Timoti ee amparpunu yopro mi e God
4
Krais yesus ee yoinsa nale e mone umpinuma e maime laip ka nu pinuma e rili pu.
Ki kire mi kero yene nanrona,
Krais Yesus namo ee yemei alele ka uma mingklari ee nuru wu nama noneni ka wu ee waiye king yekei yekei.
Nanrona fane e nama wunini ka nama e God,
ki naye koproke fa ee kererikane yene.
2 Nanrona fane yene ee yeri kero ka yopro mi e wu ee pai nu umpinuma.
La e nu uma nire nupu mi wee numeki e fi nupu mi e Krais.
Sa yene kom ee yaleye nu mi alwone nro ee yereryale nu wolapuna ka ee yangke nu ee nensona wolapuna ka ee nupune nale e God.
Ka yene won ee sam yopro mi fa ee pai nale e nu oi fa nangkene.
Sa mi namo ee mewmew nu ka ee yeinangkruye nu se nu ee fi nangke nale fafaile kore.
Ka yene ee as yereryale wolapuna e nu se nu ee neri kero ka nuna kero mi.
Kairkum yene kom ee as yopro mi aplai nu ka sam yukuleye nu nale uporo e God wolaye.
3 E fika,
mouli ee wi,
se nu umpinuma ee numeki ka ee kunrinra nane mi alwone.
Ripi e nu ee angkrenine mi e fa nupunene nale e none fa wolkinune nro.
Ka nu ee mineingkene nu uma e fa nopro nukulene nu mi e ommo e nu fa sam wolane sa nu ee nupu.
4 Sa nu e sam numpleuwa ka e kunrinra e nane mi e alwone.
Ka wolapuna e nu fa fi sam waiye,
nu fa wolkinu nire fa ee nupune irkaparmi nro.
5 Ka ningki kaire yene ee sam yuruye ira ka nale e yene.
Ka waiye nama feingkyaneye eni ee wi yene,
yene ee yeri kero ka yungkam eni namo.
Ka yene ee yopro miuporo e God ee pai nu umpinuma.
Ompla fika e Manwamo yane yene namo,
sa yene ee sam yangke.
6 Ki kire kerkane yene e mi nam,
e fika,
mouli sa poprolaye le nu ee nufu ki ri ka ori kinini ee okolpanro yukaine wain e nu fa nanene God yukaine ofa.
Mouli e ki kire ee kaiki sa wi nalen pu.
7 Ki kuna bilip kinini kero ka keri kero kungkam ompla upupu e miuporo.
Ka ki fa keri kero kukaine nu iim uma e neri kero e mouli e fa nopu iim.
Nanrona fane e ki kangke ompla namo pekimo ee yukaine mana e puye resis ka pai pleleye poru.
8 Naminrele ompla uporo wamo e mana ririye resis sa naye waiye yoriye ki ee kem.
Ompla uporo namo ee yukaine,
Manawamo fa yupuneye nale uporo e woneni sa wu ee yuruye nu umpinuma ka e youw ki sa e yukaine mana ee uporo nama e wu woneni.
Ka mouli e kot wamo e wunini,
wu ee yane ki ompla uporo namo e mana ririye resis.
Ka ompla namo,
wu ee fi yane ki kongkera nro.
Onnele!
God ee yali uma mingklari fopi isi wolane wu wamo ka isi nori nire ee nuru wu ee yemei alele.
Timoti ee as faflai pai yuru Pol
9 Yene e yapu rokoi ka faflai wi yuru ki.
10 E fika,
Demas wu e nampalo ommo e pike nam ka wu pai taun Tesalonaika pu.
Kresens sa pai provins Galesia ka Taitus sa pai distrik Dalmesia.
11 Luk wonkera nro sa ki kane maime.
E yene wi,
yumane Mak plau yane pi.
E fika,
wu mana uporo fa mewmewye ki ka mangkleme ommo.
12 Ki kawane Tikikus e pai pone taun Efesus pu.
13 E yene yire fa wi,
sa yene e as yem ki saket e waiye mow e Karpus e taun Troas.
Ka yuꞌpu ki buk plau.
Ka yene e fi wola kuruno fa e yuꞌpu buk e nangke omplakuru papri.
Yene e wolarufu ka yuꞌpu yunari wi ki.
14 Aleksanda,
mana fa yangkeye ommo bras namo,
oi yangke ompla fafaile wamo ki.
Ingke,
Manwamo wone ee yangke fafaile wu yukaine isi wu yangke ommo namo ki.
15 Poo sam yuruye mana namo,
wu fa ira kero ka pokongkoyupuye mu e mi e mone.
16 Mirale,
e ki keri kot,
mana wongke e fi yurpari ki ka yopro mi.
Awaili e nupone ki.
Ka ki kesapu God fa wu ee yupole ommo fafaile e nu.
17 Ka Manwamo e waiye ki ka yane kero ki.
Nanrona fane ki e kuna kero ommo wunini e ki kopro miuporo pai uma mingklari e fi Juda ee nupu.
Ka Manwamo sa e mewmewye ki fane laion wamo e fi wo ki.a
18 Manwamo e yumane ki kore ka wu e sam yaukiri ki e ommo fafaile e nu uma nire fa e nangkene ki.
Ka wu won e sam yauno ki ka e mewmewye ki pai plele mouli e wu yire e yumane ki ka yirane ki kingdom e wone e yeye heven.
Se mone e mereri noula e Manwamo yekei.
Alwone.
Piparola e Pol sa wi peprere nam nro
19 Yene ee yane kaire uporo mi e ki ee pai Prisila yane Akwila ka nu uma e Onesiforus.
20 Erastus sa ro yeye taun Korin ka Trofimus sa yenri fane ki e kupone wu ro waiye taun Miletus.
21 Yene sa yuka rinra amparpunu faflai wi kom,
mouli e fa raulo wamo ka rapu fa priri keroye ee yemei.
Ka Yubulus,
Pudens,
Linus ka Klodia ka nu Kristen plai e God namo e nire kaire uporo pai yene.
22 Ka Manwamo sa waiye malma e yene ka e wolapaloye pone.