ခါန် 16
လွင် နာင် ဆာရာယ် ဂါယ် နာင် ဟာဂါ
1 န့ ယီ မိုဝ်း နာင် ဆာရာယ် အီ မုး အီဘိုန့် အာဘြာမ် တွိုန်။ အန် ညှမ် မိုဝ်း ဂွန်။ အန် ယီ မိုဝ်း မှာယ် အူ ဝီ အီ တး မိူင် အဲဂိုပ် အီ စိူဝ် နာင် ဟာဂါ။ 2 အူ ဆီငဲ၊ နာင် ဆာရာယ် တွိုန် ယီ ကာလာင် ဂြုဝ်း ဒီ အာဘြာမ်။ အန် တဝ်း၊ “မဲ ယိုဝ်၊ ဇဝ်ဖြာ တူ တဲး အုဝ် မိုဝ်း ဂွန်။ ခုဝ်၊ တဲး မဲ ဟာဝ် လာယ် မှာယ် အုဝ် တွိုန်၊ တဲး အန် ဂွန် ဒါင် အုဝ်၊ တဲး ဂွန် အန် ဘဲန် ဂွန် အုဝ်။” အန် ဟဲ့ ဟွတ့် ကာလာင် ပါယ် တီ ဒါ အာဘြာမ် ဝီ ထူမ် ဂြုဝ်း အန်။
3 ပန် တီ နာင် ဆာရာယ်၊ အီ မုး အီဘိုန့် အာဘြာမ် တွိုန်၊ အန် ဒဲ့ မှာယ် အန် အီ စိူဝ် နာင် ဟာဂါ အီ တး မိူင် အဲဂိုပ် တွိုန်။ အန် ဘော တဲး နာင် ဟာဂါ ဘဲန် အီဘိုန့် အာဘြာမ် အာဒါ အူ ကာစန်။ ဒေါ အန် တီ အာဘြာမ် ဟဲ့ ဟွတ့် ကွယ် ခဲင် မိူင် ကာနန့် အာဒါ ဂိုဝ် ဆီနမ်။ 4 ဒါ အာဘြာမ် ဘော လာယ် နာင် ဟာဂါ တီ။ ဟဲ့ ဟွတ့်၊ နာင် ဟာဂါ ဒဲ ဘာဒိက် ဆန်ထေ။
နာင် ဟာဂါ ဘော နပ်၊ အန် ဟဲ့ ဒဲ ဘာဒိက် ဆန်ထေ၊ အန် တူ ဝီ ဂူမ် ယာ ကာညာ အန်။ အန် ဘော ပီခိုက် နဝ်း အန်။ 5 ပန် တီ နာင် ဆာရာယ် တွိုန် ဝီ တဝ်း ဒီ အာဘြာမ်၊ “အီ တူ မွှိုမ် ပီ ဘူင် အန် ဒီ အုဝ်၊ န့ မုး မှာပ် မဲ။ အုဝ် ဟဲ့ ဒွါ အီဘိုန့် တီ ဒီ မဲ။ ဒေါ တီ နီ၊ အန် ဘော နပ်၊ အန် ဟဲ့ ဒဲ ဘာဒိက် ဆန်ထေ၊ အန် ဝီ ပီခိုက် နဝ်း အန်။ အန် မိူဝ် ဘူင် နာ တူ မွှိုမ် ဒီ အုဝ်။ တဲး ဇဝ်ဖြာ ဆုင်ဖျာတ် ဒါရာ ဒီ မဲ ကူပ် ဘူင် မဲ ပါယ် တီ။”
6 အာဘြာမ် ဝီ တဝ်း ဒီ နာင် ဆာရာယ်၊ “အီဘိုန့် တွိုန်၊ အန် မုး မှာယ် မဲ။ တဲး မဲ ဘူင် ပီ အိုင် မဲ။” ဟဲ့ ဟွတ့် ပန် တီ နာင် ဆာရာယ် ဝီ အေး နာင် ဟာဂါ။ နာင် ဟာဂါ ယီ တူ ခမ်၊ ဝီ တဝ် တ ဒူင် ကွယ် ယာ ကာညာ အန်။
7 န့ ယီ မိုဝ်း အာမူ အာမာတ် ဇဝ်ဖြာ၊ အန် ဝီ ယိုဝ် နာင် ဟာဂါ တွိုန်၊ ဒေါ ကွယ် အန် ခူပ် အိုမ် ခိုမ် ခဲင် ပြဲ ကာဟဝ်း။ န့ မုး အိုမ် ခိုမ် အီ ကွယ် ဒီ ခူပ် န့တေန့် ဟာဝ် မိူင် ဆူရာ။ 8 အာမူ အာမာတ် ဇဝ်ဖြာ ကာလာင် ဂြုဝ်း ဒီ နာင် ဟာဂါ တွိုန် တဝ်း၊ “အိုယ် နာင် ဟာဂါ၊ မဲ မုး မှာယ် နာင် ဆာရာယ်။ နာ မှဝ် မဲ တး။း နာ မှဝ် မဲ ဒီ ဟာဝ်။း”
အန် တဝ်း၊ “အုဝ် ဟဲ့ လေး တဝ် ခဲင် ကာင် နာင် ဆာရာယ် အီ မုး ယာ ကာညာ အုဝ်။”
9 အာမူ အာမာတ် ဇဝ်ဖြာ ဝီ တဝ်း ဒီ အန်၊ “တဲး မဲ ဝီ ဝေန့် ဒီ ကာင် ယာ ကာညာ မဲ၊ ဝီ ထူမ် ဂြုဝ်း အန်၊ ဘူင် ပီ စ်ု အန်။” 10 ဟဲ့ ဟွတ့်၊ အာမူ အာမာတ် ဇဝ်ဖြာ ဝီ တဝ်း၊ “အုဝ် ဒီ တဲး လှုက်လှာန် မဲ ကိူန် ကော ဟူ ပဲ ဒီ တိး။”
11 အန် ဘော တဝ်း၊ “မဲ ဟဲ့ မိုဝ်း ဂွန် ခဲင် ဝတ့် မဲ။ ဂွန် တီ၊ န့ မုး ဂွန် အီမာယ်။ မဲ လုဝ် တဲး အန် စိူဝ် အာဆာမာန်။ ခုဝ်၊ ဇဝ်ဖြာ ဟဲ့ ဟွတ့် ထူမ် ပဲ့ ဟဲ့ မှာန့် မဲ ဒီ အန်။a
12 ဂွန် တီ ယီ ပီ မင်ပြွင့် ပြဲ။ အန် ဒီ ကာဂုဝ်း ဒီ ဒွန် အီ။ ဂေ ဒွန် အီ ဒီ ဝီ ကာဂုဝ်း ဒီ အန်။ အန် ဒီ ကွယ် ရိုမ် ဒူပ် ဂေ ဘီနွင် အန်။ အန် ယီ လွှက့် လွှိုမ် ဂေ ဒွန် အီ။”
13 နာင် ဟာဂါ ဟဲ့ ဟွတ့် ထူမ် ဂြုဝ်း အာမူ အာမာတ် ဇဝ်ဖြာ တီ၊ အန် ဘော နပ်၊ န့ မုး ဇဝ်ဖြာ အီ ကာလာင် ဂြုဝ်း ဒီ အန်။ အန် တဝ်း၊ “ဇဝ်ဖြာ မုး အန် ဇဝ် အီ ယိုဝ် တူတ့်။ အန် ဇဝ် ဟဲ့ ယိုဝ် အုဝ်။ န့ ပီ အုဝ် မိူဝ် ဟဲ့ ယိုဝ် အန်။” 14 ပန် တီ အိုမ် ခိုမ် အီ မုး ဒူင် ကွယ် အန် တွိုန်၊ ဂေ အီ ဟဝ် တဲး န့ စိူဝ် အိုမ် ခိုမ် ဇဝ်ဖြာ အီ အိမ်၊ ဇဝ်ဖြာ အီ ပွိုန် ယိုဝ်။ ဒူင် ကွယ် အိုမ် ခိုမ် တီ၊ န့ ကွယ် ဒီ ကာတဲ မိူင် ဆာဒေတ် ဂါယ် မိူင် ဘေရေတ်။