1 အိုယ် မဲ ဇဝ်ဖြာ၊ အုဝ် မှာန့်၊ မဲ ရဲ၊ မဲ ဂွင့် အုဝ် ကူပ် ဘိုင် အုဝ် ဒီ မဲ။

2 အုဝ် တဝ်း ဒီ မဲ ဇဝ်ဖြာ၊ “မဲ မုး ဇဝ်ဖြာ ပီ ကြိုပ် အုဝ်။ ခဲ့ မိုဝ်း အုဝ် နာ ဘွတ် နာ မွှိုမ်၊ န့ ဘော မုး တူတ့် ပီ ဒွါ မဲ ဇဝ် ဒီ အုဝ်။”

3 န့ ဘော မိုဝ်း ဂေ အီ ညှိုမ် ဆီချာ မဲ ဇဝ်၊ ဂေ မုး ဒူအီ ဘွတ်၊ ဒူအီ မွှိုမ် ခါခ်ု။ ဆေ အုဝ် ပွိုန် ဒီ ကွယ် ရိုမ် ဒူပ် ဂေ၊ န့ ဘော လဝ့် နဝ်း အုဝ်။

4 ဂေ အီ အွန် ဒီ ကြိုပ် ဇဝ်ဖြာ ဘဲန် ကာဒင် ဘဲန် ကာဒင်၊ ဂေ ဒီ ဘော ဝဲ ဒုက် ကာဆဝ်။ အုဝ် မိူဝ် တူ လှူ နှာမ် ဒုဝ် ဆတ်ဒါဝါ ဒူပ် ဂေ။ ဘော စိူဝ် ဇဝ်ဖြာ ဘဲန် ကာဒင် ဘဲန် ကာဒင် ပီ ကြိုပ် ဂေ တီ၊ အုဝ် တူ ဆီ ကာလာင်၊ တူ ဆီ တဲး န့ လေး ခဲင် မူတ့် အုဝ်။

5 မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် အုဝ်။ မဲ ဟဲ့ ဒွါ တူတ့် ဒွန် မျုဝ် ခဲ့ ပီ လုဝ် အုဝ်။ အီ ဒီ ဘဲန် နာ အာတ့် နီ ဒီ အုဝ်၊ မဲ ဇဝ် မိူဝ် ဟဲ့ နပ် တူတ့်။

6 ပဲ့ ဟဲ့ ဒွါ မဲ ဒီ အုဝ်၊ န့ ဟဲ့ မွှိုမ် ကာဆဝ်။ အုဝ် ဟဲ့ ပွိုန် ခါဂုန် အီ ဘွတ်၊ အီ မွှိုမ်။

7 အုဝ် ဒီ အိူပ် မဲ ဇဝ်ဖြာ။ မဲ ဟဲ့ ဒွါ အာကျာမ် အာငျာန် ဒီ အုဝ်။ ကာတဲ ဆွိုမ် နဝ်း ဖွိုမ် အုဝ် ဘော ဝီ မာနုဝ် အုဝ်၊ တဲး အုဝ် နပ်။

8 အုဝ် ဒီ လှုဝ်း မဲ ဇဝ်ဖြာ ဆေဆေ။ မဲ ကွယ် ရိုမ် ဒူပ် အုဝ်၊ ကွဲ့ တဲး အုဝ် လုဝ် ယုဝ် မာဆေ။

9 ကူပ် န့ ပါယ် တီ၊ ခဲင် နဝ်း အုဝ် ဒီ ဘော ဆီဘ့လာင်။ ဖွိုမ် အုဝ် ဒီ ဘော ဒါခိုယ်။ ဘော ဒုဝ် ဘူင့် အုဝ် ဒီ ဘော ကွယ် ဂျာမ်ဆာ။

10 ခုဝ်၊ မဲ ဇဝ် တူ ဝဲန် အုဝ် ခဲင် မိူင် မာရာန။ ဒူအီ အီ ဆီငါ ဘွတ်၊ မဲ ဇဝ် မိူဝ် တူ တဲး အန် ယမ်။

11 မဲ ဇဝ် ဟဲ့ နှဲ န့တေန့် အီ တဲး အုဝ် အိမ်။ ဒူင် ကွယ် မဲ ဇဝ် ဒီ ဘော ဘျုဝ် ဒါခိုယ် ကာဆဝ်။ ဆေ မဲ ကွယ် ဒူပ် အုဝ်၊ ဘော အုဝ် ဟဲ့ ဒါခိုယ် ဆေဆေ။