Piparola e Pol yeꞌre pai
Filemon
1
Ki Pol,
ki kalabus mana e Krais Yesus e fika,
ki wunini.
Naminrele sa ki kaike kalabuske Rom.
Filemon,
mone awaili fa bilipme God namo maime oikenra e wunini.
Nanrona fane kikane mela moneni Timoti nam,
wola yene wamo yukaine yene sa mela munini.
Ka yene yakle mu fa mangke ompla e Yesus.
Nanrona fane kikane meꞌre piparola nam pai yene.
2 Piparola nam kikane meꞌre pai pone uma nam:
yene ka pinmela e moneni Apia,
ka Arkipus,
mana fina fa waiye yukaine iim mana kero e God yakle mone iplile e iim wamo e nopune namo,
ka nu uma e sios fopi e fa ni ka nemnokune mow e yene namo plau.
3 Aina God e mone yane Manwamo Yesus Krais wolyale pone ka yangke wolapuna e pone yeye aplai.
Nale uporo e Filemon namo, yangke Pol aiyem wamo
4 Mouli e ki fa tenkyuke God e ki,
ki fa wola rufuke yene e ki kesapuke.
5 E fika,
ki fa kupu uma nopro mingklarine yene sa mana fa yane wolapuna e yene paiye Manwamo Yesus,
ka yene fa sam yangkeye nale uporoye wu ka yene fa yangkeye nale plainrane namo pai nu umpinuma oikenra e God.
6 Kairkum ki fa kesapu ka karike God ee keryane bilip e yene sa yene e resukru fa ee mewmew nu umpinuma e God sa nu plau ee keronane yene ee yeri kero.
Ka le nanrona se God wone ee yangke ompla uporo woneni fa ee yangke yene e namapeperipari nanrona,
ommo upupu e fa nemeine wolapuna e mone namo,
sa ommo mone ee mererime noula e Krais.
7 Mela kinini,
nale e yene fa sam wolayaneye nu umpinuma e God ka keryaneye wolapuna nunini ka yangke nu neri kero ee bilipim Krais Yesus ka yangke ommo alwone wunini.
Namo sa yereryane ki wolapuna wamo ka ki aikem ka kem wolapuna raulo wamo ka nomu e namo nro ki fa kesapu mingklarike ka kire uporo God.
Filemon ee as yem Onesimus kore yukaine e inu woneni
8 Ki sa won resukru ee kire mi alele yene e noula e Yesus Krais,
e ompla fika ee yene ee as yangke.
9 Ka,
ki ke wola nanrona ki e fi kawa yene ee yangke ompla namo.
Nale e fa sam wolane nu umpinuma plai sa fa wamoye yenekawe.
Nanrona fane ki kom ee kireke mi aplai nro yene.
Ki Pol,
ki almake ka ki kaike yukaine kalabusmana fa kungkamke mi e Krais Yesus.
10 Nanrona fane ki kire kari yene fa ee as yangke nale uporo mana wongke fina e fa waiye yukaine auna kinini,
mana nam e ki kaike kalabuske nam,
wu e wi ki ka ki mewmew wu e bilip Krais la nam sa wu yemei yukaine auna e ki koneni.
Noula e mana nam sa Onesimus.
11 Isi wu fa yukaine mana wongke e fafaile ka fa fi yungkamye ompla plola e yene.
Ka e naminrele sa wu e yemei yukaine mana uporo wongke fa ee mewmewye yenekawea e ompla e yenekaweni.
12-14 Mana namo,
ki fa sam wolake wu wamo.
Oi ki wola fa ee mi kaure wu ee yane ki maime nam fa ee yem koii e yene ka yurpariye ki.
E fika,
ki fa keri keroke miuporo fane nu nina ki kalabus.
Ka ki kumeki ee fi kangke ompla wongke wolapuna e ki koneni e yene fi yireni ki.
Nanrona fane ki nam kawane wu pai kore yene.
Ka namo sa yangke ki naye wolake wu wamo.
Nanrona fane ompla fika e yene wone wola yire uporo ka yire yangke fa ee mewmew ki,
sa ki ee kuruke nro ka e fi kawa yene.
15 Alwone,
Onesimus e yupone yene ka pai raiꞌyuye namo.
Sa ki wola nanrona,
nomu e God mewyimai Onesimus,
sa nanrona,
wu ro ee bilipim Krais se sa wu ee wi kore ka yeneyane ee paipe yukaine e inrani yekei yekei.
16 Yene fa ungklama ningkrinoloye Onesimus yukaine wu e mana fa karnangkleye ompla siwole nro e yeneni.
Nenrape.
Wu e waiye yukaine mana siwole nro fa karyangkeye ompla e yeneni,
yene nama peperpari wu ee yukaine e yene inu ka sam wolayane kei wu wamo.
E fika,
ki kone e nama peperipari pu fane ki kane wolapuna e ki koneni pai rilele kei wu.
Ka ki e namale nanrona yene plau ee namale ka ee wolayane wu wamo.
E fika wu e yemei yukaine mana siwole uporo fa sam karyangkeye ompla yeneni,
ka yeneyane plau ee paipe yukaine yeneyane e inrani noula e Manawamo.
17 Le yene yuru ki yukaine fori uporo yeneni e ompla e Krais ka yangke nale uporo wamo ki,
nam yene ee yeima Onesimus ka yangke nale nanrona wu yukaine e yene fa yangkeniye ki namo.
18 Ka le wu oi yangke ompla wongke fafaile yene wee karyuꞌpuye ommo plai e yene ka fi yane romaula yene,
sa yene ee yina ommo fika e wu karyuꞌpuye namo waiye mew e ki.
19 Ki Pol ki keꞌre piparola nam mew e ki koneni pai yene.
Ki kone sa ee kane yene romaula fa ee yem kore koii e ompla e wu karyemye namo.
Ki kire nanrona laip e yene e karyemye ompla e ki.b
Ka ki sa ee fi kire ompla namo.
20 Mela kinini,
yenekawe e maime uma e Krais.
Ka noula e Manwamo e moneni,
ki wola kire yene ee as keryane wolapuna e ki sa ki ee kem wolapuna aplai.
21 Ki namale nanrona yene ee yangkle ommo yukaine mi e ki keꞌre wileye piparola nam.
Ka yene sa ee sam yupune ka ee yangke ompla e ki karineke yene ee yangke,
ka yene sa ee yangke nale uporo plai kore.
22 Ka ompla wongke kore e ki ee kireni yene.
Ki namale nanrona God e yupu mi e pone pesapupe ka ee kampruno rokoi e ki ee kaiki kuru pone.
Nanrona fane yene ee as saimoro koii rola wongke e fa nilene e mow e yeneni fa ki ee kile e ki ee kii ka kakle pone ee maime.
Nu uma e fa nane Pol nemnoku nangkene ompla namo nire kaire uporo pai Filemon
23 Epafras yire kaire uporo wunini pai yene.
Kikane sa maime kalabusme e fika wu plau fa yungkamye ompla e Krais Yesus.
24 Nu efe e ki fa kakle mangkeme ompla naminrele plau,
nire kaire uporo nunini pai yene.
Nu uma namo sa:
Mak yane Aristarkus ka Demas yane Luk.
25 Manwamo Yesus Krais ee wolyale pone ka e waiye plau malma uporo e pone.