Xkuajli para yakaj kintlajtlakolmakas on tokniuan
14
Xselikan sen tokniu yejuan xkojtik ipan itlaneltok.
Pero maka nemokamauijsokiskej ika on tlen yejua xkajsikamati.
2 In sen ejemplo.
Sen tlakatl kinemilia uelis kikuas nochi kech sesekneka tlakuajli onkaj,
pero okse tlakatl xkajsikamati niman kinemilia san uelis kikuas kijli.
3 Aman tej,
on yejuan nochi tlajtlamach* tlakuajli kikua,
maka ma kinemili ika xitlaj* kimati on yejuan xijki tlakua.
No ijki on yejuan san kijli kikua,
maka ma kistlako on yejuan kikua nochi kech tlajtlamach* tlakuajli onkaj,
pampa Dios no yokiselij on tlakatl.
4 ¿Akin tejua in para tikistlakos itekitkau okse tlakatl?
Tej,
san on iteko uelis kijtos tla kuajli noso xkuajli on tlen kichiua.
Niman yejua xuetsis pampa toTEKO kipiya poder para kipaleuis maka uetsis.
5 Nikixtis okse ejemplo.
Nemotsajlan sen tlakatl kinemilia ika sen tonajli más ueyixtikaj xken okse.
Pero nemi okse tlakatl yejuan kijtoua ika nochi tonaltin sano ijki.
Cada se ma nomelajkatlali ipan itlaneltok.
6 On tlakatl yejuan kejeua sen tonajli,
kejeua para kitlakaita toTEKO.
Niman on yejuan xkejeua,
no xkejeua para kitlakaita toTEKO.
Yejuan kikua nochi tlajkuajli,
kichiua para kitlakaita toTEKO pampa kimaka tlaxtlauijli Dios.
Niman yejuan kinemilia ika Dios xkauilia para kikuas nochi tlakuajli,
xkikua para kitlakaita toTEKO,
niman yejua no kimaka tlaxtlauijlij Dios.
7 Nion se de tejuamej nemi san para yejua,
nion miki san para yejua.
8 Yej tla tinemij,
tinemij para toTEKO,
niman tla timikij,
timikij para toTEKO.
Tla tinemij noso tla timikij,
titeyaxkauan* itech toTEKO.
9 Yejua ika tej,
Cristo omik niman oksejpa oyoliu para yejua onochiu inTEKO on yejuan yoltokej niman on yejuan yomikkej.
10 Pero ¿tline* tikistlakos mokniu?
Niman okse,
¿tline tiknemilia ika xitlaj* kimati mokniu?
Tinochimej tiaskej ixpan Cristo para yejua techyolkuitis niman techtlaxtlauilis ken noneki.
11 In Yektlajkuilojli ijkin kijtoua:
“Ijkon ken melauak niyoltikaj,
kijtoua toTEKO,
no melauak ika nochi tlakatl nixpan notlakuantelketsas
niman nochimej teixpan kijtoskej ika melauak nejua niDios.”
12 Yejua ika tej,
cada se de tejuamej ika onkaj tikijliskej Dios nochi tlen kuajli niman on tlen xkuajli otikchijkej.
Xkuajli para tikchiuas itlaj yejuan kitlajkalis mokniu ipan tlajtlakojli
13 Yejua ika tej,
xok kitocaroua titoistlakojtiaskej iuan oksekimej.
Yej xchiuakan kanika para maka itlaj nenkichiuaskej yejuan kipopolos nemokniu ipan itlaneltok,
noso kitlajkalis ipan tlajtlakojli.
14 Pampa nikneltoka Cristo Jesús,
nejua kuajli nikmatstikaj ika nochi tlen onkaj chipauak.
Pero tla yakaj kinemilia ika itlaj xchipauak,
on xchipauak para yejua.
15 Tla tikpajsoloua mokniu ikan on tlen tikua,
xok timouika ikan tetlajsojtlalistli*.
Maka xchiua para yakaj ma poliui yejuan Cristo ipampa omik,
san ipampa on tlen tikua.
16 Maka xkauili yakaj ma mitstlajtlakolmaka de on tlin tiknemilia kuajli tikchiua,
17 pampa kampa Dios tlamandaroua,
tlen tikua noso tikoni xitlaj* kijtosneki.
Pero on yolchipaualistli niman yolseuilistli,
niman on paktli yejuan tikpiyaj itechkopa Espíritu Santo,
yejua ueyi kijtosneki.
18 Yejuan ijkin kitekipanoua Cristo,
kipaktia Dios niman on tlakamej kitlakaitaj.
19 Yejua ika tej,
ma tikejekokan tikchiuaskej on tlajtlamach* yejuan kuajkij yolseuilistli,
niman kimiskaltiaj oksekimej impan intlaneltok.
20 Maka xpopolo itekiu Dios san ika on tlen tikua.
On melauak ika nochi tlakuajli chipauak para nokuas,
pero yej xkuajli para tikuas on tlen kimintlajkali oksekimej ipan tlajtlakojli.
21 Kuajli tikchiuas tla xtikuas nakatl,
nion tikonis vino,
nion tikchiuas itlaj yejuan ika najantikisas mokniu,
noso yejuan kitlajkalis ipan tlajtlakojli,
noso yejuan kiyemanilis itlaneltok.
22 On tlen tiknemilia,
xkonmati san iuan Dios niman maka inuan oksekimej yejuan kinemiliaj oksekneka.
Sen tlakatl paki tla xometlamati de on tlen kichiua.
23 Pero Dios kitlajtlakolmakas on yejuan itlaj kikua ikan ometlamatilistli,
pampa xkineltoka ika Dios kineki para ma kikua.
Nochi tlen se kichiua ikan ometlamatilistli,
yejua tlajtlakojli.