1 တဲး မဲ ဇဝ် ဘူင် တဲး ဂေ ရန်ဆူ မဲ ကာယဝ်း ဟာဝ် ဒွန် နာ ဒွန် ပ့လုဝ့်၊ တဲး ဘော ဂေ အီ ဇွင့် မဲ ဇဝ် တဝ်။

2 တဲး ဂေ ဘော ဟြာယ် ပီ ခုန် ဘုတ် ဒက် ငဝ်။ တဲး မဲ ဇဝ် ဟုဝ် တဝ် ဂေ ပါယ် တီ။ တဲး ဂေ ဒူအီ ဟာယ် ဒူအီ မိူက် ဘော စှိုမ် တူတ့်။ တဲး န့ ပီ ဘ့လမ် အီ လာတ့် ဒေါ ကွယ် ခူပ် ငဝ်။

3 အီ မုး ဂေ ဒူအီ နဝ်း ဆိူဝ် နဝ်း မှာန်၊ တဲး ဂေ ယီ ဘျုဝ် ဒါခိုယ်၊ တဲး ဂေ ဘော ကျဝ် ဘော ခူယ် ဒီ အာတ့် ဇဝ်ဖြာ။

4 တဲး ဘေ တဝ်း မှုဝ် အီ အိူပ် ဇဝ်ဖြာ။ တဲး ဘေ တဝ်း မှုဝ် အီ အိူပ် ပွုန် အန် ဇဝ်။ တဲး ဘေ အိူပ် အန် ဇဝ် အီ ကွယ် ခဲင် န့အု။ အန် ဇဝ် ဟဲ့ မုး ဇဝ်ဖြာ။ တဲး အေ ဘောကာဂ့လျီတ် အိူပ် အန် ဇဝ်။

5 အန် ဇဝ် ဘော ကွယ် ခဲင် ဒူင် ဘွတ်။ အန် ယွတ် လိုမ်လာ ဂေ ဂွန် ဆီပြး ပီ ဂုန့် ဂေ။ အန် ဘော မွင့်ကာရာ ဒွါ ဒီ ဂေ ယာ ဆီပြး ဒွန် အီ။

6 ဂေ အီ တူ မိုဝ်း ဂိုက်၊ အန် ဇဝ် ဘူင် တဲး ဂေ ဝီ မိုဝ်း န့ဟူမ်၊ မိုဝ်း ကာင်။ ဂေ အီ ကွယ် ခဲင် ကာပိုမ်၊ အန် ဇဝ် တဲး ဂေ ဝီ လေး၊ တဝ်း မှုဝ် ဒါခိုယ်။ အာဆေ ယီ ဝဲန် ဇဝ်ဖြာ၊ အန် ဇဝ် ဒီ ဝီ တဲး ဂေ ကွယ် ခဲင် ပြဲ ကာဟဝ်း၊ ဒူင် ငွင့်။

7 အိုယ် မဲ ဇဝ်ဖြာ၊ ဒေါ ယဲတ့် မဲ ဇဝ် ဒီ အာတ့် ဂေ ဒူအီ အီ မုး ဒူအီ အာမျုဝ် မဲ၊ ဒေါ ဟာဝ် ဂေ ခဲင် ပြဲ ကာဟဝ်း တွိုန်၊

8 မာအိမ် ဟဲ့ ယေန့်။ ဘော ဂ့လာယ် ဟဲ့ စုဝ်း လူင် ခဲင် ဂါင်ဟြာဝ် အာတ့် တး မဲ ဇဝ်။ ဘော နွန် ဆီနာယ် ဟဲ့ ဒီယေန့် ဒေါ ကာပ့လုး မဲ ဇဝ်ဖြာ၊ အီ မုး ဇဝ်ဖြာ ပီ ကြိုပ် ယေ ဒူအီ အီဆာရေလ။

9 မဲ ဇဝ်ဖြာ ဘော ဘူင် တဲး ဂ့လာယ် စုဝ်း ကိူန် ကာဆဝ်။ တဲး န့ စွယ် ဘော မိူင် အီ မုး ခါဂုန် ပီ ဒွါ မဲ ဒီ ယေ။

10 ဂေ ဒူအီ အာမျုဝ် မဲ ဇဝ်၊ ဂေ ဟဲ့ လိုပ် ကွယ် ခဲင် မိူင် တီ။ မဲ ဇဝ်ဖြာ မိုဝ်း နဝ်း ဒီဟာင်။ ခုဝ်၊ မဲ နပ် ဒီ ဒွါ ခဲ့ ပီ လုဝ် ဂေ ဒူအီ ဂိန်၊ ဒူအီ ဖ့လာန်။

11 ဇဝ်ဖြာ ကာလာင် ဂြုဝ်း။ ဟဲ့ ဟွတ့်၊ န့ ဝီ မိုဝ်း ဂေ အီဘိုန့် ကိူန် အီ ကာလာင် လွင် အန် တီ ဒီ အီ ဟဝ်။

12 ဂေ ဟဲ့ တဝ်း၊ “ခုန်ဒီခမ် ဂေ ဒါ ဆိုက် ဟဲ့ ပီခြန် ဂေ ဒီ တဝ်။ ဂေ အီဘိုန့် ဝီ ဒိုဝ်း ကြုဝ် ပဲ့ ဟဲ့ အုန် ရန်ဆူ ဂေ တီ၊ ဝီ လာယ် ကာဆာင်။”

13 ဂေ မိူဝ် တဝ်း၊ “အိုယ်၊ ဘေ ဒူအီ အီ ဝါတ် ငဝ်၊ အီ ကွယ် ဒူင် ကွယ် မာဘူ၊ တဲး ဘေ နပ်၊ ဂေ အီဘိုန့် တွိုန် ဟဲ့ ပွိုန် ရွိုန် ဂေ ခြိဝ် ကိူန် ကာဆဝ်။ န့ ဘော မိုဝ်း အာရိုပ် မာဘ့လူယ် ပီ ပိတ် အီ ရွိုန် ဒီ ဖျီင် အန်၊ ဘော ခြိဝ် ဒီ ဟိုက် အန်။”

14 ဇဝ်ဖြာ အီ တာင် လွှိုမ် တူတ့် ဒွန် မျုဝ် ဘော အိုပ် တူတ့် ဒွန် မျုဝ်၊ အန် ဟဲ့ တဲး ဂေ ခုန်ဒီခမ် ကာယဝ်း။ ဒေါ အန် တီ န့ ဟဲ့ ပီ အိုမ် ဒါတ် စုဝ်း ဒီ နွန် ဆာလာဂူမ် တွိုန်။

15 ဂေ နွန် အီ ကွယ် ခဲင် မိူင် ဘာဆန် မုး နွန် စာ၊ နွန် အီ မိုဝ်း ကာဒဲ့ အီ စာ ကာဆဝ်။

16 အိုယ် ဘေ ဒူအီ အီ ကြိုပ် ဒဲင် ကာဒဲ့ နွန် စာ တီ၊ အာဝ် လုဝ် ဘေ လှယ့် ဂေ ဒူအီ အီ ကြိုပ် ဇဝ်ဖြာ ဒဲင် နွန် အီ မုး ဒူင် ကွယ် ဇဝ်ဖြာ။ အန် ဇဝ် ဒီ ဘော ကွယ် ဒီ နွန် အန် ဆေဆေ။

17 ဇဝ်ဖြာ မိုဝ်း လက်လဝ် ကိူန် ကာဆဝ်၊ အီ ပွိုန် ပဝ့် ကာဂုဝ်း ဒီ အီ။ အာဝ် ဝန် ဘဲန် မှိုန့် ဘဲန် မှိုန့်။ အန် ဇဝ် ဟဲ့ တး ဒီ နွန် ဆီနာယ် ဝီ ဟာဝ် ဇမ် ဒူင် ဘွတ်၊ ဒူင် ကြိုပ် ဆာခိုဝ် ဒူအီ ဒီ အန်။

18 အန် ဇဝ် ဟဲ့ ဒဲ့ ဒူအီ ကိူန် ကာဆဝ် ဟုဝ့် ဒူပ် အန် နာ ဒဲင်။ အန် ဇဝ် ဘော ဒိုဝ်း လက်ဆွင် ဒီ ဂေ ဒူအီ ပဲ့ ဟဲ့ ကာဂုဝ်း အွင် အန်။ ပါယ် တီ၊ ဇဝ်ဖြာ ဟဲ့ ဘူင် တဲး အန် ပွိုန် ဒီ ဝီ ကွယ် ဒူင် ကွယ် အန် တီ။

19 တဲး အေ အိူပ် ဇဝ်ဖြာ အီ ဟဲ့ ချွတ် အေ။ ဒွန် ဆီငဲ ဒွန် ဆီငဲ အန် ဘော စွယ် အေ ဒေါ မိုဝ်း အေ ဒုက်။

20 ဇဝ်ဖြာ တီ မုး ဇဝ်ဖြာ အီ ချွတ် ဒူအီ။ အန် ဘော မုး ဇဝ်ဖြာ အီ အိုပ် အေ။ အန် ဘော နပ် ဒီ ထုတ် လေး အေ ကွဲ့ တဲး အာဆာက် အေ စှိုမ်။

21 အန် ဇဝ် ဒီ ဘော ဂ့လွက် ဂိန့် ဂေ ရန်ဆူ အန် အာခ်ု မှာန်။ ဂေ အီ ဘူင် မှာပ် ဆေဆေ၊ အန် ဒီ ဘော တဲး အာဆာက် ဂေ စှိုမ်။

22 ဇဝ်ဖြာ တဝ်း၊ “ဂေ အီ မုး ရန်ဆူ မဲ၊ အုဝ် ဒီ ဒိုဝ်း လေး ဂေ ဒီ မိူင် ဘာဆန်။ အုဝ် ဘော တဲး ဂေ လေး ခဲင် အိုမ် နမ်မုက်ဆာရာ အီ လိုက် ကာဆဝ်၊

23 တဲး မဲ ဝီ ညဲတ့် ဟာဝ် ဒဲင် နှာမ် ဂေ၊ တဲး ဘော မာဆုဝ် မဲ ပွိုန် ဒီ ဟူမ် ဒီ လျီ့ ဖဲ နှာမ် ဂေ။”

24 အိုယ် ဇဝ်ဖြာ၊ ယေ ဟဲ့ ပွိုန် ဒီ ယိုဝ် မဲ ဇဝ် တး။ ယေ ဘော ယိုဝ် ဂေ အီ ကိူန် အီ ဒူပ် မဲ။ ယေ ဟဲ့ ယိုဝ် မဲ အီ မုး ဇဝ်ဖြာ ပီ ကြိုပ် ယေ ဘော ခုန်ဒီခမ် အီ အိုပ် ယေ။ မဲ ဇဝ် ဟဲ့ ဝီ တး ဒူင် ဘွတ်၊ ဒူင် ကြိုပ် ဆာခိုဝ် အီ ဒီ မဲ။

25 ဂေ အီ နပ် ဒီ တဝ်း မှုဝ်၊ ဂေ ဘော ယဲတ့် ဒီ အာတ့်။ ဂေ အီ ဘး ဒိင် ဘော ဒူပ် ဒီ ပန်။ ဂေ အီဘိုန့် အီ နပ် ဒီ က်ု ဂြိုင် ဘော ဟာဝ် ဒူပ် ဂေ။

26 ဂေ ဘော တဝ်း၊ “တဲး အေ အိူပ် ဇဝ်ဖြာ ကာတဲ ဂေ ဒူအီ ပီ အိုပ် အန် ဇဝ်။ အေ ဒူအီ အီဆာရေလ၊ တဲး အေ ကာဖြူမ် ဒီ အိူပ် ဇဝ်ဖြာ။”

27 န့ ဘော မိုဝ်း ဒူအီ ဘဲန် ခြိုဝ် ဘဲန် ခြိုဝ်။ န့ စုး ဒီ ခြိုဝ် အာဘေန်ယာမ် အီ ပြေတ့် လွှိုမ် အီ ဟဝ်။ န့ ဘော မိုဝ်း ဂေ ဒါ တာင် ယူဒါ အီ ကိူန် ကာဆဝ်၊ ဘော ဂေ ဒါ တာင် ခဲင် ခြိုဝ် အာဇေဘူလူန်၊ ဘော ဂေ ခြိုဝ် အာနာပ်ထာလီ၊ ဂေ ဘောကာဂ့လျီတ် ဟဲ့ ကာဒူပ် တး။

28 အိုယ် မဲ ဇဝ်ဖြာ၊ မဲ ဟဲ့ ဒွိုမ် ဘျ ပွုန် မဲ ဒီ ယေ။ ဒေါ တီ နီ၊ ယေ မှာန့်၊ တဲး မဲ ဇဝ် ဝီ ဘျ ပွုန် တီ ဒီ ယေ ပေါ အူ ဇေန့်။

29 မဲ ဇဝ်ဖြာ၊ မဲ မိုဝ်း ဟုဝ် ခဲင် မိူင် ယေရူဆာလဲမ်။ ဂေ ခုန်ဒီခမ် ခဲင် မိူင် အီ ဟဝ်၊ ဂေ ဒီ တိုယ် တး လက်ဆွင် ဂေ ဒီ မဲ ဇဝ်။

30 တဲး မဲ ဇဝ် ဘော မာနုဝ် ဂေ ဒူအီ ခဲင် မိူင် အဲဂိုပ် အီ ပီ မာဒုဝ် ပြဲ အီ ဟာယ် ကာဆဝ်၊ အီ ကွယ် ခဲင် နင် ဂုဝ်�လင်။ တဲး မဲ မာနုဝ် ဘော ဂေ ဒူအီ ဟဝ် အီ ပီ မက် ဒီဆုဝ် အီ ကွယ် ကာတဲ ဂေ ဂွန် မာမက်။ တဲး ဂေ ဝီ ခမ် ဒီ ဂူမ်၊ ခမ် ဒီ ယူမ်၊ တဲး ဂေ ကော ဝီ တး လှူ ရွိုန် ဂေ ဒီ မဲ ဇဝ်။ ဘော ဂေ အီ အိုင် ဒီ ကာဂုဝ်း၊ တဲး ဂေ တဝ် ကာယဝ်း ဟာဝ် ဒွန် ဘ့လာက်။

31 ဂေ ဒူအီ အဲဂိုပ် ဒီ တိုယ် ဒါလာမ် ဂေ တး ဇမ် ဒူင် ကွယ် မဲ ဇဝ်။ ဂေ ဒူအီ အီ ကွယ် မိူင် ကူဆာ၊^a ဂေ ဘော ပီခြန် ဂေ ဒီ တး ကြိုပ် ဇဝ်ဖြာ။^b

32 အိုယ် ဘေ ဒူအီ အီ ကွယ် ဒွန် မာန် ဒွန် မိူင် ဒဲင် ကာဒါယ် နီ၊ တဲး ဘေ ဘော တဝ်း မှုဝ်၊ အီ အိူပ် ဇဝ်ဖြာ။ တဲး ဘေ တဝ်း မှုဝ် ထမ်၊ အိူပ် အန် ဇဝ်။

33 န့ မုး အန် ဇဝ် အီ အိုပ် တူတ့် ခဲင် ဘ့လေန့်၊ အီ ဟဲ့ ဒွိုမ် မိုဝ်း ဆိန့် ဒေါ မွိုန်။ န့ မုး အန် ဇဝ် အီ နပ် ဒီ ကာလာင် ဂြုဝ်း တာင် ပီ ဟမ် ဘ့လေ ကာဆး။

34 တဲး ဘေ ဘော ကာလာင် ဘျ လွင် အာဖုင် ဒင်ခုဝ် ဇဝ်ဖြာ။ ပွုန် အန် အိုပ် ဂေ ဒူအီ အီဆာရေလ။ အာဖုင် ဒင်ခုဝ် အန် ဟဲ့ ပွိုန် ယိုဝ် ခဲင် ဘ့လေန့်။

35 မဲ ဇဝ်ဖြာ၊ မဲ ဟဲ့ မွှိုမ် အာမ် ကာဆဝ် ဒေါ လေး တး မဲ ဒူင် ကွယ် မဲ အီ ဘွတ် ကာဆဝ်။ ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဘော နပ် ဒီ ဒွါ ပ့လူမ်၊ ဒွါ ဟဲန့် ဒီ ဒူအီ ပီ အိုပ် အန်။ တဲး အေ ဘောကာဂ့လျီတ် ဘော အိူပ် အန် ဇဝ်။