9
Ka Yesus yireli nu kore,
“Alwone ki kireli pone,
plai e pone e peripe naminrele ee paipe laip ka ee purupe kingdom e God ee wi plau kero wamo woneni se sa ingke se sa pone ee rili.”
Nale e Yesus pleilneri
(Luk 9.28-36; Matyu 17.1-13)
2 6pla kaire pai se sa Yesus yumane Pita,
Jems ka Jon ka yumale nu panri moulaurola ka painri naine none keila.
Nu nuru nalepapri e Yesusni yemei pleilnerine ka pai ringkeningke.
3 Ka ampapri e wunini yemei sam wouwyane ka yople kei nama e nunini.
Ka mana wongke e pike nam e fi resukru ee yaklele ampapri ee yemei sam wouwyane nanrona.
4 Ka nu nuru Elaija yane Moses nane Yesus nopro mi.
5 Pita yuru namo ka yireni Yesus nanrona,
“Tikse,
uporo wamo e mu plainrikera mane yene meꞌri meri naminrele.
Mu plainrikera ee meꞌre mow anro plainrikera poneni.
Wongke yeneni,
wongke Mosesni ka wongke Elaijani.”
6 Uma plainrikera e nane Yesus panrine namo nemnumeki wamo,
fane Pita faflai yingkapalo mi namo.
7 E mouli namo,
kupu wongke karyemei ka yuforo nu ka nu nupu mi wongke yolo renro e kupu yire nanrona,
“Nam sa,
Auna kinini!
Fina e ki fa sam wolake wu wamo.
Pupupe mi wunini.”
8 Ka faflai nro,
Elaija yane Moses karpekiyi ka uma plainrikera e nane Yesus panrine namo ke napu wuyane ka ke fi nuru wuyane.
Nu nuru Yesus nro sa yakle nu naine.
9 E nu nolo korene moul aurola,
Yesus yaleye nu mi kero reinangkruye nu nanrona,
“Ompla e pone purupe namo,
pone e fi pireli nu uma plai pai plele e mouli e Auna e Mana ee ri ka ee yemei kore.”
10 Nu nuna mi kero wunini ka wolpuna mingklari,
ka nopro napune mi nomu “mana e ri ka yemei kore” sa yireye ompla fika.
11 Ka nu narine Yesus nanrona,
“Fikayen ka nu tikse e lo fa noprone nanrona Elaija ee wi se sa Krais ee wi?”
12 Ka Yesus miyangkompari mi e nunini nanrona,
“Mi namo sa won alwone nanrona:
Elaija e wi riri Krais ka e naminrele sa naye saimoroye ommo kore.
Ka mi e wileye Buk e God yire nanrona Auna e Mana ee yungkam nale fafaile mingklari ka uma ee ouwnirene wu?”
13 Ka ki kire mi alwone pone nanrona,
“Elaijaa e wi pu,
ka uma nangke fafaile wamo wu e wolpuna e nu noneni,
nupune mi e wileye buk e God.”
Yesus yuꞌpone opola fafaile e yinapoiye mela man wongke
(Matyu 16.14-19,22-23; Luk 9.37-45)
14 E Yesus yane Pita ka Jems ka Jon nolo ni plele nu disaipol plai namo,
nu nuru umpinuma mingklari wamo mamane nu ka nu tikse e lo nakle nu nopu mi.
Jesus Heals a Boy with an Unclean Spirit (Mak 9:14-29)
15 Ka e umpinuma awaili nuru Yesus,
nu ainem wamo ka puyel painri fa ee nire uporo wu.
16 Ka Yesus yarile disaipol woneni namo nanrona,
“Pone ke pakle nu popupe mi e ompla fika?”
17 Mana wongke e waiye iplile e nu umpinuma namo youw Yesus ka yireni wu nanrona,
“Tikse,
mela mana kinini,
opola fafaile fa yufona wu ka fa yeinangkru wu e fi yopro mi.
Nanrona fane ki kumane wu wi yene.
18 Mouli e opola fafaile fa poiye wu,
sa fa yurome wu firpoiye pike ka yangke wu yamunoye nela wunini ka rofo wonouwa fa okonolone wu reꞌfa ka nalepapri wunini fa kinre nempriri ka kero wamo.
Ki karile nu disaipol yeneni ee nuꞌpole opola fafaile namo,
ka nu fi resukru e nangke.”
19 Ka Yesus yireli nu nanrona,
“Ro fikayen fane nu uma e mouli naminrele,
bilip nunini ke sam onnele wamo!
Ki e kakle pone e maimeme kei ka kungkamke nale fafaile awaili e poneni wee?
Ommo awaili e ki kangkeni pone pu fane ki ee kangke fika koreni pone?
Peima mela manro aula namo pi kominrele.”
20 Nanrona fane nu neima mela namo ni wu.
Ka opola fafaile yuru Yesus,
ka faflai nro yulpari mela ka yinelpoi wu firpoi pike ka wile fouwro rikaklaye ka kinrela nempririne ka rofo wonouwa nimerwane reꞌfa wunini.
21 Ka Yesus yarine nangka e mela namo nanrona,
“Ompla namo e yemei wu mouli eulangkren wee e werkom?”
Ka mela nangka mi yangkompari nanrona,
“Ompla namo e yemei wu isi wu mela aulaye ka wi.
22 Ningki kaire,
opola fafaile yire fa ee yine wu palo niꞌpi ka yire fa ee yuma wu palo nupi ka ri.
La e yene resukru sa yangke ompla wongke,
yene as wolayure mu ka mewmew mu.”
23 Ka Yesus mi yangkompari wu nanrona,
“Fikayen ka yene yireye mi nanrona ‘Le yene resukru’?
Ommo awaili resukru ee nemei le mana bilip.”
24 Mela nangka namo faflai yireni Yesus nanrona,
“Bilip e ki kunake,
sa fi wamo.
Yene sa ee mewmew ki ka yangke bilip kinini ee yemei wamo.”
25 E Yesus yuruye uma mingklari e nempuyere nine koii namo wu miyufona kei opola fafaile namo ka yireni mi kero wu nanrona,
“Yene opola fa yangkeye nu uma ripi ukunune ka reꞌfa kungkunpanrine.
Naminrele yene yupone wu ka pai ka e fi wi kore wu.”
26 Ka opola fafaile namo yangke mela namo yangke mi wamo,
ka yangke wu kinre nempriri ka yupone wu ka pai kei.
Ka mela namo yukaine e ri waiye.
Uma mingklari nuru wu ka nire nanrona,
“Mela nam sa ri pu.”
27 Ka Yesus mew palo yeima mew e wu fa ee yereri wu yeri ka mela namo yemei ka yeri.
28 Ingke Yesus pai monre ka nu disaipol woneni nro sa nane wu naine ka nu narine wu nanrona,
“Fikami ka mu fi resukru e muꞌpole opola fafaile namo?”
29 Ka wu mi yangkompari nu nanrona,
“Yene ee yesapu se sa yene ee yuꞌpole opola fafaile yukaine nanrona.
E onnele,
sa ee onnele.”
Yesus yopro mi e wu ee ri ka ee yemei kore
30 Yesus yakle nu disaipol woneni nemei ka nupone mokoi namo ka painri distrik Galili.
Yesus fi wol uporo fa uma ee namale nu e nainene pei,
31 e fika wu naye yopro yukule nu disaipol woneni.
Wu yireli nu nanrona,
“Auna e Mana namo,
nu ee nane wu pai mew e nu uma.
Se nu uma ee nufu wu ri.
Ka e nu nufu wu ri,
ka kaire plainrikera wu ee yemei kore.”
32 Ka nu fi sam namale mi nomu namo e wu ka nu ke num fa ee nari mi plai pai wu.
Fina sa ee pai riri
(Matyu 18.1-5; Luk 9.46-48)
33 Yesus yakle nu disaipol woneni painri taun Kaperneam.
Nu painri naine mow wongke ka Yesus yarile nu disaipol woneni nanrona,
“E mone mime rokoi pone e pempopupe mi fika?”
34 Ka nu nemplamunu kei e fika nu e nine rokoi ka nemnopune mi fina sa ee pai riri none.
35 Nanrona fane Yesus waiye ka youw nu 12pla uma e fa nane wone raine namo ni ka yireli nu nanrona,
“Uma fopi ee wola nire fa ee painri riri nu uma plai sa ee nanrona,
nu ee numaralo none ka ee naine yukaine mana e fa waiye ru ka wokboi siwole nroye nu uma awaili.”
36 Ka wu mewyeima mela aula wongke wi yeri iplile e nu.
Roka wu yeima mela namo ka yireli nu nanrona,
37 “La e fina yupune ki yangke nale uporoye nu kongkom aure yukaine mela nam e noula e kinini,
sa mana namo yangke nale uporo namo wi ki kone.
Ka nale uporo e wu yangkeye ki namo,
wu fi yangkeye ki kone kera,
Onnele!
Wu yangke plau mana fina e yawane ki kii.”
Fina e fi yangke fafaile mone, wu sa uma moneni
(Luk 9.49-50)
38 Ka Jon yireni wu nanrona,
“Tikse,
mu muru mana wongke fa youw noula yeneni ka yuꞌpoleye opola fafaile.
Ka mana namo seke wongke e moneni fane mu mi maure wu ee fi yangke ompla namo kore.”
39 Ka Yesus yireni nu nanrona,
“Pone ee fi mi paure wu.
La e mana wongke youw noula kinini ka yangke mirakol wongke,
wu ee fi resukru faflai yire mi koroyane ki.
40 Nanrona fane le nu uma e fi yukaile furempi moneni namo,
sa nu uma moneni.
41 Naminrele ki kire mi alwone pone,
la e mana wongke e namale nanrona pone sa uma e pungkampe noula e Krais ka yane mii kukro pone,
sa ki kire mi alwone pone nanrona God ee ingke yane wu ompla uporo.”
Nale fafaile fa yisyoriye bilip e mana
(Matyu 18.6-9; Luk 17.1-2)
42 “Nu kongkom e bilipimne ki namo.
Ka le mana wongke yumane wongke e nu kongkom namo yangke nale fafaile fafaile nama e God,
mana namo ee yem nale fafaile wamo.
Mone mire namo sa nale fafaile wamo fane e nuka roma wamo yapa mongkoma wunini ka ningkapalo rufu yaikowo furu ka ri.
Ka nale fafaile e wu yemye sa ee rikipone nale fafaile e nu uma e roma nukane wu mongkoma namo.
43-44 Le mew yeneni yeingke yene yangke nale fafaile,
sa yene ee yaure ka yupone mew namo.
Ee uporo wamo yene e yuna mew wokera nro ka pari monre e mokoi e laip fa waiye yekei yekei namo.
Ka ee fafaile wamo le yene yuna mew plainrane,
sa God ee yingkapalo yene palo hel.
Ka hel namo sa mokoi e niꞌpi fa waiye aliye nanrona nro.
45-46 Ka le rew yeneni yeingke yene yangke nale fafaile,
sa yene ee yaure ka yupone rew namo.
Sa ee uporo wamo yene e yuna rew wokera nro ka waiye monrele mokoi e laip e fa waiye yekei yekei namo.
Ka,
ee sam fafaile wamo la e yene yuna rew plainrane sa God ee yingkapalo yene palo hel.
47 Ka le nama yeneni yeingke yene yangke nale fafaile fafaile,
sa yene ee yompome wongke.
Sa e uporo yene ee yuna nama wokera nro ee pari kingdom e God.
Ka,
e fafaile wamo e yene yuna nama plainrane sa God ee yingkapalo yene palo hel.
48 E koii namo,
marila aure fa no ka naurnumane ommo unu namo,
fa naine nanrona ka nangkene ompla namo.
Niꞌpi e fa yupoye nu namo plau,
e ali yeyeye nanrona nro.”
49 “Nu fa nenru sol panrone ofa awaili e noneni namo fa e nangkene ofa e sam paninene nama e God.b
Nanrona nro,
yeingkari ee yemei yukaine niꞌpi e laip e nu umpinuma awaili.”
50 “Sol sa ompla uporo wamo.
La e kire wunini pekimo,
sa ee fi yem kore kire wunini.
Kire e sol namo,
ee yeye renro e poneni sa ee yangke pone ee paipe wolpuna wokerape wongke ka wongke.”