1 ဝါယ် အန် တီ အာကူပ် တွိုန် ဝီ ယွတ်၊ အန် ဘော ယိုဝ် အာဆုဝ် အီ မုး အီကတ် အန်။ အာဆုဝ် မိုဝ်း ဘော ဒူအီ ဖွုန် မာယဝ်း ဝီ အီ ဟာဝ် ရိုမ် ဒူပ် အန်။ ဒေါ အန် တီ အာကူပ် ဝီ ကာယဝ်း ဂွန် အန်၊ တဲး ဂေ ကွယ် ရိုမ် ဒူပ် နာင် လေအာ ဂါယ် နာင် ရာအေန်၊ ဘော မှာယ် ဂါယ် အာ ဝီ။ 2 အန် တဲး မှာယ် တီ ဘော ဂွန် ဂါယ် ယဲတ့် ဒီ အာတ့်။ ပန် တီ အန် တဲး နာင် လေအာ ဒူပ်။ ဟဲ့ ဟွတ့်၊ အန် တဲး နာင် ရာအေန် ဂါယ် အာယုဝ် ဒူပ် ဒီ ပန်။ 3 အာကူပ် ယီ ယဲတ့် ဒီ အာတ့် ဂေ ဒွန် အီ။ ဒေါ ဟာဝ် အန် ကာတတ် အီကတ် အန်၊ အန် ခြိုပ်ခြဝ် ဂိုပ် ဘူ ဇေန့်။

4 အာဆုဝ် တွိုန် ယီ ဟာဝ် ရွုး အန်။ အန် ငျီမ် ဝါ အန်၊ အုး အန်။ ဟဲ့ ဟွတ့် ဂါယ် အာ ဝီ ဘော လာယ် ယာမ်။ 5 ပန် တီ အန် ဝီ ယွတ်၊ ဘော ယိုဝ် ဂေ အီဘိုန့် ဘော ဂွန် ဂေ၊ အန် ဒီမွှတ် တဝ်း၊ “ဂေ အီ ဒူပ် မဲ နီ၊ ဂေ မုး အာဆေ။း” အာကူပ် ဝီ တဝ်း၊ “ဂေ မုး ဂွန် ပီ ဒွါ ဇဝ်ဖြာ ဒီ မှာယ် မဲ။”

6 ပန် တီ ဂါယ် မှာယ် အီဘိုန့် ဘော ဂွန် ဂါယ် ဟဲ့ တး ကာတတ် ဒူင် ကွယ် အန်၊ ခြိုပ်ခြဝ်။ 7 ဘော နာင် လေအာ တး ကာတတ်၊ ခြိုပ်ခြဝ် ဒီ အာတ့် အန်။ ဟဲ့ ဟွတ့်၊ ဘော အာယုဝ် ဘော နာင် ရာအေန် ဝီ တး ဒီ အာတ့် အန်၊ ခြိုပ်ခြဝ်။

8 ပန် တီ အာဆုဝ် ဝီ တဝ်း၊ “မှဝ် မ့ပါယ် ပီ တိုယ် မဲ ဂေ ဒုဝ် ဆတ်ဒါဝါ ပီ ယိုဝ် အုဝ် ဒေါ တး အုဝ်။း”

အာကူပ် တဝ်း၊ “အုဝ် ထာင်၊ မဲ ဒါ ကာညာ အုဝ် ဒီ ကာဝေ အုဝ်၊ ဆေ မဲ ယိုဝ် ဒုဝ် ဆတ် ဂေ တီ။”

9 အာဆုဝ် ဝီ တဝ်း၊ “အုဝ် ဟဲ့ မိုဝ်း ကိူန်၊ အုဝ် တူ လုဝ် မာဆေ။ တဲး မဲ ဝါ အုဝ် အုန် ကြုဝ် မဲ။”

10 အာကူပ် တွိုန် ဝီ တဝ်း၊ “အာအိုဝ်း၊ ဆေ မဲ ဟဲ့ ကာဝေ အုဝ်၊ တဲး မဲ ဒိုဝ်း ခေါဆွင် အုဝ်။ အုဝ် ဟဲ့ ယိုဝ် မဲ ဒေါ တီ နီ၊ န့ ပီ အုဝ် ဟဲ့ ယိုဝ် နာ ဇဝ်ဖြာ။ နာ မဲ ဟဲ့ ဒါခိုယ် ဒီ အုဝ်။ 11 ခုဝ်၊ အုဝ် မှာန့်၊ တဲး မဲ ဒိုဝ်း ပီ တိုယ် အုဝ် ဒီ မဲ။ ဇဝ်ဖြာ ဟဲ့ ကာဝေ အုဝ်။ အုဝ် မိူဝ် ဟဲ့ ပွိုန် တူတ့် ဒွန် မျုဝ်။” အန် ဘော မှာန့် ဒီ အာဆုဝ် ပါယ် တီ တဲး အန် ကော ဒိုဝ်း ခေါဆွင် အန် တီ။

12 ပန် တီ အာဆုဝ် တွိုန် ဝီ တဝ်း၊ “တဲး အေ ယိတ့် ဟာဝ် ဝေန့် ဒူင် ကွယ် အုဝ်။ အုဝ် ဒီ ဟာဝ် ရိုမ် ဒူပ် မဲ။”

13 အာကူပ် တွိုန် ယီ တဝ်း၊ “မဲ ဒါ ကာညာ အုဝ်၊ မဲ ဟဲ့ ယိုဝ်၊ ဂေ ဂွန် အုဝ် ဟဲ့ ဒီတဲတ်၊ ညှမ် မိုဝ်း ပ့လူမ်။ ဘော ဂေ မာဘူ အီ မိုဝ်း ဂွန်၊ ဘော ဂေ မာမက် အီ မိုဝ်း ဂွန် အုဝ် လုဝ် လိုမ်လာ၊ ကွဲ့ တဲး ဂေ ဟာဝ် ကာဆဝ်။ ဆေ အုဝ် ဒီ ဘော တိုယ် ဂေ ဟာဝ် ဒူင် တူင့် အာဒါ အူ ဆီငဲ၊ အုဝ် ယုဝ် ဂေ ဒီ ယမ် တူတ့်။ 14 တဲး မဲ ဒါ ကာညာ အုဝ် ဟာဝ် နာ အာတ့် အုဝ်၊ တဲး အုဝ် ယီ ဟာဝ် ကြဲ ကြဲ၊ ဒူပ် ဂေ ဒုဝ် ဆတ်ဒါဝါ၊ ဂေ အီ ယဲတ့် ဒီ အာတ့် အုဝ်။ တဲး အုဝ် ဘော ဒူပ် ဒီ ပန် ဂေ ဂွန် အုဝ်၊ တဲး အုဝ် ကော ဇမ် မိူင် ဆေအီ တွိုန်။”

15 အာဆုဝ် ဝီ တဝ်း၊ “ဆေ န့ ပါယ် တီ တဲး အုဝ် ဒွါ မှာယ် အီ ဒူပ် အုဝ် မင် အီ၊ ဟာဝ် ရိုမ် ဒူပ် မဲ၊ တဲး ဂေ စွယ် မဲ။”

အာကူပ် ယီ တဝ်း၊ “အုဝ် တူ လုဝ် မာဆေ။ ဆေ မဲ ဒါ ကာညာ အုဝ် ဟဲ့ ကာဝေ အုဝ်၊ အုဝ် ဟဲ့ ဒါခိုယ်။”

16 ပန် တီ အာဆုဝ် ဝီ ဝေန့် ဒီ မိူင် ဆေအီ တွိုန်။ 17 အာကူပ် တွိုန် ယီ ယိတ့် ဟာဝ် မိူင် ဆူခူတ်။ ခဲင် မိူင် တီ အန် ဆမ် ကာင် အန် ဘော ထိုပ် အာဒါ ဒုဝ် ဆတ်ဒါဝါ အန်။ ခုဝ်၊ ဂေ တဲး ဒူင် တီ စိူဝ် ‘ဆူခူတ်။’^a

18 ဟဲ့ ဟွတ့် ပန် တီ အန် ဝီ ဟာဝ် ဇမ် ဆီချာ ခဲင် မိူင် ဆေခေမ် အီ ကွယ် ခဲင် ကာဒါယ် မိူင် အီ စိူဝ် မိူင် ကာနန့်။ အန် ဟဲ့ လေး တး ခဲင် မိူင် ဖာဒါန်အာရာမ် ဘော တး ဇမ် နာ ရေတ့် မိူင် တီ၊ ချ ထိုပ် ဘိက် အန် ဒီ တီ။ 19 ဒူင် ဘ့လေး အန် ထိုပ် ဘိက် အန်၊ အန် ဘော စိုဝ်း ဒီ ဂွန် အီမာယ် အာဟာမုဝ်။ အာဟာမုဝ် တွိုန် မုး ဂုန့် အာဆေခေမ်။ ငဝ်း ဒူင် ပီ စိုဝ်း အန် တီ၊ န့ မုး ရွိုန် အူ မာယဝ်း ဘူင့်။ 20 ဒူင် ကွယ် အန် တီ၊ အန် ဝီ ဘူင် ကာစှူင့် လှူ ဒီ ဇဝ်ဖြာ။ အန် တဲး န့ စိူဝ် ‘ဇဝ်ဖြာ မုး အန် ဇဝ် ပီ ကြိုပ် အာအီဆာရေလ။’