1 မဲ ဇဝ်ဖြာ၊ မှဝ် န့ ပါယ် ပီ ကွယ် တူင့် မဲ ဒီ အုဝ်။း မှဝ် န့ ပါယ် ပီ ချြီင် မဲ ဒီ အုဝ်၊ ဒေါ ကာဒုး အုဝ် ဒုက် ညှာပ်။း

2 ဂေ ဒူအီ မိူက် ဟဲ့ ပီခိုက် ကာဆဝ် နဝ်း ဂေ။ ဂေ ဟဲ့ ခါနှာပ် ဒူအီ ဂိန်။ ဂေ ဒီ လုဝ် ဝီ ခမ် မှာပ် ပီ ဘူင် ဂေ အီ တူ မွှိုမ် တီ။

3 ဂေ ဒူအီ မိူက် တီ၊ ဂေ ဘော နပ် ဒီ ပီဖုင် ဂေ၊ ကာလာင် ခဲ့ ပီ ဆီ ပွိုန် ဂေ။ ဂေ မိုဝ်း နဝ်း လောဖ ဘော ဒိူင် ဇဝ်ဖြာ။

4 ဂေ ဘော ပီခိုက် နဝ်း ဂေ၊ တူ နပ် ဒီ ရုဝ်ဆေ ဇဝ်ဖြာ။ ဂေ ဘော ကာဖာ ဘဲန် မျုဝ် ဘဲန် မျုဝ် တဝ်း၊ “တူ လုဝ် ဇဝ်ဖြာ။”

5 ပီ ဘူင် ဂေ၊ န့ အွင် ဆေဆေ။ ခုဝ်၊ ဂေ ပီခိုက် ဂေ၊ တူ ဇေန့်ဇာ လွင် ဒါရာ ဇဝ်ဖြာ။ ဂေ ဘော ကာညး ရန်ဆူ ဂေ ဒွန် အီ။

6 ခဲင် နဝ်း ဂေ၊ ဂေ တဝ်း၊ “အုဝ် တူ နပ် ဒီ ဘ့လိူင်၊ တူ မိုဝ်း ဒုက် ဒေါ မှဝ်။ အုဝ် ဒီ ကွယ် ဒါခိုယ် ဆေဆေ။”

7 မူတ့် ဂေ ဘော ကာလာင် မီ ဂြုဝ်း ဒိူင်၊ ဂြုဝ်း ကာလုဝ်၊ ဂြုဝ်း အေး အီ ဟဝ်။ ဂေ ဘော ကာလာင် အီ တူ မွှိုမ်၊ တဲး န့ ဘဲန် ဒုက် ဒီ နဝ်း အီ ဟဝ်။

8 ဂေ ဘော ချြီင် ဒုဝ် ဂေ၊ ကွယ် ခူပ် ရဝ် ခူပ် ဒူင် နာ။ ဂေ ဘော ဘ်ု ဒီ ယွတ် အာဆေ တူ နပ် ဒီ ခြဲ ဒုဝ် အန်။ ဟဲ့ ဟွတ့်၊ ဂေ ဘော ငဝ်း ဒူအီ ဇိုဝ် တီ။

9 ဂေ ဘော ကွယ် ခဲင် ပြဲ ကာလှိုပ် ပီ မာခြင်ဆီ။ ဂေ ဘော ချြီင် ဒုဝ် ဂေ၊ ဘော ဒိန့် န့ရပ် ဂေ၊ ဘ်ု ဒီ မှေတ့် ဒိူတ် ဂေ ဒူအီ ဒေါ တူ နပ် ဂေ ဒုဝ် ဂေ။

10 ဒူအီ ဂိန် ဂေ တီ၊ ဘော ကာဒုး ဒီ ဂူမ် ဒီ ယူမ် ကာဆဝ် ကူပ် တူ ပဲ ဂေ ဒူအီ မိူက် ဂေ တီ။

11 ဂေ ဒူအီ မိူက် တီ ဘော ဇေန့်ဇာ ခဲင် နဝ်း ဂေ တဝ်း၊ “ဇဝ်ဖြာ ဟဲ့ ဟွတ့် ပိဝ် ပီ ဘူင် အုဝ်။ အန် တူ ဆီ ယွတ်၊ တူ ဆီ ယိုဝ် အေ ဒေါ မှဝ်။”

12 အိုယ် မဲ ဇဝ်ဖြာ၊ မှာန့်၊ တဲး မဲ ယွတ်၊ ကွဲ့ ပိဝ် ဂေ ဒူအီ ဂိန် တီ။ မှာန့်၊ တဲး မဲ ဇဝ် စွယ် ဂေ ဒူအီ အီ ကာဒုး ဒုက်။

13 န့ ယီ မုး ဂေ ဒူအီ မိူက် တီ၊ ဂေ ဟဲ့ ဝဲန် မဲ ဇဝ်ဖြာ။ ဂေ ဘော တဝ်း ခဲင် နဝ်း ဂေ၊ “ဇဝ်ဖြာ တူ ပါယ် မှဝ် ဒီ အေ။”

14 မာလဲ၊ မဲ ဇဝ်ဖြာ ဟဲ့ ဟွတ့် ယိုဝ် တူတ့်။ ဂေ အီ ကာဒုး ဒုက် ကာဆဝ်၊ မဲ ဇဝ် ဘော တဝ်း၊ န့ မုး မဲ အီ ဒီ စွယ် ဂေ။ ဂေ ဒူအီ အီ ကာဒုး ဒုက် တီ၊ ဂေ ဒီ ဘော အာပ် ဒုဝ် ဂေ ဒီ မဲ ဇဝ်ဖြာ။ မဲ ဇဝ် ဘော စွယ် ကာဝေ ဂေ ဂွန် အီ တူ မိုဝ်း ဂုန့် မာ။

15 မှာန့်၊ တဲး မဲ ဇဝ် ဝဲန် ပွုန် ဂေ ဒူအီ မိူက်၊ ဝဲန် ဘော နာ တူ မွှိုမ် ပီ ဘူင် ဂေ။ တဲး မဲ ဇဝ် ဒမ် မှာပ် ဒီ ဂေ၊ ကွဲ့ ဟူ တဲး ဂေ ဆီ ဘူင် ဇိုဝ် တီ။

16 မဲ ဇဝ်ဖြာ၊ မဲ ဘော မုး ခုန်ဒီခမ် အီ ကွယ် ဆေဆေ ဘဲန် ဇာတ် ဘဲန် ဇာတ်။ ခဲ့ ကွယ် ဂေ ဒူအီ အာမျုဝ် ဟဝ်၊ မဲ ဇဝ် ဒီ ဘော တဲး ဂေ စှိုမ် တူတ့် ခဲင် မိူင် ပီ အိုပ် မဲ။

17 မဲ ဇဝ်ဖြာ ဒီ ဘော ထူမ် ဂြုဝ်း ပီ ဆာခိုဝ် ဂေ ဒူအီ နဝ်း တျီမ်။ မဲ ဒီ ဘော တဲး နဝ်း ဂေ ဝီ မိုဝ်း ပ့လူမ်၊ မိုဝ်း ဟဲန့်။ မဲ ဒီ ဘော ထူမ် ဂြုဝ်း ပီ မှာန့် ဂေ။

18 မဲ ဇဝ် ဒီ ဘော စွယ် ဂွန် အီ တူ မိုဝ်း ဂုန့်။ တဲး မဲ ဘော စွယ် ဂေ အီ ခမ် အီ ဟဝ် ခါနှာပ် ဂေ။ တဲး မဲ ဆုင်ဖျာတ် နာ မှာန်၊ ကွဲ့ တဲး န့ ဆီ မိုဝ်း ဒူအီ၊ အီ ပွိုန် ဒီ ကာစွှာ့ ခါနှာပ် အီ ဟဝ်။