1 တဲး အေ အိူပ် ဇဝ်ဖြာ။ ဆေ အေ တဝ်း မှုဝ် အီ အိူပ် ဇဝ်ဖြာ၊ န့ ဟဲ့ ဘွတ် ဟဲ့ မွှိုမ် ကာဆဝ်။ န့ ဟဲ့ ဒါခိုယ် ဘော ဟဲ့ ကာအာပ် အေ အိူပ် ဇဝ်ဖြာ။

2 ဇဝ်ဖြာ ဒီ ဝီ ဆမ် ဝီ မ့ပြာယ် မိူင် ယေရူဆာလဲမ်။ အန် ဝီ ဒိုဝ်း တး ဘော ဂေ ဒူအီ အီဆာရေလ ပဲ့ ဟဲ့ မှေတ့် ဟာဝ် အီ။

3 ဂေ အီ မိုဝ်း နဝ်း လိုဝ် နဝ်း ကာပျာတ့်၊ အန် ဇဝ် ဒီ တဲး ဂေ ဝီ ဒါခိုယ် ဂျာမ်ဆာ။ ဆေ ဂေ မိုဝ်း ဒိမ်၊ အန် ဇဝ် တဲး န့ ဝီ ကဲန်။

4 အန် ဇဝ် ဘော တိး ခဲ့ ကွယ် ဆီမန့်၊ ဘော တဲး ဂေ မိုဝ်း စိူဝ် ဒွန် ဘူင့်။

5 ဇဝ်ဖြာ ပီ ကြိုပ် အေ နီ၊ အန် ဟဲ့ ဘွတ် မျာတ် ကာဆဝ်။ အာဝ် မိုဝ်း အီ ပွိုန် ကာဂဝ် အာငျာန် အန် ဇဝ်။

6 ဂေ ဒူအီ ဂိန် အီ မိုဝ်း ဒုက်၊ အန် ဇဝ် ဒီ ဝီ စုဝ့် မျုက် ဂေ။ ဂေ ဒူအီ ဟာယ် ဒူအီ မိူက်၊ အန် ဇဝ် ဒီ ဘျွာ စုဝ်း ဂေ ဒဲင် ကာဒါယ်။

7 တဲး အေ တဝ်း မှုဝ် အီ ဒါင် ဂုင် ဂေဇူ ဒီ ဇဝ်ဖြာ။ တဲး အေ ဘး ဒိင် ဒီ ဇဝ်ဖြာ။

8 အန် ဇဝ် တဲး န့အု ပ့လိုက် ခဲင် ဂါင်ဟြာဝ်၊ တဲး န့ ဘော မိုဝ်း ဂ့လာယ် အီ စုဝ်း ဒဲင် ကာဒါယ်၊ တဲး ပြဲ ဂေ ပေတ့် ဘော လတ့် ဒွန် နွန် ဒွန် ပ့လုဝ့်။

9 အန် ဇဝ် ဘော ဟျီင် ဂေ ဒုဝ် ဆတ်ဒါဝါ၊ ဘော ဂွန် မာကာအ ပွိုန် ဒီ ဟူမ် ဒေါ ဟမ် ဂေ။

10 အန် ဇဝ် တူ နဝ်း တာင် ဒီ ဟဲန့် မင်ပြွင့်။ အန် ဇဝ် မိူဝ် တူ နဝ်း တာင် ဒီ ဒါ ဆိုက် အီ ကျ ဒီ ကာဂုဝ်း။

11 ဆေ န့ ယီ မုး ဒူအီ အီ ရုဝ်ဆေ အန် ဇဝ် ဘော ဒူအီ အီ ဘိုင် အန် ဇဝ် ကူပ် ရွက့် အန် ဆေဆေ၊ ဒူအီ ဇိုဝ် တီ ဟဲ့ လဝ့် နဝ်း အန် ဇဝ်။

12 အိုယ် ဘေ ဒူအီ ခဲင် မိူင် ယေရူဆာလဲမ်၊ တဲး ဘေ အိူပ် ဇဝ်ဖြာ။ အိုယ် ဘေ ဒူအီ ခဲင် မိူင် ဇီအူန်၊ တဲး ဘေ အိူပ် မျုက် ဇဝ်ဖြာ။

13 ခုဝ်၊ န့ ပီ အန် ဇဝ် ဒီ တဲး မာ မာလုဝ်း မိူင် ဘေ ဝီ မိုဝ်း ဟဲန့် မိုဝ်း ပ့လူမ်။ အန် မိူဝ် ဝီ တဲး ဘော နာ ဘွတ် နာ မွှိုမ် ဒီ ဒူအီ အီ ကွယ် ဒူင် ကွယ် ဘေ။

14 အန် ဇဝ် ဒီ တဲး ကာအုန် ကာဒါယ် ဘေ ကွယ် ဒါခိုယ် ဂျာမ်ဆာ၊ တူ တဲး န့ မိုဝ်း ရန်ဆူ။ အန် ဒီ တဲး ဘေ ပွိုန် ဒီ ဟူမ် ခဝ်ချုင် အီ ဘွတ် အီ မွှိုမ် ကာဆဝ်။

15 အန် ဇဝ် ကာလာင် ဂြုဝ်း ဒီ ဂေ အီ ကွယ် ဒဲင် ကာဒါယ်။ ခဲ့ ပီ စ်ု အန် ဇဝ် တီ၊ န့ ဒီ ဘော ကာလတ့် ခြန် ခြန်၊ ဇမ် ဒွန် နာ ဒွန် ပ့လုဝ့်။

16 အန် ဇဝ် ဘ့လး အုန် ဘျြီ အီ ကာဟိုင် ပီ ဟိုပ် ချုင်။ တဲး ဘော အိုမ် ဒါတ် စုဝ်း ကာဟိုင် ပီ ကာဝှါင်။

17 အန် ဇဝ် ဒီ ဘော တဲး ဘျြီ စုဝ်း ပီ ဂွန် မာဝ်။ အာဝ် မိုဝ်း အာဆေ အီ ပွိုန် ခမ် ဂျီတ် ပီ ဘ့လေး အန် ဇဝ် တီ။

18 ဒေါ အန် တီ အန် ဇဝ် ဘော ကာလာင် တဲး ဘျြီ လာတ့်။ အန် ဒီ တဲး န့ မိုဝ်း ခုန် အီ ဘုတ်၊ တဲး အိုမ် လာတ့် လှဲ။

19 အန် ဇဝ် ဟဲ့ ကာလာင် ဘျ ဂြုဝ်း အန် ဒီ ဂေ အာမျုဝ် အာကူပ်။ အန် ဟဲ့ မာနုဝ် ဘော ဂေ ဒူအီ အီဆာရေလ၊ တဲး ဂေ နပ် အာကျာမ် အာငျာန် အန်။

20 အီ မုး ဂေ ဒူအီ ဟဝ်၊ အန် ဇဝ် တူ မာနုဝ် တဲး ဂေ နပ် ဇိုဝ် တီ။ ဂေ တူ နပ် ဒါရာ ဇဝ်ဖြာ။ တဲး အေ အိူပ် ဇဝ်ဖြာ။