Piparola empo Pol yeꞌre paiyi
Filemon
1
Ki Pol,
ki kalabus mana empo Krais Jisas empo fika,
ki wunini.
Naimele sa ki kaike kalabus Rom.
Filemon mone uma mingklari fai bilipme God namo maime oikenra wunini.
Nanrona fane kikane mela moneni Timoti namo,
fai samo wolame yene yukaine mela mu mone oikenra.
Ka yene re yakle mu maime fai mangkeme ommo empo Jisas.
Nanrona fane kikane meꞌre piparola mee paiyi yene.
2 Piparola mee kikane meꞌre paiyi pone:
yene ka pinmela empo mone Apia,
ka Arkipus,
sa mana fina fai yeli plau mone fai mopume namo ka fai waiye yukaine iimmana kelo empo God,
ka nu uma empo sios fopi fai noloni ka nemnokune mow empo yene namo.
3 Aina God empo mone yane Manawamo Jisas Krais ese wolayali pone ka yangke pone paipe wolraulo.
Nale uporo empo Filemon namo, ke yangke Pol aiyem wamo
4 Empo ki fai kaike kesapuke,
ki fai wolrufuke yene ka ki fai kire tenkyu God kinini.
5 Empo fika,
ki fai kupuke nu uma noplo mi mingklari wamo nanrona yene mana fai wolyane Manawamo Jisas ka yene fai yangke nale uporo wu,
ka nale plainrane namo re yene fai yangke paiyi nu pinuma mingklari empo God.
6 Ningki kaire ki fai kesapuke ka kalineke God ese kelyane bilip yeneni ka yene ese resuklu mewmew nu pinuma empo God ka nu re ese kelnane yene ese yeli kelo.
La empo nanrona God wone ese yangke ommo uporo woneni ese yangke yene namale nanrona ommo uporo uporo fai nemeine wolpuna empo mone,
sa ommo empo mone ese mereri noula empo Krais.
7 Mela kinini,
nale empo yene fai samo wolyaneye nu pinuma empo God ka kelyane wolpuna nunini ka yangke nu neli kelo ese bilipim Krais Jisas ka yangke ommo alwone wunini.
Namo sa yereryane wolpuna kinini wamo ka ki aikem ka kem wolpuna raulo wamo ka nomu namo nro ki fai kesapuke mingklari ka kire uporo God.
Filemon ese as yem kore Onesimus yukaine inyanrani
8 Ki sa won resuklu ese kire mi alwone yene noula empo Jisas Krais,
empo ompla fika yene ese yangke.
9 Ka,
ki ke wola nanrona ki ese fei kusune yene ese yangke ompla namo.
Nale empo fai samo wolnaline nu pinuma plai sa ompla wamo monkawe.
Nanrona fane ki ese kire mi aplai yene.
Ki Pol,
ki alma pu ka ki kaike yukaine mana waiye kalabus empo fai kungkamke mi empo Krais Jisas.
10 Ka ki kire kaline yene ese yangke nale uporo mana wongke fina fai waiye yukaine auna kinini,
mana namo empo ki kaike kalabus,
wu isi yolowi ki ka ki mewmew wu fai ese bilipim Krais ka naimele wu yemei yukaine auna kinini.
Noula empo mana namo sa Onesimus
11 Isi wu sa yukaine mana wongke fafaile fane fei fai yungkamye ommo plola empo yene.
Ka naimele wu sa yemei yukaine mana wongke uporo fai ese mewmew monkawea empo ommo monkaweni.
12-14 Mana namo,
wolpuna kinini samo waiye wu wamo.
Isi ki wola kire kuna wu ese yem koii yeneni ka mewmew ki.
Empo fika,
ki keli keloke miuporo fane nu nina ki kaike kalabus.
Ka ki kum ese fei kangke ompla wongke empo wolpuna kinini empo yene fei yire ki.
Ki kawane wu paiyi yene pu ka ki wolkaule wu wamo.
Nanrona fane ompla fika yene wone wola yire uporo ka yire yangke fai ese mewmew ki,
ki ese kuluke nro ka ese fei kusune yene.
15 Alwone,
Onesimus isi yupone yene ka fei paiyi ripkikliye onne.
Ki wola nanrona,
nomu empo God mewyimane Onesimus sa nanrona,
wu anro ese bilipim Krais se sa yene ese yem wu kore ka yenyane ese paipe yukaine inyanrani nanrona nanrona.
16 Yene fai samo yulu Onesimus yukaine mana siwole nro.
Naime sa onne.
Wu ese waiye yukaine wokboi siwole nro fai kalyangke ommo yeneni,
fane naime yene ese yulu wu yukaine yenyane inyanrani ka yene ese wolyane wu wamo.
Empo fika,
ki kone namale pu fane ki kane wolpuna kinini paiyi wu.
Ka ki namale nanrona yene re ese samo namale ka yene ese wolyane wu wamo.
Empo fika wu yemei yukaine mana siwole uporo fai kalyangke ommo yeneni,
ka yenyane re ese paipe yukaine yenyane inyanrani noula empo Manawamo.
17 La empo yene yulu ki yukaine foli uporo yeneni empo ommo empo Krais ka yene fai yangke nale uporo wamo ki,
naime yene ese as yem kore Onesimus ka yangke nale nanrona wu yukaine empo yene fai yangkeye ki namo.
18 La empo wu isi yangke eni plai yene wee wu isi kalyuꞌpu ommo yeneni ka wu fei yawe yene romaula,
sa yene ese yina ommo fika empo wu kalyuꞌpuye namo waiye mew kinini.
19 Ki Pol empo keꞌre piparola mee mew ki koneni paiyi yene.
Ki kone ese kawe yene romaula ese yem kore koii empo ompla isi wu kalyem namo.
Ki ese kire nanrona laip yeneni sa kalyem ompla empo ki.b
Ka ki sa kum ese fei koplo ompla namo.
20 Mela kinini,
monkawe ese maime uma empo Krais.
Ka noula empo Manawamo moneni,
ki kire yene ese kelyane wolpuna kinini sa ki ese kem wolpuna raulo.
21 Ki namale nanrona yene ese yangke ommo yukaine mi empo ki keꞌre wiye piparola mee.
Ka yene ese samo yupene ka yangke ommo ewelme ki kaline yene ese yangke,
ka yene ese yangke nale uporo plai kore.
22 Ka ompla wongke kore ki ese kirewi yene.
Ki bilip nanrona God ese yupu pone pesapupe ka ese yangke rokoi kinini ese koloki ka kulu pone.
Nanrona fane yene ese yemplekuru koii rola wongke fai niyene empo mow yeneni fai ki ese kiye kaike empo ki koloki kape pone maime.
Nu uma fai nane Pol nemnoku nangke ommo namo nire kaire uporo paiyi Filemon
23 Epafras yire kaire uporo wunini paiyi yene.
Kikane maime kalabus empo fika wu re empo yungkam ommo empo Krais Jisas.
24 Nu foli empo ki fai kakle mangke ommo naimele re,
nire kaire uporo nunini paiyi yene.
Nu uma namo sa:
Mak yane Aristarkus ka Demas yane Luk.
25 Manawamo Jisas Krais ese wolyali pone ka ese waiye plau ruwilmalma poneni.