Yesus saimoro mana e mew rili
(Matyu 12.9-14; Luk 6.6-11)
3
Kaire wongke kore Yesus pai pari mow kori ka wu yuru mana wongke mew wunini sam ri.
2 Uma plai e nainene koii namo nama sam nurune Yesus fa wu ee saimoro mana e mew riye namo e kaire e sabat,
sa nu ee minona wu.
3 Yesus yireni mana mew wunini e ri namo nanrona,
“Yene yemei wi yeri ungklamayen e nu umpinuma mingklari kom.”
4 Ka wu yarile nu nanrona,
“Lo e moneni yire fika mone kaire e Sabat?
Ee mone mangke nale uporo nu uma wee mismori nu?
Ee mone saimoro laip nunini wee mufro nu rili?”
Ka nu fi nire kore mi wongke wu.
5 Yesus yemei yeri ka nama yonsaro yuruno nu ka wu wolpuna neni wamo nu.
Wu wolpuna neniye nu uma e fa fi wolpalone nu uma plai.
Ka wu yireni mana e mew riye namo nanrona,
“Yukaryale yene mew.”
Wu yukaryale mew wunini ka mew wunini uporo kore.
6 Nanrona fane nu Farisi nupone mow kori namo ka panro moilele ka faflai nro painri numale nu uma e Herot.
Ka nakle nemnoku napu rokoi fa ee nufu Yesus ri.
Umpinuma mingklari nemnoku naine nupi piyewa
(Matyu 12.15-16; Luk 6.17-19)
7 Yesus yakle nu disaipol woneni nupone mokoi namo ka nu painri mii anru Galili.
Ka umpinuma mingklari plau nupune wu.
Umpinuma mingklari namo e ni provins Galili,
ka distrik Judia,
8 ka e taunwamo Jerusalem,
ka e Idumea,
ka e pike yeye repo e nupi Jodan,
ka e ni mokoi pipi e nainene nalen taun wamo plainrane nu fa nouwne Tair ka Saidon.
Umpinuma mingklari namo ni Yesus,
e fika nu nupu mi e ommo mingklari e Yesus yangkleriye.
9 Isi wu saimoro umpinuma mingklari e nenrinine.
Nanrona fane nu umpinuma e nenrine namo nengkari ninelpaiye nu umpinuma mingklari namo fa nu plau ee painri mew noku Yesus se nu ee uporo.
10 Nanrona fane wu yireli nu disaipol woneni nanrona,
pone pem bot wongke wi yapa nalenye nro,
e fika umpinuma mingklari ee nemwaingkemuru ki ka ee nine ki,
fane ki ee kulkari bot.
11 Nu uma e nu opola fafaile konraloye namo nuru Yesus,
nu fa firipanro wu rewyen ka nangke mi kero ka nire nanrona,
“Yene Auna e God!”
12 Yesus yale mi kero nu opola fafaile namo ee fi nolmane wu sa fina.
Yesus yuꞌpu 12pla aposel
(Matyu 10.1-4; Luk 6.12-16; Aposel 1.13)
13 Ka ingke se sa Yesus pai pari moul aurola pitiri wongke ka youw nu uma e wone yaure nupunene wone,
ni wu.
14 Ka wu yaure uma 12pla nro,
ka youw nu “aposel.”
Wu yaure nu fa ee nane wone ee naine fa ee yawale nu ee painri nopro mi e God,
15 ka wu yale nu noula ka kero fa nuꞌpolene opola fafaile e nene nu umpinuma namo ee nupole nu.
16 Wu yuꞌpu nu 12pla uma namo.
Saimon (Yesus yane wu noula wongke sa Pita),
17 ka wu yem Jems,
Sebedi auna,
yane inu wunini Jon,
Yesus yane noula “Boanerges” wuyane.
Noula wuyaneni namo nomu e wunini sa nanrona Uma e Nemi yariye.
18 Ka wu yem Andru,
ka Filip,
ka Bartolomyu,
ka Matyu,
ka Tomas,
ka Jems Alfius auna,
ka Tadius,
ka Saimon,
sa wongke e nu uma Selot,
19 ka Judas Iskariot,
mana fina ee yina Yesus pai mew e nu iim uma ka nangke fafaile wu.
Yesus ka Belsebul
(Matyu 12.24-32; Luk 11.14-23; 12.10)
20 Ka Yesus pai mow wongke,
ka uma mingklari wamo ke ni ka nemnoku kore.
Nanrona fane Yesus yakle nu disaipol woneni fi resukru e no ompla.
21 Moka ka ori oikenra woneni nem mi e nu uma plai noprone nanrona,
wu e kungkumple pu.
Nanrona fane nu ni fa ee numane wu nane painri nupole nu umpinuma mingklari namo.
22 Plai e nu tikse e lo e taunwamo Jerusalem ni ka nu nire nanrona,
“Belsebul fa konraloye wu.
Belsebul namo wu koꞌne e nu opola fafaile,
ka wu fa yane kero Yesus ka wu fa yuꞌpoleye nu opola fafaile.”
23 Ka e Yesus fa youw nu nine wu,
wu fa yaleye nu mi riri wongkwongkeni,
ka mouli namo wu fa yemyoku kore nu,
ka yale nu mi riri plai nanrona,
“Satan ee resukru ee yuꞌpone wone kore wee onnele?
E sam onnele!
24 Ka le king wongke yakle nu uma woneni e nemnopune none kore,
kingdom namo ee fi yeri kero.
25 Ka le nu uma e nainene mow wokera ka nainene nemnopune none kore,
nu e fi sam nemnokul naine plau,
nu umpinuma ee yopri kenkenra ka painri mimpri naile none keila.
26 Nanrona fane la e Satan yakle nu opola fafaile nopu none kore,
kingdom e Satan ee fi yeri kero.
Wu ee firpalo ka kero wunini ee pekimo kei.
27 “Mana wongkea ee fi yekri mow e mana wongke e kero ka pari yuꞌpu ommo wunini.
Onnele.
Wu ee yukaro mew rew e mana kero namo se,
sa wu ee yekri mow ka pari monre ka pekiyuꞌpu ommo wunini.
28 “Ki kire mi alwone pone,
God ee yuꞌpole nale fafaile mingklari ka mi fafaile e nu umpinuma fa nangkene.
29 Ka le mana wongke yire kongkoye Holi Spirit,
God ee fi resukru ee yuꞌpone nale fafaile namo.
Eni namo ee yeye kei plau wu.”
30 Yesus yopro mi namo e fika nu isi ounire Holi Spirit waiye Yesus nanrona wu sa opola fafaile wongke fa yaneye kero wu.
Moka ka nu inompi e Yesus
(Matyu 12.46-50; Luk 8.19-21)
31 Ka e mouli namo Yesus moka yakle Yesus inompi ni plele mow ka nerine moilele.
Nu nireni mana wongke pari monre ka yireni Yesus.
32 Uma mingklari e naine mamanene Yesus namo,
nireni Yesus nanrona,
“Yesus,
yene ama yakle yene inompi ka pinofe naye neri moilele nire ee nuru yene.”
33 Ka Yesus yarile nu nanrona,
“Fina sa ki ama ka ki inompi?”
34 Wu yuru yonsaro nu uma e naine mamane wone namo ka yireli nu nanrona,
“Puru,
ki ama ka ki inompi sa uma kom ki kakle maimeme.
35 Nu fopi e nupunene wolpuna e God,
e naine yukaine inompi,
pinofe ka ama kinini.”