10
Nokniuan,
ikan nochi noyojlo nikneki niman nikchiua oración para on hebreos* ma kipiyakan temakixtilistli.
2 Nejua impampa nitlajtoua ika yejuamej sanoyej* kinekij kitekipanoskej Dios pero yejuamej xe ixtlajtlapouij.
Yejuamej xkajsikamatij kenijki kuajli nouikaskej itech Dios.
3 Yejuamej xkajsikamantij kenijki Dios kinteneua on tlakamej ika nochi intlajtlakoluan yokintlapojpoluij.
Yej kichiuaj tlen yejuamej kinemiliaj kimpaleuis para Dios kinselia ken yolchipajkej.
Yejua ika,
xnouikaj ijkon ken Dios tlanauatia para kinyolchipauas.
4 Cristo yejua otlan cumpliroua nochi on itlanauatiluan Moisés,
niman ijkon okichiu para nochimej on yejuan kineltokaj,
Dios kinteneua ika nochi intlajtlakoluan yokintlapojpoluij.
5 Moisés okijkuiloj intechkopa on tlakamej yejuan kinekij para Dios ma kinteneua ika nochi intlajtlakoluan yokintlapojpoluij pampa kitlakamatij on tlanauatijli.
Ijkin okijkuiloj:
“On yejuan intechkopa on tlanauatijli kinekis kipiyas nemilistli ika onkaj kitlakamatis nochi on tlanauatijli.”
6 Pero Dios uelis kinselis on tlakamej ken yolchipajkej itechkopa on intlaneltok yejuan kipiyaj itech Cristo.
Ijkin kijtoua:
“Maka mojtikopa xkijto:
¿akinon tlejkos ne iluikak?”
In kijtosneki ika tlejkos para kuajtemoltis Cristo.
7 Niman no maka xkijto:
¿Akinon ontemos ijtik in tlajli kampa nemij on mikatsitsimej?
In kijtosneki ontemos para kixtis Cristo intsajlan on mikatsitsimej.
8 ¿Tlinon tej,
kijtoua iYektlajkuilol Dios?
“Itlajtol Dios nisiu motech onkaj.
Tikpiya ipan mokamak niman ipan moyojlo.”
Niman in tlajtojli sano yejua on tlajtojli yejuan tikimijliaj on tlakamej ika ijkin noneki kineltokaskej.
9 No tikteijliaj:
“Tla ikan mokamak tikijtos ika Jesús yejua moTEKO,
niman tla ipan moyojlo tikneltokas ika Dios okiyoliuitij* niman okuiteu ipan itlalkon,
tejua timakisas.”
10 Ijkon nochiuas pampa ijkuak sen tlakatl ikan iyojlo tlaneltoka,
Dios kijtoua ika nochi itlajtlakoluan kintlapojpoluiya.
Niman ijkuak ikan ikamak teixpan kijtoua ika kineltoka Cristo,
yejua makisa.
11 In Yektlajkuilojli ijkin kijtoua:
“Nochi tlakatl yejuan kineltoka,
xkaman kipijpinatiskej ipampa itlaneltok.”
12 Ixpan Dios,
on yejuan xhebreos* xok okseknekamej intech on hebreos*.
San se inTEKO kipiyaj niman yejua nochimej sano ijki kinmaka miyek tlatiochiualistli yejuan itech noueyikatsajtsiliaj.
13 Ijkin kijtoua on Yektlajkuilojli:
“Nochimej yejuan kitlajtlaniliaj toTEKO para ma kintlapojpolui makisaskej.”
14 Pero ¿kenijki tej,
uelis kitlajtlaniliskej ma kintlapojpolui tla xe kineltokaj?
¿Niman kenijki uelis kineltokaskej tla xkaman kakij de yejua?
¿Niman kenijki uelis kakiskej de yejua tla xnemij yejuan temachtiaj?
15 ¿Niman kenijki kiteijliskej de yejua tla xnemi yejuan konmintitlanis?
In Yektlajkuilojli ijkin kijtoua:
“Sanoyej kualtsin ijkuak yejkoj on yejuan kuajkij on temachtijli de yolseuilistli niman kiteijliaj on kuajli tlajtojli yejuan kiteijlia ken Dios temakixtia.”
16 Pero xnochimej okiselijkej on kuajli tlajtojli yejuan kiteijlia ken Dios temakixtia.
Ken okijtoj Isaías:
“NoTEKO,
¿akinon yokineltokak on temachtijli yejuan tikteijliaj?”
17 Yejua ika tej,
se ueli tlaneltoka ijkuak kaki on temachtijli niman uajlau on temachtijli ijkuak yakaj techmachtia itechkopa Cristo.
18 Pero aman ninotlajtoltia:
¿Tlen on hebreos* xokakkej in temachtijli?
¡Melauak yejuamej okakkej!
In Yektlajkuilojli ijkin kijtoua:
On tlajtojli yokakistik imanian nochi in tlaltikpaktli.
On tlajtojli yoajsik hasta ne kampa sa ika nochi ixojxomolco in tlaltikpaktli.
19 Pero oksejpa ninotlajtoltia:
¿tlen manin on hebreos* yej xokajsikamatkej?
Moisés yejua achtoj in okijtoj:
Nejua nikchiuas para xnexikolmikan intech on tlakamej
yejuan chantij ipan okseki países yejuan nenkijtouaj ika xkipiyaj iminpaís.
Niman nikchiuas para xkualanikan intechkopa on tlakamej yejuan xitlaj* kajsikamatij.
20 Kemaj Isaías xonomojtij para okijtoj on tlen Dios okimachistij:
On yejuan xnechtejtemouayaj,
onechnextijkej;
niman onikinnotitij on yejuan xnoka tlajtlaniyaj.
21 Niman itechkopa on país de Israel,
Isaías okijtoj:
“Nochi tonajli nemechchixtikaj para nemechselis ikan paktli
nemejuamej tlakamej yejuan xnentetlakamatkej niman nenteixnamikkej.”