Mi riri e uma fafaile fa nurune wain nengkrele
(Matyu 21.33-46; Luk 20.9-19)
12
Ka Yesus yemei yireli nu mi riri plai.
Wu yireli nu nanrona,
“Kaire wongke,
mana wongke yoku wain nengkre ka yile roma wamo wongke fa norirene wain.
Ka wu yungkre puku mamane nengkrele,
ka wu yeꞌre yungkre mow angkren wongke.
Roka wu yukayane nengkrele namo pai nu fama plai ee nurune ka ee nangkene bisnis ka romaula plola sa nu ee nanene pai wu.
Roka wu yupole nu ka pai waiye karikaire nempririne mokoi wongke.
2 Ka e wain namo reri nale ka mouli e fa nangkrune,
wu yawane mana wongke e fa yangkeye ompla woneni namo pai yuru uma e nunrene nengkrele e wain namo fa ee yuꞌpu wain rola e bosmani.
3 Ka nu uma e nurune nengkrele e wain namo sam nufu nori wu wamo ka nawane wu kar pai kore mew siwole nro.
4 Nanrona fane nengkrele ripile namo,
fa yawane mana wongke kore e fa yangkeye ompla woneni namo ke pai kore nu uma e fa nurune wain nengkrele namo.
Ka mana namo plau won nu nufu wu ikakro ka nangke nale fafaile mingklari wu fa ee yangke wu ee rurungklamo wamo.
5 Ka wu fa yawane mana wongke kore e fa yangkeye ompla woneni namo pai kore.
Ka e wu pai nu nufu wu ri.
Nanrona fane wu yawane nu uma mingklari plai e fa nangke ompla woneni namo awaili painri nu.
Ka nu sam nufro nekri nu fafaile wamo ka nufro plai e nu sa rili kei.”
6 “Nengkrele ripile namo,
Sa onnele wokboi wongke e waiye.
Ka wu yuna mela mana wokera woneni nro sa e waiye.
Mela mana namo,
sa wu fa sam wolayaneye wu wamo.
Nanrona fane ingke se wu yawane mela mana woneni namo pai.
Ka aina yire nanrona,
‘Nu uma namo ee nuru mela kinini se nu ee nupu mi wunini.’ ”
7 “Ka uma e fa nangkene nengkrele namo ke nuka mi nanrona,
‘Mana namo wi ee yuꞌpu ommo mingklari e wone ainani.
Mone sam mufu wu ri se mone ee maime nengkre ripile.’
8 Nanrona fane nu neima wu ka nufu wu ri ka ningkapalo puꞌlo e wunini palo nengkrele piyewa.”
9 “Nengkre ripile ee yangke ompla fika kore?
Wu wone ee wi ka ee yufro nu uma e nunrene nengkre namo e rili.
Ka ee yukayane nengkrele namo e pai nu uma plai ee nurune.
10 Anro pone fi namale mi nomu e mi rola e wileye buk e God wee?
Mi namo e yireye nanrona,
‘Roma namo,
nu kamda nuru ka wola nanrona roma fafaile.
Nanrona fane nu nurule.
Ka nam roma namo sa rinra wone fa yeri yukaine ilo pos fa yurpari mow yeri kero wamo.
11 Manwamo wone isi yangke ompla nam,
ka mone namale wu wongkeningke nama e moneni.’ ”
12 Nu bikpris ka nu tikse e lo ka nu ira uma plai e nu Juda namo e namale nanrona mi riri e Yesus yopro paiye nu uma fafaile e fa nurune nengkre namo sa mi pai yauniye none.
Nanrona fane nu napu rokoi fa ee neima wu.
Ka nu ke num a e fika nu e namale nanrona umpinuma mingklari fopi e fa wolananene mi e Yesus namo,
e namale mi nomu e mi riri e Yesus yireye namo pu.
Nanrona fane nu nupone koii namo ka painri.
Pari mi e nina romaula paiye Sisar
(Matyu 22.15-22; Luk 20.20-26)
13 Ingke se nu bikpris ka nu tikse e lo ka nu ira uma plai e nu uma e Juda namo,
nawale nu Farisi plai ka uma plai e Herot painri Yesus.
Nu painri fa wifle nari ka le Yesus yire mi wongke wee yangke ompla wongke koroyane ka nu ee minona wu.
14 Nu ni plele Yesus ka nu narine wu nanrona,
“Tikse,
mu namale nanrona yene mana fa yire mi alwone nro ka yene fi fa karyangkleye nu uma.
Yene fa yire mi alwone nro nu irauma ka nu umpinuma siwole plau ka yukule nu umpinuma nale e God.
Ka yene wola fikayen,
ee uporo e mu mina romaula pai gapman e Empera Sisar wee onnele?
Mu ee mina romaula namo pai wu wee onnele?”
15 Ka Yesus namale pu nale noneni fa kar nireni,
ka wu yangkompari mi e nu nanrona,
“E fika ka pone pire ki nanrona?
Pone pem romaula wongke pi pake ki ka ki kuru.”
16 Nu nem romaula wongke ni nane wu ka wu yarile nu nanrona,
“Pone pireni ki,
nam sa malma ka noula e fina sa wile romaula nam?”
Ka nu minangkompari mi e wu nanrona,
“Noula ka malma e Empera Sisar.”
17 Ka Yesus yangkompari mi e nu nanrona,
“Nanrona fane pone ee pane ommo fika e Sisarni sa pai Sisar ka ommo e Godni sa pai God.”
Nu nupu mi wunini namo ka nu wolapanrini wamo.
Mi e mana ri ka yemei kore
(Matyu 22.23-33; Luk 20.27-40)
18 Plai e nu Sadyusi ni Yesus.
Nu Sadyusi namo,
nu uma fa nire nanrona nu uma e rili ee fi nemei kore.
Nanrona fane nu ni Yesus ka narine wu nanrona,
19 “Tikse,
Moses isi reꞌre lo wongke moneni yire nanrona,
le mana wongke yem pin ka pin fi yuꞌpu kongkom ka wu ri ka puri woneni waiye nale sa,
inrani woneni ee yem warifli woneni fa e yuꞌpu kongkom.
Ka e wuyane nuꞌpu kongkom,
nu kongkom namo e nem koii e mana e ri pu namo.
20 E kaire wongke isi 7pla nu ori inrani nainene.
Rani isi yem pin wongke ka pin fi yuꞌpu kongkom e yem koii woneni.
Pai se rani namo ri.
21 Nanrona fane inu e yupune wu namo ee yem pin plola namo.
Ka wu e puri fi yuꞌpu kongkom ka wu ri.
Ka,
inu yupune wu plau e yem pin plola wunini namo ka wu plau puri fi yuꞌpu kongkom ka wu ri.
22 Nu nangke nanrona nro resukru 7pla inrani namo nem pin wokera,
ka nu inrani namo kongkom onnele ka nu rili pu.
Ingke se,
pin namo nu 7pla inrani isi nem namo plau ri.
23 Nu 7pla inrani awaili isi nempuru nem pin wokera namo.
Ka e God yangke nu uma e rili pu namo ee naine malma,
pin namo ee waiye yukaine pin fina.”
24 Ka Yesus mi yangkompari nu nanrona,
“Pone ro fi namale kero e God ka mi e nilene buk e God plau.
Nanrona fane pone wonaye kungkumplepe rokoi e mi fafaile nananrona.
25 E uma rili pu namo ee nemei kore,
nu uma ee fi nuꞌpu umpinuma ka nu umpinuma plau ee fi nuꞌpu uma.
Nu awaili ee naine yukaile ensel e heven.”
26 “Nam pone popro ri ka yemei kore e nu umpinuma.
Ka pone puru mi wile buk e Moses namo pu wee onnele?
Wu reꞌre mi namo e wu isi yuru niꞌpi ali ilo pitiri wongke.
Ka e mouli namo,
God isi yireni Moses nanrona,
‘Ki God e Abraham ka Jekop ka Aisek.’
Ka mana plainrikera namo isi rili pu,
ka nam Baibel yire nanrona nu naine laip.
27 Wu seke God e nu uma isi rili pu,
wu sa God e nu uma naine laip.
Nanrona fane mi e pone sa fi yukaine.”
Lo riri e God
(Matyu 22.34-40; Luk 20.25-28)
28 Tikse wongke e lo e waiyeye namo yupu nu Sadyusi nane Yesus nemnopune mi e mi namo.
Ka wu yupu Yesus yingkapai nu mi wongke sam uporo wamo.
Nanrona fane wu yarine Yesus nanrona,
“Lo fikayen sa fa sam rikiponeye lo mingklari plai namo?”
29 Ka Yesus yangkompari mi wunini nanrona,
“Lo wongke fa sam rikipone lo plai.
Lo namo yire nanrona,
‘Pone uma e Israel namo e sam pupu lo namo.
Manwamo,
God e mone namo,
wu wokera nro sa Manwamo moneni.
30 Yene ee sam wolayapaye God,
Manwamo yeneni namo e wola rilele e yeneni ka spirit rilele e yeneni,
ka wolpuna rilele e yeneni ka kero rilele e yeneni.’
31 Ka lo wongke e yupuneye lo namo sa e yireye nanrona,
‘Yene e sam wolayaneye nu uma plai yukaine e yene fa sam wolayaneye yene kore namo.’
Lo wongke sa e fi rikipone lo plainrane namo.”
32 Nanrona fane tikse e lo yireni Yesus kore nanrona,
“Tikse,
mi e yene yireye namo sa won alwone.
God wokera nro sa e waiyeye,
ka God wongke kore e waiyeye sa sam onnele.
33 Mone ee sam wolamaneme wu e wolpuna moneni,
ka e kero e moneni rilele.
Ka mone ee sam wolmane nu uma plai yukaine mone fa sam wolamaneme mone kore.
Lo plainrane namo sa wamo ka fa pai ririye lo e fa nangkene ofa pariye God.”
34 E mana namo sam yimpari mi e Yesus ka Yesus yuru ka namale wu e yunaye ira uporo,
ka Yesus yireni wu nanrona,
“Yene sa fi waiye amon e kingdom e God.”
Ka mouli namo,
nu uma awaili ke nemnum fane fi narine wu mi wongke.
Fina sa Krais
(Matyu 22.41-46; Luk 20.41-44)
35 Yesus yukule nu uma mi e God tempol monre ka wu yireli nu nanrona,
“E fika ka nu tikse e lo namo fa nire nanrona Krais sa ori e Devit?
36 Holi Spirit yereriyane wolpuna e Devit ka wu wolarufu mi namo ka yireni wone nanrona,
‘Manwamo yireni Manwamo e ki nanrona,
“Yene waiye mew menrulpo e ki
pai resukru e ki ee kangke nu uma e nangke fafaile yene ee naine mew e yene.” ’ ”
37 “Devit youw Krais nanrona Manwamo woneni.
Nanrona fane e fika Krais e yemei ori oikenra e Devit?”
Umpinuma mingklari nainene ka nu ainem e nu nupu mi e Yesus.
Nu uma e namale lo nangke nale fafaile wamo
(Matyu 23.1-36; Luk 11.37-54; 20.45-47)
38 Yesus yukule nu ka wu yireli nu nanrona,
“Pone sam puru nu tikse e lo.
Nu fa naile ommo papri angkren ka mew panro none e nu naraine nama e nu umpinuma ka e mouli nu fa painrine koii e fa nupu mi.
Nu fa sam wola nanrona,
nu uma ee sam nuru nu ka nakle nuna mew.
39 Ka e monre e mow kori namo,
nu fa sam wola nire naine sia e fa neri riri.
Ka e kaire fa nangkene kola wamo e,
nu fa sam wola nire nu umpinuma mingklari ee nuru nu nanrona nu uma fa nuna noula wamo ka nu ee nali nu sia e neri riri.
40 Nu fa karnirene nu umpin e impi noneni rili pu namo ka peki nupu ommo mingklari wongkwongkeni nunini.
Nu fa nesapu eulangkren fa nu umpinuma ee nuru nu ka nire nu sa won uporo.
Nanrona fane nu uma nanrona,
ompla fika fafaile e God ee yale nu,
sa ee sam rikipone ompla fafaile e God ee yale nu umpinuma plai namo.”
Pin e ini ri namo yane ofa God
(Luk 21.1-4)
41 Yesus waiye nalen e bokis e romaula e tempol ka yuruye nu uma e neꞌri nenru romaula panrone bokis.
Uma e nuna romaula wamfafai namo naile romaula wamfafai panro bokis namo.
The Widow’s offering (Mak 12:41-44)
42 Ka pin wongke e ini ri pu e waiye yaimari,
wi yanpalo romaula pitiri plainrane yukaine wan toea palo bokis namo.
43 Ka Yesus youw nu disaipol woneni ni wu ka yireli nu nanrona,
“Ki kire mi alwone pone.
Pin nam ini wunini isi ri yupone wu ka wu waiye yaimari wamo namo,
yana romaula wamo wone rikipone romaula mingklari e nu umpinuma mingklari e nenru panrone bokis e romaula e tempol namo.
44 E fika nu umpinuma e nunarine romaula wamfafai namo,
ke naile romaula noneni ploli nro panro bokis e romaula.
Ka pin nam,
sa yaimari,
ka romaula e wu yanaye namo,
sa wonkonrona.
Ka wu ke fi yerfakru romaula plola waiyeye wone plau fa ee yuꞌpuye ompla ee wo wee ommo woneni.
Sam onnele!”