1 တဲး ဂေ ဒူအီ အီဆာရေလ တဝ်း၊ “ဂေ ဟဲ့ ခါနှာပ် အုဝ် ဆိန့် ဒေါ ဒီတဲတ် အုဝ်။

2 ဂေ ဟဲ့ ခါနှာပ် ကာဆဝ် အုဝ် ဆိန့် ဒီတဲတ် အုဝ်၊ ဂေ ယီ တူ ပဲ အုဝ်။

3 န့ ပီ ဂေ ထဲ ဒီ ကာတု အုဝ်၊ တဲး ပန် ဘ့လာ န့ထဲ ဂေ ကော ဒီဆိန့် ဒီဆိန့်။

4 မာလဲ၊ ဇဝ်ဖြာ မိုဝ်း နဝ်း ဆိူဝ် နဝ်း မှာန်။ အန် ဟဲ့ တဲး အုဝ် လွတ်၊ တူ တဲး ဂေ ပွိုန် ဒီ ပက် အုဝ်။”

5 ဂေ အီ ဇွင့် နွန် ဇီအူန်၊ တဲး ဂေ စှိုမ် ဆာရေ ဒွန် အီ။ တဲး ဂေ ကာဒုး ဒီ လေး တဝ်။

6 တဲး ဂေ ပီ ပေတ့် အီ လတ့် ဒဲင် ကာတု ကာင်၊ ဝီ ဟျီ့ ကာဟဝ်း ရာင် အန် အာတ့် တာင် အန်။

7 အာဆေ ဆီ ဆုဝ့် အန် အာဝ် ပွိုန် ပက် မ့ပူင့် အုန် အန်။ အာဆေ ဆီ ဂဲပ် အုန်၊ အာဝ် ပွိုန် မာဆေ။

8 ခဲ့ မိုဝ်း ဒူအီ အီ ကာလုဝ်း ဟာဝ် ခူပ် ဂေ ဒူအီ ဇိုဝ် တီ၊ ကွဲ့ တဲး န့ မိုဝ်း ခေါ အူ ဝီ အီ တဝ်း၊ “တဲး ဇဝ်ဖြာ ဒွါ နာ ဘွတ် နာ မွှိုမ် ဒီ မဲ။ ယေ ဘိုင် ပွုန် ဇဝ်ဖြာ၊ တဲး ဇဝ်ဖြာ မွင့်ကာရာ ဒွါ ဒီ မဲ။” ကွဲ့ တဲး န့ မိုဝ်း အာဆေ အီ တဝ်း ပါယ် တီ။