Yesus saimoro mana e mew ka rew rili yemei uporo kore
(Matyu 9.1-8; Luk 5.17-26)
2
Kaire plai pai pekimo se,
sa Yesus wi kore taun Kaperneam.
Ka faflai nro nu umpinuma nupu mi nanrona wu e wi kore ka waiye mow.
2 Umpinuma awaili ni nemnoku naine mow monre namo ka mow namo yimeri wamo nu umpinuma.
Ka mow monre namo wi plele prerama namo yimeri wamo.
Ka Yesus won naye yoproye mi e God paiye nu.
3 Ka 4pla uma nongkole mana wongke e rew rili ni.
4 Umpinuma mingklari yimeri waingkemuru kei,
fane koii rola wongke fi yeye fa nu ee nongkole wu pai plele Yesus.
Nanrona fane nu nongkole wu panri mow riplala riri ka kaki pulale riri e mow namo.
Ka nu kapa nungkru ilokori e mana wileye namo ka iprinane wu palo Yesus ungklamayen.
5 Ka Yesus yuru nanrona nu sam bilip wamo fane wu yireni mana e rew rili namo nanrona,
“Auna,
ki kuꞌpole pu nale fafaile yeneni.”
6 Ka plai e nu tikse e lo nakle nu naine namo,
ke nupu mi namo ka naine wolrufune wolpuna noneni nanrona,
7 “E fikami ka mana namo ke yopro mi nanrona?
Anro wu yire ee yem koii e God ka ouwyireye wu.
Mana wongke ee fi yuꞌpole nale fafaile e nu uma fa nangkene!
Sa onnele,
God wokera nro sa fa yangkleriye ommo namo.”
8 Faflai nro Yesus namale ompla fika e yeye wolpuna e nu uma namo ka wu yarile nu nanrona,
“E fikami ka pone ke pem wolpuna nanrona?
9 Mi uporo rongkele sa ki ee kireni mana namo?
‘Ki kuꞌpole nale fafaile yeneni,’
wee ki ee kireni,
‘Yene yemei ka yongkole ilokori yeneni ka waraiye’?
10 Ka ki sa wola kire pone ee namale nanrona Auna E Mana sa yuna noula ka kero ee waiye pike nam ka wu ee yuꞌpole nale fafaile e nu umpinuma.”
Ka wu yireni mana rew rili namo nanrona,
11 “Ki kireni yene,
yemei ka yongkole ilokori yeneni ka pai mow yeneni.”
12 Uma mingklari nuru wu yeri ka faflai yina mew palo ka yem ilokori woneni ka palo moile.
Ka umpinuma mingklari wola panrini wamo ka nereri noula e God ka nire nanrona,
“Isi mu fi muru ompla wongke nanrona.
Sam onnele!”
Yesus youw Livai
(Matyu 9.9-13; Luk 5.27-32)
13 Ka Yesus pai kore piyewa e mii anru Galili.
Ka uma mingklari wamo ni wu ka wu won naye yopro yukuleye nu mi e God.
14 Ka e wu waraiye paiye,
wu yuru Liwai,
Alfius auna,
fa waiye mow takis.a
Ka Yesus yireni wu nanrona,
“Yene wi yupune ki.”
Ka Liwai yemei yupune wu.
15 Pai se,
sa Yesus yakle nu disaipol wonenib painri no ompla mow e Livai.
Ka mouli namo plau,
nu uma mingklari fa nuꞌpune romaula e nu umpinuma ka nu uma e fa nangkene nale fafaile namo,
plau e nakle nu naine none ommo namo.
E fika,
uma mingklari nananrona fa nuꞌpunene Yesus.
16 Ka nu tikse plai e lo sa uma Farisi,
nuru Yesus ke yakle nu uma fa nem romaula ka nu uma fa nangkene nale fafaile namo none ommo ka nu narile nu disaipol wunini nanrona,
Fikami ka wu ke yakle nu uma fa nuꞌpune romaula ka nu uma fa nangkene nale fafaile namo none ommo?
17 E Yesus yupu mi nunini namo,
wu yireli nu nanrona,
“Nu uma e fi nenriline namo,
fa fi painri nurune dokta.
Ka nu uma fa nenriline nro sa fa painri nurune dokta.
Pone ee namale nanrona,
ki fi kii ee kouw nu uma uporo e fa nupune nale uporo.
Sa onnele.
Ki kii fa ee kumale nu uma e nangkene nale fafaile.”
Yesus yire nale fa neinangkrune ommo e fa none
(Matyu 9.14-17; Luk 5.33-39)
18 E kaire wongke,
nu disaipol e Jon ka nu Farisi plau neinangkru ommo fa none.
Ka uma plai ni plele Yesus ka narine wu nanrona,
“E fika ka nu disaipol e Jon nakle nu disaipol e nu Farisi neinangkru ompla e fa none,
ka nu disaipol yeneni namo,
ke fi neinangkru ompla?”
19 Ka Yesus yopro mi riri wongke nu nanrona,
“Mouli e nu nangke kola wamo e mana ee yem pin,
nu uma woneni ee neinangkru ompla fa none wee onnele?
E sam onnele!
Ka e mana namo naye yakle nu naine,
se nu ee fi neinangkru ompla fa none.
20 Ka e kaire ee wi se nu uma plai ee numane mana namo ee yupole nu uma woneni ka ee pai.
Se sa e mouli namo sol nu ee neinangkru kei ompla e fa none.
21 “Mana fi fa yemye ampapri plola keklepe wongke ka yakru plauye ampapri plola oya e peperiye namo.
E onnele!
Le wu yangke nanrona,
se ampapri plola keklepe namo ee yeingkeye oya,
ka ee yangke ampapri oya namo ee peperi.
22 Mana ee fi yairiri wain keklepe palo meme papri oya.
E onnele!
Le wu yangke nanrona,
se wain keklepe ee yopuple,
se meme papri oya ee moimoro.
Ka wain namo ee yuu wain papri ee fafaile.
Nanrona fane,
mana ee yairiri wain keklepe palo meme papri keklepe.”
Mi e kaire Sabat
(Matyu 12.1-8; Luk 6.1-5)
23 E Sabat wongke,
Yesus yakle nu disaipol woneni naraine iplile e wit nengkre.
Ka nu disaipol woneni nangkru wit nale ka nenele papri fa nu ee no.
24 Ka nu Farisi nireni Yesus nanrona,
“Yene yuru,
lo e mu sa yire nanrona nu uma ee fi nangke ommo kaire e Sabat.
E fikami ka nu disaipol yeneni ke nangke nanrona?”
25 Ka wu yireli nu nanrona,
“Pone oi ro fi ritim mi e Devit wee?
E wu ompla e none sa onnele fane nu uma e fa nupunene wu namo nu won plau ponrili.
26 E mouli namo Abiatar waiye hetpris e tempol.
Devit pari monre mow e God,
ka wo bret e nu nangke ofa pai God ka nenru nainene.
Bret namo nu pris nro se no,
ka uma nale siwole sa onnele.
Ka Devit wo kei,
ka nu uma woneni plau wu yepi plai yale nu.”