Nu irauma nuka mi nire nufu Yesus ri
(Matyu 26.1-5; Luk 22.1-2; Jon 11.45-53)
14
E mouli namo,
sa mouli poprolaye fa kaire e Pasowa ka Kola Wamo E Plawa E Yis Onnele ee yemei.
Kaire plainrane e Pasowa nro nayeye.
Nanrona fane nu bikpris ka nu tikse e lo napune rokoi wongkwongkeni fa ee pekneima Yesus ka nufu wu ri.
2 Nu nuka mi yeye none kore nanrona,
“Mu e fi mangke ompla e kaire e kola wamo namo.
Mu ee mangke ompla namo kaire plai.
Le mu mangke ompla namo e kaire e Pasowa ka Kola Wamo E Bret E Yis Onnele namo pu,
se nu uma awaili ee wolpuna neni wamo ka ee nopu wamo.”
Pin yaiku sanda ira e Yesus
3 Yesus waiye Betani namo,
wu pai mow e Saimon ka wo.
Mana namo nu fa nouw noula wongke wunini sa Saimon Yem Lepro.
E Yesus waiye ka woyeye namo,
pin wongke yuna botol uporo e nu nangke sanda roma worim uporo wamo ka sam uporo wamo wi nu.
Ka wu yenrume botol namo ka yaiku wel namo palo ira e Yesus.
4 Nu uma plai nakle nu naine mow namo ke nuru ka nu wolpun neni ka nu nopro iplile none kore nanrona,
“E fikami ka pin namo ke yaiku ka yasiro sanda uporo namo?
5 Mu resukru ee mina botol sanda namo nu uma e nem roma aula wamo resukru nanrona tri hanret silvaa ka mu ee mane romaula namo nu uma e ommo onnele.”
Nanrona fane nu nemei ka mipufona pin namo.
6 Ka Yesus yireli nu nanrona,
“Pone pimane wu.
E fika pone ke mipufona wu?
Wu yangke ompla uporo wamo ki.
7 Nu uma yaimare namo,
e naine nanrona plau pone ka kaire fika pone pire mewmew nu sa naine mew poneni.
Ka ki e fi kale pone maime kaire mingklari.
8 Pin namo yangke ompla resukru wu e yangke.
Wu yaiku sanda nalpapri kinini fa saimoro ki fa nu niꞌna ki.
9 Naminrele ki kire mi alwone pone,
ingke nu uma e nopro mi alele miuporo pai mokoi mingklari e pike namo.
Ka ompla e pin namo yangkeye namo,
uma awaili noprone fa ee yangke nu uma ee wolarufune wu.”
Judas mew yimane Yesus pai mew e nu irauma
(Matyu 26.14-16; Luk 22.3-6)
10 E kaire namo,
wongke e nu 12pla uma fa nupunene Yesus noula wunini Judas Iskariot namo,
pai yuru nu bikpris e tempol ka yimane Yesus pai mew e nu.
11 Nu ainem wamo e mi wunini ka nu plau e woluporo ka e nane romaula wu fa nangke ommo namo isi wu yangke.
Nanrona fane Judas pai ka yapu kaire fika sa e uporo fa yane Yesus pai mew e nu.
Yesus yakle nu 12pla disaipol naine none Pasowa
(Matyu 26.17-25; Luk 22.7-14; 22.21-23; Jon 13.21-30)
12 Mouli mirale e kola Wamo Fa None Bret E Yis Onnele sa yemei.
Ka e mouli namo sa kaire e fa nangke ofa sipsip wongke e Pasowa.
Ka nu disaipol e Yesus namo narine wu nanrona,
“Yene wola mone e maimpi koii pei ka saimoro ommo yene e wi ka wo sipsip e Pasowa?”
The Last Supper (Mak 14:12-26)
13 Ka Yesus yumane disaipol plainrane painri ka wu yireni wuyane nanrona,
“Yenyane ee paipi ka e yenyane pire panri taunwamo namo,
mana wongke e yongkole mii mangkam wi ka wane yenyane.
E yenyane puru mana namo,
sa yenyane e pupune wu.
14 E yenyane puru wu pai pari mow monre pei,
sa yenyane ee parine mow ripele nanrona,
‘Tikse e yariye nanrona,
“Mowpulale kinini fa ee kakle nu disaipol kinini ee memoku mo Pasowa sa yeye pei?” ’
15 Ka e wu yumane yenyane papri mowpulale e yeyeye mow riri namo.
Saimoro ommo awaili yeye anro ka poripe mu.
Yenyane saimoro ommo ka ommo mingklari e mone e mo pasowa namo.”
16 Disaipol plainrane namo painri plele taunwamo namo ka wuyane nuru ommo mingklari yukaine Yesus isi yireni wuyane.
Ka wuyane naine ka saimoro ommo nunini e Pasowa.
17 Yire namkureli ka Yesus yakle nu 12pla aposel woneni namo ni plele koii namo e wuyane nainene ka saimoro ommo fa none e Pasowa namo.
18 E mouli e nu naine ka none namo,
Yesus yireli nu nanrona,
“Ki kire mi alwone pone,
wongke e pone uma e mempuru mome ompla nam,
e yina ki pai mew e nu iim e ki.”
19 Mi namo Yesus yire ke sam yisyori wolpuna nunini ka mingklari nemei ka narine wu nanrona,
“Anro mi namo pai ki kone?”
20 Nanrona fane Yesus yireli mi kore nu nanrona,
“Wongke e pone 12pla.
Fina e yina bret woneni plau ki e dis kinini.
21 E fika Auna E Mana e ri yukaine buk e God yire mi aleleye wu ee ri.
Ka fina e yane wu pai mew e nu furempi e wunini namo,
wu e sam wolnipanri wamo e ommo fafaile wamo e yemei wu ka wu e wolpalo ka sam wolyaure wone wamo.
E fikami ka moka yem wu?”
Yesus yali bret ka wain nu 12pla disaipol
(Matyu 26.26-30; Luk 22.15-20; 1 Korin 11.23-25)
22 E nu naine ka nonene ka Yesus yem bret wongke ka wu yesapu ka yane tenkyu God.
Wu yekri bret namo ka yepi nu disaipol woneni ka yireli nu nanrona,
“Pone pem ka po.
Nam sa nale kinini.”
23 ka wu yem kap ka yire tenkyu God.
Wu yali nu ka nu mingklari naikolno.
24 Ka Yesus yireli nu kore nanrona,
“Namo sa ori kinini.
Namo sa ori kinini e kaiku,
sa kontrak keklepe God e yangke plau umpinuma woneni.
Namo sa kontrak keklepe fa mewmew nu umpinuma mingklari.
25 Ki kire mi alwone pone,
ki e fi kaikoko wain kore pai la ki kaike kingdom e God se sa ki e kaikoko wain keklepe.”
26 E wu yopro nu pekimo,
nu neile rai wongke mowkori ka panro moile ka painri moul aurola Oliv.
Yesus yoproye nu uma ee kunrinra nane wu
(Matyu 26.31-35; Luk 22.31-34; Jon 13.36-38)
27 Yesus yireli nu nanrona,
“Pone ee pemropri ka pupone ki yupune mi nu neꞌre wileye buk e God e yireye nanrona,
‘Ki ee kufu iramana e nu sipsip se nu sipsip woneni namo e nemropri.’b
28 Ka ki e kemei kore ka riri kaiki pone ka kaike kori pone distrik Galili.”
29 Ka Pita yangkompari mi e Yesus nanrona,
“Nu plai e nemropri nupone yene.
Ki nro e kane yene maime ka e fi kupone yene.”
30 Ka Yesus mi yangkompari mi e Pita nanrona,
“Ki kire mi alwone yene,
naminrele ningki,
rora naye papeye ee yina mi plainrane,
ka yene sa isi yire mi plainrikera pu nanrona yene oi fi namale ki.”
31 Ka Pita ira kero ka yireni Yesus nanrona,
“Ki fi kum ompla wongke ka ki fi kum e kane yene ri plau.
Ka ki e fi kopro mi yukaine naminrele yene yireye namo.
Sa e onnele kei!”
Ka nu 11pla disaipol plai namo ke kernane mi e Pita.
Yesus pai yesapu nengkrele Getsemani
(Matyu 26.36-46; Luk 22.39-46)
32 Nu nemei ka painri koii wongke nu nouw Getsemani.
E nu painri plele koii namo ka Yesus yireli nu disaipol woneni nanrona,
“Pone e pori ki nam ka ki e kaiki ka kesapu se.”
Jesus arrested and tried (Mak 14:32-72)
33 Wu yem Pita yane Jems ka Jon nane wu painri ka ompla sam yereryane wolpuna wunini ka wolpuna wunini sa nale fafaile wamo.
34 Ka Yesus yireni disaipol plainrikera namo nanrona,
“Wolpuna kinini sa nale fafaile wamo ka nale fafaile namo yire yangke ki ri.
Pone paipe ka purupe nam.”
35 Wu yupone nu ka asa pai ka wu yekri fufula palo pike ka wu yesapu ka yarine God le wu wone wolaye e nale fafaile namo e rikipone wu ka karpai ka wu e fi yungkam.
36 Wu yesapu nanrona,
“Aba Aina,
yene resukru e yangke ommo mingklari wongkwongkeni.
Yuꞌpole nale fafaile namo ki.
Ka,
yene faa yangke ompla yupune mi kinini,
yene e yangke ompla yupune ommo e yene wolaye.”
37 Ka Yesus wi kore disaipol plainrikera ka yuru nu nile pu.
Ka wu yireni Saimon Pita nanrona,
“Saimon,
yene ke kirwileye nama!
Yene as waiye nama feingkriyane resukru aua wokera kore ka yunreye ommo fika wongkwongkeni ee nemei naminrele?”
38 Ka wu yireli nu plainrikera nanrona,
“Pone pai pesapupe ka sam punrepe ommo e fa neingkarine e fi numaralo kero e poneni ka ee nangke pone ee firipanro.
Ki namale nanrona pone e pire ee paipe ka pesapu,
ka kero e nale e poneni ke fi resukru fa pone ee pangke ompla namo.”
39 Wu yopro pekimo ka wu pai kore ka yesapu.
E wu yesapuye namo,
wu yesapu ompla isi wu yesapu namo.
40 Wu yesapu pekimo ka wi kore nu ka yuru nu nile nama kore pu.
E fika nama nunini kire wamo fane nu fi naine ningki angkren ka nurune.
Ka e wu yoroleye nu,
nu kungkumple fane fi namale mi fika fa ee nireni wu.
41 E wu wi namba tri taim kore ka wu yireni nu nanrona,
“mouli e pone fa karpilepe nro wee?
Faa pile nama kore!
Mouli e ommo fafaile namo wi pu.
Puru,
nu nane Auna E Mana pai mew pu e nu uma e nangke nale fafaile.
42 Pone pemei ka mone maimpi.
E fika mana e yane ki kaiki mew e nu namo,
sa wiye.”
Judas yane Yesus pai mew e nu iimua
(Matyu 26.47-56; Luk 22.47-53; Jon 18.3-12)
43 E Yesus yoproye mi nu,
Judas,
wongke e nu 12pla disaipol e Yesus namo yumale uma mingklari wamo ni plele nu.
Nu uma mingklari namo sa e nu bikpris ka nu tikse e lo ka nu irauma e nawale nu ni.
Nu uma mingklari namo nunari ilo fa nufu mana ka bainat ni Yesus yane disaipol plainrikera e woneni.
44 E mouli namo,
Judas isi yuka mi nu ompla fika e wu e yangkeni Yesus sa nu e namalene wu.
Wu yakle nuka mi nanrona,
“Mana namo pone pire pukapeiri wu pane pai mew e nu irauma namo,
mana namo e pone puru ki kokune wu,
mana namo pone e pukapeiri wu.
E pone puna wu ka pem wu pai,
uma e sam nurune wu wamo.”
45 Ka e mouli e nu ni plele Yesus yakle nu disaipol plainrikera woneni namo,
Judas pai Yesus ka wu yire “Ningki uporo tikse!”
ka wu yokune wu.
46 Ka e nu uma mingklari namo namale Yesus,
nu neima wu ka nem wu painri.
47 Ka e nu neima Yesus namo,
wongke e nu uma naine nalen namo yingklame bainat woneni ka yaure ripi repo wongke e wokboi e hetpris e tempol namo firpalo waiye pike.
48 Ka Yesus yireni nu nanrona,
“Pone pongkole ilo kukla fa popupe ka bainat pi fa pukapeiri ki e nomu e fika?
Pone ro wola pire ki mana e fa kakle gapman mopume wee?
49 Kaire mingklari ki isi kakle pone maime ka kukune pone monre e tempol ka pone fi pukapeiri ki.
Ka ompla namo e yemei alwone yukaine buk e God yireye.”
50 Nanrona fane nu disaipol woneni nupone wu ka nemropri painri.
51-52 Mana efapu wongke sa isi waiye plau mouli namo,
ka yupuneye Yesus.
Mana efapu namo yiperi ampapri nro.
Ka e nu nuru wu ka nire neima wu,
wu puye pai ka nu neingke ampapri wunini ka wu puye pai wolenro.
Nu kotim Yesus
(Matyu 26.57-68; Luk 22.45-55,63-71; Jon 18.13-14,19-24)
53 Nu nem Yesus painri mow e hetpris e tempol.
Ka e mouli namo,
nu bikpris ka nu irauma plai ka nu tikse e lo namo,
sa nemnoku naine.
54 Pita plau e yupune nu kunrinrapo as amon ka pai ka pai pari monre puku e mamane mow e hetpris namo.
Ka wu pai yakle nu uma fa nopane mow namo ka waiye nalen niꞌpi ka yeingki nalpapri wunini.
55 Nu bikpris e tempol ka nu irauma e kot e nu Juda namo nemnoku ka napu nomu uporo e nu nufu Yesus ri.
Ka nu napu napu pai ka nu fi napu nomu wongke uporo.
56 Uma mingklari ke nengkari fa karnire waiwai mi nire e minona Yesus.
Ka mi nunini namo fi sam pai ka nu fi napu mi nomu wongke.
Onnele.
57 Ka plai nunini nemei ka karnire mi e minona Yesus ka nu nire nanrona,
58 “Mu mupu wu yire mireꞌfa woneni nanrona,
‘Ki e kisikori tempol namo nu uma nangke namo ka kaire plainrikera se ki e kangke keklepe e uma fi resukru nangke namo,
e yem koii wunini.’ ”
59 Ka mi nunini fi resukru.
60 Ka bikpris e tempol yeri ka yarine Yesus nanrona,
“Yene mi plai e yangkompari mi fika e nu uma minona yene namo,
wee onnele?”
61 Ka Yesus sa miruru fi miyangkompari mi wunini.
Ka bikpris e tempol namo yarine wu kore nanrona,
“Yene Krais,
Auna e God namo mu fa mosimane ka mereri noula wunini namo wee onnele?”
62 Ka Yesus yangkompari mi e nu nanrona,
“Yei,
ki Krais.
Ka pone mingklari e puru Auna e Mana e waiye sia mew menrulpo e God yuna kero wamo ka wu e wi plau kupu e heven.”
63 Bikpris e tempol namo yakre klos woneni ka yireli nanrona,
“Mone muru wu pu.
Nanrona fane pone e papu fina kore fa ee yauri mi e wunini?
Wu miyona wone pu.
64 Pone e pupu wu ouwyireye God pu ka mone e ke morime ompla fika kore?”
Uma mingklari nire nanrona Yesus yangke ompla fafaile wamo nanrona fane wu e ri.
65 Plai e nu rofonefu wu ka nuka nama wunini ampapri plola ka nu nufu wu ka narine wu nanrona,
“Yene yire yukaine profet!”
Ka nu uma e nopane koii namo nuna wu ka sam nufu wu wamo.
Pita karyire ka yire nanrona wu fi namale Yesus
(Matyu 26.69-75; Luk 22.56-62; Jon 18.15-18,25-27)
66 Mouli e Pita waiye koii e fa nemnoku nainene monrele e puku e mow namo,
pin mangkrama wongke e fa yangkeye ompla e bikpris e tempol namo wi.
67 Ka e pin namo yuru Pita waiye yengkiye niꞌpi wu yurunpari wu ka yireni Pita nanrona,
“Yene sa wongke e nu uma fa nane Yesus rainene taun Nasaret.”
68 Ka Pita karyire ka yire kore pin namo nanrona,
“Ki fi namale mi fika e yene yire namo.”
Ka e Pita yire mi namo ka yoloye moile mow rama e puku namo e yolo moile ka e mouli namo sa rora yina.
69 E pin mangkrama fa karyangke ommo namo yuru Pita nayeriye ka wu yemei ka yireni nu uma nane wu neri namo nanrona,
“Mana namo sa wongke e nu uma fa nane Yesus naraine taun Nasaret namo.”
70 Ka Pita karyireli nu kore.
Nu as neri kore ka uma plai e nerine koii namo ke nireni wu nanrona,
“Alwone wee,
yene e fi karyire ka pekinina nanrona yene sa fi wongke e nunini.
E fika distrik Galili sa mokoi yeneni.”
71 Ka Pita keryane mi woneni ka yemei ka yireni nu nanrona,
“Ki kire mi alwone pone noula e Manwamo nanrona ki fi namale mana namo pone pirepe namo.
Le ki karkireke sa,
God e yangke fafaile ki e fika ki wona karkireke.”
72 Ka e mouli namo,
rora yina ka Pita wolrufu kore mi e Yesus isi yire nanrona,
“E rora fi yina plainrane ka yene e yire plainrikera nanrona yene fi namale ki.”
Ka ompla namo yangke Pita angkren palo pike ka wiri wamo.