1 ပန် တီ အာကူပ် တွိုန် ဝီ ထူမ် ဂြုဝ်း ပီ ကာလာင် ဂေ ဂွန် အီမာယ် အာလပ် လွင် အန်။ ဂေ တဝ်း၊ “အာကူပ် ဟဲ့ ဒိုဝ်း တူတ့် ကြုဝ်ကြာမ် ဂုန့် ယေ။ ခဲ့ ပီ မိုဝ်း ဂုန့် ယေ၊ အန် ဟဲ့ ဒိုဝ်း၊ တဲး အန် ဝီ ခြမ် ခဲ့ တီ။” 2 အန် ဘော ယိုဝ် နာ အာလပ် တွိုန်၊ အာဝ် ဟူ ဒါခိုယ် ပီ ခါ အာတ့်။

3 ဒေါ အန် တီ ဇဝ်ဖြာ ကာလာင် ဂြုဝ်း ဒီ အန်။ အန် တဝ်း၊ “တဲး မဲ ဝေန့် ခဲင် မိူင် ဘြိမ် မဲ၊ ခဲင် မိူင် အီ မုး ဒူင် ကွယ် ဂုန့် မဲ။ အုဝ် ဒီ ဘော ဟာဝ် ရိုမ် ဒူပ် မဲ။”

4 ပန် တီ အန် ဒဲ့ နာင် ရာအေန် ဂါယ် နာင် လေအာ တး ဒူင် ကွယ် အန် ခဲင် ဒူင် နာ အန်။ 5 အန် တဝ်း ဒီ ဂါယ်၊ “အုဝ် ဟဲ့ ယိုဝ် ဂုန့် ဘာယ်။ အန် အာဝ် ဟူ အိုင် အုဝ် ပီ ခါ အာတ့်။ ဇဝ်ဖြာ ပီ ကြိုပ် ဂုန့် အုဝ်၊ အန် ယီ ဟဲ့ ကွယ် ရိုမ် ဒူပ် အုဝ်။ 6 ဘာယ် ဘော နပ်၊ ခဲ့ မိုဝ်း အုဝ် ပ့လူမ်၊ အုဝ် ဟဲ့ ဒွါ တူတ့် ဒီ ဂုန့် ဘာယ်၊ တဲး အုဝ် ဘဲန် ဒဲစေန့် အန်။ 7 ဂုန့် ဘာယ် ယီ ဟဲ့ ကာလုဝ် အုဝ် ဘဲန် ဇေန့် ဘဲန် ဇေန့်။ အန် ဟဲ့ ကာပ့လု ရုး ပီ လုဝ် ပွိုန် အုဝ် အာဒါ ဂိုဝ် ဇေန့်။ ဇဝ်ဖြာ ယီ တူ တဲး န့ ဘဲန် နာ တူ မွှိုမ် ဒီ အုဝ်။ 8 ဒေါ တဝ်း အန်၊ ‘ဂေ ဒုဝ် ဒီလာယ် ဒီပါင် ဒီ ဘဲန် ရုး မဲ၊’ ဒွန် ဒုဝ် ဟဲ့ ပွိုန် ဂွန် အီ ဒီလာယ် ဒီပါင်။ ဒေါ တဝ်း အန်၊ ‘ဂေ ဒုဝ် ဒီလာယ် ဒီ ဘဲန် ရုး မဲ၊’ ဂေ ဒွန် ဒုဝ် မိုဝ်း ဂွန် ဒီလာယ်။ 9 ပါယ် တီ ဇဝ်ဖြာ ဟဲ့ ဘူင်၊ တဲး ဒုဝ် ဆတ်ဒါဝါ ဂုန့် ဘာယ် ဘဲန် ဒုဝ် ဆတ်ဒါဝါ အုဝ်။ 10 ဒေါ မုး အာခြာဝ် လာယ် ဒူပ် ဂေ၊ အုဝ် ဟဲ့ မ့ဘာဝ်။ ဒေါ မ့ဘာဝ် အုဝ်၊ အုဝ် ဟဲ့ ယိုဝ် ဂေ အာလူင့် မာဘူ အီ ဒူပ် အာဟျာင်၊ ဂေ ဟဲ့ ဒီလာယ် ဒီလေန် ဘော ဒီပါင်။ 11 အာမူ အာမာတ် ဇဝ်ဖြာ ဝီ တဝ်း၊ ‘အိုယ်၊ အာကူပ်။’ အုဝ် ဝီ တဝ်း၊ ‘အုဝ် ကွယ် ဒီ နီ။’ 12 အန် ဝီ တဝ်း၊ ‘တဲး မဲ ယွတ် ဒုဝ် ဆတ်ဒါဝါ မဲ။ ဂေ အာလူင့် မာဘူ အီ ဒူပ် အာဟျာင်၊ ဂေ ဟဲ့ ဒီလာယ် ဒီလေန်၊ ဒီပါင်။ အုဝ် ဟဲ့ ယိုဝ် တူတ့် ပဲ့ ဟဲ့ ဘူင် အာလပ် ဒီ မဲ။ 13 အုဝ် မုး ဇဝ်ဖြာ အီ ကွယ် မိူင် ဘေဒါအေန် တွိုန်၊ အီ မုး ဒူင် ပီ ဘ့လေး မဲ မာဝ် တာင်၊ တဲး န့ ဘဲန် ကာအုန်။ န့ မုး ဒူင် ပီ ဒွါ မဲ ကာဒိက် ဆတ်ဇာ ဒီ အုဝ်။ ဒေါ တီ နီ၊ တဲး မဲ ယိတ့်၊ လေး ခဲင် မိူင် နီ၊ တဲး မဲ ဝေန့် ခဲင် မိူင် ဘြိမ် မဲ။’”

14 ပန် တီ နာင် ရာအေန် ဂါယ် နာင် လေအာ ဝီ တဝ်း ဒီ အန်၊ “ယာယ် တူ ဘော ပွိုန် ခါဂုန် မာဆေ ခဲင် ကာင် ဂုန့် ယာယ်။ 15 အန် ဟဲ့ ဘူင် ဒီ ယာယ် တဲး န့ ပီ ယာယ် မုး ခဲတ့်။ အန် ဟဲ့ ယွင့် ယာယ်။ ငဝ်း ယာယ်။ ပီ ပွိုန် အန်၊ အန် ဟဲ့ ဟွတ့် ဟူမ်။ 16 ကြုဝ်ကြာမ် တွိုန်၊ ပီ ဒိုဝ်း ဇဝ်ဖြာ ဒီ ဂုန့် ယာယ်၊ န့ ဟဲ့ ဝီ ဘဲန် ကြုဝ်ကြာမ် အေ ဘော ဂွန် အေ။ ဒေါ တီ နီ၊ တဲး မဲ ဘူင် ပီ ကာလာင် ဇဝ်ဖြာ ဒီ မဲ။”

17 ပန် တီ အာကူပ် တွိုန် ဝီ ယိတ့်၊ ဒိုဝ်း အီဘိုန့် အန် ဂေ ဂွန် အန်၊ တဲး ဂေ ပဝ့် မင်ပြွင့် ကာဟာတ့်။ 18 ဟဲ့ ဟွတ့်၊ အန် ဘော တိုယ် ဂေ လေး တ ဒူင် ကွယ် အာလပ်၊ တဲး ဂေ ဟာဝ် ဇမ် ခဲင် မိူင် ကာနန့်။ န့ မုး မိူင် ဂုန့် အန်၊ အီ စိူဝ် အာဆဲက်။ ဘော ဒုဝ် ဆတ်ဒါဝါ အန် ဒွန် ဒုဝ်၊ ဘော ကြုဝ်ကြာမ် ပီ ပွိုန် အန် ဒွန် မျုဝ်၊ ခဲ့ ပီ ပွိုန် အန် ခဲင် မိူင် ဖာဒါန်အာရာမ် တွိုန်၊ အန် ဘော ဒိုဝ်း တူတ့်၊ လေး ဟာဝ် ပေါ ပ့လုဝ့်။

19 ဒေါ လေး ဂေ၊ အာလပ် ဘော န့ဟူမ် အန် ဒွန် အီ ဟဲ့ ဟာဝ် ဒူင် နာ အန်၊ တဲး အန် ကပ် ဟိုက် မာဘူ။ ပန် တီ နာင် ရာအေန် ပြာ အာရိုပ် ပီ ကြိုပ် ဂေ ခဲင် ကာင် ဂုန့် အန်။ 20 အာကူပ် တွိုန် ယီ ကာလုဝ် ဒီ အာလပ် အီ မုး ဒူအီ အာမျုဝ် အာရာမ်။ အန် ပြာ ဒီ လေး တ ကာင် အန်၊ တူ တဲး အာလပ် နပ် မာဆေ လွင် အန် တီ။ 21 အန် ဟဲ့ ဒိုဝ်း တူတ့် ကြုဝ်ကြာမ် အန် လေး ဟာဝ်၊ ကာလုဝ်း ဘ့လဲင် အိုမ်၊ ဟာဝ် ဒူပ် န့တေန့် အီ ဟာဝ် ဇမ် နွန် ဂီလေအာတ်။

22 ပန် တီ ဟဲ့ နုဝ့် အူယ် ဆီငဲ၊ ဂေ အီ ဟဝ် ဝီ ကာလာင် တဲး အာလပ် ဘော နပ် လွင် အာကူပ် ဟဲ့ လေး ဟာဝ် မိူင် ဘြိမ် အန်။ 23 အာလပ် တွိုန် ဝီ ဒဲ့ ဝေါဝဲ အန်၊ ဟာဝ် ဒူပ် ဒီ ပန် အာကူပ် အာဒါ ဘူ ဆီငဲ။ ဝါယ် အန် တီ အန် ဝီ ကာပပ် အာကူပ် ခဲင် နွန် ဂီလေအာတ် တွိုန်။ 24 ခဲင် မှိုဝ်၊ ဒေါ မ့ဘာဝ် အန်၊ ဇဝ်ဖြာ ယီ တး ဒူင် ကွယ် အာလပ် အီ မုး ဒူအီ အာမျုဝ် အာရာမ် တွိုန်။ အန် ဇဝ် တဝ်း ဒီ အန်၊ “မဲ ကွဲ့ ကာလာင် မာဆေ ဒီ အာကူပ်။ ဘော နာ မွှိုမ်၊ ဘော နာ တူ မွှိုမ်၊ မဲ ကွဲ့ တဝ်း မာဆေ ဒီ အန်။”

25 ဒေါ အန် တီ အာကူပ် တွိုန် ဟဲ့ ချ ထိုပ် ဘိက် အန် ဒဲင် နွန် ဂီလေအာတ် တွိုန်။ ဘော အာလပ် ဂေ ဝေါဝဲ အန် ဟဲ့ ဒီလှဝ် ဒူင် ကွယ် အန် တီ။ 26 အာလပ် ယီ ကာလာင် ဒီ အာကူပ် တဝ်း၊ “မာဆေ ပီ ဘူင် မဲ။း မဲ ဟဲ့ ကာလုဝ် အုဝ်၊ ပြာ ဂွန် အုဝ်၊ ဘူင် ပီ ဂေ ဒါ ဆိုက် မှေတ့် ဒူအီ။ 27 မှဝ် န့ ပါယ် ပီ ပြာ မဲ ဒီ ဝေန့်။ မှဝ် မ့ပါယ် ပီ တူ တဝ်း မဲ မာဆေ ဒီ အုဝ်။း ဆေ အုဝ် ဟီ နပ် လွင် ဒီ ဝေန့် မဲ၊ အုဝ် ယီ ဒီ တိုယ် မဲ။ အုဝ် ယီ ဒီ စ်ု အီ တဝ်း မှုဝ်၊ တဲး ဂေ ဒါခိုယ်။ အုဝ် ယီ ဒီ တဲး အီ က်ု ဂြိုင်၊ ဘး ဒိင်။ 28 ဒေါ တီ နီ မဲ တူ တဲး အုဝ် အုး လှာန် အုဝ်၊ အုး ဂွန် အီဘိုန့် အုဝ်။ ပဲ့ ဟဲ့ ဘူင် မဲ ဟဲ့ ရိုဝ်။ 29 ဆေ အုဝ် ဆီ ဘူင်၊ အုဝ် ဟဲ့ ပွိုန် ဘူင် နာ တူ မွှိုမ် ဒီ ဘေ ဘောကာဂ့လျီတ်။ အာမှိုဝ် ဇဝ်ဖြာ ပီ ကြိုပ် ဂုန့် မဲ၊ အန် ယီ ဟဲ့ ကာလာင် ဂြုဝ်း ဒီ အုဝ်။ အန် ဟဲ့ တဝ်း၊ ‘ကွဲ့ တဲး မဲ ကာလာင် ဂြုဝ်း ဒီ အာကူပ်။ ဘော နာ မွှိုမ်၊ ဘော နာ တူ မွှိုမ်၊ ကွဲ့ တဲး မဲ ကာလာင်။’ 30 အုဝ် ဟဲ့ နပ်၊ မဲ ဟဲ့ လေး ခဲင် ကာင် အုဝ် ကူပ် ဒီကေန် ကာဆဝ် မဲ ဂုန့် မဲ။ မှဝ် မ့ပါယ် ပဲ့ ဟဲ့ ပြာ မဲ အာရိုပ် ရာင် ပီ ကြိုပ် ယေ ခဲင် ကာင်။း”

31 အာကူပ် ဝီ ဝျီ့ ဂြုဝ်း တီ။ အန် တဝ်း၊ “အုဝ် ယုဝ် မဲ တူ တဲး ဂွန် အီဘိုန့် မဲ ဒူပ် အုဝ်။ 32 ဆေ န့ မုး အာရိုပ် ရာင်၊ တဲး မဲ ဟြေတ့် ဒွန် ပ့လုဝ့်။ မဲ ဘော ယိုဝ် ဒီ အာဆေ၊ ဒူအီ တီ၊ ဟဲ့ စှိုမ် အာဆာက် အန်။ တဲး ဘော ဝေါဝဲ အေ ယွတ်။ ဆေ မဲ ကာတုန့် ကြုဝ် မဲ၊ မဲ ပွိုန် ဒီ ဒိုဝ်း။” မာလဲ၊ အာကူပ် တူ နပ်၊ န့ မုး နာင် ရာအေန်၊ အီ ဟဲ့ ပြာ အာရိုပ် တွိုန်။

33 ပန် တီ အာလပ် တွိုန် ဘော လိုပ် ခဲင် ထိုပ် ဘိက် အာကူပ်။ ဟဲ့ ဟွတ့်၊ အန် ဝီ လိုပ် ခဲင် ထိုပ် ဘိက် နာင် လေအာ၊ ဘော ခဲင် ထိုပ် ဘိက် မှာယ် အန်။ အန် ယီ တူ ကာတုန့် မာဆေ။ အန် ဟဲ့ ဟွတ့် လေး ခဲင် ထိုပ် ဘိက် နာင် လေအာ တွိုန်၊ အန် ဝီ တဝ်း ဒီ လိုပ် ခဲင် ထိုပ် ဘိက် နာင် ရာအေန်။ 34 နာင် ရာအေန် တွိုန် ယီ ဟဲ့ ဒိုဝ်း အာရိုပ် ဂေ တီ၊ ဘ့လေး ခဲင် ဟူ အီ ဒိုက် ဒီ ကွပ် မင်ပြွင့် ကာဟာတ့် အန်။ ဟဲ့ ဟွတ့် အန် ဟဲ့ တုတ့် နာ ဒဲင်။ အာလပ် ယီ ဟြေတ့် ခဲင် ထိုပ် ဘိက် အန်၊ တူ ကာတုန့် မာဆေ။

35 အန် ဝီ ကာလာင် ဒီ ဂုန့် အန်၊ “အိုယ်၊ ဂုန့် အုဝ်၊ ကွဲ့ တဲး မဲ ရူ ဒီ အုဝ်၊ ဆေ အုဝ် တူ ယိတ့် ဒီ အာတ့် မဲ။ အုဝ် မိုဝ်း ခြိုင် ကာပ့လု။” အာလပ် ယီ ဟြေတ့်၊ တူ ကာတုန့် မာဆေ။

36 ပန် တီ အာကူပ် တွိုန် ဘော ရူ ကာဆဝ်၊ ဘော ပိုန့် ဒီ အာလပ်။ အန် တဝ်း၊ “မာဆေ န့ မိုဝ်း မှာပ် အုဝ်၊ မာဆေ ပီ ဘူင် အုဝ် ဒီ မဲ၊ တဲး မဲ ဝီ ဒူပ် အုဝ်။း 37 မဲ ဟဲ့ ဟွတ့် ဟြေတ့် တူတ့် ကြုဝ် အုဝ်၊ မဲ ဘော ကာတုန့် မာဆေ။း တဲး မဲ ဒိုဝ်း တူတ့်၊ ဘ့လေး ဒီ အာတ့် ဝေါဝဲ အေ၊ တဲး ဂေ ဆုင်ဖျာတ် ဒါရာ ဒီ အာယ်။

38 အာဒါ အာ ဂိုဝ် ဆီနမ် အုဝ် ဟဲ့ ကွယ် ရိုမ် ဒူပ် မဲ။ ဒေါ အန် တီ၊ ဂေ မာပဲ မဲ တူ မိုဝ်း ဂွန် ယမ်။ မာဘူ အာလူင့် မဲ အုဝ် မိူဝ် တူ ဟူမ် ဒေါ မှဝ်။း 39 ဆေ ဒုဝ် ပြဲ ဟဲ့ ကဝ့် အူ ဒုဝ်၊ အုဝ် တူ ပွိုန် ဒွါ ဒီ မဲ။ အုဝ် လုဝ် ဝီ ဒွါ ဒုဝ် ဆတ် အုဝ် ဒီ မဲ ကာဒါင် ဒုဝ် အီ ယမ် တီ။ န့ ဘော မိုဝ်း ဒုဝ် အီ ဟြာယ် ကာတဲ ဆီငဲ၊ ဒုဝ် အီ ဟြာယ် ခဲင် မှိုဝ်၊ မဲ ဟဲ့ ဝီ မှာန့် တူတ့် ဒီ အုဝ်။ 40 ကာတဲ ဆီငဲ၊ အုဝ် ကော ရိန် ဒီ ယမ် ခဲင် ဆောဒါတ်။ ခဲင် မှိုဝ်၊ အုဝ် ဟဲ့ ဂတ် ကာဆဝ်၊ အာဝ် ပွိုန် အိတ်။ 41 အုဝ် ဟဲ့ ကွယ် ခဲင် ကာင် မဲ အာဒါ အာ ဂိုဝ် ဆီနမ်။ ဂိုဝ် ဒီ ဖွုန် ဆီနမ် အုဝ် ဟဲ့ ဘဲန် မှာယ် မဲ၊ တဲး အုဝ် ပွိုန် ဂွန် အီဘိုန့် မဲ အာ ဝီ။ ဘော ဒဝ် ဆီနမ် အုဝ် ဟဲ့ ဘဲန် မှာယ် မဲ၊ တဲး အုဝ် ပွိုန် မာဘူ အုဝ်။ မဲ ယီ ဟဲ့ ကာပ့လု ရုး ပီ လုဝ် ပွိုန် အုဝ် အာဒါ ဂိုဝ် ဇေန့်။ 42 ဆေ အုဝ် တူ မိုဝ်း ဇဝ်ဖြာ ပီ ကြိုပ် အုဝ်၊ ဆေ ဇဝ်ဖြာ ပီ ဘိုင် အာဆဲက် တူ ဝီ စွယ် အုဝ်၊ မဲ ဒီ ဘော တဲး အုဝ် ဟာဝ် ဝေန့် ခဲင် မိူင် အုဝ်။ မဲ ခမ် ဆ ဒွါ မာဆေ ဒီ အုဝ်။ ဇဝ်ဖြာ ယီ ဟဲ့ ယိုဝ် ဒုက် အုဝ်။ အန် ဟဲ့ ယိုဝ် ခဲ့ နင်ဂန် အုဝ် ဒီ ဘူင် ဒွန် မျုဝ်။ ဟဲ့ ဟွတ့် အန် ဟဲ့ ဒမ် ဆာဒိက် ဒီ မဲ ခဲင် မှိုဝ်။”

43 အာလပ် တွိုန် ဝီ တဝ်း၊ “ဂေ အီဘိုန့် မဲ မုး ဂွန် အီဘိုန့် အုဝ်။ ဂေ ဂွန် အီမာယ် မဲ မုး ဂွန် အီမာယ် အုဝ်။ ဘော ဂေ မာဘူ ဘော ပီ ယိုဝ် မဲ တူတ့် ဒွန် မျုဝ် ဟဲ့ မုး ကြုဝ် အုဝ်။ အုဝ် ယီ တူ ပွိုန် ဘူင် နာ တူ မွှိုမ် မာဆေ ဒီ ဂွန် အီဘိုန့် ဘော ဒီ ဂွန် ဂေ။ 44 တဲး မဲ တး၊ တဲး ဘော မဲ ဘော အုဝ် လာယ် ဖြူမ်၊ တဲး ပီ လာယ် ဖြူမ် တီ ဝီ ဘဲန် ဆက်ဆေ လွင် အာရေ အာယ်။”

45 ပန် တီ အာကူပ် တွိုန် ဒိုဝ်း မာဝ် တာင်၊ ဘ့လေး တဲး န့ ဘဲန် ကာအုန်။ 46 အန် ဝီ တဝ်း ဒီ ဝေါဝဲ အန်၊ “တဲး ဘေ ကာဇု မာဝ်။” ဟဲ့ ဟွတ့် ဂေ ဝီ ဒိုဝ်း မာဝ်၊ ဘူင် ဘ့လေး မ့ပိုမ်။ ဂေ ဝီ ကွယ် ရိုမ်၊ ဟူမ် ဘူမ် ဒီ ခူပ် မ့ပိုမ် မာဝ် တွိုန်။ 47 အာလပ် ဝီ တဲး ဒူင် တီ စိူဝ် ‘ယေ ဂါ ဆာ ဟူ ဒူ တာ။’ ခဲင် ဂြုဝ်း အန်၊ အာကူပ် ယီ တဲး အန် စိူဝ် ‘ဂါန် အေတ်။’^a

48 အာလပ် ဝီ တဝ်း၊ “မ့ပိုမ် မာဝ် တီ၊ အန် ဘဲန် ဆက်ဆေ ဒီ အာယ်။” ခုဝ်၊ အာကူပ် တဲး အန် စိူဝ် ‘ဂါန် အေတ်။’ အာလပ် တွိုန် ဘော တဲး အန် စိူဝ် ‘မီဇာဖာ။’^b 49 ခုဝ်၊ အန် တဝ်း၊ “ဇဝ်ဖြာ ဒီ ဘ်ု ဘော အုဝ် ဘော မဲ။ ဆေ အာယ် ဝီ လာယ် ကာယဝ်း၊ 50 ဆေ မဲ ဘူင် နာ တူ မွှိုမ် ဒီ ဂွန် အီဘိုန့် အုဝ်၊ ဆေ မဲ ဘော ဝီ ဒိုဝ်း အီဘိုန့် ပေါ ဝီ၊ န့ တူ မိုဝ်း အာဆေ ယိုဝ်။ ဇဝ်ဖြာ ယီ ကွယ် ဒီ ကာတဲ အာယ်။ အန် ယိုဝ် တူတ့်။”

51 ပန် တီ အာလပ် ဝီ တဝ်း၊ “မဲ ယိုဝ်၊ ဘော ကာအုန် ဘော မ့ပိုမ် မာဝ် ဟဲ့ ကွယ် ဒီ တီ။ အုဝ် ဟဲ့ ဘ့လေး အန် ဒီ အာတ့် မဲ ဘော ဒီ အာတ့် အုဝ်။ 52 ကာအုန် တီ၊ ဘော မ့ပိုမ် မာဝ် တီ၊ ဂါယ် ဒီ ဘဲန် ဆက်ဆေ ဒီ အာယ်။ ဘော အုဝ် တူ ကာလုဝ်း ပွုန် မာဝ် ဂေ တီ၊ ဟာဝ် ဒူင် ကွယ် မဲ။ ဘော မဲ တူ ဝီ ကာလုဝ်း ပွုန် မာဝ် တီ၊ တး ဒီ အုဝ်၊ ဆေ အာယ် တူ မိုဝ်း နဝ်း ဒီ လာယ် ဘူင် နာ မွှိုမ်။ 53 ဇဝ်ဖြာ ပီ ကြိုပ် အာဘြာဟမ်၊ အီ မုး ဘော ဇဝ်ဖြာ ပီ ကြိုပ် အာနာဟုဝ်။ အန် မုး ဇဝ်ဖြာ ဂုန့် ဒင် အာယ်၊ အန် ဇဝ် တီ ဒီ ဆုင်ဖျာတ် ဒါရာ ဒီ အာယ်။”

ပန် တီ အာကူပ် တွိုန် ဝီ ဒွါ ကာဒိက် ဆတ်ဇာ၊ တဲး ဘော ဇဝ်ဖြာ ဝီ ထူမ်။ အန် ယီ တဝ်း၊ “ဇဝ်ဖြာ တီ၊ အန် မုး ဇဝ်ဖြာ ပီ ဘိုင် အာဆဲက်။” 54 ဟဲ့ ဟွတ့် ပန် တီ အာကူပ် ဝီ လှူ မာဘူ ဒီ ဇဝ်ဖြာ ဒဲင် နွန် တွိုန်။ အန် မိူဝ် ဘာင် ဂေ ဝေါဝဲ အန် ဒွန် အီ၊ တဲး ဂေ ဟူမ် ရိုမ်။ ဂေ ဟဲ့ ဟွတ့် ဟူမ် ဖဲ၊ ဂေ ဝီ တမ် ဒဲင် နွန် တီ။

55 ပါ ခဲညှာ အာလပ် ဝီ စေဝ် ယိတ့်။ အန် ဘော အုး ဘော မွင့်ကာရာ ဒွါ ဒီ လှာန် အန် ဘော ဂွန် အီဘိုန့် အန်။ ဟဲ့ ဟွတ့် အန် ဝီ ဝေန့် ဒူင် ကွယ် အန်။