Yesus yuꞌpone opola fafaile e konraloye mana wongke
(Matyu 8.28-34; Luk 8.26-39)
5
Yesus yakle nu disaipol woneni painri panri mii anru wamo Galili repo pike plola e nu Gerasa.
Jesus Casts Out Demons (Mak 5:1-20)
2-3 E Yesus yupone bot ka yulpari yeri pike riri,
faflai nro mana wongke e opola fafaile konralo wu wi plele Yesus.
Mana namo fa waiye roma pulale e nu fa nirine uma e rili.
Ka wu kero wamo fane sen ka uma plau fa fi neimane wu.
4 Ningki kaire uma fa nem sen ka nukarone merewama wunini.
Ka wu fa yekriyampreye sen namo.
Mana wongke fi kero resukru e yeima wu.
5 Ningki ka kaire,
wu fa wilewaileye roma pulale e uma fa nirine uma ka moul aurola ka e wu fa yangke mi ka wiriye plau sa wu fa yemye roma ka yaureyekriye wone papri.
6 Koii e wu waiyeye namo sa as amon.
Ka e wu yinra wi yuru Yesus wiye,
wu puye wi firpoi fufula yokle wolale e rewyen e Yesus.
7 Ka yangke mi kero wamo ka yireni Yesus nanrona,
“Yesus,
Auna e God Waiye Riri Wone.
Yene yire fa ee yefele ki?
Ki kire mi kero yene noula e God yene faa yangke fafaile ki!”
8 Wu yangke mi nanrona e fika,
isi Yesus yireni wu nanrona,
“Yene opola fafaile.
Yimane mana namo.”
9 Ka Yesus yarine opola fafaile namo nanrona,
“Yene noula fina?”
Ka opola fafaile namo mi yangkompari wu nanrona,
“Noula kinini Ami.
E fika,
mu mingklari wamo.”
10 Ka opola fafaile namo yire plau wolayure Yesus ee fi yuꞌpole nu e painri nupone pike plola namo.
11 Mouli aurola wongke yeri nalen mokoi namo.
Ka pori mingkla neri ka none ommo repo e mouli aurola namo.
12 Ka nu opola fafaile namo nire plau wolanure kero Yesus ka nireni wu nanrona,
“Yene ee yawale mu minarponri pori.”
13 Ka Yesus yawale nu painri.
Ka opola fafaile nupone mana namo ka painri ninarponri pori.
Ka pori faflai nempuyere painri panro koii wongke fafaile.
Ka nu firipanro repo e mouli aurola ka firipanro mii anru rira,
ka nu naikolno mii ka rili.
Namba e pori mingklari namo sa resukru 2,000.
14 Ka e nu uma e fa naunolene pori nurune ommo namo nemeine,
nu nempuyere painri ka nopro mi e ommo namo pai taun ka mokoi mingklari e koii namo.
Ka umpinuma mingklari ni plele koii namo ee nuru ompla namo.
15 E nu ni plele mokoi e Yesus waiyeye,
nu nuru mana namo,
isi opola fafaile mingklari namo fa konraloye wu.
Naminrele ira wunini uporo pu ka yiperi ampapri ka waiyeye.
Ka e nu umpinuma nuru ompla namo ka nu numeki.
16 Nu uma fopi e nurune ompla e Yesus yangkeye namo nu noprongkleni nu umpinuma plai e ommo mingklari e Yesus isi saimoroye mana namo e opola fafaile e konraloye wu.
Ka nu noprongkle nu e ompla fika e nemeine pori.
17 E uma mingklari namo nupu mi namo,
nu nire mi kero ee nawane Yesus ee yupone pike nunini ka pai mokoi wongke.
18 Nanrona fane Yesus pai yulpari bot,
ka mana e opola fafaile konraloye wu namo,
ke wolayure Yesus ka yireni wu nanrona,
“Ai,
yene yire se ki ee kane yene e maimpi plau?”
19 Ka Yesus mi yaure wu ka yireni wu nanrona,
“Yene ee pai mow yeneni ka ori oikenra e yeneni ka yireli nu ommo mingklari e Manwamo e wolpaloye yene wamo ka mewmewye yene.”
20 Roka,
mana namo pai ka raiye yoproye mi e ommo mingklari e Yesus saimoroye wone.
Wu raiye yopro mi namo mokoi mingklari e distrik Dekapolis.a
Ka umpinuma fopi e nupune mi wunini namo wola panrini wamo.
Mela pin e Jairus ka pin e mew yokuye ampapri e Yesus
(Matyu 9.18-26; Luk 8.40-56)
21 Ka Yesus yulpari kore bot ka nu piri painri kore repo e mii anru wamo Galili.
Ka e kaire namo,
umpinuma mingklari wamo ni ka nemnoku mamane wu.
22 Ka iramana wongke e mow kori namo noula wunini sa Jairus wi plele nu koii namo.
Wu yuru Yesus ka wu wi angkrenpalo ka yekri fufula nalen rew e Yesus.
23 Ka wolayure wamoye Yesus ka yireni wu nanrona,
“Mela pin kinini e yire ee ri.
Ki wolakure ke yene ee wi mew yauni wu se wu ee uporo kore ka waiye laip.”
24 Nanrona fane,
Yesus yane wu painri.
Umpinuma mingklari plau nakle nu painri.
Ka e mouli namo nu mingklari wamo ka nu nemnoku ka nemnangkaro raine reprepo e wu ka painrine.
25 Ka e mouli namo,
pin wongke e fa yurukari woneni yenyapaye namo plau e waiye.
Ka yenri e yeye wu namo resukru 12pla kikla.
26 Isi kikla mingklari wu fa pai yuruye nu dokta mingklari wongkwongkeni saimoro wu ka nanene wu rere mingklari.
Ka wu plau won yaleye nu romaula wamfafai ka romaula wunini namo won sam pekimo kei.
Ka yenri ke fi yupone wu sa wu ee uporo,
onnele.
Yenri namo sa nayeye wu ka yangke wu pai sam fafaile wamo.
27 Roka e wu yupu mi nanrona Yesus e wi ka raiye saimoroye nu uma e nenrinine,
wu wi ka yauri sam pai iplile e nu umpinuma ka raiye nalen kunrinrale e Yesus.
Ka e wu raiyeye namo,
wu raiye riri e kunrinrale e Yesus ka mew yokuye ampapri e Yesus.
28 E fika wu e wola rufuye wone kore pu nanrona,
“Ki e mew koku ampapri e wu nro,
sa ki ee uporo.”
29 E wu mew yokuye ampapri e Yesus,
e mouli namo nro,
wu yuru nanrona ori e fa yeyeye nale e wunini namo pekimo ka wu kuparari kei.
30 E mouli namo nro,
Yesus plau nalefifri nanrona kero rola e wu e yolo ka pai pari mana wee pin wongke.
Nanrona fane wu yensona ka yarile nu nanrona,
“Fina se mew yokuye ki ampapri?”
31 Ka nu disaipol woneni nireni wu kore nanrona,
“Yene yuru umpinuma seke pisir aula e ni nemnangkaro yene.
E fikami ka yene ke yarileye mu nanrona,
‘Fina e mew yokuye ki?’ ”
32 Ka Yesus poipai yapuye pin fina e mew yokuye ampapri e woneni.
33 Ka pin namo e namale nanrona wu e mew yokuye ampapri e Yesus ka yenri wunini namo e yupone wu.
Fane wu yum ka fouwro plau ka wi firpoi wile rewlele e Yesus ka yopro mi alele ompla e wone yangkeye.
34 Ka Yesus yireni wu nanrona,
“Mela pin,
yene pai plau wolaraulo.
Bilip yeneni nro e saimoro yene pu fane yenri namo ee fi wi kore.”
35 E Yesus naye yoproye mi,
uma plai nuna mi wongke ni mow e Jairus.
Ka nireni Jairus nanrona,
“Mela pin yeneni e ri pu.
Nanrona fane yene faa yaneye eni tikse.”
36 Yesus yupu mi e nu ka yireni Jairus nanrona,
“Yene faa yumye.
Yene bilip nro.”
37 Yesus mi yaurereye nu uma plai ee fi nupune wu.
Wu kom yumaneye Pita,
Jems yane wone inu Jon nane wu painri monre.
38 Nu ni nalen e mow e Jairus ka Yesus yuru nu umpinuma namo nemniri poipanrene ka wu yupu nu niri ka nangke mi ukurere wamole.
39 Ka wu paipari mow monre ka yireli nu nanrona,
“Pone faa pempiri rikaklape?
Mela se ke ri,
wu an wileye nama fane.”
40 Ka nu umpinuma namo nupo wu wamo.
Nanrona fane wu yireli nu panro moile ka wu yumane moknangka e pin aula namo ka Pita yane Jems ka Jon panri monre koii e mela pin aula ri ka nina waiyeye namo.
41 Wu yeima mew e mela pin aula namo ka yireni wu mi e nu Juda nanrona,
“Talita kum.”
Nomu e mi namo sa nanrona,
“Pin aula,
ki kire yene yemei.”
42 Ka faflai nro mela pin aula namo yemei ka raiye.
(Mela pin aula namo,
kikla wunini sa 12pla nro.)
Ka e nu nuru ompla namo,
nu wola panrini ka nemplamunu kei.
43 Ka Yesus yireli nu mi kero nanrona,
“Pone ee fi pireni mana wongke mi e ompla e yemeiye naminrele.”
Roka wu yireli nu nane ompla fa none plai pai pin aula namo wo.