1 အာဘြာမ် တွိုန်၊ ဒေါ ဟဲ့ နုဝ့် အာဆာက် အန် ဒိမ် ဂိုဝ် ဒီ ဒိမ် ဆီနမ်၊ အူ ဆီငဲ ဇဝ်ဖြာ ဝီ ကာပ့လုး ဒီ အန် တဝ်း၊ “အုဝ် မုး ဇဝ်ဖြာ၊ အုဝ် စိူဝ် ဇဝ်ဖြာ အီ အိုပ် တူတ့် ဒွန် မျုဝ်။ ခဲ့ ပီ ဘူင် မဲ၊ တဲး န့ ဒူပ် ပီ အိုင် အုဝ်၊ ကွဲ့ တဲး အီ ဟဝ် ပွိုန် ဒီ ကာလာင် နာ တူ မွှိုမ် လွင် မဲ။ 2 အုဝ် ဒီ ဒွါ ကာဒိက် ဆတ်ဇာ ဒီ မဲ။ တဲး အာယ် လာယ် ဖြူမ်။ အုဝ် ဒီ ဘူင် တဲး လှုက်လှာန် မဲ ကိူန် ကာဆဝ်။”

3 ဇဝ်ဖြာ ဟဲ့ ဟွတ့် ကာလာင် ပါယ် တီ အာဘြာမ် ဝီ ခြိုပ်ခြဝ် ဒီ အာတ့် အန် ဇဝ်။ အန် ဇဝ် ဝီ ကာလာင် ဒီ အန် တဝ်း၊ 4 “န့ မုး အုဝ် အီ ကာလာင် ဒီ မဲ။ တဲး မဲ နပ်၊ အုဝ် ဟဲ့ ဟွတ့် ဒွါ ကာဒိက် ဆတ်ဇာ ဒီ မဲ။ မဲ ဒီ ဘဲန် ဂုန့် ဒင် ဂေ အာမျုဝ် ဒူအီ ကိူန်။ 5 ခါ အာတ့် ဂေ ဟဲ့ တဲး မဲ စိူဝ် အာဘြာမ်။ အုဝ် ယီ တဲး မဲ ဝီ စိူဝ် အာဘြာဟမ်။ လွင် ဒါင် အန် တီ၊ န့ မုး၊ ‘မဲ မုး ဂုန့် ဒင် အာမျုဝ် ဒူအီ ကိူန်။’ 6 အုဝ် ဒီ တဲး မဲ မိုဝ်း လှုက်လှာန် ကိူန် ကာဆဝ်။ အုဝ် ဒီ တဲး ဂေ ဘဲန် အာမျုဝ် ဒူအီ ဘဲန် မျုဝ် ဘဲန် မျုဝ်။ မဲ ဒီ ဘော ဘဲန် ဂုန့် ဒင် ခုန်ဒီခမ် ဘဲန် ကာဒင် ဘဲန် ကာဒင်။ 7 ကာဒိက် ဆတ်ဇာ ပီ ဒွါ အုဝ် ဒီ မဲ၊ အုဝ် တူ ဘျွင် ဒေါ မှဝ်။ န့ မှာန် အာခါခ်ု အာဒါ ဒွန် ဇာတ် ဒွန် ဘာန်။ ကာဒိက် ဆတ်ဇာ တီ၊ န့ ဒီ မှာန် အာခါခ်ု အာဒါ မဲ ဘော အာဒါ ဂေ လှုက်လှာန် မဲ ဒွန် စုဝ်။ ပါယ် တီ အုဝ် ဟဲ့ မုး ဇဝ်ဖြာ ပီ ကြိုပ် မဲ။ အုဝ် ဒီ ဘော မုး ဇဝ်ဖြာ ပီ ကြိုပ် ဂေ လှုက်လှာန် မဲ။ 8 မိူင် ဒူင် ကွယ် မဲ ဒေါ တီ နီ၊ မိူင် ပီ ဘဲန် မဲ ခဲတ့် ဒေါ တီ နီ၊ အုဝ် ဒီ ဒွါ ဒီ မဲ ဘော ဒီ လှုက်လှာန် မဲ။ န့ ဒီ ဘဲန် မိူင် ဂေ ကော ဇမ် ဒွန် ဇာတ် ဒွန် ဘာန်။ အုဝ် ဒီ ဘော ဘဲန် ဇဝ်ဖြာ ပီ ကြိုပ် ဂေ။”

9 ပန် တီ ဇဝ်ဖြာ ဝီ ကာလာင် ဂြုဝ်း ဒီ အာဘြာဟမ် တွိုန် တဝ်း၊ “ဘော မဲ လုဝ် ဘူင် ပီ စ်ု အုဝ် ဒီ မဲ၊ တဲး န့ ဘဲန် လက်ဆာနာ ပီ လာယ် ဖြူမ် အာယ်။ ဘော မဲ၊ ဘော လှုက်လှာန် မဲ ဒွန် စုဝ် ဘေ လုဝ် ဘူင် ခဲ့ ပီ စ်ု အုဝ် ဒွန် မျုဝ်။ 10 အုဝ် စ်ု ဘေ ဘူင် ပါယ် တီ တဲး ဘေ လှုဝ်း ကာဒိက် ဆတ်ဇာ ပီ ဒွါ အုဝ် ဒီ ဘေ ဒွန် စုဝ်။ အီမာယ် အီ ကွယ် ဒူပ် ဘေ ဒွန် အီ၊ ဘေ လုဝ် ဆွာ့ ဝဲန် ဟုန် လခါနာ ဂေ။ 11 ဟုန် အီ ကွယ် ဒီ လခါနာ အီမာယ်၊ ဘေ လုဝ် ဆွာ့ ဝဲန်။ အာတီ၊ န့ မုး လက်ဆာနာ ပီ ဖြူမ် ဘေ ဒီ အုဝ်၊ တဲး ဘေ ထူမ် ဘူင် ပီ စ်ု အုဝ် ဆေဆေ။ 12 အာဆေ မုး အီမာယ် ခဲင် အာမျုဝ် ဘေ၊ ဘော ဂေ ဂွန် မှာယ် ဘေ အီ ကွယ် ခဲင် ကာင် ဘေ ဘော ဂွန် မှာယ် ပီ စိုဝ်း ဘေ ဒီ အီ ဟဝ်၊ ဆေ အာဆာက် ဂေ ဟဲ့ နုဝ့် ဒါ ဆီငဲ၊ ဘေ လုဝ် ဆွာ့ ဝဲန် ဟုန် လခါနာ ဂေ။ ဘေ ဘော လုဝ် ဘူင် ပါယ် တီ အာဒါ ဒွန် စုဝ် ဟာဝ် နာ အာတ့်။ 13 ပါယ် တီ အုဝ် ဟဲ့ တဲး ဘေ ဘူင်၊ တဲး ဘေ လှုဝ်း ကာဒိက် ဆတ်ဇာ ပီ ဒွါ အုဝ် ဒီ ဘေ ဆေဆေ ကော ဇမ် ဒွန် ဇာတ် ဒွန် ဘာန်။ ဘော မှာယ် အီ ဂွိုတ် ခဲင် ကာင် ဘေ၊ ဘော မှာယ် ပီ စိုဝ်း ဘေ၊ ဘေ လုဝ် ဆွာ့ ဝဲန် ဟုန် လခါနာ ဂေ။ 14 ဆေ န့ ယီ မိုဝ်း အီမာယ် အူ ဝီ၊ အီ တူ ဆွာ့ ဝဲန် ဟုန် လခါနာ အန်၊ ဘေ လုဝ် ဘ့လေး ဝဲန် အန်၊ ကွဲ့ တဲး ဘေ မာတ် အန် မုး ဒူအီ အာမျုဝ် ဘေ။ အန် ဟဲ့ ဟွတ့် ပျာတ့် ပီ လာယ် ကာဆဲန့် အေ။”

15 ပန် တီ ဇဝ်ဖြာ ဝီ ကာလာင် ဂြုဝ်း ဒီ အာဘြာဟမ် တဝ်း၊ “အူ ပူင့် အာတိုဝ် နီ၊ အီဘိုန့် မဲ အီ စိူဝ် နာင် ဆာရာယ် တွိုန်၊ ကွဲ့ ဟူ တဲး အန် စိူဝ် နာင် ဆာရာယ်။ မဲ လုဝ် တဲး အန် စိူဝ် နာင် ဆာရာ။ 16 အုဝ် ဇဝ်ဖြာ ဒီ မွင့်ကာရာ တဲး ဒီ အန်။ အုဝ် ဒီ တဲး အန် မိုဝ်း ဂွန်။ ဂွန် တီ မုး ဂွန် အီမာယ် မဲ။ အုဝ် ဒီ မွင့်ကာရာ တဲး နာင် ဆာရာ၊ တဲး အန် ဝီ ဘဲန် မာ ဒင် ဂေ အာမျုဝ် ဒူအီ ဘဲန် မျုဝ် ဘဲန် မျုဝ်။ ဂေ ခုန်ဒီခမ် အာမျုဝ် ဒူအီ ဘဲန် မျုဝ် ဘဲန် မျုဝ် ဒီ ဝီ တဝ်း၊ နာင် ဆာရာ မုး မာ ဒင် ဂေ။”^a

17 ဇဝ်ဖြာ ဟဲ့ ဟွတ့် ကာလာင် ပါယ် တီ အာဘြာဟမ် ဝီ ခြိုပ်ခြဝ် ဘော ကာညး။ အန် တဝ်း ခဲင် နဝ်း အန်။ “အာဆာက် အုဝ် ဟဲ့ နုဝ့် အူ မာယဝ်း ဆီနမ်။ အုဝ် ဒီ ဘော မိုဝ်း ဂွန်။း ဘော နာင် ဆာရာ၊ အာဆာက် အန် ဟဲ့ နုဝ့် ဒိမ် ဂိုဝ် ဆီနမ်။ မှဝ် အန် ဒီ ဘော ပွိုန် ဒီ ဂွိုတ် ဂွန် အာင။း” 18 အာဘြာဟမ် ယီ ကာလာင် ဂြုဝ်း ဒီ ဇဝ်ဖြာ။ အန် တဝ်း၊ “မဲ ဇဝ်၊ တဲး အာဆာမာန် တွိုန် ဘဲန် ဒူအီ အီ ပ့လု အုဝ်။”

19 ဇဝ်ဖြာ ဝီ တဝ်း၊ “အာဝ် မုး ပါယ် တီ။ အီဘိုန့် မဲ၊ အီ စိူဝ် နာင် ဆာရာ၊ အန် ဒီ မိုဝ်း ဂွန်။ မဲ လုဝ် တဲး ဂွန် တီ စိူဝ် အာဆဲက်။ ကာဒိက် ဆတ်ဇာ ပီ ဒွါ အုဝ် ဒီ မဲ၊ အုဝ် ဒီ ဘော ဒွါ ဒီ အန်၊ တဲး န့ မှာန် အာဒါ ဒွန် စုဝ် ဟာဝ် နာ အာတ့်။ 20 န့ ဘော မိုဝ်း အာဆာမာန် တွိုန်၊ အုဝ် မိူဝ် ဟဲ့ ထူမ် ပီ မှာန့် မဲ။ အုဝ် ဒီ မွင့်ကာရာ တဲး ဘော ဒီ အန်။ အုဝ် ဒီ တဲး ဘော အန် မိုဝ်း လှုက်လှာန် ကိူန် ကာဆဝ်။ ဂွန် အန် ဒီ ဘဲန် ဒါ ကာညာ ဂိုဝ် ဒီ အာ ကာဒင် အီ အိုပ် မိူင်။ အုဝ် ဒီ တဲး ဂေ ဘဲန် ဒူအီ အာမျုဝ် တာင် ကာဆဝ်။ 21 ကာဒိက် ဆတ်ဇာ ပီ ဒွါ အုဝ် ဒီ မဲ၊ ပီ လာယ် ကာဆဲန့် အာယ် တွိုန်၊ အုဝ် ယီ ဒီ ဒွါ ဒီ အာဆဲက်။ ဆီနမ် ဒီ တး၊ ဒေါ ဝီ ဇမ် မာဂျီန် နီ၊ နာင် ဆာရာ ဒီ ဂွိုတ် ဂွန် အီမာယ် တီ၊ ဒွါ ဒီ မဲ။” 22 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အန် ဝီ လေး ဒူင် ကွယ် အာဘြာဟမ် တွိုန်။

23 ဇဝ်ဖြာ ဟဲ့ ဟွတ့် ကာလာင် ဂြုဝ်း ဒီ အာဘြာဟမ် တွိုန်၊ အန် ဝီ ဘူင် ပီ ဒမ် ဇဝ်ဖြာ အူ ဇေန့်။ ဆီငဲ တီ အန် ဒိုဝ်း အာဆာမာန် အီ မုး ဂွန် အန်၊ ဘော မှာယ် အီ ဂွိုတ် ခဲင် ကာင် အန်၊ ဘော မှာယ် ပီ စိုဝ်း အန်။ ခဲ့ မိုဝ်း အီမာယ် အီ ဒူပ် အန်၊ အန် ဒိုဝ်း ဒွန် အီ၊ ဆွာ့ ဝဲန် ဟုန် လခါနာ ဂေ။ 24 အာဘြာဟမ် တွိုန်၊ အာဆာက် အန် ဟဲ့ နုဝ့် ဒိမ် ဂိုဝ် ဒီ ဒိမ် ဆီနမ် ဒေါ ဆွာ့ ဝဲန် အန် ဟုန် လခါနာ အန်။ 25 အာဆာမာန် အီ မုး ဂွန် အီမာယ် အန်၊ အာဆာက် အန် ဟဲ့ နုဝ့် ဂိုဝ် ဒီ အူယ် ဆီနမ် ဒေါ ဆွာ့ ဝဲန် ဂေ ဟုန် လခါနာ အန်။ 26 ဆီငဲ တီ အာဘြာဟမ် ဘော ဂွန် အီမာယ် အန် ဟဲ့ ခမ် ဒီ ဆွာ့ ဝဲန် ဟုန် လခါနာ ဂါယ်။ 27 ဘော ဂေ အီမာယ် ဒွန် အီ၊ အီ ကွယ် ရိုမ် ဒူပ် အန်၊ ဂေ အီ ကွယ် ခဲင် ကာင် အန် ဆိန့် ဒေါ ဂွိုတ် ဂေ၊ ဘော ဂေ မှာယ် အီ တး ခဲင် မိူင် ဟဝ်၊ ဂေ အီ ပီ စိုဝ်း အန်၊ ဂေ ဒွန် အီ ဘော ခမ် ဒီ ဆွာ့ ဝဲန် ဟုန် လခါနာ ဂေ ဒေါ အန် တီ။