Yesus yemei kore
(Matyu 28.1-8; Luk 24.1-12; Jon 20.1-10)
16
E kaire e Sabat pekimo,
Maria e Makdala yane Salome ka Maria moka e Jems namo painri nuꞌpu sanda ka ommo plai e worim uporo namo e painri ka nasi nale e Yesus.
2 Moulpeperi Sande ningkinama nole kaire fi sam yeri kero namo,
nu painri koii e Yesus wileye namo.
3 Ka nu nemnarile none kore nanrona,
“Fina se mewmew mu ka yiꞌne roma e yeinangkruye prerama e pike pulale namo,
fa mu e moimampri monrele?”
4 Ka e nu ninra poipari riri e pulale namo,
nu nuru nanrona uma plai e isi niꞌne roma wamo namo e nu nakrau yeri yeinangkruye reꞌfa e pulale namo.
5 Ka e nu panri pulale namo,
nu nuru mana efapu wongke rana ompla papri wouw angkren ka waiye mew menrulpo repo e koii e nu isi nina Yesus wileye namo.
Ka e nu umpinuma namo nuru wu,
nu numeki ka nale nunini ke fouwro wamo.
6 Ka mana namo yireli nu nanrona,
“Pone faa pumekipe.
Ki namale nanrona pone wona papupe mana namo nu isi nona wu yapa kruse noula wunini Yesus e taun Nasaret namo.
Pone puru,
nu isi nina wu wile naminrele.
Ka wu yemei kore pu!
Wu fi waiye naminre.
7 Pone paipi ka pireni Pita yakle nu disaipol plai nanrona,
‘Yesus e pai riri pone ka yori pone distrik Galili.
Pone ee puru wu mokoi namo,
yukaine isi wu yireli pone.’ ”
8 Nanrona fane nu umpinuma namo nempuyere nolo pike pulale pulale namo plau mireꞌfa kungku.
Nu fi nauri mi e ompla namo pai mana wee pin wongke e fika,
nu nemnumne wamo ka fouwrorine plau.
[Piprola oya plai e Baibel namo,
sa fi nunane mi e ves 9 pai plele ves 20.
Fane nu saveman plai wola nanrona,
Mak wone sa e fi reꞌrero mi e nilene ves 9 pai pleleye ves 20 namo.
Pai se sa mana wongke e uma plai ke reꞌrero mi namo yemei ves 9 ka pai pleleye ves 20.]
Maria e taun Makdala yuru Yesusa
(Matyu 28.9-10; Jon 20.11-18)
9 Yesus yemei Sande ningkinama nole.
Ka pai yemei alelyenye Maria e taun Makdala ka pin sa pin e riri yuruye Yesus.
Ka wu sa pin oi 7pla opola fafaile nisnorirene wu ka Yesus yuꞌpoleye nu.
10 E nu uma isi naine ka nane Yesus naraine namo ke naine wolnaure ka nirine wu,
Maria wi plele nu ka yireli nu nanrona Yesus sa yemei kore pu ka wu wi plele ki ka ki kuru wu nama ki koneni.
11 Ka nu nangkrumo mi wunini e Yesus yemei kore namo ka wu yuru wu nama wu woneni.
Yesus yemei mana plainrane painrine rokoi
(Luk 24.13-35)
12 Ka e Maria yopro mi namo pekimo,
rongka mana plainrane nupone mokoi namo ka nupune rokoi nire painri mokoi wongke.
Ka e wuyane painrine rokoi,
Yesus yempleyensoro ungklama woneni wongkeni ka wi wane wuyane rokoi.
13 Nanrona fane wuyane plau painri ka nirengkle nu uma wonyaneni.
Ka nu plau ke wola nanrona wuyane plau karnire nu.
Yesus yali ommo nu 11pla disaipol woneni
(Matyu 28.16-20; Luk 24.36-49; Jon 20.19-23)
14 Ka,
wu fa yemei kore nu 11pla disaipol woneni e nu naine nonene.
Wu miyuforo nu e wewelane ka wolpuna e nu sam yemprewa ka fi bilipim mi e nu uma isi nuru wu yemei kore namo ka e nu noprongkle nu namo.
15 Pai se sa wu yireli nu nanrona,
“Pone e paipi mokoi mokoi e pike nam ka popro mi alele Miuporo fa uma mingklari e nupu.
16 Mana e bilip ka yem baptais,
sa God e yem kore wu ka wu e yane God ee naine nekei nekei.
La e mana fi bilip,
sa God e miyona wu ka ee ingke yane nale fafaile wamo wu.
17 Nu uma e bilipne namo ee nem kero fa nangke mirakol plau ka nu e nuꞌpole nu opola fafaile e noula kinini.
Ka nu e nopro moile mi nu uma plaingkle e nu fi isi namale.
18 Le nu nunari poisin umule mew noneni,
uka e umule namo e fi yangke nu ee rili.
Le nu naikono poisin namo,
poisin namo e fi yangke nu rili.
E nu mew nauniri nu uma e nenriline namo,
nu e nemei uporo kore.”
God yem Yesus pari heven
(Luk 24.50-53; Aposel 1.9-11)