1 ဝါယ် အန် တီ ဇဝ်ဖြာ တဝ်း ဒီ ထေဝ် နဝ်း အာဘြာဟမ် တွိုန်။ အန် ဇဝ် တဝ်း၊ “အိုယ် အာဘြာဟမ်။” အန် ဝျီ့ ဂြုဝ်း တီ တဝ်း၊ “အိုဝ်၊ အုဝ် ကွယ် ဒီ နီ၊ မဲ ဇဝ်။”

2 ပန် တီ ဇဝ်ဖြာ ဝီ တဝ်း၊ “မဲ ဒဲ့ ဂွန် မဲ၊ အီ မုး ဂွန် ပီ ရွက့် မဲ အီ စိူဝ် အာဆဲက်။ ဘော မဲ ဘော ဂွန် မဲ အူ ဝီ တီ၊ ဘာယ် အာ ဝီ လုဝ် ဟာဝ် ခဲင် မိူင် မုဝ်ရီယာ။ ဘာယ် ဟီ ဇမ် ခဲင် မိူင် တီ၊ မဲ လုဝ် လှူ ဂွန် မဲ ဒီ အုဝ်၊ တဲး န့ ဘဲန် ပီ လှူ ပီ ဟူမ် ကာဆိုမ် ငဝ်။ မဲ လုဝ် လှူ အန် ဒဲင် နွန် ပီ ဒီ ဘျ အုဝ် ဒီ မဲ။”

3 ပန် တီ အာဘြာဟမ် ဘော စေဝ် ယိတ့်၊ ဘ့လေး ကွပ် ဒီ မာလာ အန်။ အန် ဘော ဒဲ့ မှာယ် အန် အာ ဝီ ဘော အာဆဲက်၊ တဲး ဂေ ဒူပ် အန်။ အန် မိူဝ် ဆီလုဝ်း ဟေ၊ တဲး န့ ဘဲန် မာ ငဝ်။ ဟဲ့ ဟွတ့်၊ အန် လေး ဟာဝ် ဒူင် ပီ စ်ု ဇဝ်ဖြာ အန် ဟာဝ်။ 4 န့ ဘော ဇမ် အူယ် ဆီငဲ၊ အာဘြာဟမ် ဝီ ယွတ်၊ ဘော ယိုဝ် ဒူင် ပီ တဝ်း ဇဝ်ဖြာ ဒီ အန်၊ န့ ကွယ် နာ ကာတူင့်။ 5 အန် တဝ်း ဒီ ဒဲစေန့် အန်၊ “တဲး ဘာယ် ကွယ် ဒီ နီ။ တဲး ဘာယ် ဘ်ု မာလာ အုဝ်။ ဘော အုဝ် ဘော အာဆဲက်၊ ယာယ် ဒီ ဟာဝ် နာ တ ဒွယ်၊ တဲး ယာယ် ကြိုပ် ဇဝ်ဖြာ။ ယာယ် ဟဲ့ ဟွတ့် ကြိုပ် အန် ဇဝ်၊ ယာယ် ဒီ ဝီ တး။”

6 ပန် တီ အန် ဒိုဝ်း မာ ငဝ် ပီ လုဝ် ဂေ အာဒါ ပီ ဒီ လှူ ပီ ဟူမ် ကာဆိုမ် ငဝ်၊ ဒွါ ဒီ အာဆဲက်၊ တဲး အန် ဂူင့်။ အန် ဝီ ဂူင့် ငဝ် ဘော အာတိုမ်၊ ဟာဝ်။ ပါယ် တီ ဂါယ် အာ ဝီ လာယ် ကာဒူပ် ဟာဝ်။

7 အာဆဲက် တွိုန် တဝ်း ဒီ ဂုန့် အန်၊ “အိုယ်၊ ဂုန့်။”

အာဘြာဟမ် ဝီ တဝ်း၊ “အိုဝ်၊ ဂွန် အုဝ်၊ အုဝ် ကွယ် ဒီ နီ။”

အန် ဝီ ဒီမွှတ် တဝ်း၊ “အာယ် မိုဝ်း ဒီ ဂူင့် ငဝ် ဂေ မာ ငဝ်။ မှဝ် မာဘူ ပီ လုဝ် လှူ အာယ်။း”

8 အာဘြာဟမ် တွိုန် ဝီ တဝ်း၊ “အိုယ်၊ ဂွန် အုဝ်၊ ဇဝ်ဖြာ ဒီ ဝီ တဲး အာယ် ယိုဝ် မာဘူ ပီ လုဝ် လှူ အာယ်။” ပန် တီ ဂါယ် အာ ဝီ ဝီ ကာဒူပ် ဟာဝ်။

9 ဂါယ် ဟဲ့ ဟွတ့် ဇမ် ဒူင် ပီ ဘျ ဇဝ်ဖြာ ဒီ အန်၊ အန် ဝီ ဘူင် ကာစှူင့် လှူ ဒီ ဇဝ်ဖြာ ဒူင် ကွယ် ဂါယ် တီ။ အန် ဒိုဝ်း ဘ့လေး မ့ပိုမ် ဟေ၊ ဝီ ပက် အာဆဲက် အီ မုး ဂွန် အန်၊ ဘ့လေး ဒဲင် ဟေ တီ။ 10 ပန် တီ အန် ဒိုဝ်း အာတိုမ်၊ စုဝ့် ဒဲ အန်၊ တဝ်း ဒီ ဆတ် ယမ် ဂွန် အန်။ 11 ဒေါ အန် တီ အာမူ အာမာတ် ဇဝ်ဖြာ အီ ကွယ် ခဲင် ဂါင်ဟြာဝ် ဒဲ့ အန် တဝ်း၊ “အိုယ် အာဘြာဟမ်။”

အန် ဝီ တဝ်း၊ “အုဝ် ကွယ် ဒီ နီ။”

12 အာမူ အာမာတ် ဇဝ်ဖြာ ဝီ တဝ်း၊ “ကွဲ့ စုဝ့် ဒဲ မဲ၊ ကွဲ့ ဘူင် မာဆေ ဒီ ဂွန် မဲ။ ဒေါ တီ နီ၊ အုဝ် ဟဲ့ နပ်၊ မဲ ဟဲ့ ယုဝ် အုဝ်။ မဲ တူ ဂြူပ် အုန် ဂွန် ပီ ရွက့် မဲ။”

13 ဒေါ အန် တီ အာဘြာဟမ် တွိုန် ဝီ ယွတ်။ အန် ဘော ယိုဝ်၊ မာဘူ အာလူင့် အူ ဒုဝ် ဟဲ့ ကွယ် ခဲင် နင်၊ အာဝ် ဟူ ပွိုန် လေး။ အန် ဟာဝ် ဒိုဝ်း မာဘူ တီ၊ လှူ ဒီ ဇဝ်ဖြာ၊ တဲး န့ ဘဲန် ပီ ဒီ လှူ ပီ ဟူမ် ကာဆိုမ် ငဝ်၊ တဲး န့ ကာဒါင် ဂွန် အန်။ 14 အာဘြာဟမ် တွိုန် တဲး ဒူင် တီ စိူဝ်၊ “ဇဝ်ဖြာ ယိုဝ် ပီ လုဝ် အုဝ်။” ပါယ် တီ ကော ဇမ် အာတိုဝ် ဂေ ဒူအီ ကာလာင် လွင် နွန် တီ တဝ်း၊ “န့ မုး ဒူင် ဒီ တဲး ဇဝ်ဖြာ ဒူအီ ယိုဝ် ပီ လုဝ် ဂေ။”^a

15 ပန် တီ အာမူ အာမာတ် ဇဝ်ဖြာ ဝီ ဒဲ့ အာဘြာဟမ် ပေါ အူ ဇေန့်၊ ကာလာင် ဂြုဝ်း အီ လေး ခဲင် ဂါင်ဟြာဝ်။ 16 အန် တဝ်း၊ “ဇဝ်ဖြာ တဝ်း ဒီ မဲ၊ ‘အုဝ် ဇဝ်ဖြာ ဟဲ့ မုး၊ ဟဲ့ မှာန်၊ တူ နပ် ဒီ ကာလုဝ်။ ခုဝ်၊ အုဝ် ဒွါ ကာဒိက် ဆတ်ဇာ ဒီ မဲ။ ဘော ကာဒိက် ဆတ်ဇာ တီ ဟဲ့ မှာန် ပီ အုဝ် ဟဲ့ မှာန်။ မဲ ဟဲ့ ငှာ ဒီ လှူ ဂွန် မဲ ဒီ အုဝ်။ မဲ တူ မိုဝ်း ဂွန် ပေါ အူ ဝီ။ မဲ ယီ တူ ဂြူပ် အုန် ဂွန် တီ၊ တူ ခြဲ အုဝ် ဒိုဝ်း ဂွန် မဲ တီ။ 17 ခုဝ်၊ အုဝ် ဒီ ဘော မွင့်ကာရာ ဒွါ ဒီ မဲ ကိူန် ကာဆဝ်။ အုဝ် ဒီ ဘူင် တဲး ဂေ လှုက်လှာန် မဲ ကိူန် ကာဆဝ်၊ တဲး ဂေ ကိူန် ခဲ့ ကိူန် ဆီမန့် အီ ကွယ် ခဲင် ဘ့လေန့်၊ တဲး ဂေ ကိူန် ခဲ့ ကိူန် ကာဟာတ့် အီ ကွယ် ခူပ် အိုမ် နမ်မုက်ဆာရာ။ ဂေ လှုက်လှာန် မဲ၊ ဂေ ဒီ ဘော အိုပ် ရန်ဆူ ဂေ။ 18 ဂေ အာမျုဝ် ဒူအီ၊ အီ ကွယ် ဒွန် နာ ဒွန် ပ့လုဝ့် ဒဲင် ကာဒါယ်၊ ဂေ ဒီ လာယ် မွင့်ကာရာ ဒွါ၊ တဝ်း၊ “တဲး ဇဝ်ဖြာ မွင့်ကာရာ ဒွါ ဒီ မဲ ပီ အန် ဇဝ် ဟဲ့ မွင့်ကာရာ ဒွါ ဒီ လှုက်လှာန် အာဘြာဟမ် တွိုန်။” ဂေ ဒီ ကာလာင် ပါယ် တီ ကူပ် ဟဲ့ ဘူင် ဒူပ် မဲ ခဲ့ ပီ စ်ု အုဝ် မဲ ဘူင်။’”

19 အာမူ အာမာတ် ဇဝ်ဖြာ တွိုန် ဟဲ့ ဟွတ့် ကာလာင် ပါယ် တီ အာဘြာဟမ် ဝီ ဝေန့် ဒူင် ကွယ် မှာယ် အန်။ ဂေ ဝီ ဟာဝ် ဒီ ရိုမ်၊ ဇမ် ဒူင် စိူဝ် ဘီရာဆေဘာ။ အန် ဝီ ကွယ် လှေန့် ခဲင် မိူင် ဘီရာဆေဘာ တီ။

20 ပန် တီ န့ ဝီ မိုဝ်း ဒူအီ အီ ကာလာင် ဒီ အာဘြာဟမ် လွင် အီကတ် အန်။ ဂေ တဝ်း၊ “ဘော နာင် မဲက် ဟဲ့ မိုဝ်း ဂွန် အီမာယ် ဒွါ ဒီ အီကတ် မဲ အီ စိူဝ် အာနာဟုဝ်။ 21 ဂွန် အာနာဟုဝ် တွိုန်၊ အီ မုး ဂွန် ဂိန့် အန် စိူဝ် အာအုတ်။ ဟဲ့ ဟွတ့်၊ န့ ဝီ မိုဝ်း ဝါ အီ စိူဝ် အာဘုတ် ဂါယ် အာကေမူအေန်။ အာကေမူအေန် တီ ဘော ဘဲန် ဂုန့် အာရာမ်။ 22 န့ မိုဝ်း ဘော အာကေဆေတ်၊ အာဟာဆုဝ်၊ အာဖီဒါတ်၊ အာယီစာပ် ဘော အာဘေတ်။” 23 အာဘေတ် ဟဲ့ ဘဲန် ဂုန့် နာင် ဘဲက်။ ဂေ ဂွန် အီမာယ် ဒါ ဝီ တီ၊ ဂေ မုး ဂွန် နာင် မဲက်။ ဂုန့် ဂေ မုး အာနာဟုဝ် အီ မုး အီကတ် အာဘြာဟမ် တွိုန်။ 24 ဘော အီဘိုန့် အာနာဟုဝ် ပေါ အူ ဝီ၊ အီ စိူဝ် နာင် ရူမာ ဟဲ့ ပွိုန် ဂွန် အီမာယ်။ ဂေ စိူဝ် အာထေဘာ၊ အာဂါဟာမ်၊ အာထာဟာဆာ ဘော အာမာခါ။