1 အာဘြာဟမ် တွိုန် ဝီ ဒိုဝ်း အီဘိုန့် ပေါ အူ ဝီ။ အန် စိူဝ် နာင် ခေထူရာ။ 2 အန် မိုဝ်း ဂွန် အီမာယ်။ ဂေ စိူဝ် အာဆိမ်ရာမ်၊ အာယူက်ဆာန်၊ အာမေဒါန်၊ အာမီဒီအာန်၊ အာယီဘာက် ဘော အာဆူအာက်။ 3 အာယူက်ဆာန် တွိုန် ဝီ မိုဝ်း ဂွန် အီ စိူဝ် အာဆေဘာ ဂါယ် အာဒေဒါန်။ ဂွန် အာဒေဒါန် တွိုန် ဘဲန် အာမျုဝ် ဒူအီ အာဆူရိတ်၊ လေထူဆိတ် ဘော အာမျုဝ် လေအုမ်မိတ်။ 4 ဂွန် အာမီဒီအာန် စိူဝ် အာအေဖာ၊ အာအေဖေန်၊ အာဟာန်၊ အာဘီဒါ ဘော အာအေဒါဂါ။ ဂေ ဒွန် အီ မုး လှုက်လှာန် နာင် ခေထူရာ တွိုန်။

5 ခဲ့ မိုဝ်း အာဘြာဟမ် ကြုဝ်ကြာမ်၊ အန် ဒွါ တူတ့် ဒွန် မျုဝ် ဒီ အာဆဲက်၊ တဲး အန် ပ့လု ဂုန့် အန်။ 6 န့ ဘော မိုဝ်း ဂွန် အီမာယ် အီ မုး ဂွန် အီဘိုန့် တျီ့။ အန် ဒွါ မီ ခေါဆွင် ဒီ ဂေ။ အန် ဟဲ့ ဟွတ့် ဒွါ ဒီ ဂေ၊ အန် ဝီ စ်ု ဂေ လေး တ ဒူင် ကွယ် အန်၊ တဲး ဂေ ဟာဝ် ကွယ် ပေါ ပ့လုဝ့်။ ဒေါ ဆီ မိုဝ်း အန် အာဆာက်၊ အန် စ်ု ဂေ လေး ဒူင် ကွယ် ဂွန် အန် အီ စိူဝ် အာဆဲက်၊ တဲး ဂေ ဟာဝ် ကွယ် ခဲင် မိူင် နာ လေး ဆီငဲ။

7 အာဘြာဟမ် တွိုန်၊ အာဆာက် အန် ဘော နုဝ့် အူ မာယဝ်း ဒီ ဘူ ဂိုဝ် ဒီ ဖန် ဆီနမ်။ 8 ဟဲ့ ဟွတ့် ပန် တီ အန် ဘော ယမ်။ ဒေါ ယမ် အန်၊ အန် ဟဲ့ ကတ် ကာဆဝ်။ နဝ်း အန် ဟဲ့ ဆိန်၊ အန် ဟူ ဆီ ကွယ် ဒဲင် ကာဒါယ် နီ။ အန် ဝီ ဟာဝ် ကွယ် ရိုမ် ဒူပ် ဒူအီ အာမျုဝ် အန် အီ ဟဲ့ ယမ် ဒီ အာတ့် အန်။ 9 ဂွန် အီမာယ် အန် အီ စိူဝ် အာဆဲက် ဂါယ် အာဆာမာန်၊ ဂါယ် ဝီ ဒိပ် ဒုဝ် အန်၊ ဘ့လေး ခဲင် ကာဒဝ် မာဝ် အီ စိူဝ် မာတ်ပေန်လာ။ န့ ကွယ် ခဲင် ဒူင် နာ အာဖေရူန် တွိုန်၊ အီ မုး ဂွန် အာဇုဝ်ဟာန်၊ အီ မုး အာမျုဝ် ဟေထိတ်။ ဒူင် တီ ကွယ် ချြီ့ ဒူင် စိူဝ် မမ်ရေ။ 10 ဒူင် နာ တွိုန် အာဘြာဟမ် ဟဲ့ ဒွိုမ် စိုဝ်း ဒီ ဒူအီ အာမျုဝ် ဟေထိတ်။ ဒူင် တီ ဂေ ဟဲ့ ဒိပ် ဒုဝ် အာဘြာဟမ် ဂါယ် အီဘိုန့် အန်၊ အီ စိူဝ် နာင် ဆာရာ။ 11 အာဘြာဟမ် ဟဲ့ ဟွတ့် ယမ်၊ ဇဝ်ဖြာ ဝီ မွင့်ကာရာ ဒွါ ဒီ အာဆဲက် အီ မုး ဂွန် အာဘြာဟမ်။ အန် ကွယ် ခူပ် အိုမ် ခိုမ် အီ စိူဝ် အိုမ် ခိုမ် အန် ဇဝ် အီ အိမ်၊ အီ ပွိုန် ယိုဝ်။

12 အာနီ န့ မုး ဇာရာင် အီ လာယ် ဒါမ် ဂေ လှုက်လှာန် အာဆာမာန် အီ မုး ဂွန် အာဘြာဟမ်။ မာ အာဆာမာန် မုး နာင် ဟာဂါ အီ မုး အာမျုဝ် အဲဂိုပ်၊ အီ ဟဲ့ ဘဲန် မှာယ် နာင် ဆာရာ။

13 စိူဝ် ဂွန် အီမာယ် အာဆာမာန်၊ ဂေ အီ လာယ် ဒါမ် ပါယ် နီ။ ဂွန် ဂိန့် အာဆာမာန် အန် စိူဝ် အာနေယာဘူတ်။ ဟဲ့ ဟွတ့် န့ မိုဝ်း အာကေဒါ၊ အာဒေဘေန် ဘော အာမီဘာဆာမ်၊ 14 အာမီဆာမာ၊ အာဒူမာ ဘော အာမာဒါဆာ၊ 15 အာဟာဒါတ်၊ အာထေမာ၊ အာယေထူ၊ အာနာဖိတ် ဘော အာခေဒေမာ။ 16 အာတီ မုး ဂွန် အီမာယ် အာဆာမာန်။ ဂေ ကွယ် ခဲင် ဒူင် ချ ဂေ၊ ခဲင် ထိုပ် ဘိက် ဂေ။ ဂေ ဟဲ့ ဘဲန် ဒါ ကာညာ ခြိုဝ် ဂေ၊ ဟဲ့ ဘဲန် အာမျုဝ် ဒူအီ ဂိုဝ် ဒီ အာ မျုဝ်။ 17 အာဆာက် အာဆာမာန် တွိုန် ဘော နုဝ့် အူ မာယဝ်း ဒီ အူယ် ဂိုဝ် ဒီ ဘူ ဆီနမ်။ ဟဲ့ ဟွတ့်၊ အန် ဘော ယမ်၊ ဟာဝ် ကွယ် ရိုမ် ဒူပ် ဂေ အာမျုဝ် အန်၊ အီ ဟဲ့ ယမ် ဒီ အာတ့် အန်။ 18 ဂေ အာမျုဝ် အာဆာမာန် တွိုန်၊ ဂေ ကွယ် ဘဲန် ပ့လုဝ့် ဘဲန် ပ့လုဝ့် စုး ခဲင် မိူင် ဟာဝီလ ကော ဇမ် မိူင် ဆူရာ။ ဒူင် ကွယ် ဂေ တီ၊ န့ မုး နာ လေး ဆီငဲ ဒီ မိူင် အဲဂိုပ်၊ ဒူပ် န့တေန့် အီ ဟာဝ် မိူင် အာဆူရာ။ ဂေ ဘော လာယ် ကာဂုဝ်း ဆေဆေ။

19 အာနီ န့ ဝီ မုး ဇာရာင် အီ လာယ် ဒါမ် လှုက်လှာန် အာဆဲက် တွိုန် အီ မုး ဂွန် အာဘြာဟမ်။ အာဘြာဟမ် မုး ဂုန့် အာဆဲက်။ 20 အာဆဲက် တွိုန် ဘော နုဝ့် ဖွုန် ဂိုဝ် ဆီနမ်၊ အန် ခတ် ဒိုဝ်း နာင် ဘဲက်၊ တဲး အန် ဘဲန် အီဘိုန့် အန်။ နာင် ဘဲက် မုး ဂွန် အာဘေတ်၊ အီ မုး အာမျုဝ် အာရာမ် ဘော တး ခဲင် မိူင် ဖာဒါန်အာရာမ် ။ အီကတ် နာင် ဘဲက် မုး ဒူအီ အာမျုဝ် အာရာမ် အီ စိူဝ် အာလပ်။

21 နာင် ဘဲက် ယီ မှန်၊ အာဝ် မိုဝ်း ဂွန်။ ဟဲ့ ဟွတ့် အာဆဲက် ဘော ဆာခိုဝ် ဒီ ဇဝ်ဖြာ၊ တဲး အီဘိုန့် အန် မိုဝ်း ဂွန်။ ဇဝ်ဖြာ မိူဝ် ထူမ် ပီ ဆာခိုဝ် အာဆဲက်။ ပန် တီ နာင် ဘဲက် ဘော ဒဲ ဘာဒိက် ဆန်ထေ။ 22 န့ ယီ မိုဝ်း ဂွန် အာ ဝီ အီ ကွယ် ခဲင် ဝတ့် အန်။ ဂါယ် ဘျာက် ကာဆဝ် ခဲင် ဝတ့် အန်။ အန် တဝ်း၊ “ဆေ ဂါယ် ဒီ လာယ် ကာလုတ့် ဆေဆေ၊ မှဝ် အုဝ် ဒီ ပါယ် ဒီ ခမ်။း” အန် မိူဝ် ဟာဝ် ဒီမွှတ် ဇဝ်ဖြာ လွင် အန် တီ။

23 ပန် တီ ဇဝ်ဖြာ တဝ်း ဒီ အန်၊ “န့ ဒီ မိုဝ်း အာမျုဝ် ဒူအီ အာ မျုဝ် လေး ခဲင် ဝတ့် မဲ။ ဒူအီ အာ မျုဝ် တီ၊ ဂေ ဒီ လာယ် ကာလုတ့်။ အူ မျုဝ် ဒီ မိုဝ်း ပွုန် တာင် လွှိုမ် ပေါ အူ မျုဝ်။ အီကတ် ဒီ ဘဲန် မှာယ် ဝါ အန်။”

24 ဘော ဇမ် အာခြာဝ် ဒီ ဂွိုတ်၊ အန် ဘော မိုဝ်း ဂွန် ရာပ်။ 25 အီကတ် ဟဲ့ ဂွိုတ် လေး၊ အာရိုပ် အန် ဟဲ့ ရေန့်။ အန် ဘော မိုဝ်း ဟိုက် ကိူန် ဘော ဒုဝ်။ ဂေ ဘော တဲး အန် စိူဝ် အာဆုဝ်။^a 26 ဟဲ့ ဟွတ့် ပန် တီ ဝါ အန် ဂွိုတ် လေး။ အန် ဘော ပါ ခါနှုတ့် အီကတ် အန်။ ဂေ ဝီ တဲး အန် စိူဝ် အာကူပ်။^b

27 ဂွန် အီမာယ် အာ ဝီ ဘော ကြဲ ဒီ တာင်၊ အာဆုဝ် မုး ဒူအီ လဲ ပြဲ။ အန် အိုင် ဒီ ကွယ် ခဲင် ပြဲ ခဲင် နာ။ အာကူပ် ယီ မုး ဒူအီ နှိမ်။ အန် အိုင် ဒီ ကွယ် ခဲင် ထိုပ် ဘိက် အန်။ 28 အာဆဲက် ရွက့် အာဆုဝ်။ အန် မွက့် ဒုဝ် ပြဲ ပီ မှေတ့် အာဆုဝ်။ နာင် ဘဲက် ယီ ရွက့် အာကူပ်။

29 အူ ဆီငဲ အာကူပ် ဟဲ့ ဒင် ဟာပ် ဆီငဲး။ အာဆုဝ် တး ခဲင် ပြဲ၊ ဝီ လိုပ် ခဲင် ထိုပ် ဘိက်၊ ကာပြာန့် ကာဆဝ် ဘူမ်။ 30 အာဆုဝ် တဝ်း ဒီ အာကူပ်၊ “တဲး အုဝ် ဟူမ် အီ စဲက် ဟာပ် အီ ရေန့် ပီ ဒင် မဲ။ အုဝ် ဟဲ့ ကာပြာန့် ကာဆဝ် ဘူမ်။” ခုဝ် အန် တီ၊ ဂေ ဝီ တဲး အန် စိူဝ် အာအေဒူမ်။^c

31 အာကူပ် ဝီ တဝ်း၊ “ဆေ မဲ ဆီ ဟူမ် ဟာပ် တီ၊ ပီ ဒီ ပ့လု မဲ ဒီ ဂုန့် ကူပ် မုး မဲ ဂွန် ဂိန့် မဲ လုဝ် ယွင့် ဒွါ ဒီ အုဝ် ဒီ အာတ့်၊ တဲး အုဝ် ဘဲန် ပီ ဂွန် ဂိန့်။”

32 အာဆုဝ် ဝီ တဝ်း၊ “အုဝ် ဟဲ့ ကာပြာန့် ကော ရိန် ဒီ ယမ်။ အုဝ် ပီ ဘော မုး ဂွန် ဂိန့်၊ တူ မုး ဂွန် ဂိန့်၊ အာဝ် လိူက်။ အာဝ် မိုဝ်း ဒီခုဝ်၊ အာဝ် ပါယ် မာဆေ ဒီ အုဝ်။”

33 အာကူပ် ဝီ တဝ်း၊ “ဆေ န့ ပါယ် တီ တဲး မဲ ဒွါ ကာဒိက် ဆတ်ဇာ ဒီ အုဝ်၊ တဲး အုဝ် နပ် ဆီချာ၊ မဲ ဒွါ အုဝ် ဘဲန် ဂွန် ဂိန့်။” ပန် တီ အာဆုဝ် ကာလာင် ဂြုဝ်း ကာဒိက် ဆတ်ဇာ။ ပါယ် တီ အန် မိူဝ် ယွင့် တူတ့် ပီ ဒီ ပ့လု ဂွန် ဂိန့်၊ တဲး ဝါ အန် ပွိုန်။

34 ဟဲ့ ဟွတ့်၊ အာကူပ် ဒွါ ပီ ဒီ ဟူမ် တွိုန်၊ တဲး အာဆုဝ် ဟူမ်။ န့ မုး ဟာပ် ဘ့လေ လူမ် ရေန့်။ အာဆုဝ် ဘော ဟူမ် ဘော ဒျီင် ဖဲ။ ဟဲ့ ဟွတ့် အန် ဝီ ယိတ့် ဟာဝ် နာ ရေတ့်။

ရုး မုး အာဆုဝ် ဂွန် ဂိန့်၊ ပီ ဒီ ပွိုန် အန် ကူပ် မုး အန် ဂွန် ဂိန့်၊ အာဆုဝ် ဟဲ့ ဝဲန် တူတ့် ပါယ် တီ။