Pablo kijtoua kenijki se ueli notemaktilia itech Dios
12
Yejua ika tej,
notlajsojkaikniuan,
pampa Dios sanoyej* otechtiochiu ikan iteiknelilis*,
nejua sanoyej nemechtlajtlanilia xmotemaktilikan itech Dios ken itlaj uentli yejuan yoltikaj niman yektli ijkon ken yejua kineki.
Tla ijkon nenkichiuaskej,
nenkimauistiliskej Dios ken noneki.
2 Maka sa xmouikakan ken on tlaltikpaktlakamej nouikaj,
yej xkauilikan Dios ma yejua kiyenkuili nemotlamachilis.
Ijkin tej,
nenkimatiskej tlinon Dios kineki:
on tlen kuajli,
on tlen kipaktia niman nochi on tlen chipauak.
3 Dios,
ikan iueyitetlajsojtlalis* yejuan xnechtocarouaya nikselis,
onechtlalij niapóstol.
Yejua ika nemechijlia nochimej nemejuamej,
maka sano nemejuamej xnemilikan ika más nenuejueyixtokej hasta nenteyakapanauiyaj.
Yej ikan nemotlamachilis xtlanemilikan melajki ken noneki nennemiskej.
Ijkon tej,
sano nemejuamej xmixtlalokan cada se ijkon kech nenkipiyaj nemotlaneltok yejuan Dios omechmakak.
4 Totlalnakayo miyekan xexelijtikaj,
niman cada parte kipiya sesekneka tekitl.
5 Aman no ijki,
maski tejuamej timiyekej,
san se tlalnakayotl tiuajtochiuaj iuan Cristo.
Ijkon tej,
ipan sen tlalnakayotl tisesentenemij niman titopaleuiyaj iuan cada se.
6 Cada tisesentemej otikselijkej itech Dios sesekneka tetlayokoliltin yejuan techueliltia on tlen aman ueli tikchiuaj.
Dios otechinmakak ikan iteiknelilis* ken okinek.
Yejua ika ma tikintekitiltikan on tetlayokoliltin yejuan otechmakak.
Tla Dios otechmakak on tetlayokolijli* yejuan techueliltia para tikteijliskej on tiotlajtojli yejuan tikseliaj itech Dios,
noneki para tikteijliskej ken totlaneltok techyekanas.
7 Tla Dios otechmakak on tetlayokolijli* yejuan techueliltia para tikimpaleuiskej oksekimej,
noneki para ma titepaleuikan.
Niman tla Dios techueliltia para titemachtiskej,
noneki para ma titemachtikan.
8 Tla totetlayokolil techueliltia titeyoleuaj,
noneki para ma titeyoleuakan.
Niman tla techueliltia para itlaj tiktetlayokoliaj,
noneki para ma tiktetlayokolikan ken tiueliskej.
Noso tla techueliltia titeyekanaj,
noneki para ma titeyekanakan kuajli.
Niman tla techueliltia tikimpaleuiyaj on yejuan itlaj kimpoloua,
noneki para ma tikimpaleuikan ikan paktli.
On yejuan kineltokaj Cristo noneki kuajli nouikaskej
9 Cada se xmopiyalikan tetlajsojtlalistli* yejuan chipauak.
Xtlauelitakan on tlen xkuajli,
yej xchiuakan on tlen kuajli.
10 Xmotlajsojtlakan ken iknitin,
niman sanoyej xkintlakaitakan oksekimej.
11 Xchiuakan nemotekiu ikan nochi nemoyojlo,
niman maka xtlatsiuikan.
Niman ikan nochi nemoyojlo xtekipanokan toTEKO.
12 Xpakanemikan ipampa nemotlamachalis*.
Ijkuak nentlajyouiskej,
xxikokan.
Maka kaman xkajkauakan ika nenkichiuaj oración.
13 Xkimpaleuikan on yejuan tlaneltokaj itech Dios tla itlaj kimpoloua,
niman kuajli xkinselikan on yejuan xchanejkej.
14 Xtlajtlanilikan Dios ma kintiochiua on yejuan mechtlauelitaj niman mechtlajyouiltiaj.
Maka xtlajtlanilikan ma kintlajyouilti,
yej ma kintiochiua.
15 Xpakikan inuan on yejuan pakij,
niman xchokakan inuan on yejuan chokaj.
16 Maka xpiyakan tlauejli inuan oksekimej.
Maka xmouejueyimatikan,
yej xmouikakan inuan on yejuan xuejueyixtokej.
Maka xmomatikan nentlamatkej*.
17 Tla yakaj mechchiuilia itlaj xkuajli,
maka no ijki xkuepiltikan.
Xchiuakan kanika para nenkichiuaskej nochi tlen kuajli ixpan nochi tlakatl.
18 Xchiuakan kanika hasta kampa nenueliskej kenijki nennemiskej kuajlotika iuan nochi tlakatl.
19 Notlajsojkaikniuan,
maka sano nemejuamej itlaj xtekuepiltikan,
yej xkauilikan Dios ma yejua tetlakuepilti,
pampa on Yektlajkuilojli ijkin kijtoua:
“Nejua nitetlakuepiltis*;
nitetlaxtlauilis ken kitocaroua.
Ijkin kijtoua toTEKO.”
20 Niman on Yektlajkuilojli no ijkin kijtoua:
“Tla motlauelikniu apismiki,
xtlakualti,
niman tla amiki,
xkatliti.
Ijkuak ijkon tikchiuas yejua kipinauismatis on tlen omitschiuilij.”
21 Maka xmokauilikan ma mechtlani on tlen xkuajli.
Yej,
ika on tlen kuajli xtlanikan on tlen xkuajli.