1 အိုယ် မဲ ဇဝ်ဖြာ၊ တဲး မဲ ဆုင်ဖျာတ် နာ မှာန် နာ မွှိုမ်။ တဲး မဲ ဇဝ်ဖြာ နုဝ် ဂြုဝ်း ပီ ဆာခိုဝ် အုဝ်။ အုဝ် မိူဝ် မိုဝ်း နဝ်း ဆိူဝ်၊ တူ ကာလုဝ်။ တဲး မဲ ဇဝ် ထူမ် ပီ မှာန့် အုဝ် အီ လေး ခဲင် နဝ်း အုဝ် တီ။

2 တဲး မဲ ဇဝ် ယွတ် ခဲ့ ဆိူဝ် နဝ်း အုဝ်၊ တဲး မဲ ဘော ဆုင်ဖျာတ် နာ မှာန်။

3 မဲ ဒီ ဘော တး ယွတ်၊ တး ထေဝ် နဝ်း အုဝ် ဒေါ ကာတဲ ဆွိုမ်၊ မဲ ဇဝ် မိူဝ် တူ ယိုဝ် မာဆေ နာ တူ မွှိုမ် ခဲင် နဝ်း အုဝ်။ အုဝ် မိူဝ် ဟဲ့ အုန် နဝ်း၊ တူ ကာလာင် ဂြုဝ်း တူ မွှိုမ်။

4 အုဝ် တူ ဒူပ် ပီ ဘူင် ဂေ ဒူအီ ဟဝ်။ အုဝ် မိူဝ် ထူမ် ဒူပ် ဂြုဝ်း မဲ ဇဝ်ဖြာ၊ တူ ဘူင် ဒူပ် ပီ ဂေ ဒူအီ ဟာယ်၊ အီ မွှိုမ် ယုဝ်။

5 အုဝ် ဟာဝ် နာ မှဝ်၊ အုဝ် မိူဝ် ဟဲ့ ဒူပ် ဆီချာ ဒါရာ မဲ ဇဝ်၊ ကွဲ့ တဲး အုဝ် ကာလိုပ်။

6 အုဝ် ဆာခိုဝ် ဒီ မဲ ဇဝ်ဖြာ၊ ကူပ် ထူမ် မဲ ပီ ဆာခိုဝ် အုဝ်။ အုဝ် ဘော မှာန့်၊ တဲး မဲ ဒွါ ပီ မှာန့် အုဝ်။

7 အာဆေ ဆီ ဘိုင် မဲ ဇဝ်၊ မဲ ဇဝ် ဘော စွယ် တဲး အန် လေး တ ဒုက် ပီ ဘူင် ရန်ဆူ ဒီ အန်။ အုဝ် မှာန့်၊ တဲး မဲ ဇဝ် ချွတ် ဂေ။ နဝ်း ရွက့် ကာဝေ မဲ၊ အီ မွှိုမ် အာမ် ကာဆဝ်၊ တဲး န့ ဘော လိုဝ်း ဒီ ဂေ။

8 အုဝ် မှာန့်၊ တဲး မဲ ဇဝ် ယွတ် မဲန် အုဝ်၊ တဲး န့ ပီ မဲ ဇဝ် လိုမ်လာ ငါယ် မဲ။ တဲး အုဝ် ကွယ် ဆီချာ ဒူပ် မဲ၊ တဲး န့ ပီ မာဆိမ် ဟဲ့ ကွယ် ခြိုမ် ဖျီင် မာ အန်။

9 တဲး အုဝ် လွတ် တ ဂေ ဒူအီ အီ ဟာယ် ကာဆဝ် အီ ခါနှာပ် အုဝ်၊ ဘော ဒီ ဂေ ရန်ဆူ အီ ကာရူပ် အုဝ်၊ တဝ်း ဒီ ငဝ်း ယမ် အုဝ်။ ကွဲ့ တဲး ဂေ ယိုဝ် အုဝ်။

10 ဂေ ဒူအီ ဇိုဝ် တီ၊ ဂေ တူ နပ် ဒီ ကာဝေ အီ။ ဂေ ဘော ပီဖုင် ဂေ ဘော ကာလာင် မီ ဂြုဝ်း တူ မွှိုမ်။

11 အုဝ် ဟာဝ် နာ မှဝ်၊ ဂေ ဘော ဇဲတ် ဒီ ယွတ် ပန် အုဝ်။ ဒေါ တီ နီ၊ ဂေ ဟဲ့ ဘ်ု ဒီ ကာရူပ် အုဝ်၊ တဲး ဂေ ပွိုန် ဒီ မှေတ့် အုဝ်။ ဂေ ဘ်ု ဒီ ယွတ် ဆေဆေ၊ တဲး ဂေ ပဲ အုဝ်။

12 ဂေ ဘော ပီ မာခြင်ဆီ အီ ဟဲ့ ကာပြာန့် ကာဆဝ် ပီ ဒီ ဟူမ်၊ အီ ကွယ် ခဲင် ပြဲ ကာလှိုပ်၊ ဆီ ကာယာတ့် ဒီ ဟူမ် ယင် အီ။

13 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ဟာဝ် ခြဲ ဂေ၊ တဲး ဂေ စှိုမ်။ တဲး မဲ ဇဝ် စွယ် အုဝ်၊ တဲး မဲ တာ မာပွါ့ လာင် မဲ၊ တဲး အုဝ် လွတ် တ ဂေ ဒူအီ မိူက် တီ။

14 အုဝ် မှာန့်၊ တဲး မဲ ဇဝ် စွယ် တဲး အုဝ် လွတ် တ ဂေ ဒူအီ ဇိုဝ် တီ။ ဂေ နပ် မီ လွင် ဒဲင် ကာဒါယ် နီ၊ မိုဝ်း မီ အာဂျိုဝ် ဒဲင် ကာဒါယ် နီ။ န့ ယီ မုး ဒူအီ ပီ ရဝ်း မဲ၊ တဲး မဲ ဇဝ်ဖြာ ဒွါ ဂေ ဟူမ် ဖဲ၊ တဲး ဂေ မိုဝ်း ကြုဝ်ကြာမ် ကိူန်၊ တဲး ဂေ ဘော မိုဝ်း ဒီ ဒွါ ဘော ဒီ လှုက်လှာန် ဂေ။

15 အီ မုး အုဝ်၊ အုဝ် ဒီ ဘူင် နာ ဘွတ် နာ မွှိုမ် တဲး အုဝ် ပွိုန် ဒီ ယိုဝ် မဲ ဇဝ်။ ဒေါ ဝီ န့ဆိုဝ်း အုဝ်၊ မဲ ဇဝ် ဒီ ဘော ကွယ် ခူပ် အုဝ်၊ တဲး နဝ်း အုဝ် ဒါခိုယ်။