Noneki tiktokaskej iejemplo Cristo
15
Tejuamej yejuan tikojtikej ipan totlaneltok noneki tikimpaleuiskej on yejuan xkojtikej ipan intlaneltok.
Maka tej,
sano tejuamej ma titopaktikan.
2 Yej noneki tikinchiuiliskej tlen kuajli on tokniuan para tikimpaktiskej niman ijkon noskaltis intlaneltok.
3 Ijkon ma tikchiuakan pampa Cristo xsanno yejua onopaktij.
In Yektlajkuilojli kijtoua on tlen Cristo okijlij Dios:
“Nopan ouets intlauel on yejuan mitstlauelitayaj.”
4 Nochi tlen ye uejkaui onijkuiloj ipan on Yektlajkuilojli,
onijkuiloj para techmachtia.
Onijkuiloj para on ijyouilistli niman teyoltlalilistli ma techmaka tlamachalistli* itechkopa on Yektlajkuilojli.
5 Ma Dios,
yejuan kitemaka ijyouilistli niman teyoltlalilistli,
ma mechpaleui para san se nemoyojlo nenkipiyaskej inuan oksekimej,
ijkon ken iejemplo JesuCristo mechititia,
6 para ika san se inyojlo niman ika san se tlajtojli ma kiyekteneuakan Dios,
iTajtsin toTEKO JesuCristo.
On kuajli tlajtojli yoajsik intech on yejuan xhebreos*
7 Aman tej,
xmoselikan cada se iuan oksekimej ken Cristo otechselij,
para Dios kiselis ueyilistli.
8 Nejua nemechijlia ika Cristo okintekichiuiliko on hebreos*.
Ijkon tej,
ocumpliroj on promesas yejuan Dios okintlalilij on toachtojtajuan,
niman ijkin okiteititij ika Dios nochipa kichiua tlen kijtoua.
9 Cristo no ouajlaj intech on yejuan xhebreos* ken tekitketl para yejuamej ma kiueyilikan Dios ipampa iteiknelilis*,
ijkon ken Cristo okijlij Dios ipan in Yektlajkuilojli:
Yejua ika,
intsajlan on yejuan xhebreos* nimitsyekteneuas,
niman ninokuikatis ikan motokatsin on kuikamej.
10 Niman oksekan ipan on Yektlajkuilojli no kijtoua:
Nemejuamej yejuan xnenhebreos* xpakikan inuan on yejuan hebreos*.
11 Niman oksejpa kijtoua in Yektlajkuilojli:
Nochimej nemejuamej yejuan xnenhebreos* xyekteneuakan Dios.
Niman nemejuamej tlakamej nemochimej* xkueyiteneuakan.
12 Niman Isaías no kijtoua ipan itlajkuilol: b
Sen teuejkakoneu* itech Isaí uajlas.
Yejua kinmandaros on yejuan xhebreos*.
Niman yejuamej itech kitlaliskej intlamachalis.
13 Ma Dios,
yejuan kitemaka tlamachalistli*,
ma mechmaka nochi paktli niman yolseuilistli pampa nenkineltokaj para nenkipiyaskej miyek tlamachalistli* itechkopa ipoder on Espíritu Santo.
14 Nokniuan,
kuajli nikmatstikaj ika nemejuamej nententokej ikan tlen kuajli niman ikan nochi tlamatkilistli*,
niman uelis nemotlakanonotsaskej.
15 Pero ipan in tlajkuilolamatl yonemechmejlakaijkuilouilij para oksejpa nemechelnamiktia on tlajtlamach*.
Ijkin yonemechijkuilouilij pampa iueyitetlajsojtlalis* Dios yejuan xnechtocarouaya nikselis onechtlalij para niapóstol,
16 para niktekipanos JesuCristo intsajlan on yejuan xhebreos* ken nitiopixki yeskia.
Yejuamej nikimijlia on kuajli tlajtojli yejuan kiteijlia ken Dios temakixtia,
para yejuamej nochiuaskej ken sen uentli yejuan on Espíritu Santo okinchipau.
17 Aman tej,
ika ninemi san sekan iuan Cristo Jesús,
nipaki ika on tekitl yejuan nikchiua para Dios.
18 Xnitlajtlajtos itlaj ika okse tekitl.
San nitlajtlajtos ika on tlen Cristo okichiu notechkopa intsajlan on yejuan xhebreos*.
Aman tej,
yejuamej kitlakamatij Dios ipampa on tlen onikinmachtij niman on tlen onikchiu
19 itechkopa ipoder on tlamauisoltin niman on milagros,
niman itechkopa ipoder on Espíritu Santo.
Ijkon tej,
nouiyan desde Jerusalén hasta ne iueyitlalpan Ilírico kuajli yoniktemitij ika on kuajli tlajtojli yejuan kiteijlia ken Dios temakixtia.
20 Nochipa oniknek nikteijlis on kuajli tlajtojli kampa xe kixmatij Cristo.
Ijkin oniknek nikchiuas pampa xoniknek nitemachtis kampa okse tlakatl otekit.
21 Yej nikchiua ken in Yektlajkuilojli kijtoua:
“Yejuamej on yejuan xkaman intech omachiyato,
kitaskej.
Niman on tlen xkaman okakkej de yejua,
kajsikamatiskej.”
Pablo okinemilij yas Roma
22 Maski miyekpa oniknek nias nemechontas,
xouel oniaj.
23 Pero aman ika yonitlan nikchiua notekiu ipan in ueyitlalpanmej,
niman ika miyek xipan yoniknek nemechontas,
24 aman ijkuak nias España uelis nemechontas.
Niman kemaj ijkuak yonikpix paktli nemouan keski tonajli,
nikneki nennechpaleuiskej ika on tlen nechpolos para najsis España.
25 Pero aman niau Jerusalén niman nikikti sen ofrenda para on tlayekankej yejuan ompa nemij,
26 pampa on tokniuan yejuan chanejkej neka ipan iueyitlalpan Macedonia niman Acaya ikan paktli okinemilijkej para okisentlalijkej sen ofrenda,
niman kintitlaniliaj on tokniuan mayankej yejuan nemij Jerusalén.
27 Yejuamej okinemilijkej ika kuajli para ijkon kichiuaskej.
Niman melauak nonekiya kintlajsojkamachiliskej on hebreos* pampa on tlaneltokakej hebreos* okixelojkej on kuajli tlajtojli yejuan kiteijlia ken Dios temakixtia inuan on yejuan xhebreos*.
Yejua ika,
on yejuan xhebreos* noneki kinmakaskej on tlajtlamach* on hebreos*.
28 Kemaj ijkuak nejua yonitlan notekiu niman yonikinmakak in ofrenda,
nikisas para nias España,
niman nemechnotstikisas ijkuak nipanos.
29 Kuajli nikmatstikaj ika ijkuak nemotech najsis,
Cristo sanoyej* techtiochiuas.
30 Nokniuan,
sanoyej nemechtlajtlanilia ipampa toTEKO JesuCristo niman ipampa on tetlajsojtlalistli* yejuan on Espíritu Santo techmaka,
nouan niman nopampa xchiuakan oración ikan nochi nemoyojlo itech Dios.
31 Xtlajtlanilikan Dios ma nechmanaui intech on tlakamej xtlaneltokakej yejuan nemij Judea.
Niman no xtlajtlanilikan para on tokniuan yejuan nemij Jerusalén ma kiselikan ikan paktli on tlen nikimitkilia
32 para tla Dios kineki,
ma najsi nemotech ikan ueyi paktli niman ijki tiyolpachiuiskej.
33 Ma Dios yejuan kitemaka yolseuilistli ma nemi nemouan.
Ma ijki nochiua.