1 အုဝ် ရွက့် ဇဝ်ဖြာ ကူပ် ဟဲ့ ထူမ် အန် ဇဝ် ဂြုဝ်း ပီ မှာန့် အုဝ်။

2 ဒေါ ဆာခိုဝ် အုဝ်၊ အန် ဇဝ် ဟဲ့ ထူမ်။ ခုဝ်၊ အုဝ် ဒီ ဆာခိုဝ် ဒီ အန် ဘော စုဝ် အုဝ်။

3 အုဝ် ဟဲ့ ဇမ် ဒုက်၊ ဟဲ့ ထာင် အာဝ် ဟူ လွတ် ယမ်။ န့ ပီ အုဝ် ဟဲ့ ဟွတ့် ဇမ် မိူင် မာရာန၊ တဲး န့ ဒုက် ညှာပ် ကာဆဝ် ဒီ နဝ်း အုဝ်။

4 ဒေါ အန် တီ အုဝ် ဘော ဆာခိုဝ် ဒီ ဇဝ်ဖြာ တဝ်း၊ “အိုယ် ဇဝ်ဖြာ၊ တဲး မဲ ချွတ် အုဝ်။”

5 ဇဝ်ဖြာ ဘော မိုဝ်း နဝ်း ဆီ ဂေဇူ ဘော နဝ်း ဆိူဝ် နဝ်း မှာန် ဆေဆေ။ အန် နပ် ဒီ ကာဝေ အီ ဆေဆေ။

6 ဇဝ်ဖြာ ဘော ရဲ ဘော ဂွင့် ဂေ ဒူအီ အီ တူ မိုဝ်း ဒူင် ဒီ ဘိုင်။ ဒေါ ဇမ် အုဝ် ဒုက် တာင်၊ အန် ဇဝ် ဟဲ့ စွယ် ဟဲ့ ချွတ် ဘော အုဝ်။

7 တဲး နဝ်း ဖွိုမ် အုဝ် ဝီ ညှိုမ် ဆီချာ ပီ ဘြိမ်။ ခုဝ်၊ ဇဝ်ဖြာ ဟဲ့ ဂေဇူ အုဝ်။

8 ဇဝ်ဖြာ ဟဲ့ စွယ် ကွဲ့ တဲး အုဝ် ယမ်။ အန် ဟဲ့ တဲး ဘော အိုမ် ငါယ် အုဝ် ဝီ ဟိတ်။ အန် ဟဲ့ ဘ်ု ရိတ် ဘော အာဆာက် အုဝ်၊ ကွဲ့ တဲး န့ စှိုမ်။

9 အန် ဟဲ့ ဘူင် ပါယ် တီ၊ တဲး အုဝ် အိမ်၊ တဲး အုဝ် ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။

10 အုဝ် ပီ ဘော ဟဲ့ တဝ်း၊ “အုဝ် ဟဲ့ ဒုက် ကာဆဝ်။” မာလဲ၊ အုဝ် ယီ ညှိုမ် ဘိုင် ဇဝ်ဖြာ။

11 အုဝ် မိူဝ် ဟဲ့ တဝ်း ဒေါ ယုဝ် အုဝ်၊ “ဒူအီ အေ နီ၊ အာဝ် ပွိုန် ဘိုင် ပွိုန် ညှိုမ် အာဆေ။”

12 အုဝ် အာဝ် ဟူ နပ် ပီ ဒီ ဝီ ပါယ် ဒီ ဒါင် ဂုင် ဂေဇူ ဒီ ဇဝ်ဖြာ၊ အီ ဟဲ့ ဘူင် နာ မွှိုမ် ဒွန် မျုဝ် ဒီ အုဝ်။

13 အုဝ် ဒီ ဝီ ဒိုဝ်း ဆီလယ့် အိုမ် မာငုန် အီ တဲး ယေ လှုဝ်း လွင် ဇဝ်ဖြာ ချွတ် ဒူအီ၊ ဝီ လှူ ဒီ ဇဝ်ဖြာ။ အုဝ် ဒီ ဘော ဆာခိုဝ်၊ ဒါင် ဂုင် ဂေဇူ ဒီ အန် ဇဝ် ပါယ် တီ။

14 ခဲ့ ပီ ဒွိုမ် ကာဆဲန့် အုဝ် ဒီ ဇဝ်ဖြာ၊ အုဝ် ဒီ ဘော ဘူင် တဲး ဘော ဂေ ဒူအီ ပီ အိုပ် အန် ဒွန် အီ ပွိုန် ဒီ ယိုဝ်။

15 ဆေ ဂေ ဒူအီ ဘွတ် ပီ အိုပ် အန် ဇဝ် ယမ်၊ န့ ဘော ဒိုဝ် နဝ်း ဇဝ်ဖြာ။

16 အိုယ် ဇဝ်ဖြာ၊ အုဝ် မုး ဒဲစေန့် မဲ ဇဝ်။ ဘော မာ အုဝ် ဟဲ့ ဒွိုမ် မုး ဒဲစေန့် မဲ။ ခုဝ်၊ ဘော အုဝ် အီ မုး ဂွန် အန်၊ အုဝ် မိူဝ် ဟဲ့ ဘဲန် ဒဲစေန့် မဲ ဇဝ်။ မဲ ဇဝ် မိူဝ် ဟဲ့ ချွတ် အုဝ်၊ ကွဲ့ တဲး အာဆာက် အုဝ် စှိုမ်။

17 အုဝ် ဒီ လှူ ပီ ဒီ လှူ ဒီ မဲ ဘော ဆာခိုဝ် ဘော ဒါင် ဂုင် ဂေဇူ ဒီ မဲ ဇဝ်ဖြာ။

18 ခဲ့ ပီ ဒွိုမ် ကာဆဲန့် အုဝ် ဒီ မဲ၊ အုဝ် ဒီ ဘော ဘူင်၊ တဲး ဘော ဂေ ဒူအီ ပီ အိုပ် မဲ ဇဝ် ဒွန် အီ ယိုဝ်။

19 အုဝ် ဒီ ဘူင် ပါယ် တီ ခဲင် ဝဲင် ဟုဝ် ဇဝ်ဖြာ အီ ကွယ် ခဲင် မိူင် ယေရူဆာလဲမ်။ တဲး အေ အိူပ် ဇဝ်ဖြာ။