Nu numane Yesus painri Pailat
(Matyu 27.1-2,11-14; Luk 23.1-5; Jon 18.28-38)
15
Ningkinama nole,
nu bikpris nakle nu tikse e lo ka nu irauma e kot wamo e nu Juda ka nu irauma plai namo wolpuna wokera ompla e nu ee nangkeneni Yesus.
Nanrona fane nu faflai nro painri neima Yesus ka sen nuka wu ka numane wu nane painri nirane wu pai mew e Pailat.
The crucifixion and resurrection of Jesus (Mak 15:1–16:7)
2 Ka Pailat yarine Yesus nanrona,
“Yene king e nu Juda wee?”
Ka Yesus mi yangkompari nanrona,
“Mi yukaine e yene yireye.”
3 Ka nu bikpris namo nangke mi mingklari wongkwongkeni pai Yesus nanrona wu e yangke ommo mingklari fafaile wamo.
4 Ka Pailat fa yarine wu kore nanrona,
“Nu napu mi mingklari fa ee minona yene,
la yene mi plai wee onnele?”
5 Ka Yesus sa miruru ka fi yire mi wongke.
Ka ompla namo yangke Pailat wolnipanri wamo.
Pailat yire e nona Yesus yapa kruse
(Matyu 27.15-26; Luk 23.13-25; Jon 18.39–19.16)
6 Ningki kaire mingklari e kaire Pasowa,
Pailat fa yarile nu umpinuma e nu uma fa naine kalabus namo fina nunini sa wu e yimane wu pai nalenengkem.
7 E mouli namo,
wongke e nu isi waiye kalabus namo,
noula wunini Barabas.
Mana namo yakle nu uma woneni isi nane gapman nopu ka nufro uma plai rili
8 Nanrona fane nu umpinuma ni plele Pailat ka narine wu e yangke ompla fikayen e yukaine isi wu fa yangkeye e kaire Pasowa plai pu.
9 Pailat yemei ka yarile nu nanrona,
“Pone pire ki e kimane king e nu Juda nam pai wee onnele?”
10 Pailat namale wolpuna fafaile e yeye nu bikpris fane wona nopro mi mingklari wu e yangke ompla namo Yesus.
E nomu namo nro,
nu neima wu ka nuna ni nane mew e Pailat.
11 Ka nu bikpris nuka ira nu umpinuma e nopro mi mingklari Pailat fa wu e mew yimane Barabas yolo moile ka pai nalnengkem.
12 Nanrona fane Pailat yarile nu kore nanrona,
“Ka pone pire ki e kangke fika mana nam e pone pouwpe wu nanrona,
‘king e nu Juda’ namo?”
13 Ka nu nangke mi kero ka nire nanrona,
“Pona wu yapa kruse.”
14 Ka Pailat yarile nu kore nanrona,
“Wu sa yangke ompla fika fafaile pone?”
Ka nu nangke mi kero wamo ka nireni wu nanrona,
“Pona wu yapa kruse.”
15 Pailat yire yangke nu umpinuma e ainem,
nanrona fane wu mew yimane Barabas e waiye kalabus namo yolo moile.
Ka wu yireli nu iimuma nufu Yesus kapa plola wongke e nu fa nouwne wip.a
Roka wu yane Yesus pai mew e nu iimuma ee nona wu yapa kruse.
Nu iimuma ounire Yesus
(Matyu 27.27-31; Jon 19.2-3)
16 Ka nu iimuma numane Yesus painri ka panri puku e mow wamo e gapman ka nu mi pai iimuma mingklari ni nemnoku.
17 Ka nu nana ampapri kaka wongke Yesus yukaine ampapri e nu king.
Ka nu nuꞌpu kapa rin ka mairemaire yukaine hat e nu king ka nu nana palo Yesus ira.
18 Ka nu nemei nangke mi ka nire nanrona,
“Kaire uporo yene,
king e nu Juda!”
19 Ka nu nem ilo plola wongke ka nufu ikakro wunini ka rofo nefu wu ka nekri fufula ka ira panro wu fa e nuku nanrona nu ainem wamo wu.
Ka ompla e nu nangke namo,
fa e ounire wu
20 Ka e nu ounire wu pekimo se,
nu ningklame ampapri kaka namo yukaine e nu king namo.
Ka nu nanani kore ampapri woneni ka numane wu palo moile ka nona wu yapa kruse.
Nu nona Yesus yapa kruse
(Matyu 27.32-44; Luk 23.26-43; Jon 19.17-27)
21 Mana wongke noula wunini Saimon ka mokoi wunini sa Sairini.
Wu sa nangka e Aleksanda yane Rufus.
Wu waraiye yupune rokoi namo yire pai taunwamo Yerusalem.
Ka nu iimuma nire mi kero wu e mewmew Yesus ka yongkole kruse wunini.
22 Nu numane Yesus painri kei mokoi nouw Golgata.
Ka nomu e noula e mokoi namo sa:
“Koii e ikakro rinra.”
23 Ka e koii namo,
nu nane wu wain e nuka plau marasin e nale rere nu nouw “mur” namo ka nane Yeus fa ee yaiko.
Ka wu ke fi yaikowo ompla namo.
24 Se nu nona wu yapa kruse.
Nu nakrere ommo papri wunini ka naraku satu nire napu fina e yem ommo papri plola wongke e wu.
25 9 kilok ningkinama nole,
nu nona wu yapa kruse.
26 Mi rola wongke e nu kero neri ka nopro mi mingklarine namo,
sa nu neꞌre wile riri e kruse namo.
Ka mi rola namo sa nanrona:
“KING E NU JUDA.”
27-28 Nu noꞌna mana plainrane e fa pekinuꞌpune ommo plau napane kruse.
Wongke sa nu nona yapaye mew menrulpo e Yesus ka wongke sa nona yapaye mew aiyalpo.b
29 Nu uma e ni painrine rokoi ka e nu ni plele koii namo ka nu nuru Yesus,
nu nukaka ira ka nire mi wongkwongkeni fa ounire wu.
Nu nire mi nanrona,
“Aꞌaa,
isi yene yireye yene ee yisyori tempol munini ka ee yangke keklepe e yem koii wunini e kaire plainrikera namo wee!
30 Yolo ka mewmew yene kore.”
31 Nu bikpris ka nu tikse e lo namo plau ounire Yesus.
Nu nuka mi nanrona,
“Wu mewmew uma mingklari,
ka wu fi mewmew wu wone!
32 Wu fa yire nanrona wu sa Krais ka king e nu Israel.
Le,
mone muru wu yolo ka yeri pike nam,
se mu ee bilipim wu.”
Mana plainrane e nu nona napa kruse nalen wu namo plau ounire wu.
Yesus ri
(Matyu 27.45-56; Luk 23.44-49; Jon 19.28-30)
33 E kaire yeri iplile mokoi namo sam ningkiyolo wamo yukaine ningki rona ka yeye pai plele 3 kilok ningkipopri ka mokoi fa warunu kore.
34 Ka e 3 kilok ningkipopri,
Yesus yangke mi fafri ka yire nanrona,
“Eloi,
Eloi,
lama sabaktani?”
Ka nomu e mi namo sa nanrona,
“God kinini,
God kinini,
fikami ka yene yupone ki?”
35 Ka uma plai e nerine koii namo fi sam nupu mi e wu fane nire nanrona,
“Pupu,
wu youwye Elaija.”
36 Ka wongke e nu uma namo puyelpai yem ompla fa nouwne “spans” ka yinapalo yori plau wain raflauwa namo ka yuka ilo kukla angkren wongke ka yunapari yoku Yesus reꞌfa fa Yesus e yaikowo.
Ka e wu yangkeye ompla namo e yereriye spans namo pariye Yesus,
wu yireli nu plai namo nanrona,
“Murume wu se,
yeka Elaija ee yolo ka mewmew wu ee yolo yeri pike wee onnele?”
37 Ka Yesus yangke mi fafri wamo ka wu ri yapa kruse riri.
38 E Yesus riye namo,
ampapri wamo e fa yapaye tempol monre namo ke nengkeyi rep plainrane,
riri yolpalo ruwe.
39 Manwamo e nu iimuma namo sa yeriye nalen e kruse wolale e Yesus.
Ka e wu yeriye namo,
wu yupu Yesus yangkromye mi kero wamo ka wu yuru plauye ommo awaili e nemeine se sa Yesus ke ri.
Ka manwamo e nu iimuma namo yemei yire mi nanrona,
“Mana namo sa won alwone Auna e God.”
40 Umpinuma plai plau e naine mouli namo.
Ka nu naine as amon ka nu plau nuru ompla mingklari namo.
Sa Maria e taun Makdala ka Salome ka Jems wongke moka nane Josep naine ka nurune Josep yiꞌnaye Yesus pike pulale.
41 Nu umpinuma namo e isi nupune Yesus ka mewmew wu e distrik Galili ka wi.
Ka nu umpinuma plai plau nakle nu umpinuma namo nupune Yesus painri kei taunwamo Yerusalem.
Nanrona fane nu umpinuma namo e neri ka nuru ommo mingklari namo.
Nu niꞌna Yesus roma pulale
(Matyu 27.57-61; Luk 23.50-55; Jon 19.38-42)
42-43 Ka e ningkipopri poprolaye yire kureli,
Josep e Arimatea wi.
Wu sa wongke e nu irauma e kot e nu Juda ka wu plau yuna noula wamo.
Wu sa mana fina e waiye ka yoriye kingdom e God e wi.
Ningkinama se kaire e Sabat e wi.
Nanrona fane Josep fi yumeki fa ee pai pari monre koii e Pailat ka yarine fa wu e yemane Yesus puꞌlo ka pai yiꞌna pike pulale.
44 Pailat wolapanri e wu yupu nanrona Yesus e ri pu.
Nanrona fane wu youw kepten e nu iimuma namo wi ka wu yarine wu nanrona,
“Yesus e ri pu wee?”
45 E wu yupu mi e kepten e nu iimuma pekimo roka wu yireni Josep yem puꞌlo e Yesus pai yiꞌna.
46 Josep pai yuꞌpu ampapri wouwno plai ka pai yemane Yesus ka yukaro wu ampapri namo.
Wu yongkole wu pai yiꞌna wu roma pulale e nu fa nirine uma e riline.
Ka wu yiꞌne roma wamo wongke wi yeri fa ee yakrau pulale e roma namo yukaine rama.
47 Maria e taun Makdala yane Josep moka Maria namo sa e neri nurune koii e Josep yiꞌnaye Yesus.