Yesus yopro mi e nale e mana yupone pin
(Matyu 19.1-12; Luk 16.18)
10
Yesus yemei ka yupone mokoi namo ka pai mokoi plola e distrik Judia ka pai yaure nupi Jodan ka pai plele koii repo.
Umpinuma mingklari wamo ni ka nane wu nemnoku,
ka wu yemei yopro yukule nu mi e God yukaine wone fa kairkum yangkeye.
2 Ka Farisi plai ni Yesus ka karwiflenari wu fa ee napu nale fafaile wunini e mi fikayen fa wu ee koroyane.
Fane nu narine wu nanrona,
“Lo e moneni e yireye fika,
ee uporo mana ee yupone pin woneni wee onnele?”
3 Ka Yesus mi yangkompari nu nanrona,
“Moses isi yale pone lo ka lo namo yireye fika?”
4 Ka nu mi nangkompari wu nanrona,
“Moses yinayane mana ee reꞌre piprola wongke fa wu ee yupone pin woneni.”
5 Ka Yesus mi yangkompari nu nanrona,
“Pone uma fa wewelape,
nanrona fane Moses e reꞌreye lo namo poneni.
6 Pone pupu,
isi mirale God yangkeye ommo mingklari namo,
wu yangke manale.
‘Wu yangke mana wongke ka pin wongke.’a
7 ‘Nanrona nro umpinuma e nemnuꞌpune,
nu e nuponene none moknangkapi ka painri nenaine none keila
8 ka ee nemei yukaine nale wokera.’b
Wuyane ee fi naine yukaine plainrane,
wuyane ee naine yukaine wokera nro.
9 Nanrona fane ompla e God yuka namo,
mana wongke ee fi yekri.”
10 Ka ingke se Yesus yakle nu disaipol woneni painri ka e nu nainene monre kore,
nu disaipol woneni narine wu mi namo.
11 Ka Yesus yireli nu nanrona,
“Ka le mana wongke yuꞌpone pin woneni ka ee yem pin wongke,
mana namo ee yangke nale pamok.
Ka e rokoi namo,
wu yangke nale fi uporo nama e God e wu yangke fafaileye pin riri e woneni.
12 Ka le pin wongke plau e yupone ini woneni ka pai yem mana wongke,
pin namo plau won yangke nale pamok.”
Yesus blesim kongkom
(Matyu 19.13-15; Luk 18.15-17)
13 Umpinuma numale kongkom ni Yesus fa ee mew yauniri nu.
Ka nu disaipol woneni nuru nu ka ke minuforone nu umpinuma namo.
14 Yesus yuru nu disaipol woneni nangkene ompla namo ka wu wolpuna neni nale fafaile nu nangkene namo.
Ka yireli nu disaipol woneni namo nanrona,
“Puplen kongkom ni ki.
Pone faa mi paurepe nu ee nine ki.
E fika,
kingdom e God namo,
sa nu uma e nukailene kongkom namongkleni.
15 Ki kire mi alwone pone nanrona,
mana e wola wamo yire fa ee waiye monre e kingdom e God namo,
e sam wola wamo ka wolpuna wokeraye mi awaili e God yukaine e kongkom fa wola wamo ka wolpuna wokerane mi e none moknangkapi.
Le onnele sa,
mana namo e fi waiye monre e kingdom e God.
E sam onnele!”
16 Ka wu yeimare kongkom namo ka mew raunri nu ka yarine God ee blesim nu.
Mana efapu fina e fa yunaye ommo mingklari
(Matyu 19.16-30; Luk 18.18-30)
17 Yesus yemei fa raiye kore ka mana wongke puye wi plele wu ka fufula yokle wolale e wu.
Ka wu yarine Yesus nanrona,
“Tikse uporo,
ki ee kefele sa ki ee kem laip e fa waiye yekei yekei namo?”
18 Ka Yesus miyangkompari mi e wu nanrona,
“E fikami ka yene ke youw ki tikse uporo?
Mana wongke fi uporo.
God wokera nro sa uporo.
19 Yene e namale lo:
‘Yene faa yufu mana ri,
ka yene faa yangke nale pamok,
ka yene faa peki yuꞌpuye ommo,
ka yene faa miyonaye umpinuma plai,
ka yene faa karyangkle ka yemkeingkeroye ommo e nu uma plai,
ka yene ee yangke nale uporoniye yene moknangkani ka yumaraloye yene kore ka waiye ru e wuyane.’ ”c
20 Ka mana namo yireni Yesus nanrona,
“Tikse,
e ki kone mela aula wi plele e nam,
ki kupune lo mingklari namo.”
21 Yesus yuru wu ka wolayaneye wu wamo ka yireni wu kore nanrona,
“Ompla wongke nro sa yene onnele namo.
Yene ee pai ka yenru ommo yene yunaye namo fa uma ee nuꞌpu ka romaula namo yene ee yali uma yaimare.
Ka le yene yangke nanrona,
sa God ee yane yene ommo uporo fa waiye yori yene heven.
Ka yene wi ka yupune ki.”
22 Ka e mana namo yupu mi e Yesus yireye namo ka wu ungklama ningkrinolo ka wolpuna sam nale fafaile wamo ka pai.
E fika,
wu e yuna ommo mingklari.
23 Yesus nama yairuye nu disaipol woneni ka yireni nu nanrona,
“Uma nuna ommo mingklari namo,
sa ee amparpunu wamo e nu painri panri monre kingdom e God.”
24 Nu disaipol woneni nupu mi namo ka nu wolapanrini wamo.
Ka Yesus yireli nu kore nanrona,
“Kongkom kinini,
uma e nire panri kingdom monre e God namo sa nu ee amparpunu wamo.
25 Ka le kamel yire pari pulale e nidel,
namo e fi yangke wu e raraine.
Ka le mana wongke e yuna ommo mingklari ee yire pari kingdom monre e God,
namo sa ee yangke wu e sam raraine wamo.”
26 Nanrona fane nu disaipol e Yesus namo sa mi onnele kei ka nu naine ka nopro mi komafre iplile e none nro nanrona,
“La e nanrona sa fina se resukru ee waiye yekei yekei plau God?”
27 Yesus yuru nu ka yireli nu nanrona,
“E mana,
ompla namo ee raraine wu ka wu ee fi yangke.
La e God ompla namo sa pitiri ka ee fi raraine wu ka wu ee yangke ompla namo.”
28 Nanrona fane Pita yemei ka yireni Yesus nanrona,
“Yuru!
Mu mupone ommo mingklari munini ka mupune yene!”
29-30 Ka Yesus yireli nu kore nanrona,
“Ki kire mi alwone pone,
fina e yire yupune ki ka miuporo,
e yupone mow,
ka ommo mingklari e wone,
ka inompranimpi,
pinofe,
moka,
nangka,
kongkom,
ka nengkrele ommo e woneni,
se mouli e wu waiye malmaye pike nam,
God ee yane 100pla ompla reryane kore wu,
e rikipone ommo e wu isi yunaye:
Ommo yukaine mow plai,
ka ommo mingklari woneni,
ka inompranimpi,
pinofe,
mokapi,
kongkom,
ka ommo nengkrele woneni.
Ka ingke e mouli namo nu uma ee nangke fafaile ka ownire wu.
Ka mouli ingke wi wu ee waiye yekei yekei.
31 Ka uma awaili e nunane noula wamo e naminrele namo,
ingke noula wamo nunini e firipanro ka nu ee sam naine kunrinrale.
Ka fopi e noula onnelene naminrele namo,
sa ee nem noula ka ee naine riri.”
Yesus yopro koreye mi e wone ee ri ka ee yemei kore
(Matyu 20.17-19; Luk 18.31-34)
32 Yesus yakle nu 12pla disaipol woneni painri rokoi e pai taunwamo Yerusalem ka Yesus sa e paiye riri nu,
ka nu disaipol ke wolpuna mingklari.
Ka uma e nupulene nu namo ke nemnumnumne.
Ka Yesus youw nu 12pla disaipol woneni ni wu ka yireli nu ompla fika fa nu uma ee nangkeni wu.
33 Wu yireli nu nanrona,
“Pone puru.
Naminrele mone maimpi plele taunwamo Yerusalem,
nu ee nane Auna e Mana pai mew e nu bikpris nane nu tikse e lo.
Nu ee minona wu ka nuka mi e wu ee ri.
Ka nu ee nina wu pai mew e nu uma fi Juda.
34 Ka uma namo ee ownire wu ka rofonefu ka nufu wu wip ka nufu wu ri.
Ka e kaire plainrikera sa wu ee yemei kore ka ee waiye laip.”
Jems yane Jon nire naine wamo
(Matyu 20.20-28)
35 Ka mela mana plainrane e Sebedi,
Jems yane Jon ni Yesus ka nireni wu nanrona,
“Tikse,
kikane sam wola mire yene ee yangke ompla wongke e kikane ee marine yene ee yangke.”
36 Ka wu yarine wuyane nanrona,
“Yenyane wola pire ki ee kangke ompla fika yenyane?”
37 Ka wuyane minangkompari mi wunini nanrona,
“E yene waiye sia king yene ka yene yopane kingdom e God ka ommo mingklari namo,
kikane sam wolame nanrona yene ee yane namba wongke kikane ee maime mew menrulpod yene ka wongke ee waiye mew aiyalpo yene.”
38 Ka Yesus yane mi riri wuyane nanrona,
“Yenyane an fi namale mi fika e yenyane poprolepe ka parinepe ki namo.
Yenyane ee paikopo kap e ki ee kaikoko namon wee?
Ka yenyane resukru le nu ee baptaisim yenyane yukaine e nu ee baptaisim ki wee?”
39 Ka wuyane nireni wu kore nanrona,
“Yei,
kikane resukru.”
Ka Yesus yireni wuyane kore nanrona,
“Kap namo e ki ee kaikoko yenyane ee paikopo plau.
Ka baptais namo e nam ki ee kem namo,
yenyane ee pem.
40 Ka fina ee waiye mew menrulpo ka mew aiyalpo seke ommo e ki ee kane mana.
Sam onnele!
Sia plainrane namo sa e mana fina God wone yina pu.”
41 E 10pla disaipol plai nupu mi e Jems yane Jon,
nu wola neni ka nemei mi nufona wuyane.
42 Ka Yesus yemyoku nu ka yireli nu nanrona,
“Pone e namale nanrona nu uma nu fa nouwne manwamo e nu uma e fi Juda namo,
sa fa nererine none ka numaralone nu plai.
Ka nu uma e fa painri ririne nu lida namo sa fa nire mi kerone nu umpinuma ee nupune mi e nunini.
43 Ka pone faa pupune nale e nu.
Mana yire yemei manwamo poneni,
sa ee waiye yukaine wokboi poneni.
44 Ka mana e sam wola yire ee pai riri pone namo,
ee waiye yukaine wokboi siwole e uma mingklari.
45 E fika mi e God e yireye nanrona,
uma ee riline nale fafaile e noneni.
Ka Auna e Mana ee yina wone ee ri fa ee yuꞌpu nale fafaile awaili e nu umpinuma mingklari fa nangkene se nu ee fi rili.
Wu seke wi fa nu uma ee mewmewne wu.
Onnele!
Wu e wi fa ee mewmewye nu umpinuma awaili e pike nam.”
Yesus saimoro mana namfai
(Matyu 20.29-34; Luk 18.35-43)
46 Yesus yakle disaipol woneni painri plele taun Jeriko.
Ka Yesus yakle nu disaipol nupone taun Jeriko ka painri ka nu umpinuma mingklari nakle nu plau painri.
Ka mela mana e Timeus,
noula wunini Bartimeus,
e waiyeye rokoi piyewa namo.
Nama e wunini namfai.
Ka wu fa waiye ka yuyariye nu uma ee nane wu romaula.
47 Wu yupu nanrona Yesus e taun Nasaret wiye rokoi namo ka wu yangke mi fafri wamo ka yire nanrona,
“Yesus,
Auna e Devit,
yene wolayure ki!”
48 Nu uma mingklari minufona wu ka nire mi kero wu nanrona,
“Misaruru!”
Ka wu yangke mi fafri kore ka yire nanrona,
“Auna e Devit,
yene wolayure ki!”
49 Yesus wi yeri ka yire nanrona,
“Pouw wu wi.”
Roka nu nouw mana namfai namo nanrona,
“Yene aiyem ka yemei yeri!
Wu youwye yene.”
50 Wu usu yingkapalo saket woneni ka yemei faflai wi Yesus.
51 Ka Yesus yarine wu nanrona,
“Yene yire ki ee kefele yene?”
Ka mana namfai namo yangkompari mi wunini nanrona,
“Tikse,
ki kire kuru.”
52 Ka Yesus yireni wu kore nanrona,
“Yene pai.
Bilip yeneni saimoro yene pu.”
Ka faflai nro,
nama e wu uporo ka wu yuru.
Ka wu yupune Yesus pai kei rokoi.