1 နာင် ရာအေန် တွိုန်၊ ဒေါ နပ် အန်၊ အန် တူ မိုဝ်း ဂွန်၊ အန် ဝီ အုန် နဝ်း ဒီ အီကတ် အန်။ အန် တဝ်း ဒီ အာကူပ်၊ “ဆေ မဲ တူ တဲး အုဝ် မိုဝ်း ဂွန်၊ အုဝ် ဒီ ယမ်။”

2 ပန် တီ အာကူပ် တွိုန် ဘော ရူ ကာဆဝ် တဝ်း၊ “အုဝ် တူ မုး ဇဝ်ဖြာ။ န့ မုး အန် ဇဝ် အီ တူ တဲး မဲ မိုဝ်း ဂွန်။” 3 ပန် တီ နာင် ရာအေန် ဝီ တဝ်း ဒီ အန်၊ “နီ၊ တဲး မဲ ဒိုဝ်း မှာယ် အုဝ်၊ အီ စိူဝ် ဘီလာ။ တဲး မဲ လာယ် အန်၊ တဲး အန် မိုဝ်း ဂွန် ကာဒါင် အုဝ်၊ တဲး ဂွန် အန် ဘဲန် ဂွန် အုဝ်။”

4 ပန် တီ အန် ဒွါ မှာယ် အန် အီ စိူဝ် ဘီလာ၊ တဲး အန် ဘဲန် အီဘိုန့် အာကူပ်။ အာကူပ် ဘော လာယ် အန်။ 5 ပန် တီ နာင် ဘီလာ ဘော ဒဲ ဘာဒိက် ဆန်ထေ၊ ကော မိုဝ်း ဂွန် အီမာယ်။ 6 နာင် ရာအေန် တွိုန် ဝီ တဝ်း၊ “အန် ဇဝ် ဟဲ့ ဆုင်ဖျာတ် ဒါရာ၊ တဲး န့ မွှိုမ် ဒီ အုဝ်။ အန် ဟဲ့ ထူမ် ဂြုဝ်း အုဝ်။ အန် မိူဝ် ဟဲ့ ဒွါ အုဝ် မိုဝ်း ဂွန်။” ခုဝ်၊ အန် တဲး ဂွန် တီ စိူဝ် အာဒါန်။^a

7 ပန် တီ နာင် ဘီလာ အီ မုး မှာယ် နာင် ရာအေန် ဝီ ဒဲ ဘာဒိက် ဆန်ထေ ပေါ အူ ဇေန့်၊ ဒွါ အာကူပ် မိုဝ်း ဂွန် အီမာယ် ဝီ ဟာအာ။ 8 ပန် တီ နာင် ရာအေန် ဝီ တဝ်း၊ “န့ ပီ အုဝ် ဟဲ့ လာယ် ကာလုတ့် ဒီ အီကတ် အုဝ်။ ဇဝ်ဖြာ မိူဝ် ဟဲ့ တဲး အုဝ် ပဲ။” ခုဝ်၊ အန် တဲး ဂွန် တီ စိူဝ် အာနာပ်ထာလီ။^b

9 ဝါယ် အန် တီ ဘော နာင် လေအာ တွိုန် ဟဲ့ နပ်၊ အန် တူ ဝီ မိုဝ်း ဂွန်။ အန် ဘော ဒိုဝ်း နာင် ဆီဖာ အီ မုး မှာယ် အန်၊ ဒွါ ဒီ အာကူပ်၊ တဲး အန် ဝီ ဘဲန် အီဘိုန့် အာကူပ်။ 10 နာင် ဆီဖာ တွိုန် ဘော မိုဝ်း ဂွန် အီမာယ် ဒွါ ဒီ အာကူပ်။ 11 ဒေါ အန် တီ နာင် လေအာ ဝီ တဝ်း၊ “ဂါမ် အုဝ် ဟဲ့ မွှိုမ်။” ခုဝ်၊ အန် တဲး ဂွန် တီ စိူဝ် အာဂတ်။^c

12 ပန် တီ မှာယ် နာင် လေအာ၊ အီ စိူဝ် ဆီဖာ၊ အန် ဝီ မိုဝ်း ဂွန် အီမာယ် ပေါ အူ ဝီ။ 13 ဒေါ အန် တီ နာင် လေအာ ဝီ တဝ်း၊ “အုဝ် ဟဲ့ ဒါခိုယ် ကာဆဝ်။ ဘော ဂေ အီ ဟဝ် ဒီ တဝ်း ပါယ် တီ။” ခုဝ်၊ အန် တဲး ဂွန် တီ စိူဝ် အာဆေန်။^d 14 န့ ဇမ် အူ ဆီငဲ၊ ဒေါ ဆုဝ့် ဂေ ခဝ်ချုင်၊ အာရူဘေန် တွိုန် ဟဲ့ လေး ဟာဝ် ခဲင် ဒူင် နာ။ အန် ဘော ယိုဝ် ဘ့လေ အီ တဲး အီ လာယ် အိုင်။ အန် ဘော ဒိုဝ်း မင် ဘူင့်၊ ဒွါ ဒီ မာ အန် အီ စိူဝ် နာင် လေအာ။ ပန် တီ နာင် ရာအေန် တွိုန် ဝီ တဝ်း ဒီ နာင် လေအာ၊ “ဘ့လေ အီ တဲး အီ လာယ် အိုင် တွိုန် ပီ ဒိုဝ်း ဂွန် မဲ၊ တဲး မဲ ဒွါ ဒီ အုဝ် မင် ဘူင့်။”

15 နာင် လေအာ ဝီ တဝ်း၊ “မဲ ဟဲ့ ဟွတ့် ဒိုဝ်း အီမာယ် အုဝ်။ ဒေါ တီ နီ မဲ ဆီ ဝီ ဒိုဝ်း ဘော ဘ့လေ အီ တဲး အီ လာယ် အိုင် ဒီ အုဝ်။”

ပန် တီ နာင် ရာအေန် ဝီ တဝ်း၊ “ဆေ မဲ ဒွါ ဘ့လေ တီ ဒီ အုဝ်၊ ခဲင် မှိုဝ် နီ အုဝ် ဒီ တဲး အီမာယ် အုဝ် အိတ် ရိုမ် ဒူပ် မဲ။” ပန် တီ ခဲင် မှိုဝ် တီ အာကူပ် ဝီ ကွယ် ရိုမ် ဒူပ် နာင် လေအာ။

16 ဘာ ဒီ အပ်၊ ဒေါ တး အာကူပ် ခဲင် နာ၊ ဝေန့် ခဲင် ထိုပ် ဘိက် အန်၊ နာင် လေအာ ဟဲ့ ဟာဝ် ရွုး အန်။ အန် တဝ်း၊ “အာတိုဝ် မဲ လုဝ် လိုပ် အိတ် ခဲင် ထိုပ် ဘိက် အုဝ်။ အုဝ် ဟဲ့ ဟွတ့် ဒွါ ဘ့လေ အီ တဲး အီ လာယ် အိုင် ဒီ နာင် ရာအေန်၊ တဲး န့ ဘဲန် ရုး အန်။”

17 ဇဝ်ဖြာ ယီ ထူမ် ပီ ဆာခိုဝ် နာင် လေအာ တွိုန်၊ တဲး အန် ဒဲ ဘာဒိက် ဆန်ထေ။ ဟဲ့ ဟွတ့်၊ အန် ဝီ မိုဝ်း ဂွန် အီမာယ် ပေါ အူ ဝီ၊ တဲး န့ ဘဲန် ဂွန် အီမာယ် အန် ဝီ မ့ဖန်။ 18 အန် တဝ်း၊ “အုဝ် ဟဲ့ တဲး မှာယ် အုဝ် ဘဲန် အီဘိုန့် အီမာယ် အုဝ်။ ဒေါ တီ နီ ဇဝ်ဖြာ ဟဲ့ ဝီ တဲး န့ ဘဲန် အာဂျိုဝ် ဒီ အုဝ်။” ခုဝ်၊ အန် တဲး ဂွန် အန် တီ စိူဝ် အာအီဆာခါ။^e

19 ပန် တီ နာင် လေအာ ဝီ ဒဲ ဘာဒိက် ဆန်ထေ ပေါ အူ ဇေန့်။ အန် ဒွါ အာကူပ် မိုဝ်း ဂွန် အီမာယ် ဝီ န့ဒဝ်။ 20 နာင် လေအာ ဝီ တဝ်း၊ “ဇဝ်ဖြာ ဟဲ့ ဒွါ ခေါဆွင် နာ ဘွတ် ဒီ အုဝ်။ အုဝ် ဟဲ့ ဒွါ ဂွန် အီမာယ် ဒဝ် ဝီ ဒီ အီမာယ် အုဝ်။ ဒေါ တီ နီ အန် ဒီ ဘော အိုင် အုဝ်။” ခုဝ်၊ အန် တဲး ဂွန် အန် တီ စိူဝ် အာဇေဘူလူန်။^f

21 ပန် တီ အန် ဝီ မိုဝ်း ဂွန် အီဘိုန့် အူ ဝီ။ အန် တဲး ဂွန် တီ စိူဝ် ဒီနာ။

22 ဝါယ် အန် တီ ဇဝ်ဖြာ ဝီ လှုဝ်း နာင် ရာအေန် တွိုန်။ အန် ထူမ် ပီ မှာန့် နာင် ရာအေန်၊ တဲး အန် မိုဝ်း ဂွန်။ 23 အန် ဒဲ ဘာဒိက် ဆန်ထေ၊ မိုဝ်း ဂွန် အီမာယ်။ အန် တဝ်း၊ “ဇဝ်ဖြာ ဟဲ့ ဘူင်၊ ကွဲ့ ဟူ တဲး အုဝ် လုဝ် ဆာယ် အီ။” 24 ခုဝ်၊ အန် တဲး ဂွန် တီ စိူဝ် အာယုဝ်။ အန် ဘော တဝ်း၊ “တဲး ဇဝ်ဖြာ ဒွါ ဂွန် အီမာယ် ပေါ အူ ဝီ ဒီ အုဝ်။”^g

25 နာင် ရာအေန် ဟဲ့ ဟွတ့် မိုဝ်း အာယုဝ်၊ အာကူပ် တွိုန် ဝီ ကာလာင် ဂြုဝ်း ဒီ အာလပ်။ အန် တဝ်း၊ “တဲး မဲ ခ့ဝါင် အုဝ် ဝေန့် ခဲင် မိူင် ဘြိမ် အုဝ်။ 26 အုဝ် ဟဲ့ ဟွတ့် ဘဲန် မှာယ် မဲ၊ တဲး အုဝ် ပွိုန် အီဘိုန့် ဂေ ဂွန် အုဝ်။ ဒေါ တီ နီ၊ တဲး မဲ တဲး အုဝ် ဝေန့်။ မဲ ဘော နပ် ခဲ့ မှဝ် ရုး ပီ လုဝ် ပွိုန် အုဝ်။”

27 အာလပ် တဝ်း၊ “ဆေ မဲ ဘော အိုင်၊ တဲး မဲ ကွယ်။ အုဝ် ဟဲ့ ယိုဝ်၊ ကူပ် ကွယ် ရိုမ် မဲ ဒူပ် အုဝ်၊ ဇဝ်ဖြာ ဟဲ့ မွင့်ကာရာ တဲး ဘော ဒီ အုဝ်။” 28 အာလပ် မိူဝ် တဝ်း၊ “တဲး မဲ ကာလာင် ဒီ အုဝ် ခဲ့ မှဝ် မဲ လုဝ်၊ တဲး န့ ဘဲန် ရုး မဲ။ အုဝ် ဒီ ဒွါ ဒီ မဲ ခဲ့ တီ။”

29 အန် ယီ တဝ်း ဒီ အာလပ်၊ “မဲ ဟဲ့ နပ်၊ ခဲ့ ကိူန် ပီ ဘူင် အုဝ် ဒေါ ဘဲန် အုဝ် မှာယ် မဲ။ မဲ ဘော နပ်၊ ကြုဝ် မဲ ဟဲ့ ကြဲ ဒီ ကိူန် ခဲ့ မှဝ် ဒေါ ကွယ် အုဝ် ဒူပ် မဲ။ 30 အာတ့် တး အုဝ်၊ မဲ တူ ကူပ် မိုဝ်း မာဆေ။ ဒေါ တီ နီ၊ ကြုဝ် မဲ ဟဲ့ မိုဝ်း ကာပွါ ကိူန် ကာဆဝ်။ အုဝ် ဘော ဘူင် မာဆေ၊ ဇဝ်ဖြာ ဟဲ့ မွင့်ကာရာ ဒွါ ဘော ဒီ မဲ။ ဒေါ တီ နီ၊ အုဝ် ယီ လုဝ် ဘူင် ဂါန် အုဝ်၊ တဲး ဂေ ခဲင် န့ဟူမ် အုဝ် ဘော ပွိုန် ပီ ဒီ လုဝ် ဂေ။”

31 ပန် တီ အာလပ် ဝီ တဝ်း၊ “မာဆေ ပီ ဆီ ပွိုန် မဲ ဒီ အုဝ်။း” အန် ဝီ တဝ်း၊ “မဲ တူ လုဝ် ဒွါ မာဆေ ဒီ အုဝ်၊ တဲး မဲ ဘူင် ပါယ် နီ။ အုဝ် ဒီ ဝီ ဟျီင် မာဘူ ဂေ မာပဲ မဲ။ 32 အာတိုဝ်၊ အုဝ် ဒီ ဟာဝ် ယွတ် ဒုဝ် ဆတ်ဒါဝါ မဲ။ ခဲ့ မိုဝ်း ဒုဝ် မာဘူ အီ ဒီလာယ် ဒီပါင်၊ ခဲ့ မိုဝ်း ဂွန် မာဘူ အီ ဝွင့်၊ ဘော ဂေ မာပဲ အီ ဒီလာယ် ဒီပါင်၊ အုဝ် ဒီ ကာယဝ်း၊ တဲး န့ ဘဲန် ကာနာယ် အုဝ်။ 33 ဆေ မဲ တး ခဲညှာ၊ မဲ ဒီ နပ်၊ ပီ ပါယ် အုဝ် ဒီ ကာယဝ်း။ အုဝ် တူ ကာလုဝ် မဲ။ မဲ ဒီ ယိုဝ် ခဲ့ မှဝ် န့ မုး ရုး ပီ ပွိုန် အုဝ်၊ ခဲ့ မှဝ် ဟဲ့ မုး ကာနာယ် အုဝ်၊ ဆေ မဲ ယိုဝ် မာဘူ ဂေ မာပဲ အီ ကွယ် ဘ့လာက် အုဝ်၊ ဆေ မဲ ယိုဝ် မာပဲ အီ တူ ဒီလာယ် ဒီပါင်၊ ဘော ဂွန် မာဘူ အီ တူ ဝွင့်၊ မဲ ဒီ နပ်၊ ဒုဝ် ဂေ တီ အုဝ် ဟဲ့ ပြာ။”

34 ပန် တီ အာလပ် တွိုန် မိူဝ် ဟဲ့ အိုင်။ အန် တဝ်း၊ “တဲး န့ ဘဲန် ပါယ် တီ။” 35 ဆီငဲ အန် တီ အာလပ် ဘော ဟာဝ် ကာယဝ်း ဒုဝ် ဆတ်ဒါဝါ အန်။ ခဲ့ မိုဝ်း အာလူင့် မာပဲ ဒီလာယ် ဒီပါင်၊ ခဲ့ မိုဝ်း မာပဲ အာဟျာင် အီ ဒီလာယ် ဒီပါင်၊ ဒုဝ် အီ မိုဝ်း အီ လုယ် ဒီ ဟုန် ဂေ ဒွန် ဒုဝ်၊ ဘော ဂေ မာဘူ ဒီတဲတ်၊ ဂေ အီ ဝွင့်၊ အန် ဒိုဝ်း တူတ့် ဒွန် မျုဝ်၊ ဒွါ ဒီ ဂွန် အီမာယ် အန်။ 36 အာလပ် ဘော တဲး ဂွန် အန် ဒိုဝ်း ဟာဝ် ဖိုင် ဒုဝ် ဆတ် တီ ပေါ အူ ပ့လုဝ့်၊ တဲး န့ ကာတူင့် အာဒါ အူယ် ဆီငဲ။ တဲး ဂေ ဒုဝ် ဆတ်ဒါဝါ အာကူပ် ဝီ ကွယ် ကာယဝ်း၊ ကွဲ့ တဲး ဂေ ဝီ လာယ် ကာဝှ်ု။ ဟဲ့ ဟွတ့် အာကူပ် တွိုန် ဝီ ဟာဝ် ဘ်ု ဒုဝ် ဆတ်ဒါဝါ အီ ဆီ ဂိတ် မီ ဒီ အာလပ်။

37 ပန် တီ အာကူပ် တွိုန် ဒိုဝ်း န့လုဝ်း ဟေ လီပါနာ၊ အန် ဘော ဒိုဝ်း န့လုဝ်း ဟေ လူဇာ ဘော ဟေ အာရာမူန်။ အန် ဘော လျီ့ ဂ့လဲ့ အန်၊ တဲး အီ လုယ် လေး၊ တဲး န့ ဘဲန် န့လုဝ်း ဟေ ပဲ့ ဒီလာယ်။ 38 ပန် တီ အန် ဘ့လေး န့လုဝ်း ဂေ တီ ဘာင် ဒူင် တး ဒုဝ် ဆတ် ဒီ အိုမ်၊ တဲး န့လုဝ်း ကွယ် ဒီ အာတ့် မာဘူ ဂေ မာပဲ။ ဂေ ဒုဝ် တီ ဘော တး ဒျီင် အိုမ် ဘော လာယ် ဒူပ် ဒီ အာတ့် န့လုဝ်း တွိုန်။ 39 ဝါယ် တီ ပန် ဒီ ဂွန် ဂေ၊ ဂေ ဝီ မိုဝ်း ဂွန် ဒီလာယ် ဒီလေန် ဘော ဂွန် ဒီပါင်။ 40 ပန် တီ အာကူပ် ဝီ ကာယဝ်း ဂွန် မာဘူ ဘော ဂွန် မာပဲ အီ မုး မီ ဒုဝ် အီ ဒီလာယ် ဘော ဒုဝ် အီ ဝွင့်။ ပါယ် တီ အန် ကာယဝ်း၊ တဲး ဂေ ဝီ ဘဲန် ဒုဝ် ဆတ် အန်။ 41 အန် ဘော ဘ်ု၊ တဲး ဒုဝ် အီ မိုဝ်း ပ့လူမ် ဝီ လာယ် ဒူပ် ဒီ အာတ့် န့လုဝ်း တွိုန်။ 42 ဆေ အန် ဝီ ယွတ် ဒုဝ် အီ တူ မိုဝ်း ပ့လူမ်၊ ဆေ ဂေ တး လာယ် ဒူပ်၊ အန် တူ ဘ့လေး န့လုဝ်း တွိုန်။ ပါယ် တီ အန် နပ် ဒီ ဘူင်၊ တဲး ဒုဝ် ဒီလှး ဘဲန် ကြုဝ် အာလပ်။ ဒုဝ် အီ မိုဝ်း ပ့လူမ် ယီ ဘဲန် ကြုဝ် အန်။ 43 ပါယ် တီ အန် ဘော ကြဲ ဒီ ခြမ် ကာဆဝ်။ အန် ဟဲ့ ပွိုန် မာဘူ ဂေ မာပဲ ကိူန်။ ဘော ဂေ မှာယ် အီ မုး အီဘိုန့် အီမာယ် ဂေ ကိူန်။ ဘော မင်ပြွင့် ကာဟာတ့် ဘော မာလာ ဒွန် မျုဝ်၊ အန် ဟဲ့ ပွိုန် ကိူန် ကာဆဝ်။