Nu uma e Nasaret kunrinra nane Yesus
(Matyu 13.53-58; Luk 4.16-30)
6
Yesus yupone mokoi namo ka pai mokoi woneni.
Ka disaipol woneni plau nupune wu.
2 E kaire e Sabat,
wu yangke ompla e yukuleye nu uma monre e mow kori.
Uma mingklari nupu mi wunini,
ka mi namo ke yangke nu wola nipanrini ka nu nirene nanrona,
“Mana namo se yem ira uporo namo mokoi pei?
Ira uporo wamo namo ka kero e nangkene mirakol,
sa e fina yane wu?
3 Wu ro kapenta namo nro wee?
Ka ro Maria auna ka wu inrani oikenra sa Jems,
Josep,
Judas ka Saimon?
Ka pinofe plau kom nakle mone merime.”
Mi e Yesus nro sa ke yangke nu uma wolpuna fafaile wu wamo ka ke yereryale nu nemprewane mi wongkwongkenine wu.
4 Ka Yesus mi yangkompari nu nanrona,
“Nu profet namo,
sa nu uma e mokoi plai fa sam nererwane noula e nunini e mokoi mingklari e nu fa painrine.
Ka,
e moile ka e mow noneni,
sa nu uma oikenra e noneni ka nu uma plai plau fa fi nererine noula e nunini.”
5 Nanrona fane wu e fi resukru e yangke mirakol wongkeye mokoi namo.
Nu uma e nenrinine nro,
sa wu fa mew yauniriye plai nro ka saimoroye nu uporo kore.
6 Wu wolapanrini wamo e wu yuruye nu fi sam bilipimne wu.
Yesus yale ompla nu 12pla disaipol ee nangke
(Matyu 10.5-15; Luk 9.1-6)
Roka Yesus pai raiye mokoi mokoi, ka yukuleye nu umpinuma mi e God.
7 Wu youw nu uma 12pla fa nupune wone,
ka yawale nu painri plainplainre ka yale nu kero fa ee nuꞌpolene opola fafaile.
8 Namo sa mi e Yesus yaliye nu.
Wu yireli nu nanrona,
“Mouli e pone ee paipipe,
pone e fi pem ompla wongke.
Pone kom e pem ilo ee yurpariye pone e raipepe nro.
Pone e fi pungkam ompla e fa none wee ompoi poneni.
Ka pone won e fi pana romaula palo pukre poneni.
Sa nenrape.
9 Pone kom ee resukru pana sandel poneni,
ka pana siot wokera nro ka ee fi pem siot wongke kore.”
10 Ka wu yireli nu nanrona,
“La ee pone paipi plele mokoi wongke ka pone papri mow wongke,
pone ee paipepe mow namo nro pai resukru kaire e pone pire puponepe taun namo.
11 La e pone paipi plele taun wongke ka nu uma fi amila pone wee numpleuwa ka fi nupu mi e poneni sa,
pone e pupone taun namo ka paipi.
E pone pire ee pupone taun namo,
sa pone ee pelefu marupon wee pike fuma e nangkarone rew e poneni palo taun namo.
E ompla namo sa ee yukule nu ka ee nama peperi nanrona nu sa e nangke nale fafaile ka e kunrinra nanene mi e God.”
12 Roka nu disaipol woneni nupone mokoi namo ka painri nopro mi e Manwamo nanrona,
nu umpinuma ee nensona wolpuna ka nupone nale fafaile oi none fa nangkene.
13 Ka nu nuꞌpole opola fafaile e napalene nu uma mingklari,
ka nenrune wel ira riri e nu uma e nenrinine ka nu kuparari kore.
Jon Baptais ri
(Matyu 14.1-12; Luk 3.19-20; 9.7-9)
14 King Herot yupu mi e ompla namo,
e fika,
noula wamo e Yesus e pai mokoi mingklari pu.
Ka uma plai ke nire nanrona,
“Wu sa ro Jon Baptais fane,
wu e ri ka e ro yemei kore pu.
Nanrona fane wu yuna kero fa yangkeye mirakol namo.”
15 Plai e nu uma sa ke nirene nanrona,
“Yesus namo sa Elaija.”
Ka nu plai sa ke nirene nanrona,
“Wu sa profet wongke yukaine e nu profet plai e isi namo.”
16 Mouli e Herot yupu mi namo,
wu yunyangkunruye mi nanrona,
“Ki oi kireli nu naure Jon mongkoma ka ri pu ka naminrele wu yemei kore ka waiye laip!”
17 Herot wone sa e isi yaleye mi kero nu polis neimane Jon ka nuka sen ka nina wu pari waiye kalabus.
Herot e yangke ompla namo e fika,
wu e yemye pin e wone rani Filipni.
18 Jon yopro mingklariye Herot nanrona,
“Lo e moneni e yireye,
yene ee fi yem pin e yene ranini.”
19 Herot puri namo noula wunini sa Herodias,
ke wolpuna neniye Jon,
ka ke yapuye rokoi fa ee yufu Jon ri.
Ka wu ke fi resukru e fika,
Herot e sam yumye ee fi yufu Jon.
20 E fika,
Herot namo e yumye Jon.
Wu namale nanrona Jon wu sa mana e yangkeye nale uporo nama e God ka wu sa holi.
Nanrona fane Herot fa sam yunreye wone.
Ka mouli e Herot fa yupuye mi e Jon,
wolpuna wunini fa poipaiyenruye.
Ka wu fa wola yire fa ee sam yupuye mi e Jon se.
21 Ingke se,
mouli uporo e Herodias yemei fa wu ee yangke ompla wongke nunini sa nu ee nufu Jon ri.
Wu namale nanrona Herot ee yampo ompla wamo fa e wolarufuye mouli e moka yemye wone.
Herot yampo ompla wamo namoni nu irauma fopi e fa mewmewne wone ka nangkene ompla e gapman,
ka nu ofisa e ami,
ka nu irauma e distrik Galili.
22 Ka mela pin e Herodias sa yeri monre ka yokuleye koii e Herot yakle nu irauma e naine none namo.
Ka e nu nuru wu,
nu sam ainem wu.
Ka king Herot yire pin mangkrama nanrona,
“Ompla fika e yene wolaye,
sa yireni ki nro sa ki ee kaneni yene.”
23 Herot yukami wu nanrona,
“Ompla fika ee yene yari,
sa ki ee kane yene.
La e yene wola yire ki ee kauri kingdom plola kinini,
se ki ee kane yene.”
24 Ka pin namo palo moile ka yarine wone moka nanrona,
“Ki ee karine king ompla fika wee?”
Ka moka mi yangkompari wu ka yireni nanrona,
“Yene ee yireni king nanrona yene wolaye ira e Jon Baptais.”
25 Ka e mouli namo,
pin mangkrama namo faflai nro pari king ka yireni wu nanrona,
“Naminrele ki wola kire yene ee yaure ira e Jon Baptais ka yanpalo plet wongke ka yake ki.”
26 E pin mangkrama namo yire mi namo,
king Herot yupu ka wolpuna wunini fafaile wamo.
Ka wu wolarufu kore mi mirale e isi wone yukaye pin mangkrama namo,
ka wu won wolarufuye nu uma e wone yakle naine nonene ompla wamo namo e nu isi nupu mi e wu yukaye namo pu e wu yireniye pin mangkrama namo.
Nanrona fane Herot fi yensona mi e pin mangkrama namo.
Wu yangke ompla yukaine e isi wone yireye.
27 Ka faflai nro wu yane mi kero soldia wongke,
mana fa yaurereye nu uma mongkoma,
ee pai mow kalabus ka yaure mongkoma e Jon Baptais ka yuna ira wunini wi nu.
Nanrona fane soldia namo pai mow kalabus ka yaure mongkoma e Jon.
28 Ka wu yina ira e Jon Baptais waiye plet wongke riri ka yem yuna wi ka yane pin mangkrama namo.
Ka pin mangkrama namo yane wone moka.
29 Ka nu disaipol e Jon nupu mi namo ka ni nem nale e wu nuna painri niꞌna roma pulale koii e nu uma fa nirine nu uma e rili.
Yesus yane ompla e none nu uma 5,000pla
(Matyu 14.13-21; Luk 9.10-17; Jon 6.5-13)
30 Nu aposel e Yesus namo,
ni ka nane Yesus nemnoku ka noproni wu ommo mingklari e isi nu nangkene,
ka skul plau isi nu nukulene nu umpinuma.
Jesus feeds 5000 (Mak 6:30-44)
31 Ka umpinuma mingklari ke painri niine fane Yesus yakle nu aposel sa raraine fi no ommo.
Nanrona fane Yesus yireni nu nanrona,
“Sa,
mone nro maimpi koii wongke uma fi nainene ka pone as pai nalaplai se.”
32 Ka nu nulpari bot ka nu nempuyere painri koii e uma fi nainene.
Nu nro painri.
33 Ka uma mingklari nuru nu ka namale koii namo nu ee painri.
Nanrona fane nu umpinuma e taun mingklari namo riri nempuyere painri plele mokoi namo e Yesus yakle nu aposel woneni nire painrine.
34 E Yesus pai yulpari pike riri,
wu yuru umpinuma mingklari wamo nemnoku nainene.
Nu sa yukaile sipsip uma fa nopaline sa onnele.
Nanrona fane wu wolayure nu wamo ka wu yopro yukuleye nu ommo mingklari wongkwongkeni.
35 Ka e kaire yire pai sam fiken palo namo nu disaipol e Yesus ni wu ka nireni wu nanrona,
“Mokoi namo uma onnele ka ompla fa nonene plau onnele.
Ka kaire paipalo kei ka yire nama ningkiyolo namo.
36 Yene ee as yawale nu umpinuma nam painri se.
Nu e nunari romaula e noneni ee painri mokoi wee nengkrele e nu uma e nenene nalen kom ka nuꞌpu ommo noneni fa ee no.”
37 Ka Yesus yireli nu nanrona,
“Pone nro pale nu ompla.”
Ka nu mi nangkompari wu nanrona,
“Yene ro yire mu ee maimpi ka muꞌpu ommo pari resukru 20pla fotnait ka male nu no wee?”
38 Ka wu yireli nu nanrona,
“Pone paipi ka poinsaro bret ploli rongkele sa naine.”
Ka nu painri nuru pekimo ka nireni wu nanrona,
“Mu e muna 5pla bret ka firala plainre.”
39 Ka Yesus yireni nu nanrona,
“Nu umpinuma e nemnoku nainene namo pone ee penru nu painri naine grup,
ka pirengkle nu ee naine kiprela uporo namo.”
40 Ka nu umpinuma namo painri ka naine grup.
Plai nemnoku naine 100pla ka plai sa nemnoku naine 50pla.
41 Ka Yesus yem 5pla bret namo ka yinra pari heven ka tenkyu God ka yekri bret,
ka yaleye nu disaipol woneni nepinalene nu umpinuma.
Ka firala plainrane namo plau,
wu yekri ka yaleye nu nepine nu umpinuma awaili.
42 Ka umpinuma mingklari namo none ommo pai ka nu rengki wamole.
43 Ka nu disaipol nuꞌpari bret ka firala ploli e nu umapinkongkom no ka puna reingkini ka nuplen nailene namo palo 12pla nekela yimerwa kei.
44 Nu uma e naine none ompla namo namba e nu sa 5,000pla uma.b
Yesus pai nupi riri
(Matyu 14.22-32; Jon 6.15-21)
45 E mouli namo,
Yesus yireli nu disaipol woneni nulpanri bot ka painri riri wu e repo e mii anru Galili ka painri norine wu e taun Betsaida.
Ka wone sa waiye se fa ee yawale nu umpinuma namo e painri peplelene se.
46 Ka e wu miyaleye nu umpinuma awaili namo painri pekimo roka,
wu wonkera pari moulaurola wongke fa ee yesapu.
47 Ka e mouli kureliye,
bot namo sa yeye mii anru iplile ka Yesus wonkera sa yeriye koii e fa ninerine.
48 Ka Yesus yuru nanrona rapu sa pukul paiye wolale e nu ka yineye furu yeinangkru bot fi puye.
Namo sa yangke nu nuka rinra wamo pulne pai won mouli kongkonkala yakrere kei.
Ka Yesus yupone koii e wone waiyeye namo ka raiye pai mii riri fa ee pai plele nu.
E wu pai nalen yepusol wu ee yupole nu.
49 Ka nu nuru wu paiye mii riri namo ka nu wolpanrini wu sanro opola wongke,
ka nu nangke mi wamo.
50 E fika nu nuru Yesus ka nu sam num wu wamo.
Ka faflai nro Yesus yireli nu nanrona,
“Pone ee sam paipe kero!
Ki fane ka pone fa pumpe.”
51 Wu pai yulpari bot plau nu ka rapu yiwri kei.
Nu nuru namo ka nu wolpanrini wamo.
52 E fika nu fi namale nomu e ompla namo Yesus isi yangke e wu yekri bret ka nu nepinalene nu umpinuma.
Ira nunini ke sam rerile.c
Yesus saimoro uma awaili e nenrinine e nainene taun Genesaret
(Matyu 14.34-36)
53 Nu naure mii anru Galili ka ni neꞌri repo se,
roka nu painri kore ka painri plele pike plola e Genesaret.
Ka nufena bot e noneni yapaye koii namo.
54 Ka e nu nupone bot ka nulpanri pike riri namo,
faflai nro nu uma namale Yesus.
55 Uma mingklari puye pepel painri mokoi pipi ka nina uma e nenrinine nile iloaki ka nongkolwa ni.
E nu nupu mi nanrona Yesus wileye koii pei,
sa nu nongkolwane uma e nenrinine namo painrine wu.
56 Mokoi pei e Yesus yire ee pai e taun wee mowmow plau nu uma fa nongkolwane nu uma e nenrinine painri ka nenrune nu nainene koii e maketne.
Nu fa wolanurene Yesus ee nu mew nro noku piyewa e ampapri wunini.
Ka nu uma e mew nauni ampapri wunini namo,
nenri nunini e pekimo ka nu uporo kore.