13
Nochi tlakatl ma tetlakamati intech on tekiuajkej,
pampa xnemij tekiuajkej yejuan Dios xokinkalaktij,
yej nochi kech tekiuajkej nemij Dios okinkalaktij.
2 Yejua ika tej,
on yejuan kixnamiki sen tekiuaj,
kixnamiki on akin Dios okitlalij.
Niman on yejuan ijkon kichiuaj,
kiseliskej castigo ipampa on tlen kichiuaj.
3 On yejuan kichiuaj tlen kuajli xnomojtiaj intech on tekiuajkej,
yej san on yejuan kichiuaj tlen xkuajli.
¿Tikneki tej,
tinemis xikan nemojtijli intech on tekiuajkej?
Tla ijkon kuajli xmouika,
niman on tekiuajkej mitstlakaitaskej.
4 Dios okintlalij on tekiuajkej para mitspaleuiskej.
Pero tla xkuajli timouika,
xkinmakajsi pampa on tekiuajkej melauak tecastigarouaj.
Yejuamej itekitkauan Dios yejuan castigaroskej ken noneki on yejuan kichiua tlen xkuajli.
5 Yejua ika,
noneki para xkintlakamati on tekiuajkej,
xsan para maka tikselis castigo,
yej pampa tikmatstikaj ipan motlamachilis ika noneki para ijki tikchiuas.
6 Yejua ika tej,
no nenkitlaxtlauaj impuestos,
pampa on tekiuajkej kichiuaj intekiu para kitekipanouaj Dios.
7 Nochimej xkinmamakan on tlen noneki nenkinmakaskej.
Xtlaxtlauakan tla nenkiteuikiliaj rentas,
niman xtlaxtlauakan nemoimpuestos.
Xtlakaitakan yejuan kitocaroua nenkitlakaitaskej,
niman xselikan ken ueyixtikaj on yejuan ueyixtikaj.
8 Maka yakaj itlaj xkuikilikan,
yej xpiyakan on tetlajsojtlalistli* yejuan noneki nemopiyaliskej.
Ijkuak sen tlakatl tetlajsojtla,
cumpliroua nochi itlanauatil Moisés.
9 On tlanauatiltin ijkin kijtouaj:
“Maka iuan xmoteka yejuan xmosiuau noso xmoueuentsin,
maka titemiktis,
maka titlachtekis,
maka tikeleuis on tlen teyaxka.”
Pero in tlanauatiltin niman nochi on oksekimej,
san sekan nocumplirouaj ika in tlanauajtijli yejuan ijkin kitoua:
“Xtlajsojtla motlaltikpakchanejkau no ijki ken tejua timotlajsojtla.”
10 Yejuan tetlajsojtla xkitechiuilia on tlen xkuajli.
In kijtosneki ika tla sen tlakatl tetlajsojtla,
yejua kichiua nochi on tlanauatiltin.
11 Noneki para ijkon nenkichiuaskej,
pampa ye nenkimatstokej tlen tiempo tinemij.
Yejua ika tej,
xtlamachilistlachakan niman xmatikan tlinon nochijtikaj aman,
pampa más ye nisiu uajlau Cristo para techkixtis ipan in tlaltikpaktli xken ijkuak kemach otitlaneltokakej.
12 Ye tlamis in tonaltin ijkuak tinemij ipan in tlaltikpaktli,
niman ye nisiu peuas on tonaltin ijkuak tinemiskej iuan Dios.
Yejua ika,
ma tikchiuakan on tlen kuajli niman ma tiktlanikan on tlen xkuajli,
ijkon ken sen soldado kitlani itlauelikniu.
13 Ma titouikakan kuajli ken on yejuan nemij iuan Dios ipan chipaualistli.
Maka ma titlauantinemikan,
niman maka ma tiakan ne iluipan kampa kichiuaj tlen xkuajli.
Maka ma tiauilnemikan niman maka ma tikmakakan totlalnakayoj nochi tlen xkuajli kineki.
No maka ma titouijsokikan inuan oksekimej.
Niman no maka ma titenexikolitakan.
14 Yej oksekneka xmouikakan ken toTEKO JesuCristo nouika,
niman maka xnekikan nenkipaktiskej nemotlalnakayo ika on tlen yejua kineki.