Yesus pai taunwamo Yerusalem yukaine king
(Matyu 21.1-11; Luk 19.28-40; Jon 12.12-19)
11
Yesus yakle disaipol woneni ni nalen e taun wamo Yerusalem.
Nu ni plele mokoi pitiri plainrane nouw Betfage ka Betani.
Mokoi pitiri plainrane namo e nene nalen e mouli aurola Oliv.
Ka Yesus yawale disaipol plainrane woneni e riri painri.
2 Wu yireni wuyane nanrona,
“Yenyane paipi mokoi namo nro e mone maimpi namo.
E yenyane paipi plele mokoi namo ka paipi papri,
sa yenyane ee puru donki woꞌla wongke e mana wongke fi isi waiye riri namo,
e nuka yeriye.
Ee yenyane peingkro kapa e nuka wu ka pumane pane pi nam.
3 Le mana wongke yari yenyane,
‘E fika ka yenyane ke pangke namo,’
sa yenyane ee pireni wu nanrona,
‘Manwamo e yire yangke ompla donki namo.
Ka e mouli e ommo wunini e pekimo,
se wu ee faflai nro ee yane yene kore.’ ”
4 E wu yopro mi wunini pekimo roka wuyane painri.
Ka e wuyane painri plele koii namo,
wuyane nuru donki woꞌla yeri nalen rama e mow wongke e yeri nalen e rokoi.
Wuyane painri donki namo ka neingkro kapa e nu nuka donki.
5 Ka nu uma plai e neri nalen namo nuru wuyane ka narine wuyane nanrona,
“Yenyane peri peingkro kapa e donki woꞌla namo fa ee pefere?”
6 Ka wuyane nireli nu yukaine mi e isi Yesus yireliye wonyane.
Ka nu uma ninanane wuyane ka wuyane numane donki woꞌla namo painri.
7 E wuyane numane donki woꞌla ni Yesus,
wuyane nuꞌpu ommo ampapri e wonyane ka ningklari donki woꞌla kunrinra ka Yesus yulpari waiye donki riri.
8 Uma mingklari ningklari ommo ampapri e noneni nupune rokoi ka plai sa naurerene ommo ilo para ka nenrune rokoi plau.
9 E Yesus yupune rokoi paiye,
umpinuma plai sa naraine wolale e wu ka plai sa naraine kunrinrale e wu.
Nu awaili plau e naraine namo nukari kero wamo ka nire nanrona,
“Mu mereri yene,
God ee yuꞌpu mu kore!
God ee saimoro mana namo e wi noula e Manwamo.
10 God ee sam yangke kingdom e ingke wi.
Kingdom namo,
sa e kingdom e aina e moneni,
Devitni.
Wu ee mewmew mone.
Mone mereri God e waiye riri wamo!”
11 E Yesus pai pari taunwamo Yerusalem,
wu pai pari tempol ka wu sam yuru ommo awaili.
Ka mouli sa poprolaye yire e kureli,
nanrona fane wu yakle nu 12pla aposel woneni fa painri kore Betani.
Yesus rofo yefulpari ilo fik e fi reri nale
(Matyu 21.18-19)
12 Nu nile pai moulipeprere roka nupone Betani ka nire painri kore taunwamo Yerusalem,
ka Yesus ke ponrini.
13 Ka wu yuru ilo fik wongke e yeriye as amon ka para keklepe yuforo yeinangkru pu.
E mouli namo sa mouli e ilo fik fa fi punone.
Ka e Yesus pai plele ilo fik namo,
wu yuruno ka yapu fik nale keklepe wongke fa ee wo.
Ka wu fi yane wongke.
Wu kom yuruye ilo fik para nro sa yuforoye ilo.a
14 Ka Yesus rofoyeful pari ilo fik namo ka yireni ilo nanrona,
“Yene ee karyerinale nro e fi reri nale kore.
Nu uma ee fi no kore nale e yene.
Ee sam onnele!”
Nu disaipol woneni nupu mi namo.
Yesus yangkrupu nu uma e nangke bisnis tempol monre
(Matyu 21.12-17; Luk 19.45-48; Jon 2.13-22)
15 E Yesus yakle nu disaipol woneni ni plele taunwamo Yerusalem,
wu sa wi pai pari poipare tempol monre.
Ka yuru uma naine maketne ompla tempol monre,
wu yemei yangkrupu nu ka yensoro tebol e nu uma fa naine neinensone romaula ka sia e nu uma e fa maketne rora ufu namo.
16 Ka wu reinangkru nu uma awaili e fi nungkamo ommo e maket noneni e fi nauri poipanre puku monrele e tempol.
17 Ka e wu naye yukuleye nu namo,
wu yireli nu nanrona,
“Buk e God yire nanrona,
‘Mow kinini ee sam waiye yukaine mow fa nesapune e nu umpinuma e mokoi mingklari.’
Ka anro pone wola pumaro ompla namo,
wee?
Ka pone ke pangke wu yemei yukaine koii e uma fa peki nuꞌpu ommo ka ni peki nainene.”
18 E nu bikpris ka nu tikse e lo nuꞌpu mi namo,
nu nemei ka napu rokoi wongkwongkeni fa nufu Yesus ri.
Nu num wu,
e fika,
nu namale nanrona uma mingklari wolapanrini wamo mi e Yesus yangke namo.
19 E kaire mingklari,
Yesus yakle disaipol woneni namo,
fa nupone taunwamo Yerusalem namo ka painri kore koii e none fa nainene.
Ilo fik rouw
(Matyu 21.20-22)
20 E ningkinama nole wamo Yesus yakle disaipol woneni nemei ka painri kore taunwamo Yerusalem namo,
nu nuru ilo fik e Yesus isi rofoyefuye namo sam rouw pai plele kinrela woneni.
21 Ka Pita wolarufu ompla e Yesus isi yangke namo ka wu yire nanrona,
“Tikse,
yuru ilo fik oi yene rofoyefuye namo rouw pu.”
22 Ka Yesus fa miyangkompari mi e nu disaipol woneni namo nanrona,
“Pone ee sam bilipim God.
23 Ki kire mi alwone pone,
le mana wongke yireni moulala naminre nanrona,
‘Yene yemei ka pai yingkapalo yene kore palo rufru iplile.’
Ka e mana namo e fi wola plainrane ka wu fa sam bilipimye ompla namo ee yemei yukaine e wu yireye.
Sa ki kire mi alwone pone nanrona,
God ee yangke ompla namo ee yemei yukaine e wu wolaye.
24 Nanrona nro,
ki kire mi alwone pone,
le pone puna kero wolpuna ka pesapu fa puꞌpu ommo sa,
pone sam bilip kero nanrona pone pem pu ompla namo e pone fa pesapu ka God ee yane pone.”
25-26 “E pone pesapu ka pone wolrufu ompla wongke fafaile e mana wongke isi yangkeye pone,
sa pone ee sam puꞌpole ommo fafaile namo e wu isi yangkeniye pone.
Nanrona nro ee Aina waiye heven namo,
ee yuꞌpole ommo fafaile pone e isi pangke namo.”
Nu narine Yesus e wu yem kero namo pei
(Matyu 21.23-27; Luk 20.1-8)
27 Yesus yakle disaipol woneni ni kore taun wamo Yerusalem.
Ka Yesus pai pari raiye tempol monre.
Ka nu bikpris ka nu tikse e lo ka nu ira uma plai ni plele wu.
28 Ka nu won nirenine wu nanrona,
“Yene yireni mu,
fina yane ira uporo namo ka ommo namo?
Ka kero namo wi pei?”
29 Ka,
Yesus miyangkompari mi e nu nanrona,
“Ki e kire karine pone mi wongke se.
Le pone sam pimpone mi kinini karike,
sa ki ee kopro alele fina yane namba ki fa kangke ommo namo.
30 Pone pireni ki,
e Jon baptaisim nu uma mii namo,
God e heven isi yane namba ka kero wu wee nu uma isi nane wu?”
31 Nu nuka mi iplile none kore nanrona,
“Mone ee mire fika?
Le mone mire nanrona kero namo wi God,
wu ee yireni mone nanrona,
‘E fika ka pone fi bilipim mi e Jon?’
32 Ka e mone mire nanrona ‘Namo sa ommo e mana nro,’
ka mi namo ee yensona wi mone kore.”
Nu nire nanrona e fika,
nu num nu umpinuma.
Umpinuma mingklari fa nirene nanrona Jon wu sa profet runu.
33 Nanrona fane nu minangkompari mi wunini nanrona,
“Poo,
mu fi namale.”
Ka Yesus e yangkompari mi e nu nanrona,
“Ki plau ee fi kire mi alwone pone e fina isi yane namba namo ki ka ki kangke ompla namo.”