Lo e God rikepone ira e mana
(Matyu 15.1-20)
7
Nu Farisi nakle nu tikse plai e lo nupone taunwamo Jerusalem ka ni nemnoku naine mamane Yesus.
2 Ka nu nuru plai e nu disaipol wunini none plau mew kiina nama e God.
Namo e fika,
nu fi nupune nale e naklele mew noneni se sa ee no ompla
3 E fika,
nu Farisi ka nu Juda namo fa nupune nale e flili e noneni,
nu fa fi none ompla e nu uma fi naklelene mew noneni.
4 E nu painrine maket ka ni kore,
nu no ompla resukru e nu naklelene mew e noneni.
Nu fa nupunene lo mingklari plau oi nu isi nuꞌpune nu flili e noneni,
yukaine nanrona,
nu ee naklelene kap ka mangkam,
dis ka koii e nu fa naine ka none ompla.
5 Nanrona fane nu Farisi ka nu tikse e lo namo ke narine Yesus nanrona,
“E fikami ka nu disaipol yeneni ke fi nupune nale e moneni e memme nu flili e moneni?
Mew nunini kiina nama e God ka nu nonene ommo.”
6 Ka Yesus mi yangkompari nu nanrona,
“Profet Aisaia yire mi alwone pone uma namo.
Pone uma ira wongkwongkeni,
yukaine nanrona wu reꞌre mi nanrona,
‘God yire nanrona,
“Uma namo fa karnosine ki reꞌfa nro,
ka wolpuna nunini nene amon e ki.
7 Nanrona fane fikami ka nu ke nosine ki?
Nu fa nukule nu uma lo e nu uma nro.’”
8 “Pone pupone lo e God ka pone puna nale kero e mana nro.”
9 Ka Yesus yireni nu kore nanrona,
“Pone fa sam namale nale ka pumpe lo e God ka pupunepe rokoi poneni.
10 Moses yire nanrona,
‘Yene ee yangke nale uporoniye yene moknangka ka yumaraloye yene kore ka waiye ru e wuyane.’
Ka ‘fina e yire mi fafaileye wone moknangka,
sa pone ee pufu wu ri.’
11 Ka,
pone fa pirepe nanrona,
‘La e mana wongke yumeki faa yauno wone moknangka,
wu ee yireni wuyane nanrona,
“Ommo namo,
ki e kenru pu fa ee kane pai God.a” ’
12 Nanrona fane e mouli namo ka pai,
mana namo ee fi mewmew wone moknangka.
13 E nale namo pone e pupunepe nale e pone pempe e nu flili e oya,
fa nangkene pone e peinpangkomepe mi e God e pai amon.
Ka pone won fa pangkepe nale plai kore e fa sam yukaineye namo.”
Ommo fa yangke nu uma kiina nama e God
14 Yesus youw umpinuma mingklari fopi e nemnoku nainene namo ni nalen wu ka wu yireli nu nanrona,
“Pone mingklari ee sam pupupe mi e ki koproke namo ka pempe mi nomu namo.
15-16 Ommo fika e naine moilele ka mana yuꞌpu panri monrele e wone nale namo,
ommo namo e fi resukru ee nangke mana e kiina nama e God,
onnele.
Ka,
ommo e nainene mana monrele ka nolo moilele namo,
sa plai sa ee nangke mana e kiina wamo nama e God.b”c
17 Ka e wu yoproleni nu umpinuma pekimo,
wu yupone nu ka paipari mow monre.
Ka e mouli namo,
disaipol woneni narine wu ee yireli nu mi nomu e mi riri namo.
18 Ka wu yireli nu nanrona,
“Pone plau won fi pem mi nomu e ki namo wee?
Ompla fika wongkwongkeni e nene moilele ka yene wo wee yaikowo,
ommo namo e fi resukru ee yangke yene ee kiina nama e God.
19 Ompla namo fa fi paloye wolpuna e mana,
onnele wu fa paloye puna e mana,
ka fa paloye ponai.”
Ka e mi plola namo sa Yesus yopro alele mone nanrona ompla wongkwongkeni mingkla e fa none namo,
God yuru ompla nanrona sa namakire nama e wu.
20 Ka Yesus yireli nu kore nanrona,
“Ommo fika e naine mana ka fa yolo moile namo,
fa yangke mana kiina nama e God.
21 Ommo e nilene wolpuna e mana ka fa nererwane mana ee yangke nale namo yukaine,
nale e pamok,
pekiyuꞌpue ompla,
nufu mana ri,
wola fafaile,
22 nampalone ka,
nale wongkwongkeni fafaile,
nale e fa karnirene,
wewelane ka nongkone,
wolpuna fafaile,
nokone uma plai mi,
nererine none noula,
nale e fa naraine ririyen nro.
23 Nale fafaile wongkwongkeni namo sa fa nainene mana ka fa nolone moile ka nangkene mana kiinaye nama e God.”
Pin e distrik Fonisia e provins Siria fa bilipimye Yesus
(Matyu 15.21-28)
24 Yesus yemei ka pai mokoi wongke nalen e taunwamo nu fa nouwne Tair.
Wu pai plele mow wongke ka wu wola yire nanrona nu uma ee fi namale wu e waiyeye mow namo.
Wu e fi resukru ee peki waiye,
ee onnele.
25 Pin wongke mela pin e wu fa sam wolayaneye namo,
opola fafaile fa konraloye wu.
Ka e wu yupu mi e Yesus waiyeye mow namo,
faflai nro wu pai plele Yesus ka yekri fufula nalen rew e Yesus.
26 Pin namo sa fi uma Juda.
Uma mingklari woneni namo,
sa e fi namale mi e God.
Nu numane wu distrik Fonisia e provins Siria.
Ka wu fa yopro mi e “Grik.”
Wu yopro plau wolayure wamo Yesus ee yuꞌpone opola fafaile fa konraloye mela pin e woneni namo.
27 Ka Yesus mi yangkompari wu nanrona,
“Mone ee mane ommo e none nu kongkom se.
E fi uporo mone ee mupu ommo e nu kongkom ka mingkipanro pala.d”
28 Ka pin namo mi yangkompari wu nanrona,
“Manwamo,
pala fa naine angkromole e tebol plau ka none ommo rola e kongkom nangkle firipanrone tepol angkromole.”
29 Nanrona fane Yesus mi yangkompari mi wunini nanrona,
“Mi e yene yireye namo,
sa uporo wamo.
Nanrona fane naminre yene pai kore mow yeneni.
Opola fafaile fa konraloye mela pin yeneni namo,
yupone wu ka pai pu.”
30 Pin namo,
pai kore mow woneni ka yuru mela pin woneni namo,
sam wile eniralo waiye koii woneni ka opola fafaile sa yupone wu ka pai pu.
Yesus saimoro mana e reꞌfa ka ripi uku
(Matyu 15.29-31)
31 Yesus yemei kore ka yupone koii plola e taun Tair,
ka pai distrik e taun Saidon.
Ka wu as pai mokoi plola e Dekapolis,
ka pai plele mii anru wamo Galili.
32 Uma plai nongkole mana wongke e ripi uku ka fa fi sam yoproye mi ni Yesus.
Ka nu nire plau wolayure wamo Yesus ee mew yauni mana namo se wu ee uporo kore.
33 Ka Yesus yumane mana namo yane painri neri repo,
amon e nu uma plai,
ka mewmempi yina pai riꞌpi pulale plainre e mana namo.
Ka mew yem rofo woneni ka yasi mana namo nongkola.
34 Ka Yesus yinra pari nemi ka anine ka yireni mana namo nanrona,
“Efata.”
Nomu e mi “Efata” namo sa nanrona,
“Ripi ka reꞌfa e yeneni e ikoiyi.”
35 Ka faflai nro,
mana namo ripi yane reꞌfa wunini ikoiyi ka wu resukru sam yopro kei mi.
36 Ka Yesus mi yaure uma mingklari nuru ommo namo ee fi yopro mi uma plai e ompla namo isi wu yangke namo.
Wu yopro mi mingklari wamo ee mi yaure nu ee fi yopro mi e ompla namo.
Ka nu neingknane mi ka uma mingklari nupu.
37 E uma mingklari nupu mi e ompla wu yangke namo,
nu mi onnele.
Ingke se,
nu nire mi nanrona,
“Ommo mingklari wongkwongkeni wu yangke namo,
wu fa sam yangke uporo.
Wu fa saimoroye nu uma e ripi uku ee nupu mi ka nu uma e mi reꞌfa kungku ee nopro mi.”