Mi mirale e wileye Buk e Mak sa yireye nanrona, “Nam sa Miuporo e Yesus Krais, Auna e God.” Ka e buk nam, sa mone ee sam namaleme nanrona Yesus wu sa mana e yunaye noula ka kero fa ee yangke ompla wongkwongkeni. Ka mone won e sam murume noula ka kero e wunini oisi wu fa yukuleye nu umpinuma ka yuꞌpoleye nu opola fafaile ka yuꞌpoleye nale fafaile e nu umpinumani. Ka Yesus wu won fa youwye wone kore sa nanrona, “Auna E Mana,” ka fa yireye nanrona wu e wi fa ee yane laip woneni ka ee yumale kore nu umpinuma awaili (Mk 10.45).

Mak yopro mi mingklariye ompla e Yesus fa yangkeye. Ka mi e mouli e Yesus yopro ka yukuleye nu umpinuma namo sa wu ke fi sam yopro mingklariye. Ka mirale e Mak yoproye sa mi e ompla e Jon Baptais ka mi e Yesus yemye baptais ka Satan yeingkariye wu. Ka mone won ee namaleme Yesus wu sa fa wolpaloye nu umpinuma fopi e nungkamone nale fafaile wongkwongkeni, ka yukuleye nu umpinuma. Ka e mirale sa nu disaipol ke fi sam namalene ompla nomu e wu yangkeye. Ka komafre pai se sa nu ke nama feingkyane kei ompla e Yesus yangkeye.

Ka mone won plau e namaleme nanrona nu uma e furempi e Yesus sa fa nanene eni mingklari fafaile wu. Ka e pekimo e Miuporo e Mak reꞌreroye namo, sa e yireye Mak e yoproye mi e Yesus ri ka yemei kore.