1 နာင် ဆာရာ ဟဲ့ နုဝ့် အူ မာယဝ်း ဒီ အာ ဂိုဝ် ဒီ ဘူ ဆီနမ်၊ အန် ဘော ယမ်။ 2 ဒေါ ယမ် အန်၊ အန် ကွယ် ဒူင် စိူဝ် ကီရီယာတ်အာဘာ။ မိူင် တီ ဘော စိူဝ် မိူင် ဟေဘြုဝ်။ န့ ကွယ် ဒီ ကာဒါယ် မိူင် အီ စိူဝ် မိူင် ကာနန့်။ အန် ဟဲ့ ဟွတ့် ယမ်၊ အာဘြာဟမ် ဘော မိုဝ်း နဝ်း က့လိုဝ်။ အန် ဟာဝ် လိုပ် ဒူင် ကွယ် အီဘိုန့် အန် ဘော ယာမ်။

3 ဟဲ့ ဟွတ့်၊ အန် ဝီ ယိတ့် လေး ဒူင် ကွယ် အန်၊ ဟာဝ် ကာလာင် ဂြုဝ်း ဒီ ဒူအီ အာမျုဝ် ဟေထိတ် အီ ကွယ် ဒီ တီ။ 4 အန် တဝ်း၊ “အုဝ် ဟဲ့ မုး ခဲတ့် ခဲင် မိူင် ဘေ။ ဒေါ တီ နီ အုဝ် ယီ မှာန့်၊ တဲး ဘေ ဒွါ ကာဒါယ် ဒီ ဘူင် ဘာရေဝ်၊ တဲး အုဝ် ပွိုန် ဒီ ဒိပ် ဒုဝ် အီဘိုန့် အုဝ်။” 5 ပန် တီ ဂေ ဒူအီ အာမျုဝ် ဟေထိတ် ဝီ တဝ်း ဒီ အန်။ 6 “မဲ ဒါ၊ တဲး မဲ ထူမ် ဂြုဝ်း ယေ။ မဲ မုး ဒါ ကာညာ ပီ တိုယ် ဇဝ်ဖြာ အီ ကွယ် ရိုမ် ဒူပ် ယေ။ တဲး မဲ ရဝ်း ကာဒဝ် မာဝ် အီ မွှိုမ် လွှိုမ် တူတ့်၊ ဘ့လေး ဒုဝ် အီဘိုန့် မဲ နာ ခဲင်။ ကာတဲ ယေ၊ န့ တူ မိုဝ်း အာဆေ အီ တူ ခ့ဝါင် မဲ ဘူင် ပါယ် တီ။”

7 ပန် တီ အာဘြာဟမ် တွိုန် ဝီ ယိတ့်၊ မုတ် ဂိန့် အန် ဒီ အာတ့် ဂေ ဒူအီ အာမျုဝ် ဟေထိတ် တွိုန်။ 8 အန် တဝ်း၊ “ဆေ ဘေ ဆီ တဲး အုဝ် ဒိပ် ဒုဝ် အီဘိုန့် အုဝ် ခဲင် ဘာရေဝ်၊ တဲး ဘေ ထူမ် ဂြုဝ်း အုဝ်၊ တဲး ဘေ ဟာဝ် ဒီ အာဖေရူန် အီ မုး ဂွန် အာဇုဝ်ဟာန်၊ 9 တဲး အန် ဒွါ ကာဒဝ် မာဝ် အီ စိူဝ် မာတ်ပေန်လာ၊ အီ ကွယ် ခူပ် ဒူင် နာ အန်၊ တဲး ဘေ မှာန့် ဒါင် အုဝ်၊ တဲး အန် ဒွါ ကာဒဝ် မာဝ် တီ ဒီ အုဝ်။ အုဝ် ဒီ ဘော စိုဝ်း ဒီ အန်၊ ဒွါ ခဲ့ ပီ လုဝ် အန်၊ တဲး န့ ဘဲန် ဘာရေဝ် ယေ။”

10 အာဖေရူန် တွိုန် ယီ ကွယ် ရိုမ် ဒူပ် ဂေ ဒူအီ အာမျုဝ် ဟေထိတ် တွိုန်။ ဘော အန် မုး ဒူအီ ဟေထိတ် အီ ကွယ် ခူပ် မာလုဝ်း မိူင်။ အန် တဝ်း၊ တဲး ဒွန် အီ ထူမ်။ 11 “အိုယ် ဒါ၊ တဲး မဲ ထူမ် ဂြုဝ်း အုဝ်၊ တဲး ဘော ဒွန် အီ ထူမ်။ ဘော ဒူင် နာ တွိုန်၊ ဘော ကာဒဝ် မာဝ် အီ ကွယ် ဒီ ခူပ် နာ တွိုန်၊ အုဝ် ဒီ ဒွါ ဒီ မဲ ပီယေန့်။ ဂေ ဒွန် အီ အီ ထူမ် ဂြုဝ်း အုဝ် ဒေါ တီ နီ ဟဲ့ နပ်၊ အုဝ် ဒွါ ပီယေန့် ကာဒါယ် တီ။ တဲး မဲ ဟာဝ် ဘ့လေး ဒုဝ် အီဘိုန့် မဲ။”

12 အာဘြာဟမ် ပီ ဝီ မုတ် ဂိန့် အန် ဒီ အာတ့် ဒွန် အီ၊ 13 ပီ ဝီ ကာလာင် ဒီ အာဖေရူန် တဲး ဒွန် အီ ပွိုန် ဒီ ထူမ် ဂြုဝ်း အန်။ အန် တဝ်း၊ “တဲး မဲ ထူမ် ဆီချာ ဂြုဝ်း အုဝ်။ အုဝ် ဒီ ဒွါ ငဝ်း အန်၊ အုဝ် ဒီ စိုဝ်း ကာဒါယ် တီ။ အုဝ် ဘော မှာန့် တဲး မဲ ဒိုဝ်း ငဝ်း အန် ဒီ အုဝ်၊ တဲး အုဝ် ပွိုန် ဒီ ဘ့လေး ဒုဝ် အီဘိုန့် အုဝ်။”

14 အာဖေရူန် တွိုန် ဝီ တဝ်း၊ 15 “အိုယ် ဒါ၊ တဲး မဲ ဝီ ထူမ် ဂြုဝ်း အုဝ်။ ကာဒါယ် တီ၊ ငဝ်း အန် မုး ရွိုန် ဖွုန် မာယဝ်း ဘူင့်။ အာဝ် လိူက်၊ မဲ မုး ဂိုက် အုဝ်၊ အုဝ် ဒွါ ဒီ မဲ၊ တဲး မဲ ဟာဝ် ဘ့လေး ဒုဝ် အီဘိုန့် မဲ။”

16 အာဘြာဟမ် ဘော ဘူင် ပီ မှာန့် အာဖေရူန်၊ ဒိုဝ်း ငဝ်း ကာဒါယ်၊ ဒွါ ဒီ အန်။

17 ပါယ် တီ အာဘြာဟမ် ဟဲ့ ဘဲန် ဒါ ကာညာ ကာဒါယ် တီ။ ခါ အာတ့် ဒါ အာဖေရူန် ဟဲ့ မုး ဒါ ကာညာ အန်။ ဒူင် တီ ကွယ် ချြီ့ ဒူင် စိူဝ် မမ်ရေ။ န့ မိုဝ်း ကာဒဝ် မာဝ် ဘော ဟေ ဒွန် မျုဝ် အီ ကွယ် ဒီ ကာအုန် ဒူင် နာ အန်။ 18 အာဘြာဟမ် ဟဲ့ စိုဝ်း ကာဒါယ် တီ၊ တဲး ဂေ ဒူအီ ဟေထိတ် ဒွန် အီ ယိုဝ်။ န့ မုး ဂေ အီ ဟဲ့ တး ကာဇု ဒီ ခူပ် မာလုဝ်း မိူင် ဒေါ လာယ် ဆင်ချာင် ဂေ လွင် အန် တီ။ 19 အန် ဟဲ့ ဟွတ့် စိုဝ်း၊ အန် ဝီ ဟာဝ် ဘ့လေး အုန် ဒုဝ် အီဘိုန့် အန် ခဲင် ကာဒဝ် မာဝ် အီ စိူဝ် မာတ်ပေန်လာ အီ ကွယ် ချြီ့ ဒူင် စိူဝ် မမ်ရေ တွိုန်။ မိူင် တီ ဘော စိူဝ် ဟေဘြုဝ် ဘော ကွယ် ခဲင် ကာဒါယ် မိူင် ကာနန့်။ 20 ဂေ ဒူအီ အာမျုဝ် ဟေထိတ်၊ ဂေ ဟဲ့ ဒွါ ဒူင် တီ၊ တဲး န့ ဘဲန် ဘာရေဝ် ဂေ ဒူအီ အာမျုဝ် အာဘြာဟမ် တွိုန်။