1 အိုယ် ဘေ ဒူအီ ဘောကာဂ့လျီတ် အီ ကွယ် ဒဲင် ကာဒါယ်၊ တဲး ဘေ တဝ်း မှုဝ် ဒါခိုယ် ဘော အိူပ် ဇဝ်ဖြာ။

2 တဲး ဘေ တဝ်း မှုဝ် အီ အိူပ် အာဖုင် ဒင်ခုဝ် အန် ဇဝ်။ တဲး ဘေ တဝ်း၊ “အာဖုင် ဒင်ခုဝ် မဲ ဇဝ် ဟဲ့ တာင် ကာဆဝ်။”

3 တဲး ဘေ ကာလာင် ဒီ ဇဝ်ဖြာ တဝ်း၊ “ပဲ့ ဟဲ့ ဘူင် မဲ ဇဝ် ဟဲ့ မွှိုမ် အာမ် ကာဆဝ်။ မဲ ဇဝ် ဟဲ့ မိုဝ်း အာဖုင် ဒင်ခုဝ် တာင်၊ တဲး ရန်ဆူ မဲ ဇဝ် ဘောကာဂ့လျီတ် လုဝ် ဂူမ် ဂိုပ် ဒီ အာတ့် မဲ ဇဝ်။

4 ခဲ့ ကွယ် ဒူအီ ဒဲင် ကာဒါယ် ဘောကာဂ့လျီတ်၊ ဂေ ဒီ ဘော ကြိုပ် တူတ့် မဲ ဇဝ်။ ဂေ ဒီ တဝ်း မှုဝ် အီ အိူပ် မဲ ဇဝ်။”

5 တဲး ဘေ ယွတ် အီ မွှိုမ် အာမ် ပဲ့ ဟဲ့ ဘူင် ဇဝ်ဖြာ၊ တဲး န့ စွယ် ဒူအီ။

6 အန် ဇဝ် ဟဲ့ ဘူင် တဲး အိုမ် နမ်မုက်ဆာရာ ဟိတ်၊ တဲး န့ လိုဝ်း ကာဒါယ်၊ ဟဲ့ တဲး ဒါ ဒါ အေ တွိုန် ပွိုန် ဒီ ကာလုဝ်း ဟာဝ်။ တဲး အေ ခူယ် ကာဆဝ် ကူပ် ဟဲ့ ဘူင် ဇဝ်ဖြာ ပါယ် တီ။

7 န့ မုး ပွုန် ဇဝ်ဖြာ တီ အီ အိုပ် အေ ဆေဆေ။ အန် ဇဝ် ဘော ယွတ် ဘော ယိုဝ် ခဲ့ ကွယ် ဒူအီ ဒွန် မျုဝ်။ ဂေ ဒူအီ အီ ဝဲန် အန် ဇဝ်၊ ကွဲ့ တဲး ဂေ ပွိုန် ဒီ ပီခိုက် နဝ်း ဂေ။

8 ခဲ့ ကွယ် အေ ဒူအီ၊ တဲး အေ ဘော အိူပ် မျုက် ဇဝ်ဖြာ။ တဲး ဒွန် အီ ပွိုန် ဒီ ယိုဝ် မှုဝ် ပီ တဝ်း အေ။

9 အန် ဇဝ် ဟဲ့ ဘ်ု ရိတ် အာဆာက် အေ၊ ကွဲ့ တဲး အေ ယမ်။

10 မဲ ဇဝ်ဖြာ၊ မဲ ဟဲ့ ထေဝ် နဝ်း ယေ၊ တဲး န့ ပီ အီ ထာရွင် ရွိုန်။

11 မဲ ဇဝ် ဟဲ့ ဘူင်၊ တဲး န့ ဒုက် ဒီ နဝ်း ယေ၊ ဟဲ့ ပီ ယေ ကွယ် ခဲင် ယွတ့်၊ ဟဲ့ ပီ ဘော ယေ ပး ကြုဝ် စန်။

12 ပဲ့ ဟဲ့ ဘူင် မဲ ဇဝ်ဖြာ ဒီ ယေ၊ န့ ဟဲ့ ပီ အီ ဟဝ် ဟဲ့ ပဝ့် ဂိန့် ယေ။ န့ ဘော ပီ ယေ ဟဲ့ ကာလုဝ်း ဘော အိုမ် ဘော ငဝ်။ မာလဲ၊ မဲ ဇဝ် ယီ ဝီ ယဲတ့် တဲး ယေ ဇမ် ဒူင် ဘျုဝ် ဒါခိုယ်။

13 အုဝ် ဒီ ဟာဝ် ခဲင် ဟုဝ် မဲ ဇဝ်၊ လှူ ပီ လှူ အီ ဒုဝ့် ဒီ ငဝ်။ အုဝ် ဒီ ဘူင် ခဲ့ ပီ ဒွိုမ် ကာဆဲန့် အုဝ်။

14 ဒေါ ဇမ် အုဝ် ဒုက် တာင်၊ အုဝ် ဟဲ့ ကာဆဲန့် ဒီ ဘူင် ဘဲန် မျုဝ် ဘဲန် မျုဝ်။ ဒေါ တီ နီ၊ အုဝ် ဒီ ဝီ ဘူင် ခဲ့ တီ။

15 အုဝ် ဒီ ဒိုဝ်း မာဘူ အာလူင့် အီ ဂ့လန့် ဆီချာ၊ တဲး န့ ဘဲန် ပီ လှူ အီ ဒုဝ့် ဒီ ငဝ်၊ တဲး န့ အုး ငှုန် ဒီ အာတ့် မဲ ဇဝ်။ ဒဲင် တီ၊ အုဝ် ဒီ ဒိုဝ်း ဘော မာပဲ ဂေ မာမက်၊ လှူ ဒီ မဲ ဇဝ်။

16 အိုယ် ဘေ ဒူအီ အီ ရုဝ်ဆေ ဇဝ်ဖြာ ဘောကာဂ့လျီတ်၊ တဲး ဘေ တး ထူမ်။ အုဝ် ဒီ ကာလာင် ပဲ့ ဟဲ့ ဘူင် ဇဝ်ဖြာ ဒီ အုဝ်။

17 အုဝ် ဟဲ့ တဝ်း ဂြုဝ်း တာင်၊ ဆာခိုဝ် ဒီ ဇဝ်ဖြာ။ အုဝ် မိူဝ် ဟဲ့ အိူပ် အန် ဇဝ်။

18 ဒေါ အန် တီ ဆေ န့ မိုဝ်း အီ တူ မွှိုမ် ခဲင် နဝ်း အုဝ်၊ အန် ဇဝ် မိူဝ် တူ ထူမ် ဂြုဝ်း ပီ ဆာခိုဝ် အုဝ်။

19 ဒေါ တီ နီ၊ အန် ဇဝ် ယဲ့ ဟဲ့ ထူမ် ဂြုဝ်း ပီ ဆာခိုဝ် အုဝ်။ အန် ဇဝ် ဟဲ့ နုဝ် ပီ မှာန့် အုဝ် ဒီ အန်။

20 ခုဝ်၊ အုဝ် အိူပ် ဇဝ်ဖြာ ကူပ် တူ ဝဲန် အန် ဇဝ် ဂြုဝ်း ပီ မှာန့် အုဝ်။ အန် ဇဝ် မိူဝ် တူ ဝဲန် နဝ်း ရွက့် ကာဝေ အန် ဒီ အုဝ်။