1 ပန် တီ န့ မုး နာင် ဒီနာ အီ မုး ဂွန် အီဘိုန့် နာင် လေအာ တွိုန်။ အူ ဆီငဲ နာင် ဒီနာ တွိုန် ဟာဝ် လေး ခဲင် ကာင် အန်၊ တဲး အန် ဟာဝ် ဝိန် ဒီ လဲ ဒီ ဂွန် အီဘိုန့် အီ ကွယ် ခဲင် မိူင် တီ။ 2 ဒေါ အန် တီ န့ မိုဝ်း ဒါ အီ အိုပ် မိူင် တီ။ အန် မုး ဒူအီ အာမျုဝ် ဟီဝိတ် အီ စိူဝ် အာဟာမုဝ်။ ဂွန် အီမာယ် အန် အူ ဝီ၊ အန် စိူဝ် အာဆေခေမ်။ အာဆေခေမ် တီ၊ အန် တာ ယိုဝ် နာင် ဒီနာ၊ အန် ဘော မှေတ့် လုတ့် နာင် ဒီနာ တွိုန်။ 3 နဝ်း အန် ဆီ ပွိုန် ကာဆဝ် နာင် ဒီနာ။ အန် မိူဝ် ရွက့် ဘော ဘူင် ဘဲန် မျုဝ် ဘဲန် မျုဝ်၊ တဲး နာင် ဒီနာ ဝီ ရွက့် အန်။ 4 အန် ဘော ဟာဝ် ကာလာင် ဒီ ဂုန့် အန် တဝ်း၊ “တဲး မဲ ဒီမွှတ် နာင် ဒီနာ တွိုန် ဒွါ ဒီ အုဝ်၊ တဲး အန် ဘဲန် အီဘိုန့် အုဝ်။”

5 ပန် တီ အာကူပ် တွိုန် ဘော နပ် ဂေ ဟဲ့ လုတ့် ဂွန် အီဘိုန့် အန် အီ စိူဝ် နာင် ဒီနာ။ ဒေါ အန် တီ ဂွန် အီမာယ် အန်၊ ဂေ ကွယ် ခဲင် နာ၊ ဘ်ု ဒုဝ် ဆတ်ဒါဝါ ဂေ။ ခုဝ်၊ အန် တူ တဝ်း မာဆေ၊ နှဝ့် ဂေ ဝီ တး ဇမ် ဒူင် ကွယ် အန်။

6 န့ ယီ မိုဝ်း အာဟာမုဝ် တွိုန် အီ မုး ဂုန့် အာဆေခေမ်၊ အန် တး ဇမ် ဒူင် ကွယ် အာကူပ်၊ တဲး အန် ကာမွုန် ဒီ အာကူပ်။ 7 ဒေါ ဝီ တး ဇမ် ဂွန် အီမာယ် အာကူပ် ဒူင် ကွယ် အန်၊ ဂေ ဘော နပ် တူတ့် လွင် အန် တီ၊ တဲး နဝ်း ဂေ လိုဝ် ကာဆဝ်။ ဂေ ဘော ရူ ကာဆဝ် အူ ဇေန့်။ ဂေ ထာင်၊ ပဲ့ ဟဲ့ ဘူင် အာဆေခေမ် တွိုန် ဟဲ့ တဲး အာကူပ် ဝီ စှိုမ် ဆာရေ။ အာတီ အာဝ် ပွိုန် ဘူင်။

8 အာဟာမုဝ် တွိုန် ယီ ကာလာင် ဒီ ဂေ တဝ်း၊ “နဝ်း ဂွန် အုဝ် အီ စိူဝ် အာဆေခေမ် ကာပြာ ကာဆဝ်၊ ဆီ ပွိုန် ဂွန် အီဘိုန့် မဲ။ တဲး မဲ ဒွါ အန် ဒီ ဂွန် အုဝ်၊ တဲး ဂါယ် လာယ် ခတ်။ 9 တဲး ဂွန် အာမျုဝ် ဘေ ဘော ဂွန် အာမျုဝ် ယေ ခတ် လာယ် ဒိုဝ်း။ တဲး ဘေ ဒွါ ဂွန် အီဘိုန့် ဘေ ဒီ ယေ။ ဟဲ့ ဟွတ့် ဘော ယေ ဒီ ဝီ ဒွါ ဂွန် အီဘိုန့် ယေ ဒီ ဘေ။ 10 တဲး ဘေ ဘူင် ပါယ် တီ တဲး ဘေ ကွယ် ရိုမ် ဒူပ် ယေ။ ယေ ဒီ တဲး ဘေ ဘူင် ပီ အိုင် ဘေ ခဲင် မိူင် ယေ နီ။ တဲး ဘေ ကွယ် ဒီ တီ၊ တဲး ဘေ ဟာဝ် ဒွန် ပ့လုဝ့်၊ တဲး ဘေ စိုဝ်း ဒူင် ဒီ ကွယ် ဘေ ဒီ နီ။”

11 ဘော အာဆေခေမ် တွိုန် တဝ်း ဒီ ဂုန့် ဘော အူကတ် အူဝါ နာင် ဒီနာ တွိုန်၊ “တဲး ဘေ ကာဝေ အုဝ်။ ခဲ့ ပီ ဒီ မှာန့် ဘေ ဒီ အုဝ်၊ အုဝ် ဒီ ဒွါ ဒီ ဘေ။ 12 ဘေ ဘော မှာန့် ခဲ့ မှဝ်၊ အုဝ် ဒီ ဒွါ ဒီ ဘေ။ တဲး ဘေ ယီ ဒွါ အူ မျုဝ် တီ ဒီ အုဝ်။ တဲး ဘေ ဒွါ နာင် ဒီနာ တွိုန်၊ တဲး အန် ဘဲန် အီဘိုန့် အုဝ်။”

13 ဂေ အူကတ် အူဝါ နာင် ဒီနာ တွိုန် ဝီ ဝျီ့ ဂြုဝ်း တီ။ ကူပ် ဟဲ့ ဘူင် အာဆေခေမ် နာ စီစိဝ် ဒီ ဝါ ဂေ၊ ဂေ ယီ တူ ကာလာင် ဂြုဝ်း မှာန် ဂြုဝ်း ဆိူဝ် ဒီ အာဆေခေမ် ဂါယ် ဂုန့် အန်။ 14 ဂေ တဝ်း၊ “ယေ တူ ပွိုန် ဒွါ ဝါ ယေ ဒီ ဒူအီ အီ တူ ဆွာ့ ဝဲန် ဟုန် လခါနာ အီမာယ်၊ တဲး ဝါ ယေ ဘဲန် အီဘိုန့် ဝီ တီ။ ဆေ ယေ ဘူင် ပါယ် တီ န့ ဒီ တဲး ဆာရေ ယေ လိုဝ်။ 15 ဆေ ဘေ ယီ ဘဲန် ပီ ယေ၊ ဆေ ဘေ ဒီ ဆွာ့ ဝဲန် ဟုန် လခါနာ အီမာယ် ဘေ၊ ယေ ဒီ ဒွါ ပီ မှာန့် ဘေ။ 16 ဆေ ဘေ ဘူင် ပါယ် တီ ယေ ဒီ ဒွါ ဂွန် အီဘိုန့် ယေ ဒီ ဘေ။ ဘော ယေ ဒီ ဒိုဝ်း ဂွန် အီဘိုန့် ဘေ၊ တဲး ယေ လာယ် ခတ်။ ပန် တီ ယေ ဒီ ဘော ကွယ် ရိုမ် ဒူပ် ဘေ၊ တဲး အေ ဘဲန် အူ မျုဝ်။

17 ဆေ ဘေ တူ ဆီ ဘူင် ပီ မှာန့် ယေ ဇိုဝ် တီ၊ ယေ ဒီ ဒိုဝ်း ဂွန် အီဘိုန့် ယေ၊ ဟာဝ် ပေါ ပ့လုဝ့်။” 18 ဂေ ဟဲ့ ဟွတ့် ကာလာင် ဂြုဝ်း တီ၊ အာဟာမုဝ် ဂါယ် ဂွန် အန် အီ စိူဝ် အာဆေခေမ် တွိုန်၊ ဂါယ် အိုင် ပီ တဝ်း ဂေ။ 19 အာဆေခေမ် တဝ်း ဒီ ဘူင် ပီ မှာန့် ဂေ အူ ဇေန့်။ ခုဝ်၊ အန် ရွက့် ကာဆဝ် ဂွန် အီဘိုန့် အာကူပ် တွိုန်။ ဂေ အီ ကွယ် ခဲင် န့ဟူမ် ဂုန့် အန်၊ ဂေ ဒီ ဘော ဝီ ထူမ် ဒူပ် ပီ ဘူင် အန်။ 20 ပန် တီ အာဟာမုဝ် ဂါယ် ဂွန် အန် အီ စိူဝ် အာဆေခေမ်၊ ဂါယ် ဟာဝ် ဇမ် ဘာင် မာလုဝ်း မိူင် ဂေ။ ဂါယ် ဝီ ကာလာင် ဂြုဝ်း ဒီ အီမာယ် ဒွန် အီ၊ အီ ကွယ် ခဲင် မိူင် ဂေ။ ဂါယ် တဝ်း၊ 21 “ဂေ ဒူအီ တွိုန်၊ ဂေ မိုဝ်း နဝ်း မွှိုမ် ဒီ အေ။ တဲး ဘေ ခ့ဝါင် ဂေ ဟာဝ် ဝိန် ဒီ လဲ ခဲင် မိူင် အေ၊ တဲး ဘေ ဘော တဲး ဂေ ကွယ် ခဲင် မိူင် အေ။ မိူင် အေ ဟဲ့ တာင်၊ တဲး ဘော ဂေ ပွိုန် ဒီ ကွယ်။ အေ ဒီ ဘော ပွိုန် ဒီ ဒိုဝ်း ဂွန် အီဘိုန့် ဂေ၊ တဲး အေ လာယ် ခတ်။ ဘော အေ ဒီ ဒွါ ဂေ ခတ် လာယ် ဂွန် အီဘိုန့် အေ။ 22 ဆေ ဂေ ယီ ဒီ ကွယ် ရိုမ် ဒူပ် အေ၊ တဲး အေ ဘဲန် အူ မျုဝ်၊ ဂေ မှာန့် တဲး အေ ဘူင် အူ မျုဝ်။ ဂေ မှာန့်၊ တဲး အေ အီမာယ် ဒွန် အီ ဆွာ့ ဝဲန် ဟုန် လခါနာ အေ၊ တဲး အေ ပီ ဂေ ဒွန် အီ။ 23 ဆေ အေ ဘူင် ပါယ် တီ မာဘူ ဂေ မာပဲ ဂေ ဘော ကြုဝ်ကြာမ် ဂေ ဒွန် မျုဝ် ဘော ဒုဝ် ဆတ်ဒါဝါ ဂေ ဒွန် မျုဝ်၊ န့ ဒီ ဘဲန် ကြုဝ်ကြာမ် အေ ဒွန် မျုဝ်။ ခုဝ်၊ တဲး အေ ဘူင် ပီ မှာန့် ဂေ၊ တဲး ဂေ ကွယ် ရိုမ် ဒူပ် အေ ဆေဆေ။”

24 ဂါယ် ဟဲ့ ဟွတ့် ကာလာင် ပါယ် တီ ဂေ ဒါ အီ ကွယ် ဒီ ခူပ် မာလုဝ်း မိူင် တွိုန်၊ ဂေ ဒွန် အီ အိုင်။ ဂေ အီမာယ် ဒွန် အီ ဘော ဆွာ့ ဝဲန် ဟုန် လခါနာ ဂေ။

25 ဝါယ် အန် တီ ဟဲ့ နုဝ့် အူယ် ဆီငဲ၊ န့ မုး ဒေါ ဟဲ့ ဆဝ် ဂေ ဒီ ဒိမ် ဒွန် အီ၊ ဂွန် အာကူပ် အီ စိူဝ် အာဆီမေအူန် ဂါယ် အာလေဝီ၊ အီ မုး အီကတ် နာင် ဒီနာ တွိုန်၊ ဂါယ် ဝီ ဒိုဝ်း မာပွါ့ လာင် အူ ဝီ အူ ဘ့လ၊ ဟာဝ် ခဲင် မိူင်၊ ငဝ်း ဝဲန် အီမာယ် ဒွန် အီ။ ဂေ ဒူအီ ခဲင် မိူင် ယီ တူ နမ်လှုဝ်း နမ်ရွယ် မာဆေ။ 26 ဂါယ် ဘော ငဝ်း အာဟာမုဝ် ဘော ဂွန် အီမာယ် အန်၊ တဲး ဂါယ် ယမ် ဒီ မာပွါ့ လာင် ဂါယ်။ ဟဲ့ ဟွတ့်၊ ဂါယ် ဝီ ဒိုဝ်း နာင် ဒီနာ၊ လေး ခဲင် ကာင် အာဆေခေမ် တွိုန်၊ ဝီ ဝေန့် ဒူင် ကွယ် ဂေ။ 27 ပန် တီ ဂေ ဂွန် အီမာယ် အာကူပ် ဝီ ဟာဝ် ခဲင် မိူင်၊ ဒိုဝ်း အုန် တူတ့် ကြုဝ်ကြာမ် ဂေ ဒူအီ ယမ်။ ကူပ် ဟဲ့ လုတ့် အာဆေခေမ် ဒီ ဝါ ဂေ၊ ဂေ ဟဲ့ ဘူင် ပါယ် တီ။ 28 ဘော မာဘူ၊ မာမက်၊ မာလာ ဘော တူတ့် တူတ့် ပီ မိုဝ်း ဂေ၊ ဘော ခဲင် မိူင် ဘော ခဲင် နာ၊ ဂေ ဒိုဝ်း တူတ့် ဒွန် မျုဝ်။ 29 ဂေ ဘော မှေတ့် အီဘိုန့် ဂေ ဂွန်၊ ဝီ တိုယ် ဟာဝ် ဇမ် ဒူင် ကွယ် ဂေ။ ခဲ့ မိုဝ်း ကြုဝ်ကြာမ် ခဲင် မိူင် တွိုန်၊ ဂေ ဒိုဝ်း တူတ့်၊ တဲး န့ ဘဲန် ကြုဝ်ကြာမ် ဂေ။

30 ပန် တီ အာကူပ် တွိုန် ဝီ ကာလာင် ဂြုဝ်း ဒီ အာဆီမေအူန် ဂါယ် အာလေဝီ တွိုန်။ အန် တဝ်း၊ “ဘာယ် ဟဲ့ ဘူင် တဲး အုဝ် ဇမ် ဒုက် တာင်။ ဘာယ် ဟဲ့ ဘူင် တဲး ဂေ ဒူအီ အီ ကွယ် ခဲင် မိူင် တီ ဝီ ရူ ဒီ အုဝ်။ ဘော ဂေ ဒူအီ အာမျုဝ် ကာနန့်၊ ဘော ဂေ ဒူအီ ဖေရေဆိတ်၊ ဂေ ဒီ ရူ ဒီ အေ။ ဂေ ဒူအီ အီ ကွယ် ရိုမ် ဒူပ် အုဝ်၊ ဂေ တူ ကိူန်။ ဂေ ဒူအီ အီ ကွယ် မိူင် တီ၊ ဂေ ဒီ ဝီ ကာဖြူမ် ဒီ ကာဂုဝ်း ဒီ အေ။ ဟဲ့ ဟွတ့်၊ ဘော အုဝ် ဘော န့ဟူမ် အုဝ်၊ အေ ဒီ စှိုမ်။”

31 ဂွန် အန် အာ ဝီ တွိုန် တဝ်း၊ “အန် ဟဲ့ ဘူင် တဲး န့ ပီ ဝါ ယာယ် မုး ယာ မာလမ်။ မဲ ထာင်၊ ယာယ် ဒီ တဲး အန် ဘူင် ပါယ် တီ။း အာဝ် ပွိုန်။”