1 ဝါယ် အန် တီ အာယုဝ်ဘာ ဝီ ကာလာင် ဂြုဝ်း။

2 အန် တဝ်း၊ “ဟဲ့ မှာန်၊ ဇဝ်ဖြာ ဟဲ့ ကွယ် ဆေဆေ။ ပါယ် တီ ဘော ဂြုဝ်း အုဝ် ဟဲ့ မှာန် အာခါခ်ု။ အန် ဇဝ် ဟဲ့ ဘူင် တဲး အုဝ် စှိုမ် အာမူ အုဝ်။ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ဘူင် တဲး န့ ဆွင့် ကာဆဝ် ဒီ နဝ်း ဖွိုမ် အုဝ်။

3 ဒေါ ဆီ မိုဝ်း အုဝ် ဖွိုမ် ဒီ ဟိုဝ်း လိုပ် ဟိုဝ်း လေး ဒေါ ဆီ အိမ် အုဝ် နီ၊

4 အုဝ် မိူဝ် တူ တဲး ဂြုဝ်း ဟာယ် ဂြုဝ်း မိူက် လေး ခဲင် မူတ့် အုဝ်။ အုဝ် မိူဝ် တူ တဲး ဆီဒ အုဝ် ကာလာင် ဂြုဝ်း ကာလုဝ် ခေါ အူ ဇေန့်။

5 အုဝ် မိူဝ် တူ တဝ်း ဂြုဝ်း ပီ ကာလာင် ဘေ ဒီ အုဝ် ဟဲ့ မှာန်။ အုဝ် မိူဝ် တူ တဲး ဆာရေ အုဝ် စှိုမ်၊ တဲး န့ ကော ဇမ် ယမ် အုဝ်။

6 စုဝ် ဆီ မိုဝ်း အုဝ် အာဆာက် နီ၊ အုဝ် မိူဝ် ဒီ ကာလာင် ဒီ ဘေ၊ အုဝ် ဟဲ့ မိုဝ်း နဝ်း ဆိူဝ် နဝ်း မှာန်။ နဝ်း အုဝ် မိူဝ် တူ ဝီ ဒမ် မှာပ် ဒီ ဒုဝ် ဘြိမ် အုဝ် ဒေါ မှဝ်။

7 တဲး ဇဝ်ဖြာ ဒမ် မှာပ် ဒီ ဂေ အီ မုး ရန်ဆူ အုဝ်၊ ပီ အန် ဒမ် မှာပ် ဒီ ဂေ ဒူအီ ဟာယ် ဒူအီ မိူက်။ တဲး ဂေ အီ ကာဘး ဒီ အုဝ် ဝီ ခမ် မှာပ် ဂေ ပီ ပီ ခမ် ဂေ အီ တူ မိုဝ်း နဝ်း ဆိူဝ် နဝ်း မှာန်။

8 ခုဝ်၊ ဒူအီ အီ တူ ရုဝ်ဆေ ဇဝ်ဖြာ တီ၊ ဆေ ဇဝ်ဖြာ ဟီ ဒိုဝ်း လေး ဖွိုမ် အန်၊ ဆေ ဇဝ်ဖြာ ဟဲ့ တဲး အာဆာက် အန် တူတ့်၊ အန် တူ မိုဝ်း ဒီ နှဝ့် န့ဒဝ့် မာဆေ။

9 ဒေါ ဟဲ့ ခမ် အန် ဒုက် တာင် တွိုန်၊ ဇဝ်ဖြာ တူ ထူမ် ပီ ဆာခိုဝ် ပီ မှာန့် အန်။

10 ဒူအီ ဝီ တီ အန် မိူဝ် တူ မိုဝ်း နဝ်း ဒါခိုယ် ဒီ ဒူပ် ဇဝ်ဖြာ အီ အိုပ် တူတ့် ဒွန် မျုဝ်၊ အန် မိူဝ် တူ ဆာခိုဝ် ဆေဆေ ဒီ ဇဝ်ဖြာ။

11 အုဝ် ဒီ မာနုဝ် ဘေ၊ တဲး ဘေ နပ် ခဲ့ တာင် ပွုန် ဇဝ်ဖြာ။ အုဝ် မိူဝ် ဒီ ကာလာင် ဘျ ဒီ ဘေ၊ တဲး ဘေ နပ် ပဲ့ ဟဲ့ ဘူင် ဟဲ့ ရဲန် အုန် ဇဝ်ဖြာ အီ အိုပ် တူတ့် ဒွန် မျုဝ် အာဒါ ဘေ။

12 ဘေ ဒွန် အီ မိူဝ် ဟဲ့ ဟွတ့် နပ် လွင် အန် တီ။ မှဝ် န့ ပါယ် ပီ ဝီ ကာလာင် ဘေ ဂြုဝ်း ပီယေန့် ဂြုဝ်း ဒီလူယ် ဒီလာယ် ပါယ် တီ။း

13 ရုး ပီ ဒီ ဒွါ ဇဝ်ဖြာ ဒီ ဒူအီ ဟာယ် ဒူအီ မိူက် ဘော ခါဂုန် ဂေ ဒူအီ အီ အိုင် ဒီ ခါနှာပ် အီ ဟဝ်၊ ဇဝ်ဖြာ အီ အိုပ် တူတ့် ဒွန် မျုဝ် ဒီ ဒွါ ဒီ ဂေ ပါယ် နီ။

14 ဂေ ပီ ဘော ဟဲ့ မိုဝ်း ဂွန် ဂေ လှာန် ကိူန် မိူဝ်၊ ဂေ ယီ ဒီ ဝီ ယမ် ဒီ မာပွါ့ လာင်။ ဆေ အာဝ် ပါယ် တီ၊ ဂေ ဒီ ယမ် ကူပ် တူ မိုဝ်း ဂေ ပီ ဒီ ဟူမ်။

15 ဂေ အီ ဆီ ဂိတ် ဆီ ကွယ်၊ ဂေ ဒီ ဘော ဝီ ယမ် ဒီ ဆဝ် ရောဂါ။ ယာ ဆီပြး ဂေ တီ မိူဝ် တူ ငှုန် တူ ယာမ်။

16 ဂေ ဒူအီ ဟာယ် ဒူအီ မိူက် တီ ဂေ ပီ ဘော ဟဲ့ မိုဝ်း ရွိုန် ကိူန်၊ တဲး န့ ကော ပီ မ့ပိုမ် ကာပုး၊ ပီ ဘော ဟဲ့ မိုဝ်း ခြိုင် တာ၊ တဲး န့ ကော နှဲန် မ့ပိုမ် ကာဒါယ် ကာပိတ် မိူဝ်၊

17 ဂေ ယီ တူ ပွိုန် ဒီ စ်ု ဒီ တာ ကြုဝ် ဂေ တီ။ ဒူအီ အီ မိုဝ်း နဝ်း ဆိူဝ် နဝ်း မှာန် ဒီ ဝီ ဒိုဝ်း ဒီ တာ၊ ဘော ဂေ ဒူအီ အီ တူ မိုဝ်း မှာပ် ဒီ ဝီ ဒိုဝ်း လာယ် ကာဆာင် ရွိုန် ဂေ တီ။

18 ကာင် ပီ ဆမ် ဂေ မိူဝ်၊ အာဝ် မန် အာဝ် မိုဝ်း ပ့လူမ် မာဆေ ပီ ကာင် ပုင်ပျေန့်။ ကာင် တီ ပီ ဘော ထိုပ် ဒူင် ဘ်ု မှာယ် ဂေ ဒီ မာန်။

19 ဒေါ လိုပ် အိတ် ဂေ၊ ဂေ မုး ဒူအီ ခြမ်။ မာလဲ၊ ဒေါ ဝီ န့ဆိုဝ်း ဂေ၊ ကြုဝ်ကြာမ် ဂေ ဟဲ့ ဟွတ့် ဘျုဝ်း ဟြာယ် တူတ့်။

20 အာဖေ အာရေ ဒီ ဘော ခုင်ခြး ဂေ ပီ အိုမ် ပြဲ့ အီ တး အူ ဇေန့်။ ခုန် တာင် ဘော ဂ့လာယ် တာင် မိူဝ် ဒီ တး ဇုး လှဲ ဂေ ခဲင် မှိုဝ်။

21 ခုန် အီ တး နာ လေး ဆီငဲ ဒီ ဘော တး ဘုတ် ဂေ၊ တဲး ဂေ ဘိုန့် ဟာဝ် ဒူပ် ဟဲန့် ခုန် တီ။ ခုန် တီ ဒီ ဘော တး ဘုတ် လေး ဂေ ဒူင် ကွယ် ဂေ။

22 ခုန် မိူဝ် တူ နပ် ဒီ ကာဝေ ဂေ။ အန် ဒီ တး ဘုတ် ကာဆဝ် ဂေ။ ဂေ မိူဝ် ဒီ ဂျုဝ်ဂျာ ဒီ တဝ် လေး တ ဟဲန့် ခုန် တီ။

23 န့ ပီ ခုန် ဒီ ဘော ကာထ ဒဲ ကာညး ဂေ ဘော နဲန ဂေ။ ခုန် ဒီ ဘော ဒီငိုန့် တး ဟုဝ် တဝ် ဂေ၊ ကွဲ့ တဲး ဂေ ပွိုန် ဒီ ကွယ် ဒူင် ကွယ် ဘြိမ် ဂေ။”