကာလာင် ဂြုဝ်း တီ ဒေါ လုဝ် ကာလာင်။

24 ဒူအီ အီ မိုဝ်း အာငျာန်၊ အန် တူ ဒူပ် န့တေန့် အီ လူင် မိူင် မာရာန။ အန် ဒူပ် န့တေန့် အီ ဒွါ အာဆာက်၊ အီ ဟုဝ့် နာ ဒဲင်။

25 ဇဝ်ဖြာ ဒီ ယဝ်း ဝဲန် ကာင် ဂေ အီ မိုဝ်း နဝ်း ပီခိုက်။ အီ မုး ကာအုန် ကာဒါယ် ယာ ဆီပြး၊ အန် ယီ ရဲ၊ ယီ ဂွင့် ဒွါ ဒီ ဂေ။

26 ဇဝ်ဖြာ ဇွင့် အာကျာမ် အာငျာန် အီ တူ မွှိုမ်။ အန် ဇဝ် ယီ အိုင် အာကျာမ် အာငျာန် ဂေ ဒူအီ မွှိုမ်။

27 ဆေ မဲ မိုဝ်း နဝ်း လောဖ၊ န့ ဒီ တဲး ဘော န့ဟူမ် မဲ ဇမ် ဒုက်။ ဂေ အီ တူ ဒိုဝ်း တူ ဟူမ် လက်ဆွင် အီ၊ ဂေ ယီ ဒီ ကွယ် ဒါခိုယ် ဂျာမ်ဆာ။

28 ဒူအီ အီ ဘူင် နာ ဆိူဝ် နာ မှာန်၊ အန် ကာဒွါ့ ကာဖာ အာတ့် ဝျီ့ အန် ဂြုဝ်း အီ။ ဒူအီ ဟာယ် ယီ ပီခြန် ဒီ ဝျီ့ ဂြုဝ်း အီ တူ မွှိုမ်။

29 ဒေါ ဆာခိုဝ် ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဇဝ်ဖြာ ဘော ထူမ်။ အန် ယီ ဝး ဂေ ဒူအီ ဟာယ်။

30 ဆေ အေ ယွတ် ဒူအီ အီ အေဝ်၊ နာ အန် မိူဝ် ဆီဘ့လာင်၊ န့ ဘော ဘဲန် နဝ်း ဒါခိုယ် ဒီ အေ။ ဘော ဆာဒါင် လွင် နာ ဘွတ်၊ န့ ဒီ ဘဲန် နဝ်း ခူယ်။

31 ဆေ မဲ နပ် ဒီ ထူမ် ဂြုဝ်း ပီ မာနုဝ် အီ၊ မဲ ဒီ ဘော ကွယ် ရိုမ် ဒူပ် ဂေ ဒူအီ အီ မိုဝ်း အာငျာန်။

32 ဆေ မဲ ဝဲန် ပီ မာနုဝ် အီ၊ န့ ပီ မဲ ပျာတ့် ဒုဝ် မဲ တဲး န့ စှိုမ်။ ဆေ မဲ ယီ ဒိုဝ်း ဒီ ထူမ်၊ အာငျာန် မဲ ဒီ ဝဲ ကိူန်။

33 ဆေ ဒူအီ ရုဝ်ဆေ ဇဝ်ဖြာ၊ န့ ဒီ တဲး အန် မိုဝ်း အာငျာန်။ မဲ လုဝ် မိုဝ်း နဝ်း တျီမ် နဝ်း ဂူမ် ဒီ အာတ့်။ ဟဲ့ ဟွတ့် အီ ဟဝ် ဒီ ဝီ ရုဝ်ဆေ မဲ။