Yesus yale ompla e none nu 4,000 uma
(Matyu 15.32-39)
8
E mouli namo,
umpinuma mingklari wamo fa ni nemnokul naine kore.
Ka ommo roli e nu fa ee no sa onnele.
Nanrona fane Yesus youwle nu disaipol woneni ni wone ka yireli nu nanrona,
2 “Ki sam wolakure nu umpinuma.
Ki kakle maime kaire plainrikera ka nam nu fi nuna ompla wongke fa ee no.
3 La e ki fi kale nu ompla e none nu ka kawale nu e kar painri sa plai e nu ee nama kakaro ka ee firipanro rokoi.
Plai e nu namo,
sa mokoi nunini e amon feifei.”
4 Ka disaipol woneni ke narine wu kore nanrona,
“Koii namo sa uma onnele!
Mu sa ee mapu ompla pei le male nu uma mingklari namo?”
5 Ka Yesus yarile nu kore nanrona,
“Pone sa e punape bret ploli fikayen?”
Ka nu mi nangkompari wu nanrona,
“Mu muna 7pla bret ploli nro.”
6 Wu yireli nu umpinuma awaili namo naine pike ka wu yem 7pla bret ploli namo ka yire tenkyu God ka yekri bret.
Ka yaleye nu disaipol nepine nu umpinuma awaili namo.
Ka nu disaipol nupune ka nangke ompla yukaine e wu yireli nu e nangke.
7 Nu nuna firala ula plairane nro.
Ka Yesus yire tenkyu God e firala namo,
ka yireli nu disaipol woneni nepil pai nu umpinuma.
8 Nu umpinuma no pai ka nu rengki wamo ka ommo ploli plai naine.
Nu disaipol nemnoku ommo ploli namo ka nina panro 7pla nekela yimeri.
9 Namba e nu uma fopi e naine none ompla namo sa,
4,000pla umpinuma.
Pekimo e ompla namo se sa,
Yesus yawale nu painri
10 Ka faflai nro,
Yesus yakle nu disaipol woneni,
nulilpanri bot ka painri mokoi wongke e fa nouwne Dalmanuta.
Nu uma nire fa ee nuru mirakol
(Matyu 16.1-12)
11 Plai e nu Farisi ni plele Yesus ka nane nemnangkompari mi.
Ka nu wifle narinene wu ee yangke mirakol wongke ee yolo heven e fika nu e wolane nanrona nu ee resukru ee neirpane wu ee yuku alele nanrona wu e fi yolo God.
12 Yesus anine ka yire nanrona,
“E fikayen ka nu umpinuma e pike e mouli naminrele ke noprone mi kero ka nire fa ee nuru mirakol?
Ki kire mi alwone pone nanrona,
ee sam onnele.
Ki ee fi kangke ompla wongke e yukaine nanrona fa pone umpinuma e mouli naminrele ee puru.
Sam onnele!”
13 Ka wu yupole nu ka pai yulpari kore bot e wone yakle nu disaipol woneni ee painri kore repo e mii anru Galili e kaire yeriye pon.
Yis e nu Farisi ka e Herot
14 Nu disaipol e Yesus sam wolkuruno wamo fi nuꞌpu bret plai kore fa ee resukru none.
Nu kom nem bret wokera nro nina waiyeye bot e noneni.
15 Ka Yesus yire mi alele nu nanrona,
“Pone poo.
Pone ee sam purupe yis e nu Farisi ka yis e Herot.”
16 Ka nu nopro mi iplile none kore ka nire nanrona,
“Mone bret onnele,
nanrona fane wu yire mi namo.”
17 Yesus namale mi nunini ka wu yireli nu nanrona,
“E fikami ka pone ke pempoku popromi pone kore ka pire pone bret onnele?
Pone fi namale ka pone plau fi namale wee?
Puna ka wola poneni sa ro kero wamo fane?
18 Pone puna nama,
ka nama poneni ke fi resukru ee yuru ka namaleye ompla wee?
Pone puna ripi,
ka ripi poneni ke fi sam resukru ee nupu mi wee?
Pone ro wolakurunope ompla pu wee?
19 E ki kekri 5pla bret ploli ka pone pepi nu 5,000pla uma none namo,
nekela rongkele sa pone panpalo ommo plolploli waiyeye namo?”
Ka nu mi nangkompari wu nanrona,
“12pla nekela yimeri.”
20 Ka Yesus yari kore nu nanrona,
“E ki kekri 7pla bret ploli ka pone pepi 4,000pla uma namo ka nu rengki ka bret plai naine,
ka pone pana palo nekela rongkele e yimeri?”
Ka nu mi nangkompari wu nanrona,
“7pla nekela yimeri.”
21 Ka wu yarile nu nanrona,
“Ka pone naye fi namale ompla namo wee?”
Yesus saimoro mana namawowo e Betsaida uporo kore
22 Yesus yakle disaipol woneni ni plele taun Betsaida ka uma plai numane mana wongke e nama wowo ni plele wu ka nari wolnure Yesus ee mew yauni wu.
23 Yesus yeima mew e wu ka yane painri naine as amon e koii namo,
ka wu rofoyefu nama e mana namawowo namo ka mew yauni wu ka yarine wu nanrona,
“Yene resukru yuruno ommo wee onnele?”
24 Ka mana namawowo namo yuru pari riri ka yireni Yesus nanrona,
“Yei,
ki kuruno uma.
Ka nu ke nukaine ilo e poinpanrene.”
25 Ka Yesus mew yauni nama e wunini kore.
Ka e mouli namo sa nama wunini feingkyane ka wu sam yuruno ommo upupu.
26 Ka Yesus yireni wu pai kore mow woneni ka yire mi kero wu nanrona,
“E naminrele,
yene ee fi pai mokoi Betsaida ka yuru uma mingklari nanri.”
Pita yire mi alwone nanrona Yesus wu sa Krais
(Matyu 16.13-16; Luk 9.18-20)
27 Yesus yakle nu disaipol woneni nemei ka painri mowmow nainene nalen e taun Sisaria Filipai.
Ka e nu painrine rokoi namo,
Yesus yarile nu disaipol woneni namo nanrona,
“Pone pireni ki,
nu uma fa nire ki sa fina?”
28 Ka nu disaipol mi nangkompari wu nanrona,
“Plai fa nire nanrona yene Jon E Baptais.
Ka nu uma plai fa nire yene profet Elaija.
Ka uma plai fa nire nanrona yene sa profet wongke e isi.”
29 Ka Yesus yari kore nu disaipol woneni nanrona,
“Ka pone won pire ki sa fina?”
Ka Pita mi yangkompari wu nanrona,
“Yene Krais.”
30 Ka Yesus yale mi kero nu nanrona,
“Pone ee fi pireni mana wongke e mi naminrele.”
Yesus yopro mi e mouli e wu ee ri ka ee yemei kore
(Matyu 16.21-28; Luk 9.22-27)
31 Ka e kaire namo,
Yesus won yukule nu disaipol woneni nale fafaile mingklari ingke ee nemei wu.
Wu yoprongkle nu nanrona,
“Auna e Mana ee yungkam nale fafaile mingklari ka nu iramana,
ka nu bikpris e tempol,
ka nu tikse e lo ee sam kunrinra nane wu.
Ka uma plai ee nufu wu ri ka kaire plainrikera se,
wu ee yemei kore.”
32 Wu sam yeingkyale mi namo nu.
Ka Pita yumane wu painri repo ka miyufona Yesus.
33 Ka Yesus yensona ka nama pai nu disaipol plai namo ka miyufona Pita ka yireni wu nanrona,
“Satan,
yene yimaine ki!
Wolpuna namo yene yunaye sa fi e God,
sa wolpuna e nu uma.”
34 Ka Yesus youw nu disaipol nane nu uma mingklari namo ni wu ka wu yireli nu nanrona,
“Uma e nire nupune ki,
ee wolanumaro wone kore ka ee nongkole kruse e noneni ka nupune ki.
35 La e mana mew yeima laip woneni,
se laip woneni ee fafaile.
La e mana fi yeima laip woneni ka yupune ki ka wolarufuye miuporo,
sa laip woneni ee sam uporo ee fi fafaile.
36 La e mana yunari ommo mingklari e pike nam,
ka e ingke ommo namo ee nangke wu e pekiyi,
se ommo awaili namo ee nangke ompla fika uporo wu?
37 Nomu e ki kire nanrona,
e fika,
mana ee fi yem ompla wongke ka yane God fa ee yem laip e fa sam nainene yekei yekei.
38 E mouli naminrele,
uma mingklari fa kunrinra nanene God ka painri rerelene ommo fafaile wongkwongkeni e fi wonaye nama e God,
ka ommo e nu fa nangkene namo fa nisnorine none ka yangke none nemei yukaile none e nangkene pamok.
Ka le mana wongke e rurungklamoye ki ka mi e ki,
Auna e Mana plau ee rurungklamoye mana namo e mouli e wu ee yemyoku plau nu holi ensel ka ee ni plau glori e Nangka woneni namo.”