1 ပေါ အူ ဇေန့် န့ ဝီ ဇမ် အာခြာဝ် အေတ့် ပီ ဒီ ဟူမ်။ န့ ပီ ခါ အာတ့် နူ၊ ဒေါ ဆီ ကွယ် အာဘြာဟမ် တွိုန်။ ဒေါ အန် တီ အာဆဲက် ဟာဝ် ဇမ် မိူင် ဂီရာတ် အီ မုး ဒူင် ကွယ် ခုန်ဒီခမ် အာဘီမေန် အီ အိုပ် မိူင် တာင် အီ စိူဝ် မိူင် ဖီလီထီ။ 2 အာတ့် ဟာဝ် အန်၊ ဇဝ်ဖြာ ဟဲ့ ကာပ့လုး၊ ကာလာင် ဂြုဝ်း ဒီ အန်။ အန် ဇဝ် ဟဲ့ တဝ်း၊ “မဲ ကွဲ့ လူင် မိူင် အဲဂိုပ်။ တဲး မဲ ကွယ် ခဲင် မိူင် ပီ ဒီ ကာလာင် အုဝ် ဒီ မဲ။ 3 တဲး မဲ ကွယ် ဘဲန် ခဲတ့် ခဲင် မိူင် တီ။ ဆေ မဲ ဘူင် ပါယ် တီ အုဝ် ဒီ ကွယ် ရိုမ် ဒူပ် မဲ။ အုဝ် ဒီ မွင့်ကာရာ ဒွါ ဒီ မဲ။ အုဝ် ဒီ ဒွါ မိူင် ဂေ တီ ဒီ မဲ ဘော ဒီ ဂေ ဒူအီ အာမျုဝ် မဲ အီ ဒီ တး နာ ပန်။ အုဝ် ဒီ ဘူင် ပီ ဒွိုမ် ကာလာင် အုဝ် ဒေါ ဒွါ အုဝ် ကာဒိက် ဆတ်ဇာ ဒီ ဂုန့် မဲ အီ စိူဝ် အာဘြာဟမ်။ 4 အုဝ် ဒီ တဲး လှုက်လှာန် မဲ ကိူန် ပီ ဆီမန့် အီ ကွယ် ခဲင် ဘ့လေန့်။ အုဝ် ဒီ ဒွါ မိူင် ဂေ နီ ဒီ လှုက်လှာန် မဲ။ ကူပ် လှုက်လှာန် မဲ တီ၊ အုဝ် ဒီ မွင့်ကာရာ တဲး ဂေ ဒူအီ ဒွန် မျုဝ် အီ ကွယ် ဒဲင် ကာဒါယ် ဒွန် နာ ဒွန် ပ့လုဝ့်။ 5 အုဝ် ဒီ ဘူင် တူတ့် ပါယ် တီ ကူပ် ဟဲ့ ဒွိုမ် ထူမ် အာဘြာဟမ် တွိုန် ဂြုဝ်း အုဝ်၊ ကူပ် ဘူင် အန် ပီ မှာန့် အုဝ် ဒီ အန် ဘော ဒူပ် ဒါရာ အုဝ်၊ ဘူင် ပီ စ်ု အုဝ်၊ တူ ပိဝ် ပီ မာနုဝ် အုဝ် ဒီ အန်။” 6 ပါယ် တီ အာဆဲက် ဘော ကွယ် ခဲင် မိူင် ဂီရာတ်။

7 ဒေါ ကွယ် အန် ခဲင် မိူင် တီ၊ ဂေ ဒူအီ ဒီမွှတ် အန် လွင် နာင် ဘဲက်။ အန် တဝ်း၊ “အန် မုး ဝါ အုဝ်။” အန် တူ ယ ကာလာင် တဲး အီ နပ် နာင် ဘဲက် မုး အီဘိုန့် အန်။ အန် ယုဝ်၊ ဆေ ဂေ အီမာယ် ခဲင် မိူင် တွိုန် ဟဲ့ နပ် လွင် နာင် ဘဲက် မုး အီဘိုန့် အန်၊ ဂေ ဒီ ငဝ်း ဝဲန် အန်၊ တဲး ဂေ ပွိုန် ဒီ လာယ် နာင် ဘဲက်။ ခုဝ်၊ နာင် ဘဲက် ဟဲ့ စှိတ် ကာဆဝ်။

8 အာဆဲက် ဟဲ့ ဟွတ့် ကွယ် လှေန့် ခဲင် မိူင် တွိုန်၊ အူ ဆီငဲ ခုန်ဒီခမ် အာဘီမေန် တွိုန် ယွတ် ခဲင် မာလုဝ်း ကာင် အန်၊ ယိုဝ် အာဆဲက် ဂါယ် နာင် ဘဲက် လာယ် ရွက့်။ 9 ပန် တီ အန် ဝီ တိုယ် အူ ဝီ တဲး အန် ဒဲ့ အာဆဲက်။ အန် တဝ်း၊ “နာင် ဘဲက် မုး အီဘိုန့် မဲ။ မှဝ် န့ ပါယ် ပီ တဝ်း မဲ၊ အန် မုး ဝါ မဲ။း”

အာဆဲက် ဝီ တဝ်း၊ “အုဝ် ယုဝ် ဂေ ငဝ်း ဝဲန် အုဝ်။ ခုဝ်၊ အန် စှိတ် ကာဆဝ်။”

10 ခုန်ဒီခမ် ဝီ တဝ်း၊ “မှဝ် န့ ပါယ် ပီ ကာလုဝ် မဲ ပါယ် တီ။း ဆေ န့ မိုဝ်း ဒူအီ အူ ဝီ အီ လာယ် အန်၊ န့ ဘော ဘဲန် မှာပ် တာင် ဒီ ယေ။”

11 ပန် တီ ခုန်ဒီခမ် အာဘီမေန် ဝီ ဒွါ အာမိင် တဝ်း၊ “အာဆေ ဘူင် နာ တူ မွှိုမ် ဒီ အာဆဲက် ဂါယ် အီဘိုန့် အန်၊ ယေ ဒီ ငဝ်း ဝဲန် အန်။”

12 အာဆဲက် ဟဲ့ ဆမ် ငှုဝ် ခဲင် မိူင် တွိုန်။ ဆီနမ် တီ၊ အန် ပွိုန် လွှိုမ် ပီ ဆမ် အန် အူ မာယဝ်း ဘုန်။ ခုဝ်၊ ဇဝ်ဖြာ ဟဲ့ မွင့်ကာရာ ဒွါ ဒီ အန်။ 13 ပါယ် တီ ပွုန် အန် ကြဲ ဒီ တာင် တဲး အန် ကော ဘဲန် ဒူအီ အီ ခြမ် ကာဆဝ် ဘော မိုဝ်း ပွုန် တာင် ကာဆဝ်။ 14 အန် မိုဝ်း မာဘူ ဘော မာပဲ ကိူန်။ ဘော မာမက် ဘော မှာယ် အန်၊ ဂေ ကိူန် ကာဆဝ်။ န့ ဘော တဲး ဂေ ဒူအီ ဖီလီထီ တူ အိုင်၊ ဘဲန် နဝ်း ရူ ဒီ အန်၊ အုန် နဝ်း ဒီ အန်။ 15 ဂေ ဝီ ပုန် ဟပ် ကာဒါယ် ဘော ကာအး ခဲင် ကာဒဝ် အိုမ် ခိုမ် အီ မုး ပဲ့ ဟဲ့ ဂိုဝ်း မှာယ် ဂုန့် အန် အီ စိူဝ် အာဘြာဟမ်။

16 ပန် တီ ခုန်ဒီခမ် အာဘီမေန် တွိုန် ဝီ တဝ်း ဒီ အာဆဲက်၊ “တဲး မဲ လေး ခဲင် မိူင် ယေ၊ ဟာဝ် ပေါ ပ့လုဝ့်။ ပွုန် မဲ ဟဲ့ တာင် ကာဆဝ်။ ယေ အာဝ် ဟူ ပွိုန် ခမ်။”

17 ပန် တီ အာဆဲက် လေး ခဲင် မိူင် ဖီလီထီ တွိုန်။ အန် ဟာဝ် ချ ထိုပ် ဘိက် အန် ခဲင် ဂ့လင် အီ စိူဝ် ဂီရာတ်။ အန် ဝီ ကွယ် ဒူင် တီ။ 18 ဒူင် ကွယ် အာဆဲက် တီ၊ န့ ယီ မိုဝ်း အိုမ် ခိုမ် ဘြိမ် ပဲ့ ဟဲ့ ဂိုဝ်း ဂုန့် အာဆဲက် အီ စိူဝ် အာဘြာဟမ် တွိုန်။ ဝါယ် ဟဲ့ ဟွတ့် ယမ် အန်၊ ဂေ ဒူအီ အာမျုဝ် ဖီလီထီ ဟဲ့ ပုန် ကာဒဝ် ခဲင် အိုမ် ခိုမ် တီ။ အာဆဲက် ယီ စ်ု မှာယ် အန်၊ တဲး ဂေ ဝီ ဂိုဝ်း အိုမ် ခိုမ် တီ ဒွန် ပ့လုဝ့်။ အန် ဝီ တဲး န့ စိူဝ် ပီ ပီ ဒွိုမ် ဒါင် ဂုန့် အန်။

19 ဂေ မှာယ် အာဆဲက် ဘော ဟာဝ် ဂိုဝ်း ခဲင် ဂ့လင်။ ဂေ ဝီ ယိုဝ် တုဝ်း အိုမ် အူ ပ့လုဝ့် 20 ပန် တီ ဂေ ဒါ အီ ဟျီင် ဒုဝ် ဆတ်ဒါဝါ ခဲင် မိူင် ဂီရာတ် တွိုန်၊ ဂေ ဝီ လာယ် ကာထဲန့် ဒီ ဒါ အီ ဟျီင် ဒုဝ် ဆတ်ဒါဝါ အာဆဲက်။ ဂေ တဝ်း၊ “အိုမ် တီ ဟဲ့ မုး အိုမ် ယေ။” ပန် တီ ဂေ တဲး အိုမ် ခိုမ် တီ စိူဝ် ‘အိုမ် ခိုမ် ကာထဲန့်’ ခုဝ်၊ ဂေ ဟဲ့ လာယ် ကာထဲန့် တဲး ဂေ ပွိုန် အိုမ် ခိုမ် တီ။ 21 ဟဲ့ ဟွတ့်၊ ဂေ ပီ ဝီ ဂိုဝ်း အိုမ် ခိုမ် ပေါ အူ ပ့လုဝ့်။ ဂေ ဝီ လာယ် ကာထဲန့် လွင် အန် တီ။ ခုဝ် အန် တီ၊ ဂေ တဲး န့ စိူဝ် ဆိတ်နာ။ လွင် ဒါင် အန် န့ မုး အီ လာယ် ဖျာက်။ 22 ဝါယ် အန် တီ ဂေ ဝီ ဂိုဝ်း အိုမ် ခိုမ် ပေါ အူ ဘူင့်။ ဂေ အာဝ် ဟူ လာယ် ကာထဲန့် လွင် အန် တီ။ ပန် တီ ဂေ တဲး အိုမ် ခိုမ် တီ စိူဝ် ရေအုဝ်ဘူတ်။ လွင် ဒါင် အန် မုး ဒူင် ကာဝဝ်း။ အာဆဲက် ဝီ တဝ်း၊ “ဒေါ တီ နီ ဇဝ်ဖြာ ဟဲ့ ဒွါ ယေ မိုဝ်း ဒူင် ကာဝဝ်း ခဲင် မိူင် နီ၊ တဲး ယေ ပွိုန် ဒီ ဘြဲ ဒွန် ပ့လုဝ့်။”

23 ပန် တီ အာဆဲက် ဝီ ဟာဝ် ဟုဝ့် မိူင် ဘီရာဆေဘာ။ 24 ခဲင် မှိုဝ် ဇဝ်ဖြာ ဝီ ကာပ့လုး ဒီ အန် တဝ်း၊ “အုဝ် မုး ဇဝ်ဖြာ ပီ ကြိုပ် ဂုန့် မဲ၊ အီ စိူဝ် အာဘြာဟမ်။ ကွဲ့ ယုဝ်။ အုဝ် ဇဝ်ဖြာ ကွယ် ရိုမ် ဒူပ် မဲ။ အုဝ် ဒီ ဘော မွင့်ကာရာ ဒွါ ဒီ မဲ။ အုဝ် ဒီ ဘော တဲး လှုက်လှာန် မဲ ဘြဲ ကိူန်။ ခုဝ်၊ အုဝ် ဟဲ့ အိုင် အာဘြာဟမ် အီ မုး ဒဲစေန့် အုဝ်။”

25 ဒူင် တီ အာဆဲက် ဝီ ဘူင် ကာစှူင့် လှူ ဒီ ဇဝ်ဖြာ။ အန် ဘော ကြိုပ် ဇဝ်ဖြာ။ ပန် တီ အန် ဝီ ချ ထိုပ် ဘိက် အန် ဒီ တီ။ ဂေ မှာယ် အန် ဝီ ဂိုဝ်း အိုမ် ခိုမ် ဒီ တီ။

26 ခုန်ဒီခမ် အာဘီမေန် တွိုန် ယီ လေး မိူင် ဂီရာတ်၊ ဟာဝ် ဇမ် ဒူင် ကွယ် အာဆဲက်။ ဘော အာမူ အာမာတ် အန်၊ အီ စိူဝ် အာဟူဆာတ်၊ ဘော အာဖီခူန် အီ မုး ဒါ အီ အိုပ် ဒါ ဆိုက် အန်၊ ဂါယ် ဒူပ် အန်။ 27 အာဆဲက် တွိုန် ဒီမွှတ် ဂေ တဝ်း၊ “မှဝ် န့ ပါယ် ပဲ့ ဟဲ့ တး ဘေ။း ဘေ ဟဲ့ ဒွိုမ် မိုဝ်း နဝ်း ရူ ဒီ အုဝ်၊ ဟဲ့ ဆုတ့် အုဝ် လေး ဒူင် ကွယ် ဘေ။”

28 ဂေ ဝီ တဝ်း၊ “ဒေါ တီ နီ၊ ယေ ဟဲ့ ဝီ နပ်၊ ဇဝ်ဖြာ ကွယ် ရိုမ် ဒူပ် မဲ။ ခုဝ် အန် တီ၊ ယေ တဝ်း၊ ဘော မဲ ဘော ယေ၊ အေ လုဝ် လာယ် ဖြူမ် ရိုမ်။ 29 တဲး အေ လာယ် ဖြူမ်၊ ကွဲ့ တဲး မဲ ဘူင် နာ တူ မွှိုမ် ဒီ ယေ။ တဲး မဲ ဘူင် နာ မွှိုမ် ဒီ ယေ၊ တဲး န့ ပီ ပဲ့ ဟဲ့ ဘူင် ယေ နာ မွှိုမ် ဒီလူယ် ဒီ မဲ။ ယေ ဟဲ့ တဲး မဲ ဟာဝ် လေး ခဲင် မိူင် ယေ၊ တူ ဘူင် မာဆေ ဒီ မဲ အီ မုး ဒါ အီ ပီ မွင့်ကာရာ ဒွါ ဇဝ်ဖြာ။”

30 ဂေ ဟဲ့ ဟွတ့် ကာလာင် ပါယ် တီ အန် ဘူင် ပီ ဒီ ဟူမ်၊ တဲး ဂေ ကွယ် ဟူမ် ဘော ဒျီင် ဖဲ။ 31 ပါ ခဲညှာ ဂေ စေဝ် ယိတ့်။ ဂေ ဝီ လာယ် ဒွါ ကာဒိက် ဆတ်ဇာ။ ဟဲ့ ဟွတ့်၊ အာဆဲက် တွိုန် ခ့ဝါင် ဂေ ဟာဝ် လေး ဒူင် ကွယ် အန်။ ဂေ မိူဝ် မိုဝ်း နဝ်း ဒါခိုယ်၊ လေး ဟာဝ် ဒူင် ကွယ် အန်။ 32 ဆီငဲ အန် တီ ဂေ မှာယ် အာဆဲက်၊ ဂေ အီ ဟဲ့ ဂိုဝ်း အိုမ် ခိုမ် တွိုန်၊ ဂေ ဝီ တး ဒူင် ကွယ် အန်၊ ဂေ တဝ်း၊ “ယေ ဟဲ့ ကာတုန့် အိုမ်။” 33 ပန် တီ အန် တဲး အိုမ် ခိုမ် တီ စိူဝ် ဆေဘာ။ လွင် ဒါင် အန် န့ မုး ကာဒိက် ဆတ်ဇာ။ ခုဝ်၊ ကော ဇမ် အာတိုဝ်၊ မိူင် အီ ကွယ် ဒူင် တီ၊ အန် စိူဝ် ဘီရာဆေဘာ။

34 အာဆာက် အာဆုဝ် တွိုန် ယီ နုဝ့် ဖွုန် ဂိုဝ် ဆီနမ်၊ အန် ခတ် ဒိုဝ်း အီဘိုန့် အီ စိူဝ် နာင် ယူဒိတ်။ အန် မုး ဂွန် အာဘေအေရီ အီ မုး အာမျုဝ် ဟေထိတ်။ အန် ခတ် ဒိုဝ်း အီဘိုန့် ပေါ အူ ဝီ အီ စိူဝ် နာင် ဘာဆေမာတ်။ အန် မုး ဂွန် အာအေလူန်၊ အီ မုး အာမျုဝ် ဟေထိတ်။ 35 အီဘိုန့် အာဆုဝ် အာ ဝီ တွိုန်၊ ဂါယ် တူ တဲး အာဆဲက် ဂါယ် နာင် ဘဲက် မိုဝ်း နဝ်း ဒါခိုယ်။