Onkaj temakixtilistli para on hebreos*
11
Aman tej,
ninotlajtoltia:
¿Manin Dios yej yokitlalkauij on yejuan ikoneuan?
¡Melauak tej ika ka,
pampa sano nejua nihebreo!
Niualejtikaj itech Abraham niman no nikisa ipan itribu* toachtojtataj Benjamín.
2 Ijkuak xe onkatka in tlaltikpaktli,
Dios ye kimatstikatka ika on hebreos* iyaxkauan* yeskej.
Dios tej,
xokintlalkauij on yejuan iyaxkauan.
¿Tlen xnenkimatij tlinon kijtoua on Yektlajkuilojli kampa Elías ikan ioración okinteixpanuij on hebreos*?
Ijkin tej,
okijtoj Elías:
3 “NoTEKO,
motiotlajtojkauan yokinmiktijkej,
niman motlaixpanuan* yokinxoxotonijkej.
Aman noselti yoninokau,
niman no kinekij nechmiktiskej.”
4 Pero Dios ijkin okinankilij:
“Yoniknokauilij chikome mil tlakatl yejuan xonotlakuantelketskej ixpan on Baal yejuan xmelauak dios.”
5 Aman tej,
sano ijki.
Hasta aman nokauaj keskimej yejuan Dios ikan iteiknelilis* okintlapejpenij.
6 Niman tla Dios ikan iueyitetlajsojtlalis* yejuan xkintocarouaya kiseliskej okintlapejpenij,
tla ijkon,
xokintlapejpenij pampa itlaj kuajli okichijkej.
Tla Dios kintlapejpeniskia pampa itlaj kuajli kichiuaskiaj,
tla ijkon,
xnejli ikan iueyitetlajsojtlalis* kintlapejpeniskia.
7 ¿Niman aman tej,
tlinon tikitoskej?
Miyekej on hebreos* xokinextijkej on temakixtilistli yejuan sanoyej* kitejtemouayaj,
pero on yejuan Dios okintlapejpenij kemaj okinextijkej.
On oksekimej onoyoltechikajkej
8 ken in Yektlajkuilojli kijtoua:
“Dios okintlamachilistsaku.
Okinmakak imixtololojuan yejuan xtlachaj,
niman iminakasuan yejuan xtlakakij,
niman hasta aman ijki nemij.”
9 David no kijtoua:
Inmiluiuan ma ika nopopolokan niman Dios ma kintlajtlakolmaka,
niman ma kintlajyouilti ipampa on iluimej yejuan kichiuaj.
10 Maka ma tlachakan,
yej ma ixpajpayatikan.
Niman nochipa ma kintepotsopiya on intlamamal.
11 Aman nejua ninotlajtoltia:
¿Tlen ijkuak on hebreos* ouetskej,
Dios para yeika okinkau?
¡Melauak tej ika ka!
Pero pampa xotetlakamatkej,
aman on yejuan xhebreos* yejuamej uelij makisaj.
Ijkon nochiua para on yejuan tekoneuan itech Israel ma nexikolmikikan intech on yejuan xhebreos*.
12 Ijkon tej,
on tlaltikpaktlakamej okiselijkej ueyi tlatiochiualistli pampa on hebreos* xotetlakamatkej,
niman on yejuan xhebreos* okiselijkej temakixtilistli.
Tla ijkon onochiu,
más sanoyej kuajli yes ijkuak nochimej on hebreos* yejuan Dios kinmakixtis nochimej tlaneltokaskej.
Onkaj temakixtilistli para on yejuan xhebreos*
13 Aman tej,
nikpiya tlen nemechijlis nemejuamej yejuan xnenhebreos*.
Dios onechmakak in tekitl para nemechpaleuis niman para nejua ueyi kijtosneki in notekiu.
14 Nikneki para on yejuan hebreos* ken nejua ma noxikokan ipampa on temakixtilistli yejuan on xhebreos* kipiyaj.
Tla on hebreos* noxikoskej,
kas sekimej kinekiskej makisaskej.
15 Ijkuak Dios okintlalkauij on hebreos*,
yejua otlauelseu inuan on yejuan xhebreos* niman okinselij.
Tla ijkon okichiu,
¿tlinon tej,
nochiuas ijkuak oksejpa kinselis on hebreos*?
Sanno ijki ken yoliskiaj on mikatsitsimej.
16 Pampa Abraham achtoj iyaxka* Dios,
no ijki on iuejkakoneuan iyaxkauan* Dios.
Ijkon tej,
tla yakaj kiyaxkatia* Dios on achtoj tlaxkajli yejuan kisa itech on tixtli,
nochi on tixtli no iyaxka* Dios.
Niman ijkuak ineluayo sen kojtli* kaxkatiaj Dios,
nochi on imauan no yejua iyaxka.
17 Aman nokniuan yejuan xnenhebreos*,
in nemechijlia:
on hebreos* kipiyaj on ojtli de temakixtilistli.
Pero Dios okinkuilij sekimej hebreos* niman omechmakak nemejuamej yejuan xnenhebreos*.
Aman tej,
nenkipiyaj sano yejua on temakixtilistli.
18 Pero maka nenmoueyimatiskej niman nenkinemiliskej más nenkuajkualtin xken on hebreos*.
Tla ijki nenkinemiliaj,
san xmatikan ika xnemejuamej nenkimakaj Dios on temakixtilistli yej yejua mechmaka.
19 Manin nemejuamej uelis ijkin nenkijtoskej:
“Kemaj,
pero on hebreos* okinmejkuanijkej para tejuamej otechkalaktijkej ipan on temakixtilistli.”
20 On melauak,
pero yejuamej okinmejkuanijkej pampa xotlaneltokakej,
niman nemejuamej nenkipiyaj on temakixtilistli pampa nentlaneltokaj.
Yejua ika tej,
maka nenmoueyimatiskej,
yej xpiyakan cuidado
21 pampa tla Dios okinmejkuanij on hebreos*,
nemejuamej no uelis mechmejkuanis.
22 Xkita tej,
ken sanoyej teikneliani* Dios.
Pero no xkita ken tlauelej.
Yejua tlauelej intech on yejuan okichichiuilijkej on itemakixtilis,
pero teikneliani nemotech.
Niman yejua mechiknelis tla nennejnemiskej ipan itetlajsojtlalis*.
Pero tla xnennejnemiskej ipan itetlajsojtlalis*,
mechmejkuanis ken okinchiuilij on hebreos*.
23 Niman tla on hebreos* oksejpa peuaj tlaneltokaj,
Dios kinmakas on temakixtilistli,
pampa yejua kipiya poder para oksejpa kinmakas.
24 Xkelnamikikan ika más xouij para Dios kinmakas on hebreos* temakixtilistli yejuan ikoneuan katkaj,
xken para mechmakas nemejuamej xnenhebreos* yejuan xnenikoneuan katkaj.
Dios kimpiyalis teiknelilistli* on yejuan hebreos* niman on xhebreos*
25 Nokniuan,
nikneki para xmatikan in tlen melauak yejuan Dios kiyantikatka,
para maka xmomatikan tlamatkej*.
On tlen melauak sano yejua in:
on hebreos* yonoyoltechikajkaj para xkiseliskej temakixtilistli.
Pero yejuamej noyoltechikajtiaskej san chika nochimej tlaneltokaj on yejuan xhebreos* yejuan Dios kinmakixtis.
26 Ijkuak ijkon nochiuas,
nochimej on hebreos* makisaskej ken kijtoua ipan in Yektlajkuilojli:
Ne kampa itoka Sión ualeuas sen temakixtijketl,
niman kixtis on tlajtlakojli intech on hebreos*.
27 Ijkuak nikintlapojpoluilis intlajtlakoluan,
nochiuas ken onikijtoj ipan on pacto* yejuan nikimpiyalia.
28 On hebreos* onochijkej itlauelikniuan Dios pampa xokiselijkej on kuajli tlajtojli yejuan kiteijlia ken Dios temakixtia.
Yejua ika,
Dios yej nemejuamej omechselij yejuan xnenhebreos*.
Pero Dios okintlapejpenij on hebreos*.
Yejua ika,
sanken* kintlajsojtla* impampa inachtojtajuan.
29 Tlen Dios kinmaka on yejuan kintlapejpenia,
xok kaman kinkuilia.
30 Nemejuamej yejuan xnenhebreos* achtoj xonenkitlakamatkej Dios,
pero aman yejua mechiknelia pampa on hebreos* xok okitlakamatkej.
31 Nochi tej,
sano ijki.
On hebreos* xok kitlakamatij Dios.
Pero on nochiua san para Dios ma kimpiyali teiknelilistli* ijki ken kipiya nemouan.
32 Dios okitsaku nochi tlakatl pampa xokitlamatkej*,
para ijkon ouel okinmiknelij nochimej.
33 ¡Sanoyej ouijtikaj* tikajsikamatiskej on iriquezas Dios,
de on itlamatkilis* niman ikajsikamatilis!
Xakaj ueli kiteijlia tline Dios kichiua itlaj,
nion xakaj kajsikamati kenijki kichiua on itekiu.
34 On Yektlajkuilojli ijkin kijtoua:
“¿Akinon kimati on tlen toTEKO Dios kinemilia?
Noso,
¿kanon nemi on yejuan ueli kitlakanonotsa toTEKO Dios?
35 ¿Akinon ueli achtopa itlaj kimaka toTEKO Dios,
para kemaj kej yejua no itlaj ika kikuepilia?”
36 Xakaj ueli,
pampa nochi tlajtlamach* itech Dios ualejtikaj,
niman nochi in tlajtlamach* onkaj san yejua ipampa,
niman para iueyilis yejua.
¡Ma Dios kiseli ueyilistli para nochipa!
Ma ijki nochiua.