Dios okintlapejpenij on yejuan hebreos*
9
Nejua nikijtoua tlen melauak niman xnistlakati pampa nikneltoka Cristo.
On Espíritu Santo kiyekananotlamachilis niman ijkon notlamachilis nechmachistia ika nikijtoua on tlen melauak.
2 Nikpiya sanoyej* ueyi ajmantli niman nochipa ninoyolkokoua.
3 Niman sano nejua niknekiskia nikpoloskia notemakixtilis tla yejua ika ueliskia kinmakaskia temakixtilistli on yejuan hebreos* ken nejua.
4 Yejuamej ualejtokej itech Israel,
niman Dios okinselij ken ikoneuan.
Intsajlan onen Dios ikan iueyilis,
niman okinmakak on pactos* niman itlanauatiluan.
Yejuamej kipiyaj on tlanauatijli yejuan kintitia kenijki noneki kimauistiliskej Dios niman no okiselijkej ipromesas.
5 Yejuamej ualejtokej intech on toachtojtajuan.
Niman Cristo ikan itlalnakayo no ualejtikaj intech on toachtojtajuan.
Niman Cristo,
sano yejua Dios,
yejuan nochi kimandaroua.
Ma yejua kiseli yekteneualistli para nochipa.
Ma ijki nochiua.
6 Dios okijtoj ika kinmakixtis ikoneuan.
Niman tla on hebreos* xnochimej kipiyaj temakixtilistli,
xkijtosneki ika Dios xocumpliroj on tlen okijtoj.
Yej kuajli xmatikan ika xnochimej yejuan ualejtokej itech Israel,
Dios kimpoua ken iuejkakoneuan.
7 No ijki tej,
xnochimej yejuan ualejtokej itech Abraham nopouaj ken iuejkakoneuan,
pampa Dios ijkin okijlijka Abraham:
“Mouejkakoneuan san kisaskej itech Isaac.”
8 Ijkon tej,
tikitaj ika xnochimej iuejkakoneuan Abraham tekoneuan itech Dios,
yej san tekoneuan itech Isaac yejuan tlakatij ijkon ken Dios okiprometerouilij Abraham.
San yejuamej nopouaj ken melauak ualejtokej itech Abraham.
9 On tlen Dios okiprometerouilij Abraham sano yejua in:
“Ijkuak yejkos on kuajli tonajli,
niuajlas,
niman Sara kitlakatilis sen konetsintli.”
10 Niman in xsan ika nochi.
On kouatsitsimej* ikoneuan Rebeca san se tajtli kipiyayaj yejuan toachtojtataj itoka Isaac.
11-13 Ijkuak on iknijtin xe tlakatiyaj niman maski xe kichiuayaj tlen kuajli noso tlen xkuajli,
Dios ijkin okijlij Rebeca:
“On yejuan achtoj nemis,
kitekichiuilis on yejuan sakin* nemis.”
Yejua on tlajtojli kuajli iuan nouika on Yektlajkuilojli yejuan kijtoua:
“Jacob oniktlajsojtlak*,
pero Esaú oniktlauelitak.”
Ijkon tej,
Dios okipanextij ika kimelaua kitlapejpenis on yejuan yejua kinekis.
Yejua ika tikitaj ika Dios xokichiuilij cuenta ken yejuamej onouikakej,
yej okinots on yejuan okinek kinotsas.
14 ¿Tlinon,
tej,
tikijtoskej?
¿Tikijtoskej ika Dios xyolmelajki?
¡Melauak tej,
ika ka!
15 Dios okijlij Moisés:
“Nikiknelis on yejuan niknekis nikiknelis,
niman niktlajsojtlas on yejuan niknekis niktlajsojtlas.”
16 Yejua ika tej,
itetlajsojtlalis* Dios xakaj kiselia pampa se ijki kineki noso pampa se itlaj kichiua,
yej se kiselia ipampa iteiknelilis* Dios.
17 Ipan in Yektlajkuilojli Dios ijkin okijlij on rey de Egipto:
“Nejua onimitstlalij tirey,
san para niuelis nikpantlantis nopoder itechkopa on milagros* yejuan mopan nikchiuas.
Niman ijkin nochimej kimatiskej akin nejua imanian nochi in tlaltikpaktli.”
18 Tla ijkon tej,
Dios kiknelia on yejuan kineki kiknelis,
niman kiyoltechikaua on yejuan kineki kiyoltechikauas.
19 Pero yakaj uelis ijkin nechijlis:
“Tla ijkon,
¿tline* kitlajtlakoltia Dios on tlakatl tla xakaj uelis kixnamikis on tlen Dios kineki kichiuas?
20 Pero tejuamej yejuan san titlakamej,
¿akin tejuamej para iuan Dios titokamatlaniskej?
¿Uelis on kontli yejuan tlachijchijtli ikan sokitl kijlis on yejuan okichijchiu,
“¿Tline ijkin otinechchijchiu?”
21 On tlakatl yejuan kichijchiua on kontli yejua kitocaroua kijtos tlinon kichijchiuas ika on sokitl.
Sano ika on sokitl yejua kitlapejnenia para kichijchiua sen kontli yejuan ipan kamanaj xochitl niman okse para ipan tlajsoltemalo.
22 Dios kitocaroua kiteititis itlaluel niman ipoder.
Pero no kitocaroua kinmijyouis on yejuan kintocarouaya kiseliskej castigo.
23 Ijkin okichiu para okiteititij ken sanoyej ueyi on iueyilis yejuan otechmakak tejuamej yejuan otechiknelij.
Ijkon otechmakak tejuamej yejuan otechachtojtlalij para tikseliskej on ueyilistli.
24 Yejua ika Dios otechnots.
Sekimej tejuamej tikisaj intech on hebreos* niman sekimej intech on yejuan xhebreos*.
25 Ijkin kijtoua ipan on amamoxtli* Oseas:
On tlakamej yejuan xnoyaxkauan* katkaj nikinnoyaxkatis.
Niman on yejuan xnikintlajsojtlaya nikintlajsojtlas*.
26 Niman sano ompa kampa okinmijlijkaj:
“Nemejuamej xnennoyaxkauan”,
ompa kimijliskej ika yejuamej tekoneuan itech Dios yejuan nochipa nemi.
27 Pero inka on hebreos* ijkin okijtoj Isaías:
“Maski on yejuan ualejtokej itech on tajtli Israel,
sanoyej miyekej ken itlaj xajli yejuan onkaj ijtik mar,
san keskimej makisaskej,
28 pampa toTEKO san xuejkajtika kincastigaros.”
29 No ijki tej,
ye uejkaui okijtoj Isaías:
Tla toTEKO yejuan nochi ueli kichiua xkinkauaskia nemiskiaj toachtojtajuan,
titokauaskiaj ken on chanejkej de on ueyikalpan Sodoma niman Gomorra.
On hebreos* xkiseliaj on kuajli tlajtojli
30 ¿Kenijki tej,
tikijtoskej?
Tikijtoskej ika aman Dios yokijtoj ika nochi intlajtlakoluan on yejuan xhebreos* yokintlapojpoluij pampa otlaneltokakej,
maski yejuamej xkitejtemouayaj para Dios ijkon kinselis.
31 On hebreos* yej kitejtemouayaj itechkopa on tlanauatijli para Dios kiteneuas ika nochi imintlajtlakoluan yokintlapojpoluij,
pero yejuamej xouelkej okitlakamatkej nochi on tlanauatiltin.
32 ¿Tline xokinextijkej?
Xokinextijkej pampa xokitejtemojkej itechkopa on tlaneltoktli,
yej okitejtemojkej itechkopa on tetlakamatilistli itech on tlanauatijli.
Yejua ika,
onantikiskej ipampa Cristo yejuan ken itlaj tetl yejuan tetlajtlakali.
33 Ijki onochiu ken tlajkuilolnestikaj ipan in Yektlajkuilojli:
Xkita,
ne kampa itoka Sión,
niktlalia sen tlakatl ken itlaj tetl yejuan ika nantikisalo,
niman ken itlaj tepetlatl yejuan tetlajkali.
Pero on yejuan kineltokas xkaman nopijpinatis.