Genesis 1.1-2.4a (Proper-5 Year A)
2
ᒪᒃ ᒋᓴᒪᓂᑐᐤ ᒋ ᒋᔅᑕᐤ ᑲ ᐅᓯᑕᑦ ᒋᓯᑯᔪᐤ ᑭᔭ ᐊᔅᒋᔪᐤ,
ᑭᔭ ᒥᓯᐛ ᒐᒂᔪᐤ ᐊᓐᑕ ᐊ ᑎᑯᓂᔨᒡ᙮
2 ᑲ ᐅᑎᒋᐱᔨᒡ ᓂᔄᐅᑕᒡ ᐊ ᒋᓯᑲᔨᒡ,
ᒋᓴᒪᓂᑐᐤ ᒋ ᐊᔽᓯᐤ ᑲᒋ ᒥᓯᐛ ᒋᔅᑕᑦ ᐅᑦ ᐊᑐᔅᒐᐅᓐ᙮
3 ᐊᑯ ᒋᓴᒪᓂᑐᐤ ᒂ ᐃᔅᒋᔄᑦ ᒐᒋ ᒋᔅᑕᔨᑕᑯᓂᔨᒡ ᐊᓯᑯᒻ ᓂᔄᐅᑕᒡ ᐊ ᒋᓯᑲᔨᒡ᙮
ᒋ ᐃᑐᑎᒻ ᐅᔭ ᐛᔅ ᒋ ᐊᔽᓯᐤ ᑲ ᓂᔄᐅᑕᒡ ᑕᑐᐤ ᒋᓯᑲᔨᒡ ᑲᒋ ᒋᔅᑕᑦ ᐊ ᐅᓯᑕᑦ ᒥᓯᐛ ᒐᒂᔪᐤ᙮
ᒋᓴᒪᓂᑐᐤ ᑲ ᐃᓯ ᐅᓯᐊᑦ ᓂᔅᑎᒻ ᓇᐸᐛ ᑭᔭ ᓂᔅᑎᒻ ᐃᔎᐛ
4 ᐊᐅᑯᐤ ᑲ ᐃᔅᐱᔨᒡ ᒧᔭᒻ ᒋᓴᒪᓂᑐᐤ ᑲ ᐅᓯᑕᑦ ᒋᓯᑯᔪᐤ ᑭᔭ ᐊᔅᒋᔪᐤ᙮
5 ᓇᒪ ᐅᒋ ᓂᑕᐅᒋᓐ ᐊᔅᒄ ᒐᒂᓐ ᐅᑕ ᐊᔅᒋᒡ,
ᐅᓴᒻ ᑎᐸᔨᒋᒐᓱᐤ ᒋᓴᒪᓂᑐᐤ ᐊᔅᒄ ᓇᒪ ᐅᒋ ᐃᑎᓴᐊᒻ ᐊ ᒋᒧᓂᔨᒡ,
ᑭᔭ ᓇᒪ ᐅᒋ ᑕᐤ ᐊᐛᓐ ᒐᒋ ᓂᑕᐅᒋᑕᑦ ᒥᒋᒥᔪᐤ᙮
6 ᒥᒄ ᑭᔅᑯᐅᓂᐱᔾ ᒋ ᐸᒋ ᒧᔅᒋᐱᔪᐤ ᐊᓐᑕ ᒧᔅᑎᔅᑭᒥᒡ,
ᒐᒋ ᓄᑎᒻ ᓂᐱᐅᔅᑭᒥᑲᒡ᙮
7 ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐅᑎᓇᑦ ᐊᓯᔅᒍᐛ ᑭᔭ ᒂ ᐅᓯᐊᑦ ᓇᐸᐛ,
ᒋ ᐳᑕᑎᒧᐛᐤ ᐅᔭᔭᐅᓐ ᐅᔅᑯᑎᔨᒡ ᑭᔭ ᒂ ᐃᑐᑐᐛᑦ ᓇᐸᐛ ᒐᒋ ᐱᒪᑎᓯᔨᒋ᙮
8 ᑎᐸᔨᒋᒐᓱᐤ ᒋᓴᒪᓂᑐᐤ ᒋ ᓂᑕᐅᒋᑕᐤ ᐊ ᒥᔽᔎᔨᒡ ᓂᑕᐅᒋᑕᑭᓂᔪᐤ ᐊᓐᑕ ᐛᐱᓄᑕᒡ,
ᐃᑎᓐ ᐊᓯᓂᐧᑲᑕᔨᒡ᙮
ᐊᑯᑕ ᑲ ᐱᔅᑎᓇᑦ ᐊᓂᔭ ᓇᐸᐛ ᑲ ᐅᓯᐊᑦ᙮
9 ᑎᐸᔨᒋᒐᓱᐤ ᒋᓴᒪᓂᑐᐤ ᒋ ᐃᑐᑐᐛᐤ ᒐᒋ ᓂᑕᐅᒋᒋ ᒥᓯᐛ ᑕᑐᐎᒡ ᐊᓯᓇᑯᓯᔨᒋ ᒥᓂᓯᐅ-ᒥᔅᑎᒂ,
ᓇᔅᒡ ᐊ ᒥᔪᓯᓯᒡ ᐊ ᒋᑕᐱᒪᑭᓄᐅᒡ ᑭᔭ ᒐᒋ ᓂᑕᐅᒋᒋ ᒥᓂᓴ ᐊ ᒥᔽᒋ ᒐᒋ ᒥᒋᓇᓄᔨᒋ᙮
ᒋ ᐃᑐᑎᒻ ᐃᔭᐱᒡ ᐊᓐᑕ ᑕᑕᐅᒡ ᐊ ᒥᔽᔎᔨᒡ ᓂᑕᐅᒋᑕᑭᓂᔪᐤ ᒐᒋ ᓂᑕᐅᒋᒋ ᐱᒪᑎᓯᔪᐤ ᒥᔅᑎᒂ ᑭᔭ ᒋᔅᒐᔨᑎᒧᐤ ᒥᔅᑎᒂ,
ᐃᔪᒡ ᒐ ᐅᒋ ᒋᔅᒐᔨᑕᒡ ᐊ ᒥᔽᔨᒡ ᑭᔭ ᐊ ᒪᔭᑎᓂᔨᒡ᙮
10 ᒋ ᑎᑯᓐ ᓯᐱᔾ ᐊ ᐱᒥᐱᔨᒡ ᐊᓐᑕ ᐃᑎᓐ ᒐᒋ ᓂᐱᐅᔅᑭᒥᑲᒡ ᒧᔅᑎᔅᑭᒥᔾ,
ᒂᔅᑕᒐ ᐃᑎᓐ ᒋ ᓇᐅᔅᑎᒂᐱᔪᐛ᙮
11 ᐊᓂᔭ ᐊ ᓇᐅᔅᑎᒂᒋ,
ᐱᓴᓐ ᐃᓯᓂᐧᑲᑕᐤ ᓂᔅᑎᒻ ᓯᐱᔾ᙮
ᑭᔭ ᐱᒪᑭᒥᒍᓱᐤ ᒥᓯᐛ ᐊᓐᑕ ᐊᐱᓚ ᐊᔅᒋᒡ᙮
12 ᐊᓐᑕ ᐊ ᑎᒂᒡ ᐎᔄᐅᓱᓇᔭᐤ ᓇᔅᒡ ᐊ ᒥᔽᓯᒡ ᑭᔭ ᐊᑲ ᐊᔅᒋᐱᔨᒡ ᒐᒂᓐ ᒐᒋ ᐅᒋ ᐃᔭᔪᐛᒡ,
ᑎᑯᓐ ᐃᔭᐱᒡ ᑲᐎᒋᒪᒂᒡ ᐱᒍᐤ ᐊ ᐃᓯᓂᐧᑲᑕᒡ ᑭᔭ ᐊ ᒥᔽᔨᒋ ᐊᓯᓂᓴ ᒧᔭᒻ ᓱᓇᔭᐤ ᐊᓯᓂᓴ ᐊ ᐃᓯᓇᒂᒋ,
ᐅᓂᑭᔅ ᐃᓯᓂᐧᑲᑕᐛ᙮
13 ᑭᐊᓐ ᐃᓯᓂᐧᑲᑕᑭᓄᐤ ᓂᓱ ᓯᐱᔾ᙮
ᒥᓯᐛ ᐊᓐᑕ ᐃᔅᐱᔪᐤ ᑯᔅ ᐊᔅᒋᒡ᙮
14 ᑕᐃᑭᕆᔅ ᐃᓯᓂᐧᑲᑕᐤ ᓂᔅᑐ ᓯᐱᔾ,
ᐛᐱᓄᑕᒡ ᐊᓐᑕ ᐱᒥᐱᔪᐤ ᐊᓯᕆᔭ ᐊᔅᒋᒡ ᑭᔭ ᔪᑉᕆᑎᔅ ᐃᓯᓂᐧᑲᑕᐤ ᓇᐤ ᓯᐱᔾ᙮
Genesis 2.15-17, 3.1-7 (Lent-1 Year A)
15 ᑲᒋ ᐅᓯᐊᑦ ᑎᐸᔨᒋᒐᓱᐤ ᒋᓴᒪᓂᑐᐤ ᐊᓂᔭ ᓇᐸᐛ,
ᒋ ᐱᔅᑎᓇᐤ ᐊᓐᑕ ᐃᑎᓐ ᓂᑕᐅᒋᑕᑭᓂᒡ ᒐᒋ ᓂᑕᐅᒋᑕᔨᒋ ᑭᔭ ᒐᒋ ᑭᓄᐛᔨᑎᒥᔨᒋ
16 ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐃᑎᓱᒪᑦ ᓇᐸᐛ,
ᐊ ᐃᑕᑦ,
“ᒋᑭ ᒋ ᐅᒋ ᒥᒋᓐ ᒥᓂᓴ ᐊᓐᑕ ᒥᓯᐛ ᐊ ᑕᑎᔅᑦ ᒥᔅᑎᒄ ᓂᑕᐅᒋᑕᑭᓂᒡ,
17 ᒥᒄ ᐊᑲ ᒋᑭ ᒥᒋᓐ ᐅᔭ ᒥᓂᓴ ᐊᓐᑕ ᒋᔅᒐᔨᑎᒧᐤ ᒥᔅᑎᑯᒡ ᑲ ᐅᒋ ᒋᔅᒐᔨᑕᒂᒡ ᐊ ᒥᔽᒡ ᑭᔭ ᐊ ᒪᔭᑎᒡ,
ᐊᓐ ᑲᓯᑲᒡ ᒥᒋᔨᓇ ᒐᔅᑎᓇᔅ ᒋᑭ ᐳᓂᐱᒪᑎᓯᓐ᙮”
Genesis 2.18-24 (Proper-22 Year B)
18 ᒪᒃ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐃᔅᒋᔄᑦ,
“ᓇᒪ ᐃᓯᓇᑯᓐ ᒐᒋ ᐸᐃᑯᓯᑦ ᓇᐸᐤ,
ᓂᑭ ᐅᓯᐃᒪᐛ ᐊᐱᒋᐊᑭᓇ ᒐᒋ ᐛᐎᒋᐃᑯᑦ᙮”
19 ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐅᑎᓇᑦ ᐊᓯᔅᒍᐛ ᑭᔭ ᒂ ᐅᓯᐊᑦ ᒥᓯᐛ ᑕᑐᐎᒡ ᐊᐛᓯᓴ ᑭᔭ ᐱᔭᓱᐛ,
ᒂ ᐃᑐᑐᐛᑦ ᐅᔭ ᓇᐸᐛ ᒐᒋ ᐸᑐᐛᑦ ᑕᓐ ᒋᐸ ᐃᓯᓂᐧᑲᑕᔪᐛ᙮
ᐊᓂᔭ ᓇᐸᐤ ᑲ ᐃᓯ ᐎᔭᑦ ᒥᓯᐛ ᐱᒪᑎᓯᐤ ᐊᐛᓯᓴ,
ᐊᐅᑯᓐ ᑲ ᐃᓯᓂᐧᑲᑕᑭᓄᔨᒋ᙮
20 ᑲᒋ ᐎᔭᑦ ᓇᐸᐤ ᒥᓯᐛ ᐱᒪᑎᓯᐤ ᐊᐛᓯᓴ ᑭᔭ ᐱᔭᓱᐛ,
ᒥᒄ ᐊᓂᔭ ᐊᑎᓯᔨᒋ ᐊᐛᓯᓴ ᑭᔭ ᐱᔭᓱᐛ,
ᓇᒪ ᐅᒋ ᑕᔪᐛ ᒐ ᐛᐎᒋᐃᑯᑦ ᑭᔭ ᒐᒋ ᑕᔨᒋ ᐊ ᑕᑦ᙮
21 ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐃᑐᑐᐛᑦ ᓇᐸᐛ ᒐᒋ ᒥᔪᒂᒧᐎᒋ,
ᒪᒂᒡ ᐅᑎᓂᐸ ᓇᐸᐤ,
22 ᑎᐸᔨᒋᒐᓱᐤ ᒋᓴᒪᓂᑐᐤ ᒋ ᐅᑎᓂᒺᐤ ᐸᐃᒄ ᐅᔅᐱᒐᑭᓂᔪᐤ ᑭᔭ ᑲᐤ ᒂ ᒋᐸᐅᒺᑦ ᐊᓐᑕ ᑲ ᐅᒋ ᐅᑎᓂᒺᑦ᙮
ᒂ ᐅᑎᓇᐧᒃ ᐊᓂᔭ ᐅᔅᐱᒐᑭᓂᔪᐤ ᐊᓐᑕ ᓇᐸᐛ ᐎᔭᔨᒡ ᑲ ᐅᒋ ᐅᑎᓂᒺᑦ,
ᒂ ᐃᑐᑕᐧᒃ ᒧᔭᒻ ᐃᔎᒡ ᒐᒋ ᐃᓯᓇᑯᓂᔨᒡ,
ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐅᑎᓇᑦ ᐃᔎᐛ ᑭᔭ ᒂ ᐛᐸᑎᔭᑦ ᐊᓂᔭ ᓇᐸᐛ᙮
23 ᐎᔭᐱᒪᑦ ᐃᔎᐛ ᐊᓐ ᓇᐸᐤ,
ᒂ ᐃᔅᒋᔄᑦ,
“ᐅᒪ ᐊᐛᓐ ᑲ ᐃᓯᓇᑯᔅᑦ ᓂᔾ ᐊᓯᓇᑯᓱᐅᒡ,
ᓂᔅᑭᓂᒡ ᐅᒋᐱᔪᐛ ᐅᔅᑭᓇ ᑭᔭ ᓂᔭᒡ ᐅᒋᐱᔪᐤ ᐎᔪᐤ᙮
ᐃᔎᐤ ᒋᑭ ᐃᓯᓂᐧᑲᓱᐤ,
ᐛᔅ ᓇᐸᐛ ᐎᔭᔨᒡ ᐅᒋᐱᔪᐤ᙮”
24 ᐊᐅᑯᓐ ᐛᒋ ᐃᓯᓇᒂᒡ,
ᒥᓯᐛ ᓇᐸᐤ ᒐ ᓂᑭᑕᑦ ᐅᑕᐎᔭ ᑭᔭ ᐅᑲᐎᔭ ᑭᔭ ᒪᒧᐤ ᒐᒋ ᑕᑦ ᐎᐛ ᐊ ᑕᔨᒋ ᑭᔭ ᒂ ᐃᓯᓇᑯᓯᒡ ᒧᔭᒻ ᐸᐃᒄ ᐊᐛᓐ᙮
25 ᑭᔭ ᓇᐸᐤ ᒪᒃ ᐎᐛ ᒋ ᒧᓴᔅᑭᑕᐅᒡ,
ᓇᒪ ᐅᒋ ᑎᑯᓂᔪᐤ ᒐᒋ ᓴᒂᔨᒧᒡ᙮