Yesus yopro mi e tempol ee pikreyekri
(Matyu 24.1-2; Luk 21.5-6)
13
Mouli e Yesus yire yupone tempol,
disaipol wongke e wone yireni wu nanrona,
“Tikse,
yuru roma wamfafai upupu oi nu nuꞌpu nakene tempol namo sam neima mow ka nangke mow namkire wamo.”
2 Ka Yesus miyangkompari wu nanrona,
“Yene yuru mow wamfafai nam.
Uma e nisnori ka roma wongke e fi waiye koii e nu naune.
Roma awaili e nainene naminrele,
nu e nopri panro.”
Yesus yopro eni mingklari ee nemei
(Matyu 24.3-14; Luk 21.7-19)
3 Yesus waiye moul aurola oliv.
Moul aurola Oliv namo e yeriye tempol repo.
Ka e mouli namo,
Pita yane Jems,
Jon ka Andru ni fa ee nuru wu erelpo.
Ka nu narine wu nanrona,
4 “Yene yireli mu,
ommo namo ee nemei mouli fika?
Ka ompla fika sa ee yemei ee yukaine fela se mu ee muru ka e namale nanrona ommo namo ekre ni nalene?”
5 Ka Yesus miyangkopari nu nanrona,
“Poo!
Pone e fi pinapale nu uma ee wismampole pone rokoi e mi alwone.
6 Uma mingklari e ni ka nouw noula e ki ka ee nireli pone nanrona,
‘Ki sa mana nam,’
ka ee wismampole umpinuma mingklari ee painri rokoi ringke.”
7 “Ka le pone pupu iim wamo e neme mokoi nalen e pone wee pupu wawai mi nanrona iim wamfafai e nemei mokoi plai amon,
ommo namo e fi nangke pone e wolpuna raramo.
Ommo namo ee nemei,
ka nu e fi nuku fela e pike nam e pekimo.
Onnele!
8 E mokoi mingklari e pike nam,
nu ori oikenra ka nu kingdom ee nemei nemnopune none kore.
Ka klai wamfafai ee nemei mokoi mingklari.
Ka mouli plai ee ommo e none ee sam onnele ka uma ee sam rili ponrili.
Ka ommo namo rere nunini pipi yukaine rere pipi e nu umpin nemplenupune e mouli e nu nire fa ee nem mela se.
Ka e nu nire nem mela sa nu fa nuka rinra neingkarine ka nemne rere wamo,
pai se sa nu ee nem mela.”
9 “Pone ee sam saimope pone kore.
E fika,
pone peri noula e ki ka ompla namo ee yangke nu uma ee numale pone ee paipi ka kotim pone kansol e mokoi wokwokera e noneni,
ka numale pone paipi mow kori e nu Juda,
ka nu ee nufrokare pone.
Ka nu ee nuꞌpu pone paipi peri wolale e nu king ka nu alma e gapman.
Nu ee nunari mi mingklari pone ka ommo namo ee nemei e fika pone ee peri noula kinini ka ee popro mi e God.
10 Ka ompla wamo wone sa,
miuporo nam nu ee nopro pai nu uma awaili wongkwongkeni e pike se sa mouli e pike nam ee pekimo,
ee yemei.
11 E nu neimare pone ka numale pone paipi kot,
pone e fi wola pokope ka papu mi fa ee pireni kot e pone fi paipi peri wolale e kot.
E pone peri koii e fa kotne,
sa Holi Spirit wone ee yale pone mi fa ee pireni kot.
Ka pone ee popro mi namo e fika mi e pone ee popro nolo reꞌfa e poneni namo,
seke mi e poneni.
Onnele!
An mi e Holi Spirit woneni nro.”
12 “E mouli namo,
uma ee minona none inrani ka ee nufro nu rili.
Ka nu nangkapi plau ee nangke nanronane none kongkom.
Ka nu kongkom plau won ee naine nale e fa nakle moknangkapi nemnopu kukrune.
Ka kongkom plau won ee minonane none moknangkapi ka numale nu painri nirale kot se uma ee nufro nu rili.
13 Uma mingklari ee numpleuwa pone,
e fika pone fa paipepe noula e ki.
Ka mana e yeri kero ka pai plele mouli e nale fafaile awaili ee pekimo namo,
mana namo se God ee yem wu kore.”
Ompla fafaile wamo ee yemei
(Matyu 24.15-28; Luk 21.20-24)
14 Ka Yesus yireli nu disaipol woneni kore nanrona,
“Mouli ee wi e kaire wongke pone ee puru ompla wongke fafaile wamo ee yemei yeriye koii e wone oi fa fi yeriye.”
Mana e yuruye mi nam e sam namaleye nomu e wu.
“Ka ompla namo ee yangke uma kinini ee nupone mokoi plola namo ka e fi naine kore.a
Ka e pone puru ompla namo yemeiye,
pone uma kinini e paipepe taun e nenene distrik Judia ee as pulilpaplo paipi peki pailepe nu moulala.
15 Mana e waiye mow riri,
ee yolo ka faflai puyel pai nu moul ala.
E fika mouli e fi mi aplaiye wu ee pari monre ka yuꞌpu ommo woneni.
16 Mana e yeriye nengkrele woneni,
wu plau e fi pai mow ka yem ampapri woneni.
17 Mouli namo se mouli fafaile wamoni nu umpin e puna plau ka nu umpin fopi e naline kongkom roro.
E fika,
mouli namo se nu ee nungkam nale fafaile wamo.
18 Pone ee pesapu ka parine God e ommo namo e fi nemei plau mouli e riprapu.
19 E fika oi isi oiya,
mirale e God yeꞌreye pike nam ka wi pleleye naminrele,
ommo fafaile fa nane rere namo fi nemei wamo nanrona.
Ka e mouli ingke,
se rere wamfafai nanrona ee fi nemei yukaine namo kore.
20 Ka Manwamo yaure mouli fafaile plai namo.
Le wu e fi yangke nanrona,
se mana wee pin ee fi waiye pike nam.
Ka wu ke wolarufu uma e wone oi yaure nu e naine yukaine nu uma e woneni,
nanrona fane wu yaure mouli plai e moulkaire fafaile namo.b”
21 “Ka e mouli namo,
e mana wongke yireli pone nanrona,
‘Nam sa Krais’ wee wu yireli pone nanrona,
‘Puru!
Wu nanri.’
Pone faa bilipimpe mi e nu uma yukaile namo.
22 Plai e nu uma yukaile namo ee ni ka e neirpale uma ka nireli nu nanrona nu sa Krais wee nu profet.
Nu ee nangke mirakol wongkwongkeni fa ee nukune kero e noneni ka e neingkari nire ee numale nu uma e God yaure pu fa ee nupule nu.
Ka nu e sam onnele wamo nu e fi resukru e nensona wolpuna e nu uma e God yaurele pu fa ee nupune wone.
23 Mi e mouli nananrona sa nam ki keingkyaneke pone.
Nanrona fane mouli e pone ee paipepe,
pone ee sam punre ka paipepe.”
Mela e Mana ee wi kore
(Matyu 24.29-31; Luk 21.25-28)
24 “Se mouli fafaile namo ee pekimo,
‘ka kaire ee wuningki ka kari ee wakrole.
25 Kikla e riri ee firinolone,
ka ommo e nenene nemi riri fa nunane kero namo ee nemfourori poipanre.’c ”
26 “Ka ingke se nu uma ee nuru ‘Auna e Mana e yeri iplile e kupu ka wi’d plau kero wamo ka glori wamo e woneni yukaine kaire ali e yople panrine riri.
27 Ka ingke wu ee yireli nu ensel e woneni ee painri mokoi awaili e pike.
Plai ee painri wes,
plai ee painri is,
plai ee painri not ka plai ee painri saut.
Nu ee nemei repo wongke e pike ka nemi ka raine painri pekimo repo wongke e pike ka nemi fa ee nupari nu uma e God isi yauryale pu fa ee naine yukaile nu uma e woneni.”
Ilo fik e yemei pleilyolo mouli wongkwongkeni
(Matyu 24.32-35; Luk 21.29-33)
28 “Pone puru ilo fik naye.
Wu yukuye mi riri wongke.
E kinre ningkole mii para ee sam panima,
e yuku mone nanrona mouliyufu sa ekre wi nalenye.
29 Nanrona fane pone sa pukaile ommo e ki koprongkleni pone namo,
sa pone ee sam namale wona nanrona mouli sa ekre wi nalenye fa Mela E Mana ee wi kore.
30 Ki kire alwone pone,
nu uma e mouli nam ee naine malma plau ee nuru ommo namo ee nemei.e
31 Nemi ka pike ee pekimo.
Ka mi e ki sa e waiye yekei yekei.”
Mana wongke fi namale mouli e kaire ee pekimo
(Matyu 24.36-44)
32 “Mana wongke fi namale mouli e kaire e pekimo ee yemei.
Nu ensel e nemi ka Mela e Mana plau fi namale kaire namo.
Aina God wokera nro sa namale mouli e kaire ee pekimo.”
33 “Pone ee paipe ka sam punrepe,
e fika pone e fi namafeingkyane mouli fika wone se ompla namo e nemei.
34 Namo sa yukaine e mana wongke yire fa ee pai mokoi wongke e amon fane wu ee sam yoprongkle mi nu uma fa nangkene ompla e wone ee nunrene mow woneni.
Wu ee yepiyale ompla wokwokera nu uma e fa nangke ee nangke.
Ka wu ee yireni sikiriti e keit nanrona,
‘Yene ee yeri kero ka sam yunreye.’ ”
35 “Nanrona fane pone e sam punre ka paipe.
E fika pone e fi namale mouli wone e mow ripile ee wi kore.
Pone e fi namale,
wu ee wi ningkinpopri wee ripapri wee rora ninalene wee mouli peprerpare,
sa pone e fi namale.
36 Ka mouli e wu yemei pone ee pemfririperi nro,
wu e fi yuru pone yukaine pone e pilepe nama.
37 Mi fikfika e ki nam kirelike pone,
uma awaili e as namale nanrona ki koproke nu plau nanrona,
‘Pone ee paipe iplelepe ka fa pilepe nama.’ ”