Miuporo
E Mak
Reꞌre
Jon Baptais yoproye mi Miuporo
(Matyu 3.1-11; Luk 3.2-16; Jon 1.19-28)
1
Nam sa mirale e miuporo e Yesus Krais Auna e God.
2 Mouli angkren oi paiyile pu,
Profet Aisaia oi reꞌreye mi naminre yireye rokoi fikayen se mi e Yesus Krais e yemei.
Wu oi reꞌreye mi e God nanrona,
“Yene yupu!
Ki ee kawane mana wongke e yuna mi e ki ee pai riri ka ee yinayane rokoi yeneni.
3 Mi mongkoma e mana namo ee kaiwal wi koii e marupon siwole nro ee yireye nanrona,
‘Saimoro rokoi e Manwamoni,
pangke rokoi wunini ee yeye wolfeki.
Saimorope rokoi wunini ee wi.a’ ”
4 Ka mi e isi profet Aisaia reꞌreye namo,
nam yemei alwone ka nalyina nale woneni e mouli e Jon baptais yemeiye ka waiye yukaine mana e yungkamye mi e God.
Wu oi raiyeye mokoi marupon siwole nro,
ka miyufuye mi e God fa nu umpinuma mingklari ee nensona wolpuna ka nupone ommo fafaile awaili oi none fa nangklerine namo sa ee nem baptais,
sa God ee yuꞌpole ommo fafaile awaili oi none fa nangklerine.
Jesus is Baptized (Mak 1:4-11)
5 Umpinuma awaili e mokoi mingklari e provins Judia ka e taunwamo Yerusalem namo painri fa ee nuru ka nupune mi e Jon.
Ka nu plau won noꞌprine nale fafaile e noneni ka Jon baptaisimye nu nupi Jodan.
6 Jon fa yanaye ompla papri e nakru kamel para,b
ka fa yiperiye minriwa e nakrunone ompla kuru papri.
Ka wu fa woye rala ka ani amu e ai yukaine ompla woneni.c
7 Ka wu fa yoproye mi ka yireliye nu umpinuma nanrona,
“Mana fina ee wi kunrinrale e ki namo,
sa kero e wunini sa rikipone kero e yeye ki.
Nanrona fane ki ee fi resukru e kangke ompla yukaine e nu uma fafaile fa nangkene,
fa kulipanrone ka neingkrone sandel euwle e wunini.
8 Ka ki sa ee baptaisimke pone plau mii,
ka wu sa ee baptaisimye pone plau Holi Spirit.”
Jon Baptaisim Yesus
(Matyu 3.13-17; Luk 3.21-22)
9 Yesus e waiyeye taun wongke e distrik Galili noula wunini Nasaret.
Ka e mouli namo,
wu plau e wi plele Jon ka palo pai yingkripalo nupi Jodan ka Jon baptaisim wu.
10 E Yesus rewyufu wi yire yeri pike riri,
mouli namo nro wu yuru nemi feingkriyane ka Holi Spirit yolo wu yukaine rora ufu.
11 Ka e mouli namo plau,
mi wongke yolo heven ka yireye nanrona,
“Yene auna kinini.
Ki sam wola ka aikemke yene wamo.”
Satan yeingkari Yesus
(Matyu 4.1-11; Luk 4.1-13)
12 Ka faflai nro Holi Spirit yereriyane wu ka yumane wu pai kei mokoi marupon siwole nro.
13 Ka wu pai waiye koii marupon siwole nro e ommo kuru amun nro fa nilenailene ka e koii namo sa e yeyeye amon feifei e nu uma fa fi nainene.
Ka wu waiyeye mokoi namo pai resukru 40pla ningki se sa Satan ke yemei wu ka karyangkleye wu mi wongkwongkeni.
Ka nu ensel sa ke rerene wu fane mewmewne wu.
Yesus yangke ompla woneni distrik Galili
(Matyu 4.18-22; Luk 5.2-11; Jon 1.35-42)
14 E nu nina Jon pari kalabusye,
Yesus pai plele distrik Galili fa ee yopro miuporo e God.
15 Ka wu yireliye nu nanrona,
“Mouli oi God wone yaureye namo,
sa wi pu.
Ka kingdom woneni plau yemei wi nalen pu.
Pone ee pensona wolpuna ka bilipim miuporo.”
Yesus youw uma 4pla fa ee nupune wu
16 E wu paiye piyewa e mii anru Galili,
wu yuru Saimon yane wone inu Andru.
Wuyane sa uma fa ningkipanrone net mii anru.
Wuyane fa nangkene bisnis e firala.
17 Ka wu youw wuyane ka yireni wuyane nanrona,
“Yenyane pi pupune ki.
Se ki ee kangke yenyane ee pingkiperi nu umpinuma ee nupune ki e yukaine e nu uma fa ningkipanrone aworu ka ningkenerine firala.”
18 Ka faflai nro,
wuyane nupone net wonyaneni ka wuyane painri nupune Yesus.
19 Wu raiye pai as rola kore ka wu yuru Jems mela mana e Sebedi,
yane wone inu Jon.
Wuyane na naine bot nakrunone net e wonyaneni.
20 E Yesus yuru wuyane,
faflai nro wu youw wuyane.
Ka wuyane nupone nangka wonyane Sebedi yakle nu uma fa nangkene ommo woneni naine bot ka wuyane painri nupune Yesus.
Yesus yuꞌpone opola fafaile e yapaye mana wongke
(Luk 4.31-37)
21 Yesus yumale nu painri taun Kaperneam ka mouli e kaire e Sabat yemei,
wu paipari mow kori ka yereri ompla woneni fa ee yukuleye nu umpinuma mi e God.
22 Ka e nu nupu mi wunini,
nu ke wolapanrini mi wunini,
e fika,
mi e wu yopro ka yukuleye nu namo,
ke fi yukaine mi e nu tikse e lo fa nangkene,
onnele.
Wu yopro yukaine mana e yuna noula ka kero.
23 Ka e mouli namo,
mana wongke e yakle nu nainene mow kori namo,
opola fafaile konralo wu ka wu kaiwa mi kero ka yire nanrona,
24 Yesus e taun Nasaret,
yene yire yefele mu?
Anro yene wi ee yangke fafaile mu wee?
Ki namale pu yene fina.
Yene mana holi e God wone yawane wi.
25 Ka Yesus miyufona opola fafaile namo ka yireni wu nanrona,
“Yene misaruru ka yupone wu.”
26 Ka opola fafaile namo yenyu mana namo ka yangke mi kero wamo ka yupone mana namo.
27 Umpinuma mingklari nuru ompla namo ka nu ke wolapanrini wamo ka nemnoku nopro none kore nanrona,
“Ompla namo sa e yemei fikayen?
Mi namo sa keklepe oi mu fi mupu mi namo wu sa mi kero wamo.
E wu yoproye nu opola fafaile nu fa nupune mi wunini.”
28 Ka faflai nro mi e ompla e Yesus yangke namo,
yopri ka poipai mokoi mingklari e distrik Galili.
Yesus saimoro Saimon Pita puri moka e yenriye
(Matyu 8.14-15; Luk 4.38-39)
29 Yesus yakle nu uma plai nupone mow kori ka nolo painri mow e Saimon yane Andru.
Ka Jems yane Jon nakle painri plau.
30 Saimon puri moka e yenri nale raulokampri fane wileye monre.
Ka e Yesus yakle nu ni plele mow namo,
faflai nro nu nireni Yesus e pin namo.
31 Ka Yesus pai yuru pin namo,
ka wu yuna mew wunini ka mewmew wu yemei yeri.
Ka nale wori wunini pekimo ka wu yeinyampole ompla nunini.
Yesus saimoro umpinuma mingklari e nenrinine
(Matyu 8.16-17; Luk 4.40-41)
32 E ningkipopri mouli suneneye uma numale umpinuma e nenrinine ka uma e opola fafaile konraloye ni Yesus.
33 Uma mingklari e taun namo nupone mokoi noneni ka ni nemnoku naine nalen e mouw prerama.
34 Uma mingklari namo nenrini wongkwongkeni,
fane Yesus saimoro nu ka yuꞌpoleye opola fafaile mingklari.
Ka nu opola fafaile namo e namale wu pu,
nanrona fane wu fi yanpalo nu nopro mi wongke.
Yesus pai distrik Galili
(Luk 4.42-44)
35 Ningkinamnole kureli plau Yesus yemei ka palo moile.
Wu yupone taun namo ka pai koii wongke e nu uma fi nainene ka waiye yesapuye.
36 Nanrona fane Saimon yakle nu fori woneni painri napu wu.
37 Ka e nu nane wu,
nu nireni wu nanrona,
“Uma mingklari wamo plau naye napune yene.”
38 Ka Yesus yireli nu kore nanrona,
“Mone ee maimpi mokoi pipi plai e nene nalen namo se,
fa ki ee kopro mi e God nu mokoi namo.
Ki kii nam fa ee kangkleri ommo namo.”
39 Nanrona fane wu waraiye mokoi mingklari e distrik Galili ka wu paipari mow kori e nu ka yoprongkleye nu mi e God.
Ka yuꞌpoleye opola fafaile e fa nisnorine plai e nu.
Yesus saimoro mana e lepro
(Matyu 8.1-4; Luk 5.12-16)
40 Mana wongke e lepro wi wu ka fufula yokle wiri plau wolayure ka yire nanrona,
“Le yene wola yire,
yene ee yangke nalpari kinini ee namkire kore.”
41 Yesus wolayure wu wamo ka mew yauni wu ka yireni wu nanrona,
“Ki kire saimoro yene.
Naminrele nalpari yeneni ee namkire kore.”
42 Ka faflai nro lepro namo yupone wu ka nalpari wunini fa namkire kore.
43 Ka Yesus yawane wu faflai yupone mokoi namo,
ka yane mi kero wu nanrona,
44 “Yene sam yupu,
yene faa yireni mana wongke e ompla nam,
sa nenrape!
Yene kom pai,
yuru pris e tempol ka yukune wu nalpari e yeneni.
Ka yene ee yangke ofa yukaine lo e Moses reꞌreni nu uma fa ee nemei namakire kore.
E yene yangke nanrona,
nu umpinuma ee namale nanrona nalpapri yeneni namakire kore.”
45 Ka,
mana namo pai ka miyufu mi e ompla namo pai mokoi mingklari e wu paiye.
Nanrona fane Yesus fi raiye alelyukuye woneye taun.
Nanrona fane wu fa waiyeye mokoi pipi e nenene ai e uma fi nainene.
Ka,
nu uma e mokoi wongkwongkeni ke nine wu e mokoi e wu e waiyeye namo.