Piparola wongke kore
Jon yeꞌre
1
Ki Jon,
ilamana empo sios empo God,
keꞌre piparola mee paiyi yene,
Kristen ino uporo kinini Gaius.
Mone uma fopi empo namale mi alwone empo God pu,
ka empo nomu namo nro,
ki fai wolkane yene wamo ka yene waiye yukaine foli uporo wamo kinini.
2-3 Yene,
Kristen ino uporo kinini,
ki aikem wamo empo ki kupu nu Kristen inomranimpi ka pinofe plai noloni ka noplo ki nanrona,
yene fai bilipim mi alwone empo God,
ka ommo mingklari yene fai yangkeye namo fai yupene mi alwone empo God nro.
Nanrona fane,
ki fai kesapuke God empo ommo mingklari yene yangkeye namo,
ese nemei uporo nro,
ka yene wone re,
ese waiye aiyemye nro yukaine spirit empo bilip waiye yene fai waiye uporo.
4 Empo ki kem mi nanrona nu kongkom kinini wona nuna mi alwone empo God ka wona samo nupenene,
ompla namo empo yereryane aiyem wamo yemei yumalo aikem mingklari plai ki fai kemke.
Gaius yangke nale uporo nu Kristen plai
5 Yene,
Kristen ino uporo kinini,
empo yene fai samo yupene nale empo mi alwone empo God ka mewmew nu Kristen inomranimpi ka pinofe plai namo,
nale yeneni namo sa yuku bilip yeneni empo Jisas fai samo yangke ommo wunini.
Namo sa won alwone la empo nu Kristen plai inomranimpi ka pinofe yene won mewmew nu namo,
sa nu uma plai yene wone fei namale nu.
6 Plai empo nu Kristen inomranimpi ka pinofe moneni namo,
isi nelnane yene kingke nu noloni kore ka noplongkle nu pinuma empo sios naimele nanrona,
yene fai yangke nale uporo fai samo wolayaliye nu pinuma ka mewmewye nu plau.
Ka empo mee nu ese noloni nelnane kore yene ka empo nu nire nupone yene ka painri mokoi wongke,
sa ese uporo wamo empo yene ese mewmew nu ommo plai fai nu ese nungkam painri.
Yene ese mewmew nu resuklu yukaine God wone fai wolaye yene ese yangke.
7 Empo fika,
nu fai nangke ommo empo Jisas,
nanrona fane nu won naraine mokoi mingklari ka noplongklene nu uma noula empo Jisas.
Ka empo nu nangke ommo namo naraine,
nu fei fai nem ompla wongke empo nu uma fei fai bilipne Krais.
8 Nanrona fane mone ese samo mewmew nu uma nanrona fai mone ese memei memmoku plau ese kelmane ommo empo mi alwone empo God.
Diotrefes yangke nale fei uporo
9 Ki isi keꞌre piparola paiyi nu pinuma empo sios pu ka koplongkle nu empo ompla namo.
Ka Diotrefes namo,
wu fai yufuye wolpoku woneni ka yire ningki kaire wu wone ese paiyi risi.
Ka wu fei fai yupu ka yupene mi munini.
10 Nanrona fane empo ki koloki plele mokoi poneni,
sa ki ese koplo mi alele empo nale wunini fai yangkeye namo.
Diotrefes sa mana fai kalpoupaiyire mu mi wongkwongkeni fei alwone.
Wu fei fai yangke nale namo nro,
wu fei fai yuꞌpu nu Kristen inomranimpi ka pinofe fopi namo fai noloni noplo mi namo.
Ka empo nu plai nire numale nu Kristen inomranimpi ka pinofe painri mow nunini namo,
wu fai miyaule nu ka re wu fai mimiyaliye nu uma woneni namo empo sios wunini.
Demitrius yangke nale uporo
11 Yene Kristen ino uporo kinini,
yene faa yupene nale fafaile.
Yene ese yupene nale uporo nro.
Nu uma empo nangke nale uporo namo,
sa uma empo God wone.
Ka nu uma empo nangke nale fafaile namo,
sa nu uma fopi fei samo namale God wu sa fina.
12 Demitrius namo,
uma mingklari fai noplone mi empo nale uporo wunini.
Demitrius wu fai yupene mi alwone empo God,
ka mi alwone empo God namo yangke nale uporo yemei laip wunini.
Nanrona fane empo rokoi namo,
mi alwone empo God re fai yoplo mi alele nale uporo wunini.
Ka empo mee yene yupu nanrona mu re moplome mi alele nale uporo wunini ka yene namale nanrona mi namo empo mu sa won alwone.
Ilamana empo sios yire yulu Gaius
13 Ki kuna mi mingklari ese kirewi yene.
Ka ki kumplewa ese fei keꞌre panro piparola mee.
14 Ki won wolake ese koloki ka kulu yene ka konkawe ese miflimamplo maime ka moplo mi empo ommo namo.
15 Manawamo ese wolpuna raulo yene ka yene ese yem wolpuna raulo ka waiye.
Nu Kristen inomranimpi ka pinofe yeneni empo ki kakle maime mele,
nire kaire uporo nunini paiyi yene.
Yene re ese yirengkle nu Kristen inomranimpi ka pinofe wokwokera kinini empo mokoi namo nanrona,
ki kane kaire uporo kinini paiyi nu mingklari.