1 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ချွတ် အုဝ်။ န့ ပီ အိုမ် ဟဲ့ မ့ပုန် ဇမ် မဲင် အုဝ်။

2 န့ ဟဲ့ ပီ အုဝ် ဟဲ့ ကွယ် ခဲင် နှူင် အီ လိုက် ကာဆဝ်၊ အာဝ် မိုဝ်း ဒူင် ဒီ ညဲတ့်။ န့ ဘော ပီ အုဝ် ဟဲ့ စုဝ်း ခဲင် အိုမ် လိုက်။ အိုမ် ဟဲ့ ဟွတ့် မ့ပုန် တူတ့် အုဝ်။

3 အုဝ် ဘော နုန် ကာဆဝ် ဘော ဒီလှး ကူပ် ယာမ် ဒဲ့ အုဝ်၊ တဲး န့ မိုဝ်း အီ စွယ် အုဝ်။ ကာဒဝ် မဲင် အုဝ် ဘော ကာဟဝ်း တွင့်၊ ငါယ် အုဝ် မိူဝ် ဟဲ့ မုဝ် ကူပ် ဟဲ့ ဟြေတ့် လှေန့် အုဝ် ဒီ ဇဝ်ဖြာ။

4 ဂေ အီ ဇွင့် အုဝ် ဘော ကိူန် ကာဆဝ် လွှိုမ် ဟိုက် ဂိန့် အုဝ်။ န့ ယီ တူ မိုဝ်း ဒီခုဝ်။ ဂေ ဇွင့် အုဝ် ပီယေန့်။ ရန်ဆူ အုဝ် ဘော မိုဝ်း ပ့လူမ် မိုဝ်း ဟဲန့် လွှိုမ် အုဝ်။ ဂေ ဆီ ပျာတ့် အုဝ် ပီယေန့်။ ဂေ မှာန့် အုဝ် ဒွါ ဝိဝ် ကြုဝ်ကြာမ် ပီ တူ ဒွိုမ် ပြာ အုဝ်။

5 အိုယ် မဲ ဇဝ်ဖြာ၊ မဲ ဇဝ် ဘော နပ် ပီ ကာလိုပ် အုဝ်။ မဲ ဇဝ် ဘော နပ် တူတ့် ခဲ့ ကွယ် မှာပ် အုဝ်။

6 မဲ ဇဝ်ဖြာ အီ အိုပ် တူတ့် မျုဝ် အီ မိုဝ်း ပွုန်၊ ကွဲ့ တဲး ဂေ အီ ရုဝ်ဆေ မဲ ဇဝ် လုဝ် ဆာယ် အီ ကူပ် အုဝ်။ အိုယ် မဲ ဇဝ်ဖြာ ပီ ကြိုပ် ယေ ဒူအီ အီဆာရေလ၊ ကွဲ့ တဲး ဂေ အီ ကြိုပ် မဲ ဇဝ် မိုဝ်း နဝ်း လိုဝ် ကူပ် အုဝ်။

7 အုဝ် ဘော ခမ် တဲး အီ ဟဝ် ကာယွင့် အုဝ်၊ ဘော ခမ် ဒီ စှိုမ် ဆာရေ ကူပ် ညှိုမ် အုဝ် မဲ ဇဝ်ဖြာ။

8 အုဝ် ဟဲ့ ပီ ခဲတ့် ဒီ ဘီနွင် ဝေါဝဲ အုဝ်။ အုဝ် ဟဲ့ ဝီ ပီ ဒူအီ အာမျုဝ် ဟဝ်၊ ဝီ တး ကွယ် ခဲင် န့ဟူမ် ဂေ။

9 နဝ်း အုဝ် ဟဲ့ ရွက့် ကာဆဝ် ဟုဝ် မဲ ဇဝ်ဖြာ။ အုဝ် ကော ခမ် ယမ် ဒီ ရွက့်။ ပီ ဟဲ့ နဲန အီ ဟဝ် ဒီ မဲ ဇဝ်၊ န့ ပီ အုဝ် ဟဲ့ ဝီ ခမ် တူတ့်။

10 ဒေါ ယာမ် အုဝ် ဘော ယိူန် ပီ ဒီ ဟူမ်၊ ဂေ ဟဲ့ ကာညး အုဝ်။

11 ဒေါ စှိုပ် အုဝ် ဒီ တာ ခြိုင် စာန် ကူပ် က့လိုဝ် အုဝ်၊ ဂေ ဘော ခဲ စာဝ် အုဝ်။

12 ဂေ အီ ဟာဝ် ဒူပ် န့တေန့် ဘော ကွယ် ဒီ ဂ့လ၊ ဂေ ဘော ကာမွုန် လွင် တူ မွှိုမ် အုဝ်။ ဂေ အီ ယိုတ့် ပဝ်း ဘော တဝ်း ဘဲန် မှုဝ် ဘဲန် မျုဝ် လွင် အုဝ်။

13 န့ ယီ မုး အုဝ်၊ အုဝ် ဆာခိုဝ် ဒီ မဲ ဇဝ်ဖြာ။ တဲး မဲ ဇဝ် ဘော ထူမ် ဂြုဝ်း အုဝ် ဒေါ အိုင် မဲ ဒီ ထူမ်။ ကူပ် မိုဝ်း မဲ ဇဝ် နဝ်း ရွက့် နဝ်း ကာဝေ၊ အုဝ် မှာန့်၊ တဲး မဲ ဇဝ် ဘော ကာဝေ အုဝ်။ တဲး မဲ ဇဝ် ဘူင် ခဲ့ ပီ မှာန့် အုဝ်၊ တဲး မဲ ချွတ် အုဝ် အာခါခ်ု။

14 န့ ပီ အုဝ် ဟဲ့ စုဝ်း ခဲင် ညုဝ့် ခဲင် နှူင်။ တဲး မဲ ဇဝ် ချွတ် အုဝ်၊ ကွဲ့ တဲး အုဝ် စေတ့်။ ဂေ အီ ဇွင့် အုဝ် ဟဲ့ ကိူန်။ န့ ပီ အုဝ် ဟဲ့ စုဝ်း ခဲင် အိုမ် လိုက်။ တဲး မဲ ဇဝ် ဒိူတ် လေး အုဝ်။

15 ကွဲ့ တဲး အိုမ် ပြယ့် တး ဇုး အုဝ်။ ကွဲ့ တဲး အုဝ် ယမ် ခဲင် အိုမ် လိုက်။ ကွဲ့ တဲး အုဝ် စုဝ်း ခဲင် ကာဒဝ် ဘာရေဝ်။

16 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ထူမ် ဂြုဝ်း အုဝ်။ ကူပ် မိုဝ်း မဲ နဝ်း ရွက့် ကာဝေ၊ တဲး မဲ ဇဝ် ဂေဇူ အုဝ်။

17 မဲ ဇဝ်၊ ကွဲ့ ချြီင် ဒီ အုဝ်။ န့ ဟဲ့ ဒုက် ကာဆဝ် ဒီ နဝ်း အုဝ်။ ခုဝ်၊ အုဝ် မှာန်၊ တဲး မဲ ဇဝ် အိုဝ် ဂြုဝ်း အုဝ် ဒေါ တီ နီ အူ ဇေန့်။

18 အုဝ် မှာန့်၊ တဲး မဲ ဇဝ် တး ကွယ် ရိုမ် ဒူပ် အုဝ်၊ ချွတ် အုဝ်၊ ကွဲ့ တဲး ရန်ဆူ အုဝ် ခူယ်။

19 မဲ ဇဝ် ဘော ဟဲ့ နပ် တူတ့် ပဲ့ ဟဲ့ ခမ် အုဝ်။ အီ ဟဲ့ ကာယွင့် အုဝ်၊ ဟဲ့ ဘူင် နာ မွှိုမ် ဆာယ် ကာဆဝ် ဒီ အုဝ်၊ တဲး အုဝ် စှိုမ် ဆာရေ။ မဲ ဇဝ် ဟဲ့ နပ် တူတ့် ရန်ဆူ အုဝ် ဘောကာဂ့လျီတ်။

20 ဂေ ဟဲ့ နဲန အုဝ်၊ တဲး နဝ်း အုဝ် ကာပျာတ့် လိုဝ်။ အုဝ် အာဝ် ဟူ နပ် ပီ ဒီ ပါယ်။ အုဝ် ဘော နှဝ့် ဘ်ု ဒီ ယွတ်၊ တဲး န့ မိုဝ်း အီ ကာဝေ အုဝ် မိူဝ်၊ အာဝ် မိုဝ်း အာဆေ။ အုဝ် ဘော ဟြေတ့်၊ တဲး န့ မိုဝ်း အီ လှဝ် နဝ်း အုဝ်၊ တဲး န့ ဒါခိုယ် မိူဝ်၊ ယီ တူ မိုဝ်း ခေါ အူ ဝီ။

21 ဒေါ ကာပြာန့် အုဝ် ပီ ဒီ ဟူမ်၊ ဂေ ဘော ကာဝ်ု အိုမ် ဆွင့်။ ဒေါ ဆီ ဒျီင် အုဝ် အိုမ်၊ ဂေ ဘော ဒွါ အုဝ် ဒျီင် အိုမ် ပြာင်။

22 ဆေ ဂေ ဟူမ် တာင်၊ တဲး န့ ပဲ ဝတ့် ဂေ။ ဆေ ဂေ ဟူမ် ယင် ပီ လှူ ဂေ၊ တဲး န့ ဘဲန် ကာပူ ဒီ ဂေ၊ တဲး န့ ပီ မာဆိမ် အီ ခြေ ယွတ့်။

23 တဲး ငါယ် ဂေ အပ်၊ ကွဲ့ တဲး ဂေ ယိုဝ် မာဆေ။ တဲး ဂေ ဘော လုဝ် ဟာဝ် ကာဂုဝ့် ဆေဆေ။

24 တဲး မဲ ဇဝ် ဘော ရူ ဒီ ဂေ၊ ဒမ် မှာပ် ဒီ ဂေ။ ကူပ် ရူ ကာဆဝ် မဲ ဒီ ဂေ၊ တဲး မဲ ခုင်ခြး ဒီ ပန် ဂေ၊ ကွဲ့ တဲး ဂေ လွတ်။

25 ဒူင် ကွယ် ဂေ၊ တဲး န့ ကော ငွင့်။ ခဲင် ထိုပ် ခဲင် ကာင် ဂေ၊ ကွဲ့ တဲး န့ ဆီ မိုဝ်း အာဆေ။

26 ခုဝ်၊ ဂေ ဟဲ့ ခါနှာပ် ဒူအီ ပဲ့ ဟဲ့ ဒမ် မဲ ဇဝ် မှာပ်။ ဂေ ဘော ကာလာင် လွင် အီ ဟဝ် အီ ဟဲ့ ခမ် ဒုက် ပဲ့ ဟဲ့ ဒွါ မဲ ဇဝ် တဲး ဂေ မိုဝ်း ဆဝ် မိုဝ်း ဒိမ်။

27 တဲး မဲ ဇဝ် နုဝ် မှာပ် ပဲ့ ဟဲ့ ဘူင် ဂေ တီ။ ကွဲ့ တဲး ဂေ ပွိုန် ဂုင် ဂေဇူ ပီ ချွတ် မဲ ဇဝ် ဒီ ဂေ။

28 ကွဲ့ တဲး မဲ ဒဲမ် စိူဝ် ဂေ ခဲင် ဘပ် ဇာရာင် ဂေ အီ မိုဝ်း အာဆာက် ကာမာယ်။ ကွဲ့ အုန် စိူဝ် ဂေ ခဲင် ဇာရာင် ဂေ ဒူအီ ပီ အိုပ် မဲ။

29 အီ မုး အုဝ်၊ အုဝ် ဟဲ့ ဒုက် ဟဲ့ ညှာပ် ကာဆဝ် ဒီ နဝ်း အုဝ်။ အုဝ် မှာန့်၊ တဲး မဲ ဇဝ် ချွတ် အုဝ်၊ တဲး အုဝ် ကွယ် ဆီချာ။

30 အုဝ် ဒီ တဝ်း မှုဝ် အီ အိူပ် ဇဝ်ဖြာ။ အုဝ် ဒီ ဘော မျုက် အန်၊ ကာလာင် ဂုင် ဂေဇူ ဒီ အန်။

31 ဆေ အုဝ် ဘူင် ပါယ် တီ၊ န့ ဘော လဝ့် နဝ်း ဇဝ်ဖြာ လွှိုမ် လှူ အုဝ် မက် အာလူင့် တာင်။ န့ ဘော မွှိုမ် လွှိုမ် လှူ အုဝ် မက် ဒီဆုဝ်။

32 ဂေ အီ ဒုက် အီ ညှာပ် ဒီ နဝ်း၊ ဂေ ဟီ ယိုဝ် လွင် အန် တီ၊ ဂေ ဒီ ဘော ဒါခိုယ် ကာဆဝ်။ ဂေ အီ ကြိုပ် ဆီချာ ဇဝ်ဖြာ ဒီ ဘော ဘဲန် ပ့လူမ် ဘဲန် ဟဲန့် ဒီ နဝ်း ဂေ။

33 ဇဝ်ဖြာ ဘော ထူမ် ဂြုဝ်း ပီ ဆာခိုဝ် ဂေ ဒူအီ ဂိန်။ အန် ဇဝ် မိူဝ် တူ ပိဝ် ဂေ ဒူအီ အာမျုဝ် အန် အီ ကွယ် ခဲင် ကာပိုမ်။

34 တဲး ဘော ဂါင်ဟြာဝ် ဘော ကာဒါယ် အိူပ် ဇဝ်ဖြာ။ ဘော အိုမ် နမ်မုက်ဆာရာ ဘော ဒုဝ် ဆတ်ဒါဝါ အီ ကွယ် ခဲင် အိုမ် တီ၊ တဲး ဂေ ကာဖြူမ် တူတ့် ဒီ အိူပ် ဇဝ်ဖြာ။

35 အန် ဇဝ် ဒီ ဘော ချွတ် မိူင် ဇီအူန်၊ ဝီ မ့ပြာယ် မိူင် အီ ကွယ် ခဲင် အိူင် ယူဒါ။ အန် ဇဝ် ဒီ ဝီ တဲး ဒူအီ ကွယ် ခဲင် မိူင် တီ ဘော ဘဲန် မိူင် ဂေ။

36 ဂေ လှုက်လှာန် ဒဲစေန့် အန် ဇဝ်၊ ဂေ ဒီ ပွိုန် ဒီ ဘိုင် ခါဂုန် တီ။ ဂေ အီ ရွက့် အန် ဇဝ် ဒီ ဘော ပွိုန် ဒီ ကွယ် ခဲင် မိူင် ဂေ တီ။